Thĩna Ũrĩa Ũtũmĩte Tũgĩe na Mwĩhoko

“Matukũ marĩa ma kũrigĩrĩria nĩgũkagĩa mahinda ma ũgwati.”​—2 TIMOTHEO 3:1.

HIHI wanaigua kana ũkĩyonera ũmwe wa maũndũ maya ma kĩeha?

● Mũrimũ mũũru kũniina andũ aingĩ.

● Ngʼaragu gũtũma andũ aingĩ mũno makue.

● Gĩthingithia kũũraga andũ ngiri nyingĩ na gĩgatiga angĩ aingĩ matarĩ na ũikaro.

Tũratathi-inĩ tũrĩa tũrũmĩrĩire, nĩ ũkuona ma ĩgũgũteithia gwĩciria na ũritũ igũrũ rĩa maũndũ ta macio. Ningĩ nĩ ũkuona atĩ Bibilia nĩ yarathĩte maũndũ ta macio nĩ mangĩgakorũo kuo ‘matukũ-inĩ ma kũrigĩrĩria.’a

O na kũrĩ ũguo muoroto wa icunjĩ ici ti gũkuonia ũrĩa thĩ ĩrĩa tũratũũra ĩrĩ na mathĩna. Kwahoteka we mwene nĩ wĩyonagĩra mathĩna macio. Ithenya rĩa ũguo-rĩ, icunjĩ ici irongoreirio gũkũhe mwĩhoko. Nĩ igũkuonia atĩ kũhinga kwa morathi macio matandatũ kũronania atĩ “matukũ ma kũrigĩrĩria” nĩ megũkinya mũico ica ikuhĩ. Ningĩ icunjĩ icio nĩ ikwarĩrĩria itũmi iria andũ kaingĩ marutaga makĩregana na ũira ũcio, na nĩ ikuonania gĩtũmi kĩega gĩa gwĩtĩkia atĩ maũndũ mega marĩ hakuhĩ.

[Kohoro ka magũrũ-inĩ]

Ũrathi wa 1. Ithingithia

“Nĩgũkagĩa ithingithia nene.”​—LUKA 21:11.

● Winnie, kairĩtu ka mwaka ũmwe na nuthu nĩ kaahonokirio kuuma nyũmba-inĩ yamomokete bũrũri-inĩ wa Haiti. Aandĩki a mohoro a ceceni ĩmwe ya TV makĩribota ũhoro wa gĩcanjama kĩu nĩo maaiguire gakĩrĩra. Nĩ kaahonokire gĩthingithia kĩu, no aciari ako matiigana kũhonoka.

ŨŨMA WA MAŨNDŨ NĨ ŨRĨKŨ? Hĩndĩ ĩrĩa kwagĩire na gĩthingithia kĩa ũritũ wa Richter 7.0 bũrũri-inĩ wa Haiti mweri wa Januari 2010, andũ makĩria ma 300,000 nĩ maakuire. Angĩ milioni 1.3 magĩtigwo matarĩ ciikaro. O na gũtuĩka gĩthingithia kĩa Haiti kĩarĩ kĩnene-rĩ, kwanagĩa ithingithia ingĩ. Kuuma Ĩpuro 2009 nginya Ĩpuro 2010 gũkoretwo na ithingithia ta 18 thĩinĩ wa thĩ yothe.

KAINGĨ ANDŨ MARUTAGA GĨTŨMI KĨRĨKŨ? Ti kuuga atĩ ihinda rĩrĩ nĩrĩo kũrĩ na ithingithia nyingĩ; tekinolonjĩ ya kĩĩrĩu nĩyo ĩtũmaga tũmenye ũhoro wacio makĩria gũkĩra andũ a tene.

HIHI GĨTŨMI KĨU NĨ KĨAGĨRĨIRE? Wĩcirie ũndũ ũyũ: Bibilia ndĩtĩtĩrithagia mũigana wa ithingithia iria ingĩgaakorũo kuo matukũ-inĩ ma kũrigĩrĩria. Ithenya rĩa ũguo, yugaga atĩ “kũndũ na kũndũ,” nĩ gũkagĩa “ithingithia nene” ũndũ ũrĩa ũngĩgatũma ikorũo irĩ kĩmwe kĩa imenyithia nene cia mahinda maya tũratũũra.—Mariko 13:8; Luka 21:11.

ŨGWĨCIRIA ATĨA? Hihi nĩ kũrĩ na ithingithia nene, ta ũrĩa Bibilia yarathĩte?

Ithingithia irĩ ciki ti kĩmenyithia kĩiganu gĩa kuonania atĩ tũratũũra matukũ ma kũrigĩrĩria. Ĩndĩ, ũcio nĩ ũrathi ũmwe ũrahinga. Reke twarĩrĩrie ũrathi ũngĩ.

[Mbica karatathi ka 4]

“Ithuĩ [arĩa tũthuthuragia thĩ] tũciĩtaga ithingithia nene. Andũ arĩa angĩ othe maciĩtaga cia kũmakania.”​—KEN HUDNUT, WA ŨTUĨRIA WA US WĨGIĨ THĨ.

[Mbica karatathi ka 4]

© William Daniels/Panos Pictures

Ũrathi wa 2. Ngaʼragu

‘Nĩ gũkagĩa ngʼaragu.’​—MARIKO 13:8.

● Mũthuri ũmwe nĩ orĩire itũũra-inĩ rĩa Quaratadji, bũrũri-inĩ wa Niger. Ciana cia tatawe, aarĩ na ariũ a nyina o nao nĩ moimĩte icagi-inĩ cia kũraya makĩgeria kũũrĩra ngʼaragu ĩyo. Ona kũrĩ ũguo, mũndũ ũcio eeyaraganĩtie mũgeka-inĩ arĩ o wiki. Aarĩ wiki nĩkĩ? Sidi, cibũ wa itũũra rĩu oigire ũũ: “Mũndũ ũyũ nĩ agĩte irio cia kũhe [famĩlĩ yake] na kwoguo ndangĩrakirĩrĩirie kuona ĩgĩthĩnĩka.”

ŨŨMA WA MAŨNDŨ NĨ ŨRĨKŨ? Thĩinĩ wa thĩ, hakuhĩ mũndũ 1 harĩ andũ 7 ndonaga irio cia kũmũigana cia o mũthenya. Kũrĩa gũtororoketie nĩ icigo cia Afrika mũhuro wa Sahara, kũrĩa mũndũ 1 harĩ 3 aikaraga kahinda karaihu atarĩ na gĩa kũrĩa. Nĩguo ũmenye ũndũ ũcio wega, ta wĩcirie ũhoro wa famĩlĩ ĩrĩ na mũthuri, mũtumia na kaana. Mangĩkorũo na irio cia kũigana andũ erĩ tu-rĩ, ũgwĩciria nũũ ũngĩaga kũrĩa? Hihi nĩ mũthuri-ĩ? nĩ mũtumia-ĩ? kana nĩ kaana? Famĩlĩ ta icio no mũhaka itue itua ta rĩu o mũthenya.

KAINGĨ ANDŨ MARUTAGA GĨTŨMI KĨRĨKŨ? Thĩ ĩciaraga irio nyingĩ cingĩigana andũ othe na itigare. Kĩrĩa kĩrabatarania nĩ ũrũgamĩrĩri mwega wa indo iria irĩ thĩinĩ wa thĩ.

HIHI GĨTŨMI KĨU NĨ KĨAGĨRĨIRE? Ma nĩ atĩ, gũkĩra hĩndĩ ĩngĩ o yothe, arĩmi no mahote gũkũria na gũkinyĩria andũ irio nyingĩ makĩria. Hatirĩ nganja, thirikari cia andũ ciagĩrĩirũo nĩ kũrũgamĩrĩra mũgaĩre wa irio thĩinĩ wa thĩ nĩguo thĩna wa ngʼaragu ũthire. O na kũrĩ ũguo, itihotete gwĩka ũguo o na thutha wa kũgeria mĩaka mĩingĩ.

ŨGWĨCIRIA ATĨA? Hihi rĩandĩko rĩa Mariko 13:8 nĩ rĩrahinga? O na gũtuĩka kũrĩ na ũthii wa na mbere wa tekinolonjĩ-rĩ, na githĩ ngʼaragu to ĩranyarira andũ thĩ yothe?

Kaingĩ thutha wa ithingithia na ngʼaragu nĩ kũgĩaga na mathĩna mangĩ marĩa o namo makonainie na kĩmenyithia kĩa matukũ ma kũrigĩrĩria.

[Mbica karatathi ka 5]

“Makĩria ma gĩcunjĩ gĩa ithatũ gĩa ciana iria ikuaga kuumana na rĩmunia, kũharũo na mĩrimũ ingĩ no ihonokio korũo nĩ cionaga irio cia kũigana.”​—ANN M. VENEMAN, MŨNENE WA KĨAMA GĨA THĨ KĨRĨA KĨRŨGAMAGĨRĨRA KĨGĨNA GĨA GŨTEITHIA CIANA.

[Mbica karatathi ka 5]

© Paul Lowe/Panos Pictures

Ũrathi wa 3. Mĩrimũ

“Nĩgũkagĩa . . . mĩrimũ mĩũru ĩrĩa ĩrehage mũthiro.”​—LUKA 21:11.

● Bonzali, mũrigitani ũmwe bũrũri-inĩ waarĩ mbaara wa Afrika, aageragia o ũrĩa wothe angĩahotire kũrigita andũ a itũũra rĩao arĩa meenjaga tũhiga twa goro, arĩa maatooretio nĩ mũrimũ wa Marburg.a Ihoya rĩake rĩa gwĩtia ũteithio kuuma kũrĩ arigitani taũni-inĩ ĩrĩa yaarĩ nene, rĩtiigana gũcokio. Ũteithio waakinyire thutha wa mĩeri ĩna, no Bonzali nĩ aakuĩte. Aagwatirio mũrimũ ũcio wa Marburg nĩ andũ acio aageragia kũhonokia.

ŨŨMA WA MAŨNDŨ NĨ ŨRĨKŨ? Mĩrimũ ya mahũri (ta rĩmunia), kũharũo, mũkingo, TB, na malaria nĩ ĩmwe ya mĩrimũ ĩrĩa mĩũru mũno ĩrĩa yũragaga andũ. Mwaka ũmwe ũtarĩ kũraihu, mĩrimũ ĩyo ĩtano yooragire andũ ta milioni 10.7. Na njĩra ĩngĩ nĩ ta kuuga mĩrimũ ĩyo, yooragaga mũndũ ũmwe o thutha wa cekondi ithatũ, mwaka-inĩ ũcio.

KAINGĨ ANDŨ MARUTAGA GĨTŨMI KĨRĨKŨ? Andũ nĩ mongererekete thĩinĩ wa thĩ, kwoguo no mũhaka gũkorũo na andũ aingĩ arũaru. Kũrĩ na andũ aingĩ makĩria a kũgwatio mĩrimũ.

HIHI GĨTŨMI KĨU NĨ KĨAGĨRĨIRE? Ma nĩ atĩ, andũ thĩinĩ wa thĩ nĩ mongererekete mũno. Ĩndĩ noguo ũũgĩ wa andũ wa gũthima mĩrimũ, kũmĩgirĩrĩria, na kũmĩrigita wongererekete. Kwoguo-rĩ, na githĩ mĩrimũ na mathĩna marĩa ĩrehagĩra andũ matikĩagĩrĩirũo nĩ gũkorũo manyihĩte? O na kũrĩ ũguo, ũrĩa kũrĩ nĩ mũgarũ na ũguo biũ.

ŨGWĨCIRIA ATĨA? Hihi andũ nĩ maranyarirĩka nĩ mĩrimũ mĩũru o ta ũrĩa Bibilia yaarathĩte?

Ithingithia, ngʼaragu, na mĩrimũ nĩ maũndũ mooru marĩa marathũkia na njĩra nene ũtũũro wa andũ milioni nyingĩ. Andũ milioni ingĩ nyingĩ nĩ manyamaragio nĩ arĩa angĩ— aingĩ manyamaragio nĩ arĩa maagĩrĩirũo nĩ kũmagitĩra. Reke tuone ũrĩa Bibilia yaarathĩte kũngĩkahaana.

[Kohoro ka magũrũ-inĩ]

[Mbica karatathi ka 6]

“Nĩ ũndũ wa kũmakania gũtamburuo nĩ mũrũthi kana kĩndũ kĩngĩ, ĩndĩ no ũndũ ũmwe na kũrĩo nĩ mũrimũ mũũru ũrĩ thĩinĩ waku na kuona andũ angĩ makĩgerera ũndũ-inĩ o ta ũcio.”​—MŨTHUTHURIA WA MĨRIMŨ MICHAEL OSTERHOLM.

[Mbica karatathi ka 6]

© William Daniels/Panos Pictures

Ũrathi wa 4. Waagi wa Wendani Ũrĩa wa Ndũire

“Andũ . . . makorũo maagĩte wendani ũrĩa wa ndũire.”​—2 TIMOTHEO 3:1-3.

● Chris arutaga wĩra na gĩkundi kĩmwe gĩa kũhiũrania na ngũĩ cia famĩlĩ bũrũri-inĩ wa Ngeretha. Oigire: “Nĩ ndirikanaga mũtumia ũmwe wokire ahũrĩtwo ũũru mũno ũũ atĩ o na gũtuĩka nĩ ndamuonete mbere ĩyo-rĩ, ndiamũmenyaga. Atumia angĩ makoragwo mahinyĩrĩrĩkĩte mũno kĩĩmeciria nginya matihotaga kũrora mũndũ.”

ŨŨMA WA MAŨNDŨ NĨ ŨRĨKŨ? Thĩinĩ wa Bũrũri ũmwe wa Afrika, hakuhĩ mũtumia ũmwe harĩ atatũ, anakomwo nake kĩa hinya arĩ mwana. Ũthuthuria ũngĩ wekirũo bũrũri-inĩ o ũcio, woonanirie atĩ gĩcunjĩ gĩa ithatũ gĩa athuri monaga arĩ ũndũ mwagĩrĩru kũhũra atumia ao. O na kũrĩ ũguo, to atumia mahũragwo nĩ athuri ao. Kwa ngerekano bũrũri-inĩ wa Kanada, hakuhĩ athuri atatũ harĩ ikũmi nĩ mahũragwo kana magekwo maũndũ moru nĩ atumia ao.

KAINGĨ ANDŨ MARUTAGA GĨTŨMI KĨRĨKŨ? Kuuma o tene ngũĩ cia famĩlĩ ikoretwo kuo. Ũrĩa kũrĩ nĩ atĩ ũndũ ũcio nĩ ũrarĩrĩrio makĩria thikũ ici gũkĩra tene.

HIHI GĨTŨMI KĨU NĨ KĨAGĨRĨIRE? Mĩaka-inĩ ĩrĩa mĩhĩtũku andũ nĩ makoretwo makĩmenyithio na njĩra nene maũndũ megiĩ ngũĩ cia famĩlĩ. No hihi kũmenyeka kwa mathĩna macio nĩ gũtũmĩte ngũĩ cia mĩciĩ inyihe? Aca, ũguo tiguo kũrĩ. Waagi wa wendani wa ndũire nĩ ũingĩhĩte mũno.

ŨGWĨCIRIA ATĨA? Hihi rĩandĩko rĩa 2 Timotheo 3:1-3 nĩ rĩrahinga? Hihi andũ aingĩ nĩ makoretwo matarĩ na wendani wa ndũire kwerekera famĩlĩ ciao?

Ũrathi wa gatano ũrĩa ũreyonera ũkĩhinga, ũkoniĩ thĩ ĩno iitũ tũikaraga. Rora wone ũrĩa Bibilia yugaga igũrũ rĩgiĩ ũndũ ũcio.

[Mbica karatathi ka 7]

“Ngũĩ cia famĩlĩ nĩ ũmwe wa maũndũ moru marĩa mekagwo nĩ andũ hitho-inĩ. Kaingĩ mũtumia akoragwo ekĩtwo maũndũ moru nĩ mũthuriwe maita ta 35 mbere ya kũhũra riboti kũrĩ borithi.”​—MWARIA ŨMWE WA MAŨNDŨ MEGIĨ NGŨĨ CIA FAMĨLĨ BŨRŨRI-INĨ WA NGERETHA.

Ũrathi wa 5. Thĩ Gũthũkio

‘[Ngai nĩ] akaniina arĩa monũhaga thĩ.’​—KŨGUŨRĨRIO 11:18.

● Pirri nĩ mũthuri ũrutaga wĩra wa gũthondeka njohi ya mĩnathi gĩcagi-inĩ kĩa Kpor bũrũri-inĩ wa Nigeria. Wĩra wake nĩ ũthũkĩtio nĩ maguta maingĩ marĩa maitĩkĩte mwena ũrĩa Rũĩ rwa Niger rwĩitagĩrĩra iria-inĩ. Oigire: “Maguta macio moragaga thamaki ciitũ, magatũthũkia ngothi, magathũkia njũũĩ. Rĩu ndirĩ na wĩra wa kũruta.”

ŨŨMA WA MAŨNDŨ NĨ ŨRĨKŨ? Kũringana na athuthuria amwe, tani milioni ithathatũ na nuthu cia gĩko nĩ cingĩraga thĩinĩ wa iria o mwaka. Hakuhĩ nuthu ya gĩko kĩu nĩ plastĩki ĩrĩa ĩikaraga maĩ-inĩ mĩaka magana maingĩ ĩgĩkabutha. Makĩria ma gũthũkangia thĩ, andũ marathiĩ o na mbere kũniina indo cia kĩĩmerera na njĩra ya kũmakania. Ũthuthuria wonanagia atĩ thĩ ĩbataraga mwaka na mĩeri ĩtano nĩguo ĩcokererie kũrĩa andũ mamĩthũkangĩtie kwa ihinda rĩa mwaka ũmwe. Ngathĩti ĩĩtagwo, Sydney Morning Herald, ya Australia yoigire ũũ: “Andũ mangĩthiĩ na mbere kuongerereka na gũthũkia thĩ ũrĩa mareka-rĩ, gũkinyĩria mwaka wa 2035 tũngĩbatara Thĩ ingĩ igĩrĩ.”

KAINGĨ ANDŨ MARUTAGA GĨTŨMI KĨRĨKŨ? Andũ nĩ marĩ na ũũgĩ mũingĩ. No tũniine mathĩna macio na tũhonokie thĩ.

HIHI GĨTŨMI KĨU NĨ KĨAGĨRĨIRE? Kũrĩ na andũ na ikundi nyingĩ irĩ na kĩyo gĩa kũmenyithia andũ igũrũ rĩgiĩ mathĩna marĩa moimanaga na ũthũkangia wa thĩ. Ĩndĩ, thĩ no ĩrathiĩ na mbere gũthũkangio na gĩkĩro kĩnene.

ŨGWĨCIRIA ATĨA? Hihi nĩ harĩ bata Ngai aingĩrĩre nĩguo ahonokie thĩ ĩno tũikaraga, o ta ũrĩa eeranĩire nĩ ageeka?

Hamwe na morathi macio matano marĩrĩrio-rĩ, Bibilia ningĩ nĩ yaarathĩte mogarũrũku mega marĩa mangĩgekĩka matukũ-inĩ ma kũrigĩrĩria. Wĩcirie ũhoro wa ngerekano ĩmwe ĩgiĩ ũrathi wa gatandatũ.

[Mbica karatathi ka 8]

“Nyonaga ta mũgũnda wakwa watigire gũtuĩka gacunjĩ ka paradiso ũgĩtuĩka ta kĩara gĩa gĩko.”​—ERIN TAMBER, MŨTŨŨRI WA HAKUHĨ NA IRIA, BŨRŨRI-INĨ WA AMERIKA AKĨARIA ŨHORO WĨGIĨ MOIMĨRĨRO MA MAGUTA MARĨA MAAITĨKIRE THĨINĨ WA GULF YA MEXICO MWAKA-INĨ WA 2010.

[Mbica karatathi ka 8]

Hihi Ngai Nĩwe Ũrehaga Maũndũ Macio?

Tondũ Bibilia nĩ yarathĩte maũndũ marĩa moru tũreyonera ũmũthĩ-rĩ, hihi ũguo nĩ kuuga atĩ Ngai nĩwe ũmarehaga? Hihi nĩwe ũtũmaga tũnyamarĩke? No wone macokio marĩa mangĩtũma ũiganĩre ma ciũria icio, thĩinĩ wa gĩcunjĩ gĩa 11 kĩa ibuku rĩa Bibilia Ĩrutanaga Atĩa Kũna? rĩrĩa rĩcabĩtwo nĩ Aira a Jehova.

[Mbica karatathi ka 8]

U.S. Coast Guard photo

Ũrathi wa 6. Wĩra wa Kũhunjia Thĩinĩ wa Thĩ Yothe

“Ũhoro-ũyũ-Mwega wa ũthamaki nĩũkahunjio thĩ yothe.”​—MATHAYO 24:14.

● Vaiatea aikaraga gĩcigĩrĩra-inĩ kĩmwe gĩa Tuamotu Archipelago. O na gũtuĩka thĩinĩ wa Tuamotu gũkoragwo na tũcigĩrĩra hakuhĩ 80 tũhurunjũkĩte gĩcigo-inĩ gĩa kilomita makĩria ma 802,900, ĩkoragwo na aikari ta 16,000 tu. O na kũrĩ ũguo, Vaiatea na andũ a itũũra rĩake manahunjĩrio nĩ Aira a Jehova. Nĩkĩ? Nĩ tondũ wendi wa Aira a Jehova nĩ kũmenyithia andũ othe ũhoro ũrĩa mwega wa Ũthamaki wa Ngai, o kũrĩa guothe andũ maikaraga.

ŨŨMA WA MAŨNDŨ NĨ ŨRĨKŨ? Ndũmĩrĩri ya Ũthamaki nĩ ĩrakinya ituri ciothe cia thĩ. Thĩinĩ wa mwaka wa 2010 tu, Aira a Jehova maahũthĩrire makĩria ma mathaa bilioni 1.6 makĩhunjia ũhoro ũrĩa mwega mabũrũri-inĩ 236. Icio nĩ ta ndagĩka 30 o mũthenya wĩra-inĩ wa kũhunjia harĩ o Mũira wa Jehova. Thĩinĩ wa ihinda rĩa mĩaka ikũmi-rĩ, nĩ macabĩte na magatwarĩra andũ indo makĩrĩa ma bilioni 20 cia kũrutana Bibilia.

KAINGĨ ANDŨ MARUTAGA GĨTŨMI KĨRĨKŨ? Ndũmĩrĩri ya Bibilia ĩkoretwo ĩkĩhunjio mĩaka makiri maingĩ.

HIHI GĨTŨMI KĨU NĨ KĨAGĨRĨIRE? Ũhoro wa ma nĩ atĩ, andũ aingĩ nĩ makoretwo makĩhunjia ndũmĩrĩri ĩgiĩ Bibilia. O na kũrĩ ũguo, aingĩ mahunjĩtie o gĩcigo-inĩ kĩnini na gwa kahinda kanini. Ngũrani na ũguo-rĩ, Aira a Jehova marahunjia thĩinĩ wa thĩ yothe marĩ na mũtaratara, makahota gũkinyĩra andũ milioni nyingĩ. Aira a Jehova nĩ momĩrĩirie wĩra-inĩ wao wa kũhunjia o na kũrĩ na ũkararia mũnene wa ikundi imwe cia iria irĩ hinya mũno na itarĩ tha gũkĩra cia hĩndĩ ĩngĩ o yothe.a (Mariko 13:13) Ningĩ-rĩ, Aira a Jehova matirĩhagwo nĩguo mahunjie. Ĩndĩ mahũthagĩra mahinda mao meyendeire, na makaheana mabuku mao hatarĩ marĩhi. Wĩra wao ũtwarithagio na mbere nĩ mĩhothi ya kwĩyendera.

ŨGWĨCIRIA ATĨA? Hihi “Ũhoro-ũrĩa-Mwega wa ũthamaki” nĩ ũrahunjio thĩ yothe? Hihi kũhinga kwa ũrathi ũcio kũronania atĩ maũndũ mega marĩ hakuhĩ?

[Kohoro ka magũrũ-inĩ]

[Mbica karatathi ka 9]

“Hĩndĩ ĩrĩa yothe Jehova egũkorũo etĩkĩrĩtie, tũgũthiĩ na mbere kũhunjia ũhoro ũrĩa mwega wa Ũthamaki na kĩyo, tũkĩhũthĩra njĩra iria ciothe tũngĩhota nĩguo tũkinyĩre andũ.”​—2010 KITABU CHA MWAKA CHA MASHAHIDI WA YEHOVA.

Maũndũ Mega Marĩ Hakuhĩ!

“Amu-rĩ, no ihinda inyinyi, ũrĩa mwaganu acoke aagwo . . . No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”​—THABURI 37:10, 11.

HIHI no wende kuona ũrathi ũcio ũgwetetwo hau igũrũ ũkĩhinga? Hatarĩ nganja, no wende. Harĩ na itũmi njega cia gũtũma twĩtĩkie atĩ nĩ ũkũhinga ica ikuhĩ.

Icunjĩ iria hĩtũku, nĩ ciarĩrĩirie morathi mamwe ma Bibilia marĩa maronania wega atĩ tũratũũra thĩinĩ wa “matukũ ma kũrigĩrĩria.” (2 Timotheo 3:1-5) Ngai aatongoririe aandĩki a Bibilia marathe maũndũ macio nĩguo tũgĩe na kĩĩrĩgĩrĩro. (Aroma 15:4) Kũhinga kwa morathi ta macio kũronania atĩ mathĩna marĩa tũrĩ namo ũmũthĩ marĩ hakuhĩ gũthira.

Matukũ ma kũrigĩrĩria mathira-rĩ, hihi nĩ kĩĩ gĩkarũmĩrĩra? Ũthamaki wa Ngai nĩ ũgaathamakĩra andũ othe. (Mathayo 6:9) Ta rora wone ũrĩa Bibilia ĩtaarĩirie ũrĩa maũndũ magakorũo matariĩ thĩinĩ wa thĩ hĩndĩ ĩyo:

● Ngʼaragu nĩ ĩkaniinwo. “Bũrũri ũrogĩaga na bũthi wa ngano nginya o irĩma igũrũ.”​—Thaburi 72:16.

● Mĩrimũ nĩ ĩkaniinwo. “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.”​—Isaia 33:24.

● Thĩ nĩ ĩkerũhio. “Werũ, o na kũndũ kũrĩa kwagĩte andũ-rĩ, nĩgũgakena; o naruo rũngʼũrĩ no rũgakena, na rũagĩre rũmere mahũa ma nyeki-inĩ.”​—Isaia 35:1.

Macio no mamwe ma morathi ma Bibilia marĩa matwĩkagĩra ngoro, marĩa marĩhinga o ica ikuhĩ. Ũria Aira a Jehova magũtaarĩrie kĩrĩa gĩtũmaga makorũo na ma biũ atĩ maũndũ mega marĩ hakuhĩ.