Ũrĩa Tũgunĩkaga nĩ Gwathĩkĩra Ũtongoria wa Gĩtheokrasi

NO MŨHAKA twĩnyihĩrie ũnene wa Jehova, Mwathani Mũnene wa Igũrũ na Thĩ, nĩguo tũkorũo tũrĩ ithondeka rĩrĩa rĩreka wendi wake. Nĩ tũkũũranĩte atĩ Mũrũwe nĩwe mũtwe wa kĩũngano gĩa Gĩkristiano, na ningĩ nĩ twathĩkagĩra ũtongoria ũrĩa Jehova aigĩte maũndũ-inĩ mangĩ. Gwathĩkĩra ũtongoria ũcio wa gĩtheokrasi kũgunaga andũ othe.

² Mũbango wa andũ gwathĩkĩra ũtongoria ũrĩa Ngai akoragwo aigĩte waambĩrĩirie mũgũnda-inĩ wa Edeni. Ũndũ ũcio wonekaga thĩinĩ wa mawatho marĩa Ngai aaheanire thĩinĩ wa Kĩambĩrĩria 1:28 na 2:16, 17. Nyamũ ciaagĩrĩirũo gwathĩkĩra ũtongoria wa andũ, nao Adamu na Hawa menyihĩrie ũtongoria wa Ngai na mekage wendi wake. Gwathĩkĩra ũtongoria ũcio nĩ kũngĩatũmire kũgĩe na thayũ na mĩbango mĩega. Ũtongoria wĩgiĩ gwathĩkĩra ũnene nĩ wacokire kũgwetwo thĩinĩ wa 1 Akorintho 11:3. Mũtũmwo Paulo aandĩkire ũũ: “No ngwenda mũmenye atĩ mũtwe wa mũndũrũme o wothe nĩ Kristo; na mũtwe wa mũtumia nĩ mũndũrũme; na mũtwe wa Kristo nĩ Ngai.” Ũndũ ũcio wonanagia atĩ no Jehova wiki ũtakoragwo arĩ rungu rwa ũtongoria.

³ Andũ aingĩ ũmũthĩ matiathĩkagĩra ũnene. Nĩkĩ hihi? Thĩna waambĩrĩirie mũgũnda-inĩ wa Edeni rĩrĩa aciari aitũ a mbere maathuurire kũrega kwĩnyihĩria ũnene wa Ngai. (Kĩam. 3:4, 5) O na kũrĩ ũguo, ũndũ ũcio ndwatũmire magĩe na wĩyathi makĩria. Handũ ha ũguo, maaingĩrire rungu rwa ũtongoria wa kĩũmbe kĩũru kĩa roho, Shaitani ũrĩa Mũcukani. Ũremi ũcio watũmire andũ mamũranio na Ngai. (Kol. 1:21) Nĩ ũndũ ũcio, andũ aingĩ ũmũthĩ makoragwo marĩ rungu rwa hinya wa ũrĩa mũũru.​—1 Joh. 5:19.

⁴ Ithuĩ nĩ tuumĩte rungu rwa hinya wa Shaitani nĩ ũndũ wa kwĩruta Kiugo kĩa Ngai na gwĩka ũrĩa kiugaga. Tũrĩ Aira a Jehova mamwĩyamũrĩire na makabatithio, nĩ twĩtĩkĩrĩte Jehova akorũo arĩ we Mwathani Mũnene ũtũũro-inĩ witũ. Nĩ twĩtĩkanagia na Mũthamaki Daudi ũrĩa woigire atĩ Jehova nĩwe “mũnene igũrũ rĩa arĩa angĩ othe.” (1 Maũ. 29:11) Tuugaga ũũ tũrĩ na wĩnyihia: “Menyai atĩ Jehova nĩ Ngai. Nĩwe watũũmbire, na ithuĩ tũrĩ ake. Tũrĩ andũ ake, o ithuĩ ngʼondu iria arĩithagia.” (Thab. 100:3) Nĩ twĩtĩkĩtie atĩ Jehova nĩ mũnene na nĩ twagĩrĩirũo kũmwĩnyihĩria biũ, tondũ nĩwe wombire indo ciothe. (Kũg. 4:11) Tondũ tũrĩ ndungata cia Ngai ũrĩa wa ma, tũrũmagĩrĩra Jesu Kristo, ũrĩa waigire kĩonereria kĩega biũ gĩa gwathĩkĩra Ngai.

⁵ Jesu eerutire ũndũ ũrĩkũ kuumana na maũndũ marĩa aanyamarĩkire nĩmo arĩ gũkũ thĩ? Ahibirania 5:8 ĩcokagia ũũ: “O na gũtuĩka aarĩ mũriũ, nĩ eerutire wathĩki kuumana na maũndũ marĩa aanyamarĩkire nĩmo.” Ma nĩ atĩ, Jesu aaikarire arĩ mwĩhokeku harĩ Ithe o na acemania na moritũ. Makĩria ma ũguo, Jesu ndeekire ũndũ o na ũmwe eĩrĩte we mwene. Ndaaragia ũndũ o na ũmwe eĩrĩte we mwene; o na kana agĩĩcarĩria rũgooco. (Joh. 5:19, 30; 6:38; 7:16-18) Hĩndĩ ya ũtungata wake, nĩ aakenagĩra gwĩka wendi wa Ithe, o na gũtuĩka ũndũ ũcio nĩ watũmaga akarario na anyarirũo. (Joh. 15:20) O na kũrĩ ũguo, Jesu no aathĩkagĩra Ngai. “Eenyihirie” o nginya rĩrĩa “aakuĩrĩire mũtĩ-inĩ wa kũnyarirĩrũo.” Nĩ ũndũ wake gwathĩkĩra Jehova biũ, nĩ kwagĩire na irathimo nyingĩ, andũ makĩgĩa na ũhonokio wa tene na tene, Jesu we mwene agĩtũũgĩrio, na Jehova akĩgoocithio.​—Afil. 2:5-11; Ahib. 5:9.

ŨRĨA TŨNGĨONANIA NĨ TŨRATHĨKĨRA ŨTONGORIA WA GĨTHEOKRASI

⁶ Rĩrĩa twenyihĩria Ngai na njĩra ya gwĩka wendi wake, nĩ twĩthemaga gũkua ngoro na mĩtangĩko mĩingĩ ĩrĩa andũ arĩa maregaga kwĩnyihĩria ũnene wake macemanagia nayo. Mũcukani, thũ itũ ĩrĩa nene, aikaraga agĩcaragia mĩeke ya gũtũtambura. Ĩndĩ no tũkũũrũo kuuma kũrĩ ũcio mũũru tũngĩĩhanda tũregane nake biũ na twĩnyihĩrie Jehova na njĩra ya kũmwathĩkĩra twĩyendeire.​—Mat. 6:10, 13; 1 Pet. 5:6-9.

⁷ Thĩinĩ wa kĩũngano gĩa Gĩkristiano, nĩ tũtĩaga ũnene wa Kristo na tũgatĩĩa ũnene ũrĩa aheete “ngombo ĩrĩa njĩhokeku na njũgĩ.” Ũndũ ũcio nĩ ũhutagia mĩthiĩre itũ na muonere ũrĩa tũkoragwo naguo kwerekera andũ arĩa angĩ. Kwĩnyihĩria ũnene wa Jehova kĩũngano-inĩ nĩ kũrĩtũteithagia gwathĩkĩra Kiugo kĩa Ngai maũndũ-inĩ mothe megiĩ ũthathaiya witũ. Maũndũ macio mahutĩtie ũtungata witũ, gũthiĩ mĩcemanio na kũnyitanĩra, gwathĩkĩra athuri, na kũnyita mbaru mĩbango ya ithondeka.​—Mat. 24:45-47; 28:19, 20; Ahib. 10:24, 25; 13:7, 17.

⁸ Gwathĩkĩra Ngai nĩ gũtũmaga kĩũngano gĩkorũo na thayũ, ũgitĩri, na mĩbango mĩega. Na njĩra ĩyo, ngumo cia Jehova nĩ cionekaga harĩ ndungata ciake. (1 Kor. 14:33, 40) Maũndũ marĩa twĩyoneire ithondeka-inĩ rĩa Jehova nĩ matũmaga tuuge o ta ũrĩa Mũthamaki Daudi ooigire. Thutha wa kuona ngũrani ĩrĩa ĩkoragwo ho gatagatĩ-inĩ ka ndungata cia Jehova na andũ arĩa aganu, Daudi ooigire ũũ acanjamũkĩte: “Gũkena nĩ andũ arĩa Jehova arĩ we Ngai wao!”​—Thab. 144:15.

⁹ Thĩinĩ wa kĩhiko na famĩlĩ-inĩ, “mũtwe wa mũtumia nĩ mũndũrũme.” Athuri magĩrĩirũo kwĩnyihĩria Kristo, nake Kristo agĩrĩirũo kwĩnyihĩria Ngai. (1 Kor. 11:3) Atumia magĩrĩirũo kwĩnyihĩria athuri ao, nacio ciana ciathĩkĩre aciari a cio. (Ef. 5:22-24; 6:1) Nĩ kũgĩaga na thayũ rĩrĩa o mũndũ thĩinĩ wa famĩlĩ athĩkĩra mũbango ũcio.

¹⁰ Mũthuri agĩrĩirũo gũtongoria famĩlĩ yake na njĩra ya wendo, akĩĩgerekania na Kristo. (Ef. 5:25-29) Angĩaga kũhũthĩra gĩthũri kana age gũtiganĩria ũnene wake, mũtumia na ciana nĩ mamwĩnyihagĩria makenete. Mũtumia akoragwo arĩ mũteithia wa mũthuri wake. (Kĩam. 2:18) Mũtumia angĩnyita mũthuri wake mbaru na akamũhe gĩtĩo, nĩ endagwo nĩwe na akagoocithia Ngai. (1 Pet. 3:1-4) Rĩrĩa athuri na atumia marũmĩrĩra ũtaaro wa Bibilia wĩgiĩ ũnene, nĩ maigagĩra ciana ciao kĩonereria kĩega gĩa gwathĩkĩra Ngai.

¹¹ Gwathĩkĩra Ngai ningĩ nĩ kũhutĩtie ũrĩa tuonaga “athani arĩa anene,” arĩa “maigĩtwo nĩ Ngai ikĩro-inĩ ciao itiganĩte.” (Rom. 13:1-7) Tondũ Akristiano nĩ mathĩkagĩra watho, nĩ marĩhaga igooti, na njĩra ĩyo makarĩha ‘Kaisari indo cia Kaisari, no indo cia Ngai makarĩha Ngai.’ (Mat. 22:21) Makĩria ma ũguo, mĩbango ya kũhunjia yagĩrĩirũo gũtwarana na mawatho marĩa marĩ kuo ma kũgitĩra ũhoro wa andũ. Rĩrĩa twathĩkĩra na twenyihĩria arĩa matuĩtwo athani maũndũ-inĩ mothe marĩa matararegana na mawatho ma ũthingu ma Jehova, nĩ tũhotaga kwerekeria kĩyo gitũ na hinya witũ harĩ wĩra wa kũhunjia.​—Mar. 13:10; Atũm. 5:29.

¹² Gwathĩkĩra ũtongoria wa Gĩtheokrasi kũhutagia maũndũ mothe ma ũtũũro witũ. Nĩ twĩrĩgagĩrĩra mũno rĩrĩa andũ othe magakorũo marĩ rungu rwa Jehova Ngai. (1 Kor. 15:27, 28) Na githĩ gĩtigaakorũo kĩrĩ kĩrathimo kĩnene mũno harĩ arĩa megũtũũra mathĩkagĩra ũnene wa Jehova marĩ rungu rwake tene na tene!