Ezekieli

27 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Nawe mũrũ wa mũndũ-rĩ, ina rwĩmbo rwa gũcakaĩra itũũra rĩa Turo,+ 3 wĩre Turo atĩrĩ,

‘Wee ũikaraga njĩra-inĩ cia gũtonya iria-inĩ,

O wee ũhũũraga biacara na ikundi cia andũ a icigĩrĩra nyingĩ,

Jehova Mwathani Ũrĩa Mũnene oigĩte ũũ:

“Wee Turo, wee mwene uugĩte atĩrĩ: ‘Ũthaka wakwa nĩ mũkinyanĩru.’+

 4 Matũũra maku marĩ iria-inĩ gatagatĩ,

Nao aaki aku nĩ matũmĩte ũthaka waku ũkinyanĩre.

 5 Maathondekire mbaũ ciaku ciothe na mĩtĩ ya mĩthengera kuuma Seniri,+

Na makĩgĩra mũtarakwa Lebanoni nĩguo magũthondekere gĩtugĩ gĩa gũcuuria taama.

 6 Magĩgũthondekera mĩiko makĩhũthĩra mĩgandi ya Bashani,

Naguo mwena waku wa mbere wathondeketwo na mĩthithinda ya kuuma icigĩrĩra cia Kitimu ĩgemetio na mĩguongo.+

 7 Taama waku wathondeketwo na gatani ya kuuma Misiri ĩgemetio na marangi maingĩ,

Nacio itambaya iria ciahumbĩrĩte mwena wa igũrũ ciathondeketwo na ndigi cia rangi wa mburuu na cia papũ kuuma icigĩrĩra cia Elishahu.+

 8 Aikari a Sidoni na Arivadi+ nĩo maagũtwarithagia.

Nao andũ aku arĩa ogĩ, wee Turo, nĩo maarĩ aruti aku a wĩra.+

 9 Andũ arĩa marĩ na ũmenyeru* na ogĩ a kuuma Gebali+ nĩo maathingaga mĩanya yaku.+

Meri ciothe cia iria-inĩ o hamwe na aruti wĩra a cio mookaga harĩ wee kũhũũra biacara.

10 Andũ a Perisia, Ludu, na Puti+ maarĩ mbũtũ-inĩ yaku, nĩo maarĩ arũme aku a mbaara.

Maacuuragia ngo ciao o na ngũbia ciao thĩinĩ waku, na nĩ maakũrehagĩra riri.

11 Andũ a Arivadi arĩa maarĩ mbũtũ-inĩ yaku maarũgamaga mathiũrũrũkĩirie thingo ciaku,

Nao arũme marĩ na ũcamba nĩo maarangagĩra nyũmba ciaku iria ndaya na igũrũ.

Maacuuragia ngo cia gĩthiũrũrĩ gũthiũrũrũka thingo-inĩ ciaku ciothe

Na magĩtũma ũthaka waku ũkinyanĩre.

12 “‘“Andũ a Tarishishi+ nĩ maahũũraga biacara nawe tondũ wa ũtonga waku mũingĩ.+ Maakũũranagia indo ciaku na betha, kĩgera, ibati, na ngocorai.*+ 13 Nao andũ a Javani, Tubali,+ na Mesheki+ nĩ maahũũraga biacara nawe, magakũũranagia indo ciaku na ngombo+ o hamwe na indo cia gĩcango. 14 Andũ a nyũmba ya Togarima+ nĩ maakũũranagia indo ciaku na mbarathi na nyũmbũ. 15 Andũ a Dedani+ nĩ maahũũraga biacara nawe; nĩ waandĩkĩte ahũũri biacara kuuma icigĩrĩra nyingĩ; nao maakũrĩhaga na mĩguongo+ na mbaũ njirũ cia goro. 16 Andũ a Edomu nĩ maahũũraga biacara nawe tondũ indo ciaku ciarĩ nyingĩ. Maakũũranagia indo ciaku na tũhiga twa takuisi, ndigi cia papũ, itambaya ngʼemie, ngora njega, tũhiga twa goro twa iria-inĩ, na tũhiga twa rubi.

17 “‘“Andũ a Juda o hamwe na bũrũri wa Isiraeli nĩ maahũũraga biacara nawe; magakũũranagia indo ciaku+ na ngano ya kuuma Minithu,+ irio iria njega, ũũkĩ,+ maguta, na balisamu.+

18 “‘“Andũ a Dameski+ nĩ maahũũraga biacara nawe tondũ warĩ na indo nyingĩ na ũtonga mũingĩ, magakũũrania indo ciaku na ndibei ya kuuma Helibona na guoya wa ngʼondu kuuma Zaharu.* 19 Andũ a Vedani na Javani kuuma Uzali maarehaga kĩgera kĩrĩa gĩture, mwĩnũ,* na karamathi* nĩguo makũũranie na indo ciaku. 20 Andũ a Dedani+ nĩo maakwendagĩria matandĩko ma* mbarathi. 21 Waandĩkĩte Aarabu na atongoria othe a Kedari,+ arĩa maarĩ ahũũri biacara a tũgondu, ndũrũme, na mbũri.+ 22 Ahũũri biacara a Sheba na Raama+ nĩ maahũũraga biacara nawe; maakũrehagĩra mĩthemba yothe ya indo iranunga wega, mahiga ma goro, na thahabu nĩguo makũũranie na indo ciaku.+ 23 Andũ a Harani,+ Kane, Edeni,+ ahũũri biacara a Sheba,+ Ashuru,+ na Kilimadi nĩ maahũũraga biacara nawe. 24 Thĩinĩ wa thoko ciaku nĩ meendagia ngora thaka, tũbuuti tũtumĩtwo na itambaya cia mburuu igemetio, mĩgeka ya marangi maingĩ, na ciothe cioohagwo wega na mĩkwa.

25 Meri cia Tarishishi+ nĩcio ciagũkuuagĩra indo ciaku cia biacara,

Nawe ũkĩiyũra na ũgĩkĩrĩrĩria* o kũu iria-inĩ gatagatĩ.

26 Arĩa magũtwarithagia magũtwarĩte iria-inĩ kũrĩa kũriku;

Naruo rũhuho rwa mwena wa irathĩro rũgagũthũkangia ũrĩ o kũu iria-inĩ gatagatĩ.

27 Ũtonga waku, indo ciaku cia biacara, aruti wĩra aku, na arĩa magũtwarithagia,

Arĩa mathingaga mĩanya yaku, ahũũri biacara aku,+ na arũme othe a mbaara+

Kĩrĩndĩ* gĩothe kĩrĩa kĩrĩ thĩinĩ waku

Othe makaarikĩra iria-inĩ gatagatĩ mũthenya ũrĩa ũkaagwa.+

28 Rĩrĩa arĩa magũtwarithagia magaakaya, mabũrũri ma gĩcũa-inĩ nĩ magaathingitha.

29 Arĩa othe matwarithagia meri na mĩiko, na aruti wĩra a meri

Makooima meri-inĩ ciao marũgame thĩ nyũmũ.

30 Makaanĩrĩra marĩre nĩ ũndũ waku marĩ na ruo+

Nĩ makeikĩria tĩri mĩtwe-inĩ yao na megaragarie mũhu-inĩ.

31 Makeyenja magĩe kĩhara na mehumbe nguo cia makũnia;

Makaarĩra nĩ ũndũ waku marĩ na ruo* magĩkayaga mũno.

32 Na nĩ makaaina rwĩmbo magĩcakaya moige ũũ ũhoro-inĩ waku:

‘Nũũ ũtariĩ ta Turo, o ũcio rĩu ũkirĩte arĩ iria-inĩ gatagatĩ?+

33 Hĩndĩ ĩrĩa indo ciaku ciokaga ciumĩte iria-inĩ, nĩ wahũnagia ikundi nyingĩ cia andũ.+

Ũtonga waku mũingĩ na indo ciaku cia biacara nĩ ciatongagia athamaki a thĩ.+

34 Rĩu nĩ ũthũkangĩtio ũrĩ iria-inĩ kũrĩa kũriku,+

Na indo ciaku ciothe cia biacara o hamwe na andũ aku makarikĩra hamwe nawe.+

35 Aikari othe a icigĩrĩra magaakũrora magegete,+

Nao athamaki ao mainaine nĩ guoya,+ na mothiũ mao matangĩke.

36 Ahũũri biacara a ndũrĩrĩ nĩ makaahuuha mĩrũri nĩ ũndũ wa maũndũ marĩa mekĩkĩte harĩ wee.

Mũthia waku ũgaakorũo ũrĩ wa narua na mũũru mũno,

Na ndũgaacoka gũkorũo kuo rĩngĩ mahinda mothe.’”’”+