MĨHARI YA BIBILIA ĨTAARĨIRIO
Thimo 17:17—“Mũrata wa Mũndũ Amwendaga o Hingo Ciothe”
“Mũrata wa ma onanagia wendo hingo ciothe, na aciarĩtwo atuĩke mũrũ wa nyina na mũndũ hĩndĩ ya mĩtangĩko.”—Thimo 17:17, New World Translation in Kikuyu.
“Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.”—Thimo 17:17, The Bible in Gikũyũ.
Ũrĩa Rĩandĩko rĩa Thimo 17:17 Riugĩte
Arata a ma nĩ a kwĩhokeka. O ta andũ a nyina ũmwe na mũndũ, makoragwo marĩ ehokeku na nĩ marũmbũyanagia, makĩria hĩndĩ ya moritũ.
“Mũrata wa ma onanagia wendo hingo ciothe.” Ciugo ici ningĩ no itaũrũo “araata matũũraga meendaine.” Kiugo gĩa Kĩhibirania kĩrĩa gĩtaũrĩtwo wendo mũhari-inĩ ũcio, gĩtionanagia o ũrĩa mũndũ araigua ngoro-inĩ. Nĩ wendo wa kwĩima ũrĩa mũndũ onagia ũrĩa ũngĩ kũgerera ciĩko. (1 Akorintho 13:4-7) Arata arĩa makoragwo na wendo ta ũcio matitiganaga rĩrĩa ũrata wao wagerio nĩ maũndũ ta kwaga kũiguithania kana mathĩna ma ũtũũro. Ningĩ nĩ mohanagĩra meyendeire. (Thimo 10:12) Na mũrata ndaiguaga ũiru rĩrĩa maũndũ marathiĩ wega harĩ mũndũ ũcio ũngĩ. Handũ ha ũguo, akenaga hamwe na mũrata wake.—Aroma 12:15.
“Mũrata wa ma . . . aciarĩtwo atuĩke mũrũ wa nyina na mũndũ hĩndĩ ya mĩtangĩko.” Thimo ĩno yumanĩte na ũndũ ũĩkaine atĩ andũ a nyina ũmwe nĩ makoragwo makuhanĩrĩirie. Kwoguo rĩrĩa twerutanĩria biũ gũteithia mũrata wĩna mĩtangĩko, tũkoragwo tũgĩka ta ũrĩa mũrũ kana mwarĩ wa nyina na mũndũ angĩka. Na arata arĩa makoragwo na ũrata ta ũcio matitiganaga rĩrĩa kwĩna mathĩna. Handũ ha ũguo, ũrata wao nĩ kũrũma ũrũmaga tondũ wendo na gĩtĩo kĩao harĩ mũndũ na ũrĩa ũngĩ nĩ kuongerereka ciongererekaga.
Ũhoro ũrĩa Ũthiũrũrũkĩirie Thimo 17:17
Ibuku rĩa Thimo rĩkoragwo na motaaro ma ũũgĩ mandĩkĩtwo na njĩra nguhĩ na ĩragucĩrĩria ũndũ megũtũma mũthomi ecirie. Mũthamaki Suleimani nĩwe waandĩkire gĩcunjĩ kĩrĩa kĩnene kĩa ibuku rĩu. Aarũmĩrĩire mwandĩkĩre wa marebeta ma Kĩĩhibirania, marĩa mandĩkagwo na njĩra ya kũgweta ũndũ mũna ũgacoka ũgatĩtĩrithio nĩ ũcio ũngĩ, kana kũgweta maũndũ merĩ maronania mũgarũ. Thimo 17:17 nĩ ngerekano ya njĩra ĩyo ya kũgweta ũndũ mũna ũgacoka ũgatĩtĩrithio nĩ ũcio ũngĩ. Nayo Thimo 18:24 nĩ ngerekano ya kũgweta maũndũ merĩ maronania mũgarũ. Yugaga: “Nĩ kũrĩ arata makoragwo mehaarĩirie kũhehenjana, no nĩ kũrĩ mũrata ũnyitanaga na mũndũ gũkĩra mũrũ wa nyina.”
Rĩrĩa Suleimani aandĩkaga Thimo 17:17, no kũhoteke eeciragia ũhoro wa ũrata wa hakuhĩ ũrĩa ithe Daudi aarĩ naguo na Jonathani mũriũ wa Mũthamaki Saulu. O na gũtuĩka Daudi na Jonathani matiaciaranĩirũo, maarĩ na ũrata wa hakuhĩ gũkĩra andũ a nyina ũmwe. Jonathani o na nĩ aaingĩririe muoyo wake ũgwati-inĩ nĩ ũndũ wa mũrata wake.a
Wĩrorere video ĩno nguhĩ wone ũhoro mũkuhĩ wĩgiĩ ibuku rĩa Thimo.
a Rora gĩcunjĩ kĩrĩ na kĩongo ‘Meendanire na Makĩgĩa Ũrata wa Hakuhĩ.’