Kũgitĩra Andũ Nyũmba-inĩ cia Ũthamaki Hĩndĩ ya COVID-19

“Kĩama Kĩrĩa Gĩtongoragia nĩ gĩtuĩte atĩ gũkĩringana na mawatho marĩa maigĩtwo nĩ thirikari, ciũngano ciothe nĩ igwĩkĩrũo ngoro ciambĩrĩrie rĩngĩ gũcemania hamwe thĩinĩ wa Nyũmba cia Ũthamaki kwambĩrĩria kiumia kĩa Ĩpuro 1.” Kĩmenyithia kĩu, kĩrĩa kĩamenyithanirio thĩinĩ wa jw.org kĩambĩrĩria-inĩ kĩa mweri wa Machi 2022, nĩ gĩakenirie Aira a Jehova thĩinĩ wa thĩ yothe. No mũrimũ wa Korona warĩ o kuo.a Nĩ mogarũrũku marĩkũ meekirũo na nĩ indo irĩkũ ciabataranagia nĩguo andũ magitĩrũo kuumana na mũrimũ ũcio? Hihi Nyũmba cia Ũthamaki nĩ ingĩakorirũo ihaarĩirio thutha wa mĩaka ta ĩĩrĩ ya kwaga gũcemania kuo?

Mĩeri mĩingĩ mbere ĩyo, ariũ a Ithe witũ nĩ maakoretwo makĩhaarĩria maũndũ nĩguo tũcokererie mĩcemanio Nyũmba-inĩ cia Ũthamaki.

Kũhingia Mabataro Ngũrani, Kũgerera Njĩra Itiganĩte

Mweri ũmwe tu thutha wa gũtiga gũcemania Nyũmba-inĩ cia Ũthamaki mwaka wa 2020, Rũhonge rwa Gũcora/Mĩako rwa Thĩ Yothe (WDC), rũrĩa rwĩ Warwick, New York, nĩ rwaambĩrĩirie gũthuthuria ũrĩa mũrimũ wa Korona ũngĩahutirie ũrĩa tũhũthagĩra Nyũmba citũ cia Ũthamaki, na maũndũ marĩa maabataraga gwĩkwo nĩgetha twĩgitĩre kuumana na mũrimũ ũcio.

Maũndũ marĩa maabataranagia gĩcigo-inĩ kĩmwe gĩa thĩ, maarĩ ngũrani na marĩa maabataranagia gĩcigo-inĩ kĩngĩ. Matthew De Sanctis ũrĩa ũrutaga wĩra na rũhonge rwa WDC aaugire ũũ: “Mabũrũri-inĩ mamwe, kwarĩ na thĩna wa handũ ha gwĩthambĩra moko. Nyũmba cia Ũthamaki ingĩkorũo itarĩ na maĩ ma mũberethi, maĩ mabataraga kũgũrũo kana gũtahwo rũũĩ-inĩ kana gĩthima-inĩ. Mabũrũri-inĩ mangĩ, thirikari nĩ ciagarũrĩire mawatho megiĩ ũrĩa rĩera rĩbatiĩ kũingĩria na kuuma nyũmba, na megiĩ imenyithia ciĩgiĩ ũgima wa mwĩrĩ na ũtheru iria ibatiĩ gwĩkĩrũo.”

Ariũ a Ithe witũ maahiũranirie atĩa na moritũ macio? Matthew aaugire atĩ Nyũmba-inĩ nyingĩ cia Ũthamaki, nĩ kuonekire atĩ “indo itarĩ cia goro nĩ ciarutaga wĩra wega.” Kwa ngerekano, bũrũri-inĩ wa Papua New Guinea gwathondekirũo ndoo cia lita 20 ciĩkĩrĩtwo mĩberethi cia gwĩthambĩra moko. Kwoguo ariũ a Ithe witũ nĩ maahotire kũgĩa na indo cia gwĩthambĩra moko Nyũmba-inĩ ya Ũthamaki makĩhũthĩra dola 40 tu. Nyũmba-inĩ cia Ũthamaki cia Afrika, nĩ kwagũrirũo indo makĩria ma 6,000 ithondeketwo na njĩra ya mwanya cia gwĩthambĩra moko kuuma kambuni-inĩ ĩmwe ya Asia.

Mogarũrũku mangĩ marĩa meekirũo nĩ gwĩkĩra fani kana gũthondeka iria ciarĩ kuo nĩgetha rĩera rĩhote kũingĩra wega Nyũmba-inĩ cia Ũthamaki. Ciũngano nyingĩ nĩ ciagũrire indo cia kũnyitĩrĩra maikoroboni nĩgetha andũ matigacinyite na moko rĩrĩa irahĩtũkio. Ningĩ nĩ gwekirũo mĩbango nĩguo kũndũ kũrĩa kũhutagio kaingĩ ta mĩrango na mĩberethi gũkahuuragwo kaingĩ, nĩguo gũtigakorũo na virus. Ciũngano imwe nĩ ciekĩrire mĩberethi ya mwanya cioro-inĩ, ĩrĩa ĩhingũkaga o na mũndũ atamĩhutĩtie. Bũrũri-inĩ wa Chile, mbeca iria ciahũthĩkire gwĩka mogarũrũku marĩa maabataranagia nĩ dola 1,400 harĩ o Nyũmba ya Ũthamaki.

O na gũtuĩka ariũ a Ithe witũ nĩ meerutanĩirie mũno kũnyihia mogwati ma andũ kũnyitwo nĩ mũrimũ Nyũmba-inĩ cia Ũthamaki, ningĩ nĩ maageririe kũhũthĩra mĩhothi wega. Kwa ngerekano, mabũrũri-inĩ mamwe nĩ maahũthĩrire mweke ũrĩa thirikari yaheanĩte wa kweheria magooti harĩ indo cia gwĩthambĩra moko na cia kũnyitĩrĩra maikoroboni. Wabici cia honge nĩ cianyitanĩire ikĩgũra indo nyingĩ hamwe nĩgetha ihonokie mbeca. Ningĩ Wabici cia honge na Rũhonge rwa Ũgũri rwa Thĩ Yothe, nĩ ciabangire kũgũra indo kuuma kũrĩ kambuni ĩmwe kwa ĩmwe, na kwoguo ikĩgũra na thogora mũnini na indo icio igĩkinya na ihenya.

“Maũndũ Macio Mothe Maatũmire Njigue Ndĩna Ũgitĩri”

Mĩbango ĩrĩa ĩkĩtwo ya kũnyihia mogwati Nyũmba-inĩ cia Ũthamaki nĩ ĩgitĩrĩte arĩa maambĩrĩirie gũthiĩ mĩcemanio ĩmwe kwa ĩmwe na ĩgatũma makorũo matarĩ na guoya. Mwarĩ wa Ithe witũ wĩtagwo Dulcine kuuma Peru, aaugire atĩ aarĩ na “kaguoya kanini” rĩrĩa kwamenyithanirio atĩ nĩ tũgũcoka Nyũmba-inĩ cia Ũthamaki. Aaugire ũũ: “Nĩ ndarwarire Korona ihinda inini thutha wa mũrimũ ũcio gũtuthũka. Kwoguo nĩ ndetigagĩra gũthiĩ Nyũmba-inĩ ya Ũthamaki, nĩ ũndũ wa kuona ta ingĩnyitwo nĩ mũrimũ ũcio rĩngĩ. No rĩrĩa ndakinyire kuo, nĩ ndonire atĩ athuri nĩ moete makinya maingĩ ma kũnyihia mogwati, ta kũiga kũndũ gwa gwĩthambĩra moko, gũkorũo na indo cia kũnyitĩrĩra maikoroboni handũ ha mũndũ kwĩnyitĩra na guoko, na mũbango wa gũtheria Nyũmba ya Ũthamaki mbere na thutha wa o mũcemanio. Maũndũ macio mothe maatũmire njigue ndĩna ũgitĩri.”b

Nake mwarĩ wa Ithe witũ Sara kuuma Zambia aarĩ na ũritũ ngũrani. Aaugire ũũ: “Mũthuri wakwa aakuire mĩeri ĩigana ũna mĩthiru nĩ ũndũ wa Korona. Nĩ ndarigagwo ũrĩa ingĩaiguire ndathiĩ mĩcemanio ya ĩmwe kwa ĩmwe riita rĩa mbere atarĩ ho.” Rĩu aiguaga atĩa thutha wa gũthiĩ mĩcemanio ya ĩmwe kwa ĩmwe? Aaugire ũũ: “Mĩcemanio ya ĩmwe kwa ĩmwe nĩ ĩndeithĩtie kuona atĩ Jehova arĩ hamwe na ithuĩ matukũ-inĩ maya ma kũrigĩrĩria. Rĩu, gũkĩra hĩndĩ ĩngĩ o yothe, nĩ njiguaga njĩkĩrĩtwo hinya, ngonio wendo, na ngaheo ũteithio ũrĩa ndĩrabatara kuuma kũrĩ athuri na aarĩ na ariũ a Ithe witũ arĩa angĩ.”

Aarĩ na ariũ a Ithe witũ thĩinĩ wa thĩ yothe, nĩ makenete nĩ ũndũ wa mweke ũcio wa gũcoka Nyũmba-inĩ ciao cia Ũthamaki. Nĩ tũragũcokeria ngatho mũno nĩ ũndũ wa mĩhothi yaku, ĩrĩa kaingĩ ĩrutagwo kũgerera donate.jw.org. Mĩhothi ĩyo nĩ ĩtũteithĩtie gũtigĩrĩra atĩ kũrĩa tũcemanagĩria nĩ ũndũ wa ũthathaiya mũtheru nĩ kũndũ kwega na kũrĩ na ũgitĩri.