Jeremia 33:3—“Ngaĩra, na Niĩ nĩ Ngũgwĩtĩka”

“Ngaĩra, na niĩ nĩ ngũgwĩtĩka na ngwĩre ndĩyendeire maũndũ manene na matangĩtuĩrĩka marĩa wee ũtarĩ wamenya.”—Jeremia 33:3, New World Translation in Kikuyu.

“Njĩta, na nĩngũgwĩtĩka; nĩngũkwĩra maũndũ ma magegania na mahithe marĩa wee ũtooĩ.”—Jeremia 33:3, The Holy Bible in Gĩkũyũ Language.

Ũrĩa Jeremia 33:3 yugĩte

Kũgerera ciugo icio, Ngai aaheire andũ mweke wa kũmũkaĩra na njĩra ya mahoya. Arĩa maaheagwo mweke ũcio mangĩawĩtĩkĩrire na mahoe Ngai, nĩ angĩamaguũrĩirie maũndũ marĩa mangĩgekĩka ihinda rĩũkĩte.

“Ngaĩra, na niĩ nĩ ngũgwĩtĩka.” Kiugo “ngaĩra” gĩtironania o mũndũ gwĩta kana gũkaĩra rĩĩtwa rĩa Ngai anĩrĩire. Handũ ha ũguo, gũkaĩra Ngai rĩandĩko-inĩ rĩrĩ, kũronania gwetha ũteithio na ũtongoria wake kũgerera mahoya.—Thaburi 4:1; Jeremia 29:12.

No kũhoteke rĩĩtana rĩu rĩaheetwo rũrĩrĩ rwa Isiraeli. Rũrĩrĩ rũu nĩ rwagĩte wĩhokeku harĩ Ngai, na nĩ rwatharĩkagĩrũo nĩ mbũtũ ya Ababuloni. (Jeremia 32:1, 2) Jehovaa eerire Aisiraeli mamũcokerere na njĩra ya kũmũkaĩra kũgerera mahoya.

‘Nĩ . . . ngũkwĩra maũndũ manene na matangĩtuĩrĩka marĩa wee ũtarĩ wamenya.’ Maũndũ marĩa Ngai eeranĩire gũtũguũrĩria ‘matingĩtuĩrĩka’ (kana, matingĩtaũkĩka) na njĩra ya atĩ andũ matingĩtaũkĩrũo nĩmo matarĩ na ũteithio wa Ngai. Ciugo ‘maũndũ matangĩtuĩrĩka’ ningĩ no itaũrũo “maũndũ mahithe.”

Hihi nĩ ‘maũndũ marĩkũ mahithe’ Ngai angĩaguũririe? Nĩ maũndũ marĩa mangĩekĩkire thutha-inĩ, na nĩmo kwanangwo na gũtiganĩrio gwa itũũra rĩa Jerusalemu, na gũcoka gwakwo rĩngĩ thutha ũcio. (Jeremia 30:1-3; 33:4, 7, 8) O na kũrĩ ũguo, Ngai nĩ eeranĩire atĩ athathaiya ake matingĩaniinirũo marĩ rũrĩrĩ.—Jeremia 32:36-38.

Ũhoro Ũrĩa Ũthiũrũrũkĩirie Jeremia 33:3

Mũnabii Jeremia aamũkĩrire ndũmĩrĩri ĩyo kuuma kũrĩ Jehova mwaka wa 608 M.M.M., mwaka-inĩ wa ikũmi wa wathani wa Mũthamaki  Zedekia. Jeremia aarathĩte atĩ Jerusalemu nĩ ĩngĩagũire na Zedekia nĩ angĩatwarirũo ithamĩrio. Tondũ mũthamaki ndakenirio nĩ ndũmĩrĩri ĩyo, nĩ aathanire atĩ Jeremia ahingĩrũo.—Jeremia 32:1-5; 33:1; 37:21.

Maũndũ macio nĩmo maathiaga na mbere rĩrĩa Ngai aaheanire rĩĩtana rĩrĩa rĩrĩ thĩinĩ wa Jeremia 33:3. Ũndũ wa kĩeha nĩ atĩ, Mũthamaki Zedekia na Aisiraeli aingĩ maathiire na mbere na ũremi wao. (Jeremia 7:26; 25:4) Matiakaĩire Ngai nĩguo amahe ũtongoria wake. Mwaka ũmwe thutha ũcio, Zedekia nĩ eeheririo wathani-inĩ, Jerusalemu ĩkĩanangwo, na andũ aingĩ arĩa maahonokire makĩnyitwo magĩtwarũo Babuloni.—Jeremia 39:1-7.

Ciugo iria irĩ thĩinĩ wa Jeremia 33:3 iraririkania athomi ũmũthĩ atĩ Ngai no aheane “ũmenyo ũrĩa wa ma wĩgiĩ wendi wake” na aguũrie “maũndũ marĩa marikĩru” kũrĩ arĩa mamũhoyaga na magathoma Kiugo gĩake, Bibilia. (Akolosai 1:9; 1 Akorintho 2:10) Maũndũ marĩa marikĩru nĩ hamwe na maũndũ marĩa Ngai eranĩire kũhingia ica ikuhĩ ihinda rĩũkĩte.—Kũguũrĩrio 21:3, 4.

Wĩrorere video ĩno nguhĩ wone ũhoro ũrĩa ũrĩ thĩinĩ wa ibuku rĩa Jeremia.