Samueli wa Mbere
8 Na rĩrĩa Samueli aakũrire, akĩamũra ariũ ake matuĩke atiirĩrĩri bũrũri thĩinĩ wa Isiraeli. 2 Mũrũ wake wa irigithathi eetagwo Joeli nake wa kerĩ eetagwo Abija;+ maarĩ atiirĩrĩri bũrũri thĩinĩ wa Biri-shiba. 3 No ariũ ake matiarũmĩrĩire mĩthiĩre yake; maathingataga uumithio ũtarĩ wa kĩhooto,+ makamũkĩra mahaki,+ na makogomia kĩhooto.+
4 Thutha wa ihinda, athuri* othe a Isiraeli makĩgomana hamwe na magĩthiĩ kũrĩ Samueli kũu Rama. 5 Makĩmwĩra ũũ: “Atĩrĩrĩ, rĩu nĩ ũkũrĩte, no ariũ aku matirarũmĩrĩra mĩthiĩre yaku. Rĩu tũthuurĩre mũthamaki wa gũtũtuithanagia o ta ndũrĩrĩ iria ingĩ ciothe.”+ 6 Ĩndĩ ũndũ ũcio ndwakenirie* Samueli rĩrĩa mooigire ũũ: “Tũhe mũthamaki wa gũtũtuithanagia.” Samueli agĩkĩhoya Jehova, 7 nake Jehova akĩra Samueli ũũ: “Thikĩrĩria ũrĩa wothe andũ acio marakwĩra; nĩ gũkorũo tiwe mararega, no nĩ niĩ mararega ndĩ mũthamaki wao.+ 8 Mareka o ta ũrĩa matũire mekĩte kuuma mũthenya ũrĩa ndamarutire Misiri nginyagia ũmũthĩ; maikaraga o makĩndiganagĩria+ magatungatĩra ngai ingĩ,+ na ũguo nĩguo maragwĩka. 9 Rĩu mathikĩrĩrie. No rĩrĩ, no mũhaka ũmahe mũkaana; ũmeere kĩrĩa mũthamaki ũcio ũkũmathamakĩra arĩkoragwo arĩ na kĩhooto gĩa kũmetia.”
10 Nĩ ũndũ ũcio Samueli akĩra andũ acio maamwĩtagia mũthamaki ciugo ciothe cia Jehova. 11 Akĩmeera ũũ: “Maũndũ maya nĩmo mũthamaki ũrĩa ũkũmũthamakĩra arĩkoragwo arĩ na kĩhooto gĩa kũmwĩtia:+ Akooya ariũ anyu+ na amatware ngaari-inĩ ciake cia mbarathi+ na amatue atwarithia ake a mbarathi,+ na amwe matuĩke a gũtengʼeraga mbere ya ngaari ciake cia mbarathi. 12 Na nĩ ageethuurĩra anene a andũ ngiri+ na anene a andũ mĩrongo ĩtano,+ na andũ amwe mamũrĩmagĩre,+ magethage maciaro make,+ na mathondekage matharaita make ma mbaara o hamwe na indo cia ngaari ciake cia mbarathi.+ 13 Akooya airĩtu anyu matuĩke a gũtukanagia maguta manungi wega, arugi irio, na arugi a mĩgate.+ 14 Akeeyoera mĩgũnda yanyu ĩrĩa mĩega biũ, mĩgũnda yanyu ya mĩthabibũ, na mĩgũnda yanyu ya mĩtamaiyũ,+ amĩheane kũrĩ ndungata ciake. 15 Nĩ akooya gĩcunjĩ kĩmwe harĩ ikũmi kĩa mĩgũnda yanyu ya irio na mĩgũnda yanyu ya mĩthabibũ, akĩheane kũrĩ anene a gwake na ndungata ciake. 16 Na nĩ akooya ndungata cianyu cia arũme na cia atumia, ndũũru cianyu cia ngʼombe iria njega biũ, na ndigiri cianyu, acihũthagĩre wĩra-inĩ wake.+ 17 Nĩ akooya gĩcunjĩ kĩmwe harĩ ikũmi kĩa ndũũru cianyu cia mbũri na ngʼondu,+ na nĩ mũgaatuĩka ndungata ciake. 18 Mũthenya nĩ ũgooka rĩrĩa mũgaakaya nĩ ũndũ wa mũthamaki ũrĩa mwĩthuurĩire,+ no Jehova ndarĩ ũndũ akaamũcokeria mũthenya ũcio.”
19 O na kũrĩ ũguo, andũ acio makĩrega gũthikĩrĩria ũrĩa Samueli aameerire, makiuga ũũ: “Aca, nĩ tũtuĩte itua rĩa kũgĩa na mũthamaki wa gũtũthamakagĩra. 20 Na tũgũtuĩka o ta ndũrĩrĩ iria ingĩ, nake mũthamaki ũcio witũ nĩ arĩtũtuithanagia na agatũtongoria na akarũa mbaara citũ.” 21 Thutha wa Samueli kũigua ciugo icio ciothe cia andũ, agĩcicokera Jehova akĩiguaga. 22 Jehova akĩra Samueli ũũ: “Mathikĩrĩrie, na ũthuure mũthamaki wa kũmathamakagĩra.”+ Samueli agĩkĩra arũme acio a Isiraeli atĩrĩ: “O mũndũ nĩ acoke itũũra-inĩ rĩake.”