Bibilia Yugaga Atĩa Ũhoro-inĩ Wĩgiĩ Njohi? Hihi nĩ Mehia Kũnyua?
Macokio ma Bibilia
Ti mehia kũnyua njohi na gĩthimi. Bibilia yonanagia atĩ ndibei nĩ kĩheo kuuma kũrĩ Ngai kĩrĩa kĩngĩtũma ũtũũro ũgĩe na gĩkeno makĩria. (Thaburi 104:14, 15; Kohelethu 3:13; 9:7) Ningĩ Bibilia nĩ yonanagia atĩ ndibei no ĩhũthĩke ĩrĩ ta ndawa.—1 Timotheo 5:23.
Jesu nĩ aanyuaga ndibei rĩrĩa aarĩ gũkũ thĩ. (Mathayo 26:29; Luka 7:34) Kĩama kĩmwe kĩũĩkaine mũno kĩa Jesu, nĩ kĩrĩa aagarũrire maĩ magĩtuĩka ndibei ĩrĩ ta kĩheo iruga-inĩ rĩa ũhiki.—Johana 2:1-10.
Mogwati ma gũkĩria gĩthimi
O na gũtuĩka Bibilia nĩ yonanagia mawega ma ndibei, nĩ ĩmenagĩrĩria gũkĩria gĩthimi na kũrĩo. Kwoguo, Mũkristiano angĩthuura kũnyua njohi, agĩrĩirũo kũnyua na gĩthimi. (1 Timotheo 3:8; Tito 2:2, 3) Bibilia nĩ ĩheanaga itũmi cigana ũna cia gwĩthema kũnyua gũkĩria gĩthimi.
Nĩ gũthũkagia ũhoti wa gwĩciria na gũtua matua. (Thimo 23:29-35) Mũndũ mũrĩĩu ndangĩhota kũhingia watho wa Bibilia ũrĩa ugaga ũũ: “Mũrute mĩĩrĩ yanyu ĩrĩ igongona rĩrĩ muoyo, itheru na rĩretĩkĩrĩka nĩ Ngai, ũguo nĩ kuuga mũrutage ũtungata mũtheru mũkĩhũthĩra ũhoti wanyu wa gwĩciria.”—Aroma 12:1.
Gũkĩria gĩthimi nĩ gũtũmaga mũndũ aremwo kwĩgirĩrĩria na akaaga “ũkuũku wa ngoro.”—Hosea 4:11; Aefeso 5:18.
No gũtũme mũndũ atuĩke mũthĩni na agĩe na mathĩna manene ma mwĩrĩ.—Thimo 23:21, 31, 32.
Kũnyua gũkĩria gĩthimi na kũrĩo gũtikenagia Ngai.—Thimo 23:20; Agalatia 5:19-21.
Nĩ rĩ mũndũ angĩrũo atĩ nĩ akĩria gĩthimi?
Mũndũ no erũo nĩ akĩrĩtie gĩthimi angĩkorũo nĩ aratũma we kana andũ angĩ makorũo marĩ ũgwati-inĩ. Kũringana na Bibilia, mũndũ mũrĩĩu ndamenyekega nĩ ũndũ wa kwaga kwĩigua, no amenyekaga nĩ ũndũ wa maũndũ ta gũtukanĩrũo, gũtũgũũga, kũgĩa ngarari, kana kũremwo nĩ kwaria wega. (Ayubu 12:25; Thaburi 107:27; Thimo 23:29, 30, 33) Nginya arĩa methemaga kũrĩo no ‘maritũhĩrũo nĩ kũnyua gũkĩria gĩthimi’ na magĩe na moimĩrĩro moru ma gwĩka ũguo.—Luka 21:34, 35.
Gwĩthema njohi biũ
Ningĩ Bibilia nĩ yonanagia hĩndĩ ĩrĩa Akristiano magĩrĩirũo gwĩthema njohi biũ:
Angĩkorũo nĩ ĩkũhĩngithia arĩa angĩ.—Aroma 14:21.
Angĩkorũo kũnyua njohi nĩ mũgarũ na watho wa bũrũri.—Aroma 13:1.
Angĩkorũo mũndũ ndangĩhota kũnyua na gĩthimi. Arĩa marĩ na thĩna wa kũnyua njohi gũkĩria gĩthimi kana ũngĩ ta ũcio, no mũhaka moe ikinya rĩa na ihenya.—Mathayo 5:29, 30.