Hihi Nyamũ nĩ Ithiaga Igũrũ?
Macokio ma Bibilia
Bibilia ĩrutanaga atĩ harĩ ciũmbe ciothe iria irĩ thĩinĩ wa thĩ, no andũ anini tu magathiĩ igũrũ. (Kũguũrĩrio 14:1, 3) Magathiĩ igũrũ nĩguo magaathane marĩ athamaki na athĩnjĩri-ngai hamwe na Jesu. (Luka 22:28-30; Kũguũrĩrio 5:9, 10) No andũ arĩa aingĩ makariũkio matũũre thĩinĩ wa paradiso gũkũ thĩ.—Thaburi 37:11, 29.
No gũtirĩ handũ thĩinĩ wa Bibilia hagwetete atĩ nyamũ nĩ igathiĩ igũrũ. Nĩkĩ? Nyamũ citingĩhota kuoya makinya marĩa marabatarania nĩguo ciagĩrĩre “rĩĩtana rĩa gũthiĩ igũrũ.” (Ahibirania 3:1) Makinya macio nĩ ta: kũgĩa ũmenyo, kũgĩa na wĩtĩkio, na gwathĩkĩra maathani ma Ngai. (Mathayo 19:17; Johana 3:16; 17:3) Andũ no o tu moombirũo na wendi wa gũtũũra tene na tene.—Kĩambĩrĩria 2:16, 17; 3:22, 23.
Nĩguo mũndũ athiĩ igũrũ, no mũhaka ambe ariũke. (1 Akorintho 15:42) Bibilia nĩ ĩgwetete ũhoro wĩgiĩ ũriũkio maita maigana ũna. (1 Athamaki 17:17-24; 2 Athamaki 4:32-37; 13:20, 21; Luka 7:11-15; 8:41, 42, 49-56; Johana 11:38-44; Atũmwo 9:36-42; 20:7-12) O na kũrĩ ũguo, ũriũkio ũcio wothe wahutĩtie andũ no ti nyamũ.
Gũthiaga atĩa harĩ nyamũ rĩrĩa ciakua?
Bibilia yonanagia atĩ Ngai onaga muoyo wa andũ na wa nyamũ ũhanaine. (Ndari 31:28) Andũ mombĩtwo na ‘rũkũngũ rwa thĩ na mĩhũmũ ya muoyo,’ na noguo o na nyamũ ciũmbĩtwo.—Kĩambĩrĩria 2:7.
Bibilia ĩrutanaga atĩ nyamũ na andũ nĩ makuaga. (Maũndũ ma Alawii 21:11; Ezekieli 18:20) Rĩrĩa andũ makua, macokaga rũkũngũ-inĩ na noguo gũthiaga harĩ nyamũ ciakua. (Kohelethu 3:19, 20) Na njĩra ĩngĩ, rĩrĩa andũ makua matikoragwo ho rĩngĩ, na noguo o na nyamũ.
Hihi nyamũ nĩ ciĩhagia?
Aca. Kwĩhia nĩ kuuga gwĩciria, kũigua, kana gwĩka ũndũ ũtaratwarana na ithimi cia Ngai. Nĩguo kĩndũ kĩhie, nĩ kĩbataraga gũtua matua, na nyamũ itirĩ ũhoti ũcio. Ciĩkaga maũndũ kũringana na ũũgĩ ũrĩa ciombirũo naguo ũtũũro-inĩ wacio wothe. (2 Petero 2:12) Mũthia-inĩ wa ũtũũro wacio, no gũkua ikuaga, o na gũtuĩka itikoragwo ciĩhĩtie.
Hihi nĩ ũndũ mwĩtĩkĩrĩku gwĩka nyamũ ũũru?
Aca. Ngai eerire andũ maathage nyamũ, no ti gũciĩka maũndũ moru. (Kĩambĩrĩria 1:28; Thaburi 8:6-8) Ngai nĩ arũmbũyagia nyamũ ciothe nginya tũnyoni tũrĩa tũnini. (Jona 4:11; Mathayo 10:29) Aathire andũ marũmbũyagie nyamũ na njĩra njega. (Thama 23:12; Gũcokerithia Maathani 25:4; Thimo 12:10)