Samueli wa Mbere
29 Afilisti+ magĩgĩcokanĩrĩria mbũtũ ciao ciothe Afeku, nao Aisiraeli maambĩte hema hakuhĩ na itherũkĩro rĩrĩa rĩrĩ Jezireeli.+ 2 Na athani a Afilisti maahĩtũkaga na ikundi ciao cia thigari igana na ikundi ciao cia thigari ngiri, nake Daudi na arũme ake maathiaga marĩ thutha hamwe na Akishi.+ 3 No anene a Afilisti makĩũria atĩrĩ: “Ahibirania aya mareka atĩa gũkũ?” Akishi agĩcokeria anene acio a Afilisti ũũ: “Ũyũ nĩ Daudi, ndungata ya Mũthamaki Saulu wa Isiraeli, na akoretwo arĩ hamwe na niĩ kwa ihinda rĩa mwaka ũmwe kana makĩria.+ Ndirĩ ndona ihĩtia o na rĩmwe harĩ we kuuma mũthenya ũrĩa oorire agĩũka kũrĩ niĩ nginyagia ũmũthĩ.” 4 No anene acio a Afilisti makĩmũrakarĩra na makĩmwĩra atĩrĩ: “Ĩra mũndũ ũyũ acoke.+ Reke acoke kũrĩa ũmũgaĩire. Ndũkareke athiĩ hamwe na ithuĩ mbaara-inĩ, ndakae gũtũgarũrũka mbaara-inĩ.+ Tondũ rĩrĩ, nĩ njĩra ĩrĩkũ ĩngĩ njega angĩĩiguithania na mwathi wake nayo tiga kũneana mĩtwe ya arũme aitũ? 5 Na githĩ ũyũ ti Daudi ũrĩa maainaga ũhoro wake rĩrĩa maathũngũthaga, makiugaga ũũ:
‘Saulu eyũragĩire makiri,
Nake Daudi akeyũragĩra ngiri makũmi maingĩ’?”+
6 Akishi+ agĩgĩta Daudi akĩmwĩra atĩrĩ: “O ta ũrĩa Jehova atũũraga muoyo, wee wĩ mũndũ mũrũngĩrĩru, na no nyende gũthiĩ nawe mbaara-inĩ hamwe na mbũtũ yakwa,+ nĩ gũkorũo ndirĩ ndona ihĩtia o na rĩmwe harĩ wee kuuma mũthenya ũrĩa wokire kũrĩ niĩ nginyagia ũmũthĩ.+ No athani matirakwĩhoka.+ 7 Nĩ ũndũ ũcio coka na thayũ, na ndũgeke ũndũ o na ũmwe ũngĩrakaria athani a Afilisti.” 8 No rĩrĩ, Daudi akĩũria Akishi atĩrĩ: “Nĩkĩ, kaĩ arĩ atĩa ndeka? Nĩ ihĩtia rĩrĩkũ wonete harĩ ndungata yaku kuuma mũthenya ũrĩa ndokire kũrĩ wee nginyagia ũmũthĩ? Nĩ kĩĩ gĩkũgiria thiĩ nawe ngarũe na thũ cia mwathi wakwa mũthamaki?” 9 Akishi agĩcokeria Daudi ũũ: “Kũringana na niĩ, ũkoretwo ũrĩ mwega o ta mũraika wa Ngai.+ No anene a Afilisti moigĩte atĩrĩ, ‘Ndũkareke athiĩ hamwe na ithuĩ mbaara-inĩ.’ 10 Ũgookĩra rũcinĩ tene mũrĩ hamwe na ndungata cia mwathi waku iria ciũkĩte nawe; mũkaarahũka na muumagare rũcinĩ tene gwathererũka o ũguo.”
11 Nĩ ũndũ ũcio, Daudi na arũme ake makĩarahũka rũcinĩ tene nĩguo macoke bũrũri-inĩ wa Afilisti, nao Afilisti makĩambata Jezireeli.+