Samueli wa Mbere

7 Nĩ ũndũ ũcio arũme a Kiriathu-jearimu magĩthiĩ na makĩoya Ithandũkũ rĩa Jehova makĩrĩambatia makĩrĩiga nyũmba-inĩ ya Abinadabu+ karĩma-inĩ, na makĩamũra mũrũwe Eliazaru nĩguo arangagĩre Ithandũkũ rĩu rĩa Jehova.

2 Na kuuma mũthenya ũrĩa Ithandũkũ rĩu rĩakinyire Kiriathu-jearimu, ihinda inene rĩgĩthira, ihinda rĩa mĩaka 20, na nyũmba yothe ya Isiraeli ĩkĩambĩrĩria gũcaria* Jehova.+ 3 Samueli agĩcoka akĩra nyũmba yothe ya Isiraeli ũũ: “Angĩkorũo mũracokerera Jehova na ngoro yanyu yothe,+ eheriai ngai ngʼeni+ na mĩhianano ya Ashitorethu+ gatagatĩ-inĩ kanyu, na mwerekerie ngoro cianyu harĩ Jehova mũtegũthengeka na mũmũtungatĩre o we wiki,+ nake nĩ ekũmũhonokia kuuma guoko-inĩ kwa Afilisti.”+ 4 Nĩ ũndũ ũcio Aisiraeli makĩeheria ngai cia Baali na mĩhianano ya Ashitorethu na magĩtungatĩra Jehova o we wiki.+

5 Samueli agĩcoka akiuga atĩrĩ: “Cokanĩrĩriai andũ othe a Isiraeli Mizipa,+ na niĩ nĩ ngũhoya Jehova nĩ ũndũ wanyu.”+ 6 Kwoguo makĩũngana hamwe kũu Mizipa, magĩtaha maĩ na makĩmaita mbere ya Jehova na mũthenya ũcio makĩĩhinga kũrĩa.+ Marĩ kũu makiuga atĩrĩ: “Nĩ twĩhĩirie Jehova.”+ Nake Samueli akĩambĩrĩria gũtungata arĩ mũtiirĩrĩri bũrũri+ harĩ Aisiraeli kũu Mizipa.

7 Rĩrĩa Afilisti maaiguire atĩ Aisiraeli nĩ moonganĩte Mizipa, athani a Afilisti+ makĩambata magatharĩkĩre andũ a Isiraeli. Nao Aisiraeli maaigua ũhoro ũcio, makĩnyitwo nĩ guoya nĩ ũndũ wa Afilisti. 8 Nĩ ũndũ ũcio Aisiraeli makĩra Samueli atĩrĩ: “Ndũgatige gũkaĩra Jehova Ngai witũ atũteithie+ na atũhonokie kuuma guoko-inĩ kwa Afilisti.” 9 Nake Samueli akĩoya kagondu karonga na agĩkarutĩra Jehova karĩ igongona igima rĩa njino;+ na Samueli agĩkaĩra Jehova ateithie Aisiraeli, na Jehova agĩcokia ihoya rĩake.+ 10 Na hĩndĩ ĩyo Samueli aarutaga igongona rĩu rĩa njino, Afilisti magĩkuhĩrĩria nĩguo marũe na andũ a Isiraeli. Na mũthenya ũcio Jehova agĩtũma kũgĩe mũgambo mũnene wa marurumĩ+ kwerekera Afilisti, Agĩtũma matukanĩrũo,+ na makĩhootwo marĩ mbere ya andũ a Isiraeli.+ 11 Nĩ ũndũ ũcio arũme a Isiraeli makiuma Mizipa na magĩtengʼeria Afilisti, magĩthiĩ o makĩmoragaga o nginya mwena wa mũhuro wa Beth-kari. 12 Samueli agĩcoka akĩoya ihiga+ akĩrĩhanda gatagatĩ ka Mizipa na Jeshana na akĩrĩĩta Ebenezeri,* nĩ gũkorũo ooigire ũũ: “Nginyagia rĩu Jehova nĩ atũteithĩtie.”+ 13 Nĩ ũndũ ũcio Afilisti magĩtoorio, na matiacokire rĩngĩ gĩcigo-inĩ kĩa Isiraeli;+ nakuo guoko kwa Jehova gũgĩthiĩ na mbere gũũkĩrĩra Afilisti matukũ-inĩ mothe ma Samueli.+ 14 O namo matũũra marĩa Afilisti mooete kuuma kũrĩ andũ a Isiraeli magĩcokerio andũ a Isiraeli, kuuma Ekironi nginya Gathu, na andũ a Isiraeli magĩtunyana gĩcigo kĩao kuuma guoko-inĩ kwa Afilisti.

Ningĩ gũkĩgĩa thayũ gatagatĩ-inĩ ka andũ a Isiraeli na Aamori.+

15 Samueli agĩgĩtiirĩrĩra Isiraeli ũtũũro-inĩ wake wothe.+ 16 O mwaka o mwaka aathiũrũrũkaga Betheli,+ Giligali,+ o na Mizipa,+ na aatiirĩrĩire Isiraeli icigo-inĩ icio ciothe. 17 Ĩndĩ nĩ aacokaga Rama,+ tondũ nĩkuo nyũmba yake yarĩ, na o nakuo nĩ aatiirĩrĩire Isiraeli. Na agĩakĩra Jehova kĩgongona kuo.+