Hihi Aira a Jehova nĩ Manyitanagĩra na Ndini Ingĩ Nĩguo Mathathaiye Hamwe?

Ithuĩ Aira a Jehova nĩ tũkenaga kwaria ũhoro wĩgiĩ wĩtĩkio witũ na andũ a ndini ciothe, no tũtinyitanagĩra na ndini ingĩ nĩguo tũthathaiye hamwe. Bibilia yonanagia atĩ Akristiano a ma ‘manyitithanĩtio wega’ hamwe, na ũndũ ũmwe wa bata ũtũmaga ũndũ ũcio ũhoteke nĩ gũkorũo na wĩtĩkio ũmwe. (Aefeso 4:16; 1 Akorintho 1:10; Afilipi 2:2) Gũkorũo na wĩtĩkio ũmwe to gwĩtĩkia tu atĩ mũndũ nĩ arabatara gũkorũo na wendo, tha, na wohanĩri. Wĩtĩkio witũ wĩhocetie harĩ ũmenyo wa ma wa Bibilia, tondũ tũtarĩ na ũmenyo ũcio wĩtĩkio witũ ũngĩkorũo ũrĩ wa tũhũ.—Aroma 10:2, 3.

Bibilia yonanagia atĩ kũnyitanĩra ũthathaiya-inĩ na andũ marĩ na wĩtĩkio ũngĩ, nĩ ta kuohanio icoki-inĩ rĩmwe na njĩra ĩtagĩrĩire, na ũndũ ũcio no ũthũkie wĩtĩkio wa Mũkristiano. (2 Akorintho 6:14-17) Nĩkĩo Jesu ateetĩkĩririe arutwo ake manyitanĩre ũthathaiya-inĩ na ndini iria ingĩ. (Mathayo 12:30; Johana 14:6) Ũndũ ũmwe na ũcio, thĩinĩ wa Watho ũrĩa Ngai aaheeanĩte kũgerera kũrĩ Musa, nĩ aakaanĩtie Aisiraeli a tene matikanyitanagĩre ũthathaiya-inĩ na andũ arĩa maamathiũrũrũkĩirie. (Thama 34:11-14) Thutha ũcio Aisiraeli ehokeku nĩ maaregire ũteithio ũrĩa maaheagwo nĩ andũ angĩ, ũndũ ũrĩa ũngĩatũmire mambĩrĩrie kũnyitanĩra ũthathaiya-inĩ na andũ maarĩ na wĩtĩkio ngũrani na wao.—Ezara 4:1-3.

Hihi Aira a Jehova nĩ maranagĩria na andũ marĩ na wĩtĩkio ngũrani na wao?

Ĩĩ nĩ maranagĩria. Kwa ngerekano, mwaka wa 2015 twahũthĩrire mathaa 1,933,473,727 tũkĩaranĩria na andũ marĩ na wĩtĩkio ngũrani na witũ. O ta mũtũmwo Paulo, rĩrĩa tũrahunjia nĩ tũkenaga gũtaũkĩrũo nĩ mwĩcirĩrie na wĩtĩkio wa “andũ aingĩ o ũrĩa kwahoteka.” (1 Akorintho 9:19-22) Rĩrĩa tũraria nao, nĩ twĩrutanagĩria kũhũthĩra ũtaaro wa Bibilia wa kũhe andũ arĩa angĩ “gĩtĩo kĩnene.”—1 Petero 3:15.