Samueli wa Mbere
13 Na rĩrĩ, Saulu aarĩ na mĩaka . . .* rĩrĩa aatuĩkire mũthamaki,+ agĩgĩthamakĩra Isiraeli mĩaka ĩĩrĩ. 2 Saulu agĩthuura arũme 3,000 kuuma Isiraeli; arũme 2,000 kuuma harĩ acio maarĩ hamwe na Saulu kũu Mikimashi na gĩcigo-inĩ kĩrĩa kĩrĩ irĩma kĩa Betheli, nao arũme 1,000 maarĩ hamwe na Jonathani+ kũu Gibea+ ya Benjamini. Agĩcoka akĩra andũ acio angĩ mathiĩ, o mũndũ athiĩ hema-inĩ yake. 3 Jonathani agĩtharĩkĩra kambĩ ya thigari cia Afilisti+ ĩrĩa yarĩ Geba+ na akĩmoraga, na Afilisti makĩigua ũhoro ũcio. Nake Saulu akĩhuuhithia coro+ bũrũri-inĩ ũcio wothe, akiugaga ũũ: “Ahibirania nĩ maigue!” 4 Andũ othe a Isiraeli makĩigua ũhoro ũyũ: “Saulu nĩ atharĩkĩire kambĩ ya thigari cia Afilisti na akamoraga, na rĩu andũ a Isiraeli nĩ matuĩkĩte kĩndũ kĩranunga harĩ Afilisti.” Nĩ ũndũ ũcio andũ magĩtwo nĩguo marũmĩrĩre Saulu kũu Giligali.+
5 Afilisti nao makĩũngana hamwe nĩguo marũe na Isiraeli, marĩ na ngaari 30,000 cia mbaara na atwarithia 6,000 a mbarathi na thigari nyingĩ mũno o ta mũthanga ũrĩa ũkoragwo hũgũrũrũ-inĩ cia iria;+ na makĩambata makĩamba hema ciao kũu Mikimashi mwena wa irathĩro wa Bethi-aveni.+ 6 Nao arũme a Isiraeli makĩona atĩ marĩ thĩna-inĩ, tondũ nĩ maarĩ ahatĩke; nĩ ũndũ ũcio andũ makĩĩhitha ngurunga-inĩ,+ marima-inĩ, ndũmba-inĩ cia mahiga, kũndũ rungu,* na marima-inĩ ma maĩ. 7 Ahibirania amwe nginya nĩ maaringire Jorodani magĩthiĩ bũrũri wa Gadi na Gileadi.+ No Saulu aarĩ o Giligali, nao andũ othe arĩa maamũrũmĩrĩire no kũinaina maainainaga. 8 Agĩthiĩ na mbere gweterera thikũ mũgwanja nginya ihinda rĩrĩa rĩatuĩtwo* nĩ Samueli rĩgĩkinya, no Samueli ndaakinyĩte Giligali, nao andũ nĩ maambĩrĩirie kũhurunjũka makamweherera. 9 Mũthia-inĩ Saulu akiuga atĩrĩ: “Ndeherai igongona rĩa njino na magongona ma ũiguano.” Na akĩruta igongona rĩa njino.+
10 Na rĩrĩa aarĩkirie kũruta igongona rĩa njino, o hĩndĩ ĩyo Samueli agĩkinya. Nĩ ũndũ ũcio Saulu akiuma nĩguo akamũtũnge na amũrathime. 11 Nake Samueli akĩmũũria ũũ: “Nĩ atĩa weka?” Saulu akĩmũcokeria atĩrĩ: “Nyonire andũ makĩndiganĩria,+ nawe waga gũkinya ihinda-inĩ rĩrĩa rĩatuĩtwo, na Afilisti nĩ gũcokanĩrĩra megũcokanagĩrĩra hamwe Mikimashi.+ 12 Kwoguo ndeĩra atĩrĩ, ‘Rĩu Afilisti megũikũrũka moke maatharĩkĩre gũkũ Giligali, na ndirĩ ndĩrathaitha Jehova nĩguo njĩtĩkĩrĩke nĩwe.’* Nĩ ũndũ ũcio ndona no nginya ndute igongona rĩu rĩa njino.”
13 Nĩ ũndũ ũcio Samueli akĩra Saulu ũũ: “Nĩ weka ũndũ wa ũrimũ. Ndũnathĩkĩra rĩathani rĩrĩa Jehova Ngai waku aakũheire.+ Korũo nĩ wathĩkire, Jehova nĩ angĩatũma ũthamaki waku ũrũme biũ thĩinĩ wa Isiraeli tene na tene. 14 No rĩu ũthamaki waku ndũgũtũũra.+ Jehova nĩ egwetha mũndũ ũngĩ wĩtĩkĩrĩkĩte ngoro-inĩ yake,+ na Jehova nĩ ekũmũtua mũtongoria wa andũ ake,+ tondũ ndũnathĩkĩra ũrĩa Jehova aagwathire.”+
15 Thutha ũcio Samueli agĩũkĩra akiuma Giligali akĩambata agĩthiĩ Gibea ya Benjamini, nake Saulu agĩtara andũ; arĩa maatigĩtwo marĩ hamwe nake maarĩ arũme 600.+ 16 Na rĩrĩ, Saulu, mũrũwe Jonathani, na andũ arĩa maatigĩtwo nao maaikaraga Geba+ ya Benjamini, nao Afilisti maambĩte hema ciao Mikimashi.+ 17 Nacio ikundi cia atharĩkĩri cioimaga kambĩ-inĩ ya Afilisti irĩ ikundi ithatũ. Gĩkundi kĩmwe gĩgathiĩ kĩerekeire barabara ĩrĩa ĩthiĩte Ofara, bũrũri-inĩ wa Shuali; 18 gĩkundi kĩngĩ gĩgathiĩ kĩerekeire barabara ya Bethi-horoni;+ nakĩo gĩkundi gĩa gatatũ gĩgathiĩ kĩerekeire barabara ĩrĩa ĩthiĩte mũhaka-inĩ ũrĩa ũngʼetheire mũkuru wa Zeboimu, kwerekera werũ-inĩ.
19 Na rĩrĩ, gũtiarĩ na mũturi wa cuma bũrũri-inĩ wa Isiraeli, tondũ Afilisti mooigĩte atĩrĩ: “Nĩguo Ahibirania matigathondeke rũhiũ rwa njora o na kana itimũ.” 20 Na Aisiraeli othe maabataraga gũikũrũka kũrĩ Afilisti nĩguo manoorerũo hiũ ciao cia mĩraũ, thururu, mathanwa, kana hiũ ciao cia magetha. 21 Maarĩhagio pimu* ĩmwe kũnoorerũo hiũ cia mĩraũ, thururu, indo cia magego matatũ, mathanwa, kana kũhangĩra mũcengi. 22 Naguo mũthenya wa mbaara, gũtirĩ mũndũ o na ũmwe harĩ arĩa maarĩ na Saulu na Jonathani wakoragwo na rũhiũ rwa njora kana itimũ guoko-inĩ gwake;+ no Saulu na mũrũwe Jonathani tu maarĩ na matharaita.
23 Na rĩrĩ, thigari cia kambĩ ya Afilisti nĩ ciathiĩte nginya kĩringĩro-inĩ kĩa Mikimashi.+