Mohiki ma Aira a Jehova Makoragwo Mahaana Atĩa?
Mohiki ma Aira a Jehova kaingĩ matikoragwo na maũndũ manene, no mekagwo na njĩra ya gĩtĩo na nĩ gũkoragwo na mahunjio makuhĩ mararĩrĩria Bibilia. Thutha wa andũ arĩa marahikania kũnyitithanio, no mathuure gũthiĩ handũ na andũ a famĩlĩ na arata, hihi kũrĩanĩra.a Jesu nĩ aathiire iruga-inĩ ta rĩu rĩa ũhiki taũni-inĩ ya Kana kĩambĩrĩria-inĩ kĩa ũtungata wake.—Johana 2:1-11.
Nĩ maũndũ marĩkũ mekagwo ũhiki-inĩ?
Mahunjio marĩa marutagwo hĩndĩ ya ũhiki nĩmo ma bata mũno ũhiki-inĩ, na moyaga ndagĩka 30 na marutagwo nĩ Mũira wa Jehova. Mahunjio macio matĩtĩrithagia ũrĩa Bibilia ĩngĩteithia acio marahikania gũkorũo na kĩhiko gĩa gũtũũra, kĩrĩ na wendo na gĩkeno.—Aefeso 5:33.
Mabũrũri-inĩ maingĩ, thirikari nĩ ĩtĩkagĩria Aira a Jehova maigana ũna makorũo makĩnyitithania mohiki kĩwatho. Kwoguo thutha wa mahunjio, andũ arĩa marahikania nĩ maugaga mĩĩhĩtwa. Mangĩenda no mekĩrane mbete. Thutha ũcio, makaanĩrĩrũo atĩ rĩu nĩ mũthuri na mũtumia.
Mabũrũri-inĩ mangĩ namo, watho uugaga atĩ andũ arĩa marahikania mabatiĩ gũthiĩ kũnyitithanĩrio wabici-inĩ ya thirikari. Andũ acio marahikania mambaga gwĩka ũguo, na kahinda kanini thutha ũcio magathiĩ kũrutĩrũo mahunjio ma ũhiki. Angĩkorũo matikuugĩte mĩĩhĩtwa marĩ wabici-inĩ ya thirikari, mekaga ũguo thutha wa mahunjio. Angĩkorũo nĩ mekuugĩte, no mathuure gũcokera rĩngĩ, no mahũthĩre ciugo ĩronania atĩ nĩ mekuugĩte mĩĩhĩtwa mbere ĩyo. Mahunjio marĩkagĩrĩra na kũhoya Ngai arathime kĩhiko kĩu kĩerũ.
Mohiki ma Aira a Jehova mekagĩrũo kũ?
Aira a Jehova aingĩ mathuuraga gwĩkĩra ũhiki wao Nyũmba-inĩ ya Ũthamaki kũngĩhoteka.b Arĩa marahikania mangĩbanga gũkorũo na ndĩa thutha ũcio, mathuuraga kũndũ kũngĩ.
Nĩa magĩrĩirũo gũthiĩ?
Angĩkorũo ũhiki ũrekĩrũo Nyũmba-inĩ ya Ũthamaki, kaingĩ mũndũ o wothe no oke, akorũo arĩ Mũira wa Jehova kana ti Mũira wa Jehova. Angĩkorũo arĩa marahikania nĩ megũkorũo na ndĩa, nĩo mathuuraga nũũ mekũnyita ũgeni.
Mũndũ agĩrĩirũo kwĩhumba atĩa?
O na gũtuĩka Aira a Jehova matiigĩte watho wĩgiĩ nguo iria mũndũ abatiĩ kwĩhumba agĩũka ũhiki Nyũmba-inĩ ya Ũthamaki, nĩ merutanagĩria mũno kũrũmĩrĩra motaaro ma Bibilia megiĩ kwĩhumba na njĩra ĩtakĩrĩtie njano na ĩrĩ na gĩtĩo. Nĩ makenaga rĩrĩa andũ arĩa angĩ moka mehumbĩte na njĩra ta ĩyo. (1 Timotheo 2:9) Angĩkorũo nĩ gũgũkorũo na ndĩa, o na kuo mehumbaga na njĩra o ta ĩyo.
No ũtware iheo?
Bibilia ĩtwĩraga tũkorũo tũrĩ ataana. (Thaburi 37:21) Aira a Jehova nĩ makenaga kũheana na kwamũkĩra iheo hĩndĩ ya ũhiki. (Luka 6:38) O na kũrĩ ũguo, nĩ methemaga gwĩtia iheo kana kũgweta marĩĩtwa ma andũ arĩa maheana iheo mbere ya andũ. (Mathayo 6:3, 4; 2 Akorintho 9:7; 1 Petero 3:8) Gwĩka ũguo nĩ mũgarũ na ũrĩa Bibilia yugaga, na ningĩ no gũtũme arĩa mokĩte ũhiki maigue mataiganĩire.
Hihi andũ nĩ maringithanagia kana makoya ngirathi na igũrũ?
Aca. Aira a Jehova matiringithanagia kana makoya ngirathi na igũrũ tondũ mũtugo ũcio uumanĩte na ndini cia maheeni.c Aira a Jehova nĩ mendagĩra arĩa marahikania kĩhiko kĩega, no mekaga ũguo na njĩra ingĩ.
Hihi arĩa marahikania nĩ maikagĩrio mũcere kana indo ingĩ?
Aca. Kũndũ kũmwe andũ nĩ maikagĩria andũ arĩa marahikania mũcere kana indo ingĩ ta icio. Metĩkĩtie atĩ gwĩka ũguo nĩ gũkũrehera arĩa marahikania mũnyaka, gĩkeno, na ũtũũro mũraihu. No Aira a Jehova nĩ methemaga maũndũ mahutanĩtie na ũgo na ũragũri. Aira a Jehova matiendagĩra arĩa angĩ mũnyaka, tondũ ũndũ ũcio nĩ mũgarũ na ũrĩa Bibilia yugaga.—Isaia 65:11.
Hihi andũ nĩ marĩaga na makanyua?
Gũtirĩagwo kana gũkanyuo rĩrĩa andũ marekĩra ũhiki Nyũmba-inĩ ya Ũthamaki. Arĩa marahikania nĩ mathuuraga gũthiĩ kũndũ kũngĩ thutha ũcio, na no gũkorũo na irio kana kĩndũ gĩa kũnyua. (Kohelethu 9:7) Angĩkorũo no mende gũkorũo na njohi, nĩ matigagĩrĩra atĩ nĩ ĩkũnyuo na gĩthimi na atĩ arĩa mekũnyua no arĩa tu makinyĩtie mĩaka ĩrĩa ĩtĩkĩrĩtio nĩ thirikari.—Luka 21:34; Aroma 13:1, 13.
Hihi andũ nĩ mainaga na magathũngũtha?
Angĩkorũo arĩa marahikania nĩ megũkorũo na ndĩa, no mathuure gũkorũo na nyĩmbo na andũ mathũngũthe. (Kohelethu 3:4) No mathuure nyĩmbo iria mendete kana iratwarana na ũndũire wao, no nĩ magĩrĩirũo gũtigĩrĩra mathuura nyĩmbo njega na irakenia arĩa manyitĩtwo ũgeni. Hĩndĩ ĩrĩa ũhiki ũrekĩrũo Nyũmba-inĩ ya Ũthamaki, kaingĩ nĩ kũinagwo nyĩmbo ciĩhocetie Maandĩko-inĩ.
Hihi Aira a Jehova nĩ makũngũyagĩra mũthenya wa kũririkana rĩrĩa maahikanirie?
Tondũ hatirĩ handũ thĩinĩ wa Bibilia honanĩtie nĩ wega kana ti wega gũkũngũĩra mũthenya wa kũririkana rĩrĩa andũ maahikanirie, Aira a Jehova nĩo metuagĩra kana nĩ megũkũngũĩra mũthenya ũcio kana matigũkũngũĩra. Mangĩthuura gũkũngũĩra, no meke ũguo marĩ o erĩ, kana manyite ũgeni arata na andũ a famĩlĩ.
a Mĩtugo na maũndũ marĩa mekagwo hĩndĩ ya ũhiki, na watho wa thirikari wĩgiĩ mohiki no makorũo marĩ ngũrani kũringana na kũrĩa ũikaraga.
b Ũrĩa ũgũkorũo na mahunjio ndarĩhagwo, na mũndũ ndarĩhagio gwĩkĩra ũhiki Nyũmba-inĩ ya Ũthamaki.
c Nĩguo wone kĩhumo kĩa mũtugo wa kũringithania kana kuoya ngirathi na igũrũ, rora “Maswali Kutoka kwa Wasomaji” thĩinĩ wa ngathĩti ya Mnara wa Mlinzi wa Februarĩ 15, 2007.