Ũrĩa Jehova Aheanĩte Ũũma atĩ Thĩ nĩ Ĩgaatuĩka Paradiso

1. Mũnabii Isaia aaheire Aisiraeli ndũmĩrĩri ĩrĩkũ?

MŨNABII Isaia aaugire atĩ Jehova nĩ “Ngai wa ũhoro wa ma.” Kiugo kĩrĩa gĩtaũrĩtwo “ũhoro wa ma,” kiugĩte “ameni.” (Isa. 65:​16, kohoro ka magũrũ-inĩ.) Kiugo “ameni” kiugĩte “nĩ gũtuĩke guo,” kana “nĩ ma.” Rĩrĩa kiugo “ameni” kĩahũthĩrũo Bibilia-inĩ gĩkĩaria ũhoro wa Jehova kana Jesu, gĩkoragwo gĩgĩkĩra mũkonde atĩ ũndũ ũrĩa maugĩte nĩ wa ma. Kwoguo Isaia aaheaga Aisiraeli ndũmĩrĩri ĩno: Ũndũ o wothe Jehova eranĩire, hingo ciothe nĩ wa kwĩhokeka. Jehova nĩ onanĩtie ũũma wa ũndũ ũcio na njĩra ya kũhingia ũndũ o wothe aneranĩra.

2. Nĩ kĩĩ kĩngĩtũma twĩhoke ciĩranĩro cia Jehova ciĩgiĩ ihinda rĩũkĩte, na nĩ ciũria irĩkũ tũkwarĩrĩria?

² Hihi o na ithuĩ no twĩhoke ciĩranĩro cia Jehova cia ihinda rĩũkĩte? Hakuhĩ mĩaka 800 thutha wa matukũ ma Isaia, mũtũmwo Paulo nĩ aataarĩirie kĩrĩa gĩtũmaga ciĩranĩro cia Ngai ikorũo irĩ cia kwĩhokeka hingo ciothe. Aaugire: ‘Gũtingĩhoteka Ngai aheenanie.’ (Ahib. 6:18) O ta ũrĩa gathima ka maĩ matheru gatangĩruta maĩ ma cumbĩ, no taguo Jehova, o we Kĩhumo kĩa ũhoro wa ma atangĩheenania. Kwoguo no twĩhoke biũ ũndũ o wothe Jehova augĩte, nginya ciĩranĩro ciake ciothe ciĩgiĩ ihinda rĩũkĩte. Gĩcunjĩ-inĩ gĩkĩ, tũkwarĩrĩria ciũria ici: Nĩ kĩĩranĩro kĩrĩkũ Jehova atwĩrĩire kĩgiĩ ihinda rĩũkĩte? Na nĩ ũũma ũrĩkũ Jehova aheanĩte wa kuonania atĩ kĩĩranĩro kĩu nĩ gĩkaahinga?

NĨ KĨĨRANĨRO KĨRĨKŨ JEHOVA ERANĨIRE?

3. (a) Nĩ kĩĩranĩro kĩrĩkũ kĩendetwo mũno nĩ ndungata cia Jehova? (Kũguũrĩrio 21:​3, 4) (b) Hihi andũ amwe maiyũkagia atĩa rĩrĩa twameera ũhoro wĩgiĩ kĩĩranĩro kĩu?

³ Kĩĩranĩro kĩrĩa tũkwarĩrĩria, nĩ kĩĩranĩro kĩendetwo mũno nĩ ndungata ciothe cia Jehova. (Thoma Kũguũrĩrio 21:​3, 4.) Jehova eranĩire atĩ kũrĩ hĩndĩ “gĩkuũ [gĩtagaacoka] gũkorũo kuo rĩngĩ, o na gũcakaya kana kĩrĩro kana ruo.” Aingĩ aitũ nĩ tũhũthagĩra mĩhari ĩyo tũkĩhunjĩria andũ ũhoro wĩgiĩ ũrĩa ũtũũro ũgaakorũo ũhaana thĩinĩ wa Paradiso. Hihi andũ amwe maiyũkagia atĩa rĩrĩa twameera ũhoro wĩgiĩ kĩĩranĩro kĩu? Monaga ta arĩ ũndũ ũtangĩhotekeka.

4. (a) Nĩ atĩa Jehova aamenyaga akĩandĩkithia ũhoro wĩgiĩ kĩĩranĩro gĩa Paradiso? (b) Nĩ ũndũ ũrĩkũ ũngĩ Jehova eekire makĩria ma kũheana kĩĩranĩro kĩu?

⁴ Hatarĩ nganja, rĩrĩa Jehova aatongoririe mũtũmwo Johana kwandĩka igũrũ rĩgiĩ kĩĩranĩro kĩu gĩa Paradiso, nĩ aamenyaga atĩ nĩ tũngĩkeera andũ ũhoro wĩgiĩ kĩĩrĩgĩrĩro kĩu tũkĩmahunjĩria ndũmĩrĩri ya Ũthamaki. Jehova ningĩ nĩ aamenyaga atĩ nĩ ũngĩgaakorũo ũrĩ ũndũ mũritũ harĩ andũ aingĩ gwĩtĩkia kĩĩranĩro kĩu kĩa “maũndũ merũ.” (Isa. 42:9; 60:2; 2 Kor. 4:​3, 4) Kwoguo tũngĩteithia atĩa andũ arĩa angĩ gũkorũo na ma atĩ kĩĩranĩro kĩrĩa gĩtaarĩirio thĩinĩ wa Kũguũrĩrio 21:​3, 4 nĩ gĩkaahinga, na tũngĩkĩra hinya atĩa mwĩhoko witũ harĩ kĩĩranĩro kĩu? Jehova to kũheana aheanĩte kĩĩranĩro kĩu, no ningĩ nĩ atũheete itũmi njega cia gũtũteithia kuona atĩ nĩ gĩa kwĩhokeka. Nĩ itũmi irĩkũ icio?

JEHOVA NĨ AHEANĨTE ŨŨMA ATĨ KĨĨRANĨRO GĨAKE NĨ GĨKAAHINGA

5. Nĩ itũmi irĩkũ twĩ na cio cia kwĩhoka kĩĩranĩro kĩa Jehova gĩa Paradiso, na tũngĩciona kũ?

⁵ Nĩ tuonaga itũmi cia kwĩhoka kĩĩranĩro kĩa Jehova gĩa Paradiso thĩinĩ wa mĩhari ĩrĩa ĩrũmĩrĩire. Yugaga ũũ: “Ũrĩa waikarĩire gĩtĩ kĩrĩa kĩa ũnene akiuga: ‘Atĩrĩrĩ, nĩ kwerũhia ndĩrerũhia maũndũ mothe.’ Ningĩ akiuga: ‘Andĩka, tondũ ciugo icio nĩ cia kwĩhokeka na nĩ cia ma.’ Na akĩnjĩra atĩrĩ: ‘Maũndũ macio nĩ mahingu! Nĩ niĩ Alifa na Omega, kĩambĩrĩria na kĩrĩkĩrĩro.’”—Kũg. 21:​5, 6a.

6. Nĩkĩ ciugo iria irĩ thĩinĩ wa Kũguũrĩrio 21:​5, 6 nĩ ciĩkagĩra hinya mwĩhoko witũ harĩ kĩĩranĩro kĩa Jehova?

⁶ Nĩ kĩĩ kĩngĩtũma tuuge atĩ mĩhari ĩyo nĩ ĩrekĩra hinya mwĩhoko witũ harĩ kĩĩranĩro kĩu kĩa Jehova? Ibuku rĩa Upeo wa Ufunuo riugaga ũũ igũrũ rĩgiĩ mĩhari ĩyo: “Nĩ ta Jehova we mwene eekĩrire kĩrore, kana akĩhe andũ ehokeku title deed ya kuonania atĩ no nginya akaamarathima ihinda rĩũkĩte.”b Kwoguo, kĩĩranĩro kĩa Ngai kĩrĩ thĩinĩ wa Kũguũrĩrio 21:3, 4, naguo mũhari wa 5 na wa 6, Jehova agekĩra kĩrore na njĩra ya mũhaano, akaheana ũũma atĩ no nginya akaahingia kĩĩranĩro gĩake. Rekei twarĩrĩrie na njĩra ndikandikĩru ciugo icio Jehova aahũthĩrire akĩheana ũũma ũcio.

7. Nũũ wĩkĩrĩte mũkonde kĩĩranĩro gĩa Paradiso, na nĩkĩ ũndũ ũcio nĩ wa mwanya?

⁷ Mũhari wa 5 wambagĩrĩria na ciugo ici: “Ũrĩa waikarĩire gĩtĩ kĩrĩa kĩa ũnene akiuga.” (Kũg. 21:5a) Ciugo icio nĩ cia mwanya tondũ rĩrĩ nĩ rita rĩmwe harĩ maita matatũ tu marĩa Jehova we mwene arĩtie thĩinĩ wa ibuku rĩa Kũguũrĩrio. Kwoguo kĩĩranĩro kĩu gĩtiekĩrirũo mũkonde nĩ mũraika kana Jesu, no nĩ Jehova we mwene! Ũndũ ũcio no ũtũme tũkorũo na ma biũ na ciugo iria aacokire kuuga. Gĩtũmi nĩ tondũ Jehova ‘ndangĩheenania.’ (Tit. 1:2) Kwoguo no tũkorũo na ma atĩ ciugo iria tũthomaga thĩinĩ wa Kũguũrĩrio 21:​5, 6 nĩ cia kwĩhokeka biũ.

“ATĨRĨRĨ, NĨ KWERŨHIA NDĨRERŨHIA MAŨNDŨ MOTHE”

8. Jehova aaugire atĩa nĩguo atĩtĩrithie atĩ kĩĩranĩro gĩake nĩ gĩkaahinga? (Isaia 46:10)

⁸ Reke rĩu twarĩrĩrie kiugo “Atĩrĩrĩ.” (Kũg. 21:5) Kiugo gĩa Kĩngiriki kĩrĩa gĩtaũrĩtwo “atĩrĩrĩ,” nĩ kĩhũthĩrĩtwo kaingĩ ibuku-inĩ rĩa Kũguũrĩrio. Ibuku rĩmwe riugaga atĩ kiugo kĩu kĩhũthĩrĩtwo ĩrĩ “njĩra ya gũteithia mũthomi arore na kinyi ũhoro ũrĩa ũrũmĩrĩire.” Thutha wa Ngai kuuga kiugo kĩu, aacokire akiuga ũũ: “Nĩ kwerũhia ndĩrerũhia maũndũ mothe.” Haha Jehova araria ũhoro wĩgiĩ mogarũrũku ma ihinda rĩũkĩte, no tondũ arĩ na ma biũ atĩ nĩ akaahingia kĩĩranĩro kĩu, araria ta mogarũrũku macio marĩkĩtie gwĩkĩka.—Thoma Isaia 46:10.

9. (a) Ciugo “nĩ kwerũhia ndĩrerũhia maũndũ mothe” ironania maũndũ marĩkũ merĩ Jehova ageeka? (b) Gũgaathiĩ atĩa harĩ “igũrũ” na “thĩ” iria irĩ kuo ũmũthĩ?

⁹ Rĩu rekei tũthuthurie ciugo ici irĩ o mũhari-inĩ ũcio wa gatano wa Kũguũrĩrio 21: “Nĩ kwerũhia ndĩrerũhia maũndũ mothe.” Thĩinĩ wa mũrango ũcio, ciugo icio cionanagia maũndũ merĩ Jehova ageeka. Wa mbere, Jehova nĩ akaananga mũtabarĩre ũyũ wa Shaitani. Na wa kerĩ, nĩ akaarehe mũtabarĩre mwerũ. Kũguũrĩrio 21:1 yugaga: “Igũrũ rĩrĩa rĩa tene o na thĩ ĩrĩa ya tene nĩ ciathirĩte.” “Igũrũ rĩrĩa rĩa tene” rĩrũgamĩrĩire thirikari cia gũkũ thĩ iria itongoragio nĩ Shaitani na ndaimono ciake. (Mat. 4:​8, 9; 1 Joh. 5:19) Thĩinĩ wa Bibilia, kiugo “thĩ” no gĩkorũo gĩkĩarĩrĩria andũ arĩa maikaraga thĩinĩ wa thĩ. (Kĩam. 11:1; Thab. 96:1) Kwoguo “thĩ ĩrĩa ya tene” ĩrũgamagĩrĩra andũ arĩa aganu. Jehova ti kwagagĩria akaagagĩria “igũrũ” na“thĩ” iria irĩ kuo, no nĩ gũciniina agaaciniina biũ, na ithenya rĩacio arehe “igũrũ rĩerũ o na thĩ njerũ”—na nĩcio, thirikari njerũ na andũ athingu.

10. Nĩ kĩĩ Jehova akerũhia?

¹⁰ Mũhari ũcio wa 5 ũcokaga ũkonania ũrĩa Jehova aaugire igũrũ rĩgiĩ maũndũ marĩa akerũhia. Rora wone atĩ Jehova ndaugire: “Nĩ gũthondeka ndĩrathondeka maũndũ mothe merũ.” Handũ ha ũguo aaugire: “Nĩ kwerũhia ndĩrerũhia maũndũ mothe.” Jehova nĩ kwerũhia akeerũhia thĩ o hamwe na andũ nĩguo makinyĩrĩre ũkinyanĩru. O ta ũrĩa Isaia aarathĩte, thĩ yothe ĩgaatuo kũndũ gũthaka o ta mũgũnda wa Edeni. Ningĩ nĩ tũkerũhio na njĩra ya kũhonio mawathe maitũ mothe. Arĩa mathuaga, atumumu, na arĩa mataiguaga nĩ makaahonio, na o na arĩa makuĩte nĩ magaacokio muoyo. —Isa. 25:8; 35:​1-7.

“CIUGO ICIO NĨ CIA KWĨHOKEKA NA NĨ CIA MA. . . . MAŨNDŨ MACIO NĨ MAHINGU!”

11. Jehova aathire Johana eke atĩa, na aamũheire gĩtũmi kĩrĩkũ gĩa gwĩka ũguo?

¹¹ Nĩ ũndũ ũrĩkũ ũngĩ Ngai aaugire nĩguo atũhe ũũma atĩ no tũmwĩhoke? Jehova eerire Johana ũũ: “Andĩka, tondũ ciugo icio nĩ cia kwĩhokeka na nĩ cia ma.” (Kũg. 21:5) Jehova to gwathana aathanire atĩ ciugo icio ‘ciandĩkwo,’ ĩndĩ nĩ aaheanire gĩtũmi gĩa gwĩka ũguo. Aaugire: “Tondũ ciugo icio nĩ cia kwĩhokeka na nĩ cia ma.” Ũguo nĩ kuuga atĩ no twĩhoke ciugo cia Ngai biũ. Nĩ tũcokagia ngatho tondũ Johana nĩ ‘aandĩkire’ ciugo icio o ta ũrĩa eerĩtwo. Nĩ ũndũ ũcio no tũthome ũhoro wĩgiĩ kĩĩranĩro kĩa Ngai gĩa Paradiso na twĩcũranie ũhoro wĩgiĩ irathimo cia magegania iria irĩ mbere itũ.

12. Nĩ kĩĩ gĩatũmire Jehova auge: “Maũndũ macio nĩ mahingu!”

¹² Ngai aacokire akiuga ũũ: “Maũndũ macio nĩ mahingu!” (Kũg. 21:6) Haha Jehova araria ta maũndũ mothe megiĩ kĩĩranĩro gĩa Paradiso marĩkĩtie kũhinga. Na no auge ũguo tondũ hatirĩ kĩndũ kĩngĩmũgirĩrĩria kũhingia muoroto wake. Jehova aacokire akiuga ũndũ ũngĩ ũrĩa ũtũheaga ũũma atĩ no nginya kĩĩranĩro gĩake gĩkaahinga. Nĩ ũndũ ũrĩkũ ũcio?   

“NĨ NIĨ ALIFA NA OMEGA”

13. Nĩ kĩĩ gĩatũmire Jehova auge: “Nĩ niĩ Alifa na Omega”?

¹³ O ta ũrĩa hekũgwetetwo na hau kabere, Jehova we mwene nĩ aaririe maita matatũ cioneki-inĩ iria Johana oonire. (Kũg. 1:8; 21:​5, 6; 22:13) Mahinda-inĩ macio mothe matatũ, Jehova nĩ augĩte ciugo ici: “Nĩ niĩ Alifa na Omega.” Alifa nĩ ndemwa ya mbere harĩ ndemwa cia Kĩngiriki na omega nĩyo ya mũico. Kwoguo rĩrĩa Jehova aaugire atĩ nĩwe “Alifa na Omega,” oonanagia atĩ rĩrĩa ambĩrĩria ũndũ, atigagĩrĩra nĩ aũrĩkia.

14. (a) Tũngiuga nĩ ta rĩ Jehova aaugire “Alifa” na nĩ rĩ akauga “Omega”? (b) Ciugo iria irĩ thĩinĩ wa Kĩambĩrĩria 2:1-3 iratũhe ũũma ũrĩkũ?

¹⁴ Thutha wa Jehova kũũmba Adamu na Hawa, nĩ aameerire muoroto ũrĩa aarĩ naguo kwerekera andũ na thĩ. Bibilia yugaga ũũ: “Ngai akĩmarathima, na Ngai akĩmeera ũũ: ‘Ciaranai na mũingĩhe, mũiyũrie thĩ na mũmĩtoorie.’” (Kĩam. 1:28) Hĩndĩ ĩyo nĩ ta Jehova aaugire “Alifa.” Nĩ oonanirie wega muoroto wake, atĩ ihinda nĩ rĩngĩgooka rĩrĩa njiarũa nginyanĩru na njathĩki cia Adamu na Hawa ingĩkaiyũria thĩ na imĩtue paradiso. Rĩrĩa ũndũ ũcio ũkaahinga ihinda rĩũkĩte, nĩ ta Jehova akauga “Omega.” Rĩrĩa Jehova aarĩkirie kũũmba “igũrũ na thĩ na indo ciothe iria irĩ thĩinĩ wacio,” nĩ eekire ũndũ woonanirie atĩ hatarĩ nganja nĩ akaahingia muoroto wake. Ũndũ ũcio ũrĩ thĩinĩ wa Kĩambĩrĩria 2:​1-3. (Thoma.) Jehova nĩ aamũrire mũthenya wa mũgwanja na akĩũtua mũtheru. Hihi ũguo nĩ kuuga atĩa? Jehova aaheanaga ũũma atĩ hatarĩ nganja nĩ akaahingia muoroto wake kwerekera andũ na thĩ. Muoroto ũcio ũgaakorũo ũhingĩte biũ gũkinyĩria mũthia wa mũthenya ũcio wa mũgwanja.

15. Nĩ kĩĩ kĩngĩatũmire kuoneke ta Shaitani athararia muoroto wa Ngai harĩ andũ?

¹⁵ Thutha wa Adamu na Hawa kũremera Jehova, nĩ maatuĩkire ehia na makĩgaĩra njiarũa ciao mehia na gĩkuũ. (Rom. 5:12) Nĩ ũndũ ũcio, nĩ kũngĩonekire ta Shaitani athararia muoroto wa Ngai wĩgiĩ thĩ kũiyũra andũ akinyanĩru na athĩki. Nĩ ta Shaitani aatũmire kuoneke ta Jehova atakaahingia kĩĩranĩro gĩake. No kũhoteke Shaitani eeciragia atĩ Jehova ndakaahota kũhingia kĩĩranĩro kĩu gĩake. No gũkorũo oonaga ta Jehova ekũũraga Adamu na Hawa acoke ombe andũ angĩ akinyanĩru nĩguo ahingie muoroto wake harĩ andũ. No Ngai angĩekire ũguo, Mũcukani angĩaugire atĩ Jehova nĩ aaheenanĩtie. Nĩkĩ? Tondũ o ta ũrĩa Kĩambĩrĩria 1:28 yonanĩtie, Jehova eerĩte Adamu na Hawa atĩ njiarũa ciao nĩcio ingĩkaiyũria thĩ.

16. Nĩ kĩĩ kĩngĩatũmire Shaitani ecirie atĩ Jehova nĩ angĩaremirũo kũhingia kĩĩranĩro gĩake?

¹⁶ Ũndũ ũngĩ Shaitani angĩeciririe nĩ atĩ, Jehova nĩ ekũreka Adamu na Hawa magĩe na njiarũa, no atĩ gũtirĩ hĩndĩ njiarũa icio ingĩatuĩkire nginyanĩru. (Koh. 7:20; Rom. 3:23) Kũngĩathire ũguo, hatarĩ nganja Mũcukani angĩaugire atĩ Jehova nĩ aremetwo kũhingia kĩĩranĩro gĩake. Nĩkĩ? Tondũ ũndũ ũcio ndũngĩahingirie muoroto wa Jehova wa kũiyũria njiarũa nginyanĩru na njathĩki cia Adamu na Hawa thĩinĩ wa thĩ ĩrĩ Paradiso.

17. Jehova aahiũranirie atĩa na ũremi wa Shaitani na aciari aitũ a mbere, na maumĩrĩro magaakorũo marĩ marĩkũ? (Ningĩ rora mbica.)

¹⁷ No mũhaka akorũo njĩra ĩrĩa Jehova aahũthĩrire kũhiũrania na ũremi wa Shaitani na wa aciari aitũ a mbere nĩ yagegirie Shaitani mũno. (Thab. 92:5) Jehova oonanirie atĩ we ti mũheenania no aragia ma, na njĩra ya kũreka Adamu na Hawa magĩe ciana. Ningĩ nĩ oonanirie atĩ ndaremagwo nĩ kũhingia kĩĩranĩro gĩake. Nĩ aatigĩrĩire atĩ muoroto wake nĩ ũkũhinga, na njĩra ya kũruta “mbeũ” ĩrĩa ĩngĩkahonokia njiarũa njathĩki cia Adamu na Hawa. (Kĩam. 3:15; 22:18) No mũhaka akorũo Shaitani nĩ aagegirio nĩ mũbango wa Jehova wa ũkũũri. Nĩkĩ? Tondũ mũbango ũcio uumanĩte na wendo ũtarĩ na mwĩyendo. (Mat. 20:28; Joh. 3:16) Shaitani nĩ ngũrani tondũ we aiyũirũo nĩ mwĩyendo. Hihi mũbango ũcio wa ũkũũri ũkaahotithia ũndũ ũrĩkũ? Gũkinyĩria mũthia wa Wathani wa Mĩaka Ngiri wa Kristo, njiarũa nginyanĩru na njathĩki cia Adamu na Hawa nĩ igaakorũo igĩtũũra thĩinĩ wa thĩ ĩrĩ paradiso, o ta ũrĩa muoroto wa Jehova warĩ kĩambĩrĩria-inĩ. Hĩndĩ ĩyo nĩ ta Jehova akauga, “Omega.”

ŨRĨA TŨNGĨKĨRA HINYA MWĨHOKO WITŨ HARĨ KĨĨRANĨRO KĨA JEHOVA GĨA PARADISO

18. Nĩ itũmi irĩkũ ithatũ Ngai atũheete cia kwĩhoka kĩĩranĩro gĩake? (Ningĩ rora gathandũkũ “Itũmi Ithatũ cia Kwĩhoka Kĩĩranĩro kĩa Jehova.”)

¹⁸ O ta ũrĩa twarĩrĩria gĩcunjĩ-inĩ gĩkĩ-rĩ, nĩ itũmi irĩkũ tũngĩtaarĩria arĩa mekagĩrĩra nganja kĩĩranĩro kĩa Ngai gĩa Paradiso nĩguo makorũo na ma atĩ nĩ gĩkaahinga? Kĩa mbere, Jehova we mwene nĩwe wĩranĩire kĩĩranĩro kĩu. Ibuku rĩa Kũguũrĩrio riugĩte ũũ: “Ũrĩa waikarĩire gĩtĩ kĩrĩa kĩa ũnene akiuga: ‘Atĩrĩrĩ, nĩ kwerũhia ndĩrerũhia maũndũ mothe.’” Jehova akoragwo na ũũgĩ, hinya, na wendi wa kũhingia kĩĩranĩro gĩake. Gĩa kerĩ, Jehova arĩ na ma biũ atĩ nĩ akaahingia kĩĩranĩro gĩake, ũũ atĩ harĩ we nĩ ta kĩhingĩte. Nĩkĩo aaugire ũũ: “Ciugo icio nĩ cia kwĩhokeka na nĩ cia ma. . . . Maũndũ macio nĩ mahingu!” Gĩa gatatũ, rĩrĩa Jehova ambĩrĩria ũndũ, atigagĩrĩra nĩ aũrĩkia. Nĩkĩo aaugire ũũ: “Nĩ niĩ Alifa na Omega.” Jehova nĩ akoonania atĩ Shaitani nĩ mũheenania na gũtirĩ hĩndĩ angĩgirĩrĩria Ngai kũhingia muoroto wake.

19. Ũngĩka atĩa mũndũ angĩkĩrĩra nganja kũhinga gwa kĩĩranĩro kĩa Ngai gĩa Paradiso?

¹⁹ Ririkana atĩ rĩrĩa rĩothe wera andũ ũtungata-inĩ ũhoro wĩgiĩ ũũma ũrĩa Jehova atũheete wĩgiĩ kũhinga gwa ciĩranĩro ciake, ũkoragwo ũgĩkĩra hinya mwĩhoko waku harĩ ciĩranĩro icio. Kwoguo-rĩ, ũngĩka atĩa ũngĩthomera mũndũ kĩĩranĩro kĩgiĩ Paradiso kĩrĩa gĩtaarĩirio thĩinĩ wa Kũguũrĩrio 21:4 na mũndũ ũcio akwĩre atĩ ndarona ta ũndũ ũcio ũngĩhotekeka? Na githĩ to ũmũthomere mũhari wa 5 na wa 6 ũcoke ũmũtaarĩrie? Muonie atĩ nĩ ta Jehova ekĩrĩte kĩrore kũgerera ciugo iria arahũthĩra kũheana ũũma wa atĩ nĩ akaahingia kĩĩranĩro gĩake.—Isa. 65:16.