Samueli wa Mbere

12 Na rĩrĩ, Samueli agĩkĩra andũ othe a Isiraeli atĩrĩ: “Rĩu nĩ ndĩkĩtie gwĩka* ũrĩa wothe mwanjĩrĩte njĩke, na nĩ ndĩmwamũrĩire mũthamaki wa kũmũthamakagĩra.+ 2 Rĩu ũyũ nĩwe mũthamaki wanyu ũrĩa ũramũtongoria!*+ Na niĩ hakwa-rĩ, rĩu ndĩ mũkũrũ na ngagĩa mbuĩ, na ariũ akwa marĩ haha hamwe na inyuĩ,+ na ngoretwo ngĩmũtongoria kuuma ũnyinyi-inĩ wakwa nginyagia ũmũthĩ.+ 3 Nĩ niĩ ũyũ haha. Rutai ũira mbere ya Jehova na mbere ya mũitĩrĩrie maguta wake:+ Nũũ ndĩ ndoya ndegwa kana ndigiri yake?+ Kana nũũ ndĩ ndatunya kana ngahinyĩrĩria? Nũũ ndĩ ndamũkĩra ihaki* kuuma guoko-inĩ gwake atĩ nĩguo ndĩhũgũre ndore mwena ũngĩ?+ Angĩkorũo nĩ ndĩ ndoya, nĩ ngũmũcokeria.”+ 4 Nĩ ũndũ ũcio makĩmwĩra atĩrĩ: “Ndũrĩ watũtunya kana ũgatũhinyĩrĩria o na kana ũkamũkĩra kĩndũ o gĩothe kuuma guoko-inĩ kwa mũndũ o na ũrĩkũ.” 5 Agĩkĩmeera ũũ: “Jehova nĩ mũira harĩ inyuĩ, o na mũitĩrĩrie maguta wake nĩ mũira mũthenya ũyũ wa ũmũthĩ atĩ gũtirĩ ũndũ o na ũmwe muona wa kũnjukĩra.”* Nĩ ũndũ ũcio makiuga atĩrĩ: “Ĩĩ nĩ mũira.”

6 Samueli agĩcoka akĩra andũ acio atĩrĩ: “Jehova, o we ũrĩa wahũthĩrire Musa na Haruni na akĩruta maithe manyu ma tene bũrũri-inĩ wa Misiri,+ nĩ mũira. 7 Rĩu rũgamai haha, ndĩmũtuĩre ciira mbere ya Jehova nĩ ũndũ wa ciĩko ciothe cia ũthingu iria Jehova amwĩkĩire o na agekĩra maithe manyu ma tene.

8 “Rĩrĩa Jakubu aathiire Misiri+ na maithe manyu ma tene makĩambĩrĩria gũkaĩra Jehova amateithie,+ Jehova aatũmire Musa+ na Haruni nĩguo matongorie maithe manyu ma tene moime Misiri na mamarehe maikarage gũkũ.+ 9 No nĩ maariganĩirũo nĩ Jehova Ngai wao, nake akĩmendia+ guoko-inĩ gwa Sisera+ mũnene wa mbũtũ ya Hazoru na guoko-inĩ kwa Afilisti+ na guoko-inĩ kwa mũthamaki wa Moabi,+ na makĩmatharĩkĩra. 10 Nao magĩkaĩra Jehova amateithie,+ makiuga atĩrĩ, ‘Nĩ twĩhĩtie,+ nĩ gũkorũo nĩ tũtigĩte Jehova tũgatungatĩra ngai cia Baali+ na mĩhianano ya Ashitorethu;+ rĩu tũhonokie kuuma guoko-inĩ gwa thũ citũ nĩgetha tũgũtungatĩre.’ 11 Nake Jehova agĩtũma Jerubaali+ na Bedani na Jefitha+ na Samueli+ na akĩmũhonokia kuuma guoko-inĩ gwa thũ iria ciothe ciamũthiũrũrũkĩirie, nĩgetha mũikare mũrĩ na ũgitĩri.+ 12 Rĩrĩa muoonire Nahashu+ mũthamaki wa Aamoni nĩ oka kũmũtharĩkĩra, mũgĩikara o mũkĩnjĩraga atĩrĩ, ‘Aca, nĩ tũtuĩte itua rĩa kũgĩa na mũthamaki atũthamakagĩre!’+ O na gũtuĩka Jehova Ngai wanyu nĩwe warĩ Mũthamaki wanyu.+ 13 Rĩu ũyũ nĩwe mũthamaki ũrĩa mũthuurĩte, o we ũrĩa mwetirie. Atĩrĩrĩ, Jehova nĩ amwamũrĩire mũthamaki nĩguo amũthamakagĩre.+ 14 Angĩkorũo nĩ mũrĩĩtigagĩra Jehova+ na mũkamũtungatĩra+ na mũgathĩkĩra mũgambo wake+ na mũkaga kũremera watho wa Jehova, na mũrĩ hamwe na mũthamaki ũrĩa ũramũthamakĩra mũrũmagĩrĩre Jehova Ngai wanyu-rĩ, ũcio nĩ ũndũ mwega. 15 No mũngĩaga gwathĩkĩra mũgambo wa Jehova na mũremere watho wa Jehova, guoko kwa Jehova nĩ gũkaamũũkĩrĩra hamwe na maithe manyu.+ 16 Rĩu rũgamai haha muone ũndũ ũyũ mũnene Jehova egwĩka mwĩroreire na maitho manyu. 17 Na githĩ ũmũthĩ ti ihinda rĩa magetha ma ngano? Ngũkaĩra Jehova atũme kũgĩe marurumĩ na kuure mbura; nĩguo mũmenye na mũtaũkĩrũo nĩ ũũru ũrĩa mwĩkĩte maitho-inĩ ma Jehova nĩ ũndũ wa gwĩtia mũthamaki amũthamakagĩre.”+

18 Nĩ ũndũ ũcio Samueli agĩkaĩra Jehova, nake Jehova agĩtũma kũgĩe marurumĩ na kuure mbura mũthenya ũcio, nginya andũ othe magĩĩtigĩra Jehova na Samueli mũno. 19 Andũ othe makĩra Samueli ũũ: “Hoya Jehova Ngai waku nĩ ũndũ wa ndungata ciaku,+ tondũ tũtikwenda gũkua, nĩ gũkorũo nĩ tuongereire ũũru ũngĩ mehia-inĩ maitũ mothe nĩ ũndũ wa gwĩtia mũthamaki.”

20 Nĩ ũndũ ũcio Samueli akĩra andũ acio atĩrĩ: “Mũtigetigĩre. Nĩ ma nĩ mwĩkĩte ũũru ũcio wothe. No rĩrĩ, mũtikanatige kũrũmĩrĩra Jehova,+ tungatagĩrai Jehova na ngoro yanyu yothe.+ 21 Mũtikanagarũrũke mũrũmĩrĩre indo cia tũhũ,*+ nĩ gũkorũo itirĩ ũguni+ na itingĩhota kũhonokania, tondũ nĩ cia tũhũ.* 22 Nĩ ũndũ wa rĩĩtwa rĩake inene,+ Jehova ndagatiganĩria andũ ake,+ nĩ gũkorũo Jehova nĩ atuĩte itua rĩa kũmũtua andũ ake.+ 23 Na niĩ hakwa-rĩ, kũroaga gũtuĩka atĩ no njĩhĩrie Jehova na njĩra ya gũtiga kũmũhoera, na nĩ ngũthiĩ na mbere kũmũruta na njĩra ĩrĩa njega na njagĩrĩru. 24 Mwĩtigagĩrei Jehova+ na mũmũtungatagĩre na ngoro yanyu yothe mũrĩ na wĩhokeku,* nĩ gũkorũo nĩ muonete maũndũ manene marĩa amwĩkĩire.+ 25 No mũngĩkĩrĩrĩria gwĩka maũndũ moru, no kũniinwo mũkaaniinwo,+ inyuĩ o hamwe na mũthamaki wanyu.”+