Gũka gwa Kristo nĩ Kuuga Atĩa?
Macokio ma Bibilia
Maandĩko nĩ magwetete maita maingĩ ũhoro wa rĩrĩa Kristo agooka gũcirithia andũ.a Kwa ngerekano, Mathayo 25:31-33 yugaga:
“Rĩrĩa Mũrũ wa mũndũ [Jesu Kristo] agooka arĩ na riri wake, na araika othe hamwe nake, nĩ agaikarĩra gĩtĩ gĩake kĩa ũnene. Ndũrĩrĩ ciothe nĩ igaacokanĩrĩrio mbere yake, nake nĩ akaamũrania andũ, o ta ũrĩa mũrĩithi amũranagia ngʼondu na mbũri. Na nĩ akaiga ngʼondu guoko-inĩ gwake kwa ũrĩo, nacio mbũri acige guoko-inĩ kwa ũmotho.”
Ihinda rĩu rĩa gũtua cira rĩgakorũo rĩrĩ gĩcunjĩ gĩa “thĩna mũnene” ũrĩa ũtarĩ woneka thĩinĩ wa historĩ ya andũ. Thĩna ũcio ũkaarĩkĩrĩra na mbaara ya Hari-Magedoni. (Mathayo 24:21; Kũguũrĩrio 16:16) Thũ cia Kristo, iria aaringithanirie na mbũri, nĩ igaatuĩrũo “kũniinwo tene na tene.” (2 Athesalonike 1:9; Kũguũrĩrio 19:11, 15) Ngũrani na ũguo, ndungata njĩhokeku cia Kristo, iria aaringithanirie na ngʼondu, nĩ igakorũo na kĩĩrĩgĩrĩro gĩa kũheo “muoyo wa tene na tene.”—Mathayo 25:46.
Kristo agooka rĩ?
Jesu oigire ũũ: “Ũhoro wĩgiĩ mũthenya ũcio kana thaa, gũtirĩ mũndũ ũĩ.” (Mathayo 24:36, 42; 25:13) O na kũrĩ ũguo, nĩ aatarĩirie “kĩmenyithia” kĩarĩ na maũndũ mangĩateithirie andũ kũmenya arĩ hakuhĩ gũka.—Mathayo 24:3, 7-14; Luka 21:10, 11.
Kristo agooka na mwĩrĩ wa roho kana wa nyama?
Jesu aariũkirio na mwĩrĩ wa roho, na kwoguo agooka arĩ kĩũmbe kĩa roho, no ti na mwĩrĩ wa nyama. (1 Akorintho 15:45; 1 Petero 3:18) Nĩkĩo mũthenya ũmwe mbere ya gĩkuũ gĩake, Jesu eerire arutwo ake ũũ: “Thutha wa kahinda kanini, thĩ ndĩkaanyona rĩngĩ.”—Johana 14:19.
Mawoni mahĩtanu megiĩ gũka gwa Kristo
Mawoni mahĩtanu: Rĩrĩa Bibilia yoiga atĩ andũ nĩ makona Jesu “agĩũka arĩ thĩinĩ wa matu” ĩkoragwo ĩkiuga atĩ andũ nĩ makamuona na maitho.—Mathayo 24:30.
Ũhoro wa ma: Kaingĩ Bibilia ĩkuruhithanagia matu na kĩndũ kĩĩhithĩte. (Maũndũ ma Alawii 16:2; Ndari 11:25; Gũcokerithia Maathani 33:26) Kwa ngerekano, Ngai eerire Musa ũũ: “Ngũũka harĩ wee ndĩ itu-inĩ ithimbu mũno.” (Thama 19:9) Musa ndonire Ngai na maitho. Ũndũ ũmwe na ũcio, Kristo ‘agooka arĩ thĩinĩ wa matu’ na njĩra ya atĩ, andũ nĩ makamenya arĩ kuo o na gũtuĩka matikamuona na maitho.
Mawoni mahĩtanu: Hĩndĩ ĩrĩa rĩandĩko rĩa Kũguũrĩrio 1:7 (The Bible in Gikũyũ) rĩkuuga atĩ “gũtiri riitho rĩtakamuona” rĩkĩaria ũhoro wa gũka gwa Kristo, rĩkoragwo rĩkiuga andũ nĩ makamuona.
Ũhoro wa ma: Ciugo cia Kĩngiriki iria itaũrĩtwo Bibilia-inĩ “riitho” na “kuona” rĩmwe nĩ ihũthĩkaga kuonania gũtaũkĩrũo kana kũmenya ũndũ no ti kuona ũndũ na maitho. (Mathayo 13:15; Luka 19:42; Aroma 15:21; Aefeso 1:18) Bibilia yugaga atĩ, Jesu ũrĩa wariũkirio, “o we ũtũũraga ũtheri-inĩ ũtangĩkinyĩrĩka, . . . gũtirĩ mũndũ . . . ũngĩmuona.” (1 Timotheo 6:16) Kwoguo, ciugo “gũtiri riitho rĩtakamuona” nĩ kuuga atĩ andũ othe nĩ magataũkĩrũo atĩ Jesu nĩwe ũkarehe ituĩro rĩa Ngai.—Mathayo 24:30.
a O na gũtuĩka andũ aingĩ nĩ mahũthagĩra ciugo “gũka gwa kerĩ” makĩarĩrĩria ũhoro wa gũka gwa Kristo, ciugo icio itirĩ thĩinĩ wa Bibilia.