Mũkristiano Agĩrĩirũo Gũkorũo Ahaana Atĩa?—Mawoni ma Bibilia nĩ Marĩkũ?

Andũ aingĩ thĩinĩ wa thĩ ũmũthĩ maugaga atĩ o nĩ Akristiano, no nĩ mekaga andũ arĩa angĩ maũndũ moru. Amwe makoragwo na mwĩyendo, ti ehokeku, na matirĩ tha. Angĩ nao matikoragwo marĩ ehokeku harĩ mũndũ ũrĩa mahikanĩtie nake. Mĩtugo yao ĩtũmaga andũ amwe meyũrie ũũ: ‘Hihi Mũkristiano agĩrĩirũo gũkorũo ahaana atĩa?’

Mũkristiano nũũ?

Nĩ ũndũ mũhũthũ mũndũ kuuga atĩ we nĩ Mũkristiano. No kuuga ũguo ti kũiganu. Kũringana na Bibilia, Mũkristiano nĩ mũndũ ũrĩa ũrũmagĩrĩra Jesu Kristo. (Atũmwo 11:26) Jesu we mwene aaugire ũũ: “Mũngĩtũũra kiugo-inĩ gĩakwa, mũgũkorũo mũrĩ arutwo [kana arũmĩrĩri] akwa kũna.” (Johana 8:31) Ma nĩ atĩ gũtirĩ mũndũ ũngĩhota gwathĩkĩra ciugo cia Jesu na njĩra nginyanĩru. Ĩndĩ Mũkristiano erutanagĩria kũrũmĩrĩra morutani ma Jesu, na hĩndĩ ciothe akonania atĩ nĩ eekaga ũguo kũgerera mĩthiĩre yake. Reke tuone ngerekano imwe.

Akristiano nĩ monanagia wendo

Ũrĩa Jesu aaugire: “Ndĩramũhe rĩathani rĩerũ, atĩ mwendanage; o ta ũrĩa ndĩmwendete inyuĩ, o na inyuĩ endanagai inyuĩ ene. Nĩ ũndũ ũcio andũ othe nĩ marĩmenyaga atĩ mũrĩ arutwo akwa—mwakorũo na wendo gatagatĩ-inĩ kanyu.”—Johana 13:34, 35.

Ũrĩa Jesu eekaga: Jesu oonagia andũ othe wendo gũtekũmakania kana nĩ itonga kana nĩ athĩni, na gũtekũmakania kũrĩa maumĩte. Nĩ aahonirie arĩa maarĩ arwaru, akĩhũnia arĩa maarĩ ahũtu, na nginya akĩruta muoyo wake nĩ ũndũ wa andũ arĩa angĩ.—Mathayo 14:14-21; 20:28.

Ũrĩa Akristiano mekaga: Akristiano monanagia wendo na njĩra ya kuohanĩra, kwaga mũthutũkanio, na gũkorũo marĩ ataana. Nĩ mateithagia andũ arĩa marabatara ũteithio, na nĩ makoragwo mehaarĩirie kwĩima nĩguo mateithie andũ arĩa angĩ.—1 Johana 3:16.

Akristiano maragia ma

Ũrĩa Jesu aaugire: “Nĩ niĩ . . . ũhoro ũrĩa wa ma.”—Johana 14:6.

Ũrĩa Jesu eekaga: Jesu aarĩ mwĩhokeku maũndũ-inĩ marĩa aaragia na marĩa eekaga. Ndaaumire akungĩtie andũ wara kana akahĩngĩca andũ kũgerera mĩario yake. Nĩ ooĩkaine atĩ aarĩ mwĩhokeku, na aaragia ma o na angĩkorũo gwĩka ũguo nĩ kũngĩamũingĩririe ũgwati-inĩ.—Mathayo 22:16; 26:63-67.

Ũrĩa Akristiano mekaga: Akristiano matiheenanagia. Marutaga wĩra na wĩhokeku kũringana na ũrĩa marĩkanĩire na ũrĩa ũmaandĩkĩte, matiiyaga, na nĩ marĩhaga magooti. (Aroma 13:5-7; Aefeso 4:28) Matikungagia andũ wara, matiiyagĩra igeranio, na matiheanaga ũhoro wa maheeni magĩcaria wĩra kana makĩiyũria fomu ingĩ ta icio.—Ahibirania 13:18.

Akristiano nĩ meciragia andũ arĩa angĩ

Ũrĩa Jesu aaugire: “Ũkai kũrĩ niĩ, inyuothe arĩa mũnogete na mũtitikĩte mĩrigo, na nĩ ngũmũcanjamũra. Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũgũcanjamũrũo. Tondũ icoki rĩakwa nĩ inyoroku, na mũrigo wakwa nĩ mũhũthũ.”—Mathayo 11:28-30.

Ũrĩa Jesu eekaga: Jesu nĩ oonanagia ũtugi na nĩ eendaga andũ mathiĩ kũrĩ we mategwĩtigĩra. Nĩ aamũkagĩra ciana wega, akomĩrĩria arĩa marĩ na mĩtangĩko, na nĩ aaheete andũ gĩtĩo.—Mariko 10:13-15; Luka 9:11.

Ũrĩa Akristiano mekaga: Akristiano maragĩria andũ arĩa angĩ na njĩra njega, matiaragĩria andũ ũũru na matirumanaga. (Aefeso 4:29, 31, 32) Nĩ meciragia andũ arĩa angĩ na nĩ methaga mĩeke ya kũmateithia.—Agalatia 6:10.

Akristiano nĩ makoragwo marĩ ehokeku kĩhiko-inĩ

Ũrĩa Jesu aaugire: “Arĩa Ngai anyitithanĩtie, mũndũ ndakanamatigithanie.”—Mariko 10:9.

Ũrĩa Jesu eekaga: O na gũtuĩka Jesu ndaahikanĩtie, eerire arĩa marĩ kĩhiko-inĩ makoragwo marĩ ehokeku harĩ arĩa mahikanĩtie nao. (Mathayo 19:9) Nĩ eerire andũ metheme ciĩko iria ingĩtũma kĩhiko kĩharagane.—Mathayo 5:28.

Ũrĩa Akristiano mekaga: Akristiano nĩ methemaga ciĩko iria ciagagĩra kĩhiko gĩtĩo. (Ahibirania 13:4) Arĩa marĩ kĩhiko-inĩ nĩ matĩaga arĩa mahikanĩtie nao na makamonia wendo.—Aefeso 5:28, 33.