Shaitani Aikaraga Kũ?

Macokio ma Bibilia

Shaitani aikaraga kũndũ tũtangĩona na maitho, tondũ akoragwo arĩ na mwĩrĩ wa roho. No ũguo ti kuuga atĩ aikaraga icua-inĩ, kũndũ andũ arĩa aganu maherithagĩrio, ta ũrĩa mũcoro ũrĩa ũrĩ haha ũronania.

“Mbaara Igũrũ”

Mbere-inĩ, Shaitani ũrĩa Mũcukani nĩ aarĩ na wĩyathi wa gũthiĩ kũrĩa guothe ciũmbe cia roho ciikaraga, o na nginyagia gũthiaga mbere ya Ngai hamwe na araika arĩa ehokeku. (Ayubu 1:6) No Bibilia nĩ yaarathĩte atĩ nĩ kũngĩoimĩrire “mbaara Igũrũ” na moimĩrĩro ma mbaara ĩyo mangĩarĩ Shaitani ‘kũharũrũkio o thĩ.’ (Kũguũrĩrio 12:7-9) Kũhũthĩra Bibilia gũtara mahinda, o hamwe na kũrora maũndũ manene marĩa mekĩkĩte nĩ kuonanagia atĩ mbaara ĩyo nĩ yarũirũo. Ũmũthĩ ũyũ Shaitani akoragwo gũkũ thĩ atarĩ na wĩyathi wa gũthiĩ kũrĩa igũrũ.

Hihi ũguo nĩ kuuga atĩ Shaitani nĩ arĩ handũ aikaraga gũkũ thĩ? Kwa ngerekano, itũũra rĩa tene rĩa Perigamo rĩeragwo atĩ nĩ kuo “gwĩ gĩtĩ gĩa Shaitani kĩa ũnene . . . o kũu Shaitani atũũraga.” (Kũguũrĩrio 2:13) Ciugo icio no mũhaka ikorũo cionanagia ũrĩa ũthathaiya wa Shaitani watheremete itũũra-inĩ rĩu. Bibilia yonanagia atĩ Shaitani nĩwe wathaga “mothamaki mothe ma thĩ,” kwoguo ndaikaraga handũ hamwe thĩinĩ wa thĩ, ĩndĩ aikaraga ũthiũ-inĩ wa thĩ.​—Luka 4:​5, 6.