Nĩ Onanirie Ũũgĩ

1-3. (a) Gwathire atĩa nyũmba ya Abigaili ĩgĩkorũo ũgwati-inĩ? (b) Nĩ maũndũ marĩkũ tũkwĩruta megiĩ mũtumia ũcio wa mwanya?

NĨ KWARĨ na ũgwati mũnene mũno wakuhĩrĩirie. Anake ta 400 maarĩ njĩra magĩũka, mehotorete kũũraga arũme othe a nyũmba ya Nabali, mũthuri wa Abigaili. Mwanake ũmwe agĩũka kũrĩ Abigaili aiyũirũo nĩ guoya. Aarĩ na gĩtũmi kĩega gĩa kũmaka. Nĩkĩ hihi?

² Thĩna ũcio wothe woimanĩte na Nabali. Eekĩte maũndũ moru mũno o ta ũrĩa aamenyerete. No riita rĩrĩ aacogothete mũru, mũnene wa mbũtũ ya thigari njĩhokeku na ciamenyeretio wega iria ciamwendete mũno. Ũmwe wa ndungata cia Nabali, hihi warĩ mũrĩithi, agĩthiĩ kũrĩ Abigaili ehokete atĩ ahota gwĩka kaũndũ amahonokie. No mũtumia ũmwe angĩatoririe atĩa mbũtũ ĩyo?

³ Wa mbere, rekei twĩrute ũhoro makĩrĩa wĩgiĩ mũtumia ũyũ wa mwanya. Abigaili aarĩ ũ? Thĩna ũcio waambĩrĩirie atĩa? Na tũngĩĩruta atĩa kuumana na kĩonereria gĩake kĩa wĩtĩkio?

‘Mũtumia Wohĩgĩrĩire Maũndũ, na Warĩ na Gĩthithi Kĩega’

4. Nabali aarĩ mũndũ wa mũthemba ũrĩkũ?

⁴ Abigaili na Nabali matiaganĩrĩirũo. Abigaili aarĩ mũtumia wa bata mũno no Nabali aarĩ mũthuri tũhũ. Nĩ ma Nabali aarĩ mũtongu. Nĩ ũndũ ũcio eeyonaga arĩ wa bata mũno, no hihi andũ arĩa angĩ maamuonaga atĩa? Nĩ hinya kuona mũndũ thĩinĩ wa Bibilia wĩtanĩtio na ciugo njũru ta iria Nabali eetirũo. Rĩĩtwa rĩake rĩtaũragwo “Mũndũ ũtarĩ wĩcirio” kana “Kĩrimũ.” Hihi nĩ aciari ake maamũheire rĩĩtwa rĩu aciarũo kana nĩ andũ maamũtuire thutha-inĩ nĩ ũndũ wa mĩtugo yake? O ũrĩa kũngĩkorũo kwarĩ, aatũkĩtie rĩĩtwa rĩake. Nabali aarĩ “mwĩĩ, na akagĩa ciĩko njũru.” Nĩ ũndũ wa gũkorũo arĩ mũcogothi na mũrĩĩu, nĩ eetigĩrĩtwo na akamenwo nĩ andũ.—1 Sam. 25:2, 3, 17, 21, 25.

5, 6. (a) Ũgwĩciria ngumo iria njega biũ Abigaili aarĩ nacio nĩ irĩkũ? (b) Nĩkĩ hihi Abigaili aahikĩire mũthuri tũhũ ũguo?

⁵ Abigaili aarĩ ngũrani mũno na Nabali. Rĩĩtwa rĩake rĩtaũragwo “Baba nĩ Gwĩkenia Ekenetie.” Athuri aingĩ nĩ makenaga kũgĩa na mwarĩ mũthaka, no mũthuri mũũgĩ akenagĩra makĩria ũthaka wa thĩinĩ wa mwarĩ. Kaingĩ mũndũ ũrathimĩirũo ũthaka wa na nja nĩ agaga kuona bata wa gũkũria ngumo imwe ta ũtaũku, ũũgĩ, ũcamba, kana wĩtĩkio. No tiguo Abigaili aatariĩ. Bibilia ĩmũgathagĩrĩria nĩ gũkorũo aarĩ mũtumia mũũgĩ o na mũthaka.—Thoma 1 Samueli 25:3.

⁶ Andũ amwe mahota kwĩyũria atĩrĩ, mũirĩtu ũcio warĩ ngumo njega ũguo-rĩ, aahikĩire mũthuri tũhũ ta Nabali nĩkĩ? Ririkana atĩ, mahinda-inĩ ma Bibilia, aciari nĩo maathagĩrĩra ciana ciao andũ arĩa cikaahikania nao. O na akorũo tiguo, aciari no maabataranagia nĩguo metĩkĩrie kĩhiko. Hihi aciari a Abigaili nĩo mamwathĩrĩire Nabali, kana hihi magĩtĩkĩria amũhikĩre nĩ ũndũ wa ũtonga wake? Kana hihi magĩka ũguo nĩ kũhatĩkwo nĩ ũthĩni? O na angĩkorũo nĩguo kwarĩ, ũtonga wa Nabali ndwamũtuire mũthuri mwega.

7. (a) Nĩ ũndũ ũrĩkũ aciari magĩrĩirũo gwĩthema angĩkorũo nĩ marenda kũruta ciana ciao muonere ũrĩa wagĩrĩire wĩgiĩ kĩhiko? (b) Abigaili eerutanagĩria gwĩka atĩa?

⁷ Aciari arĩa mena ũmenyo marutaga ciana ciao muonere ũrĩa wagĩrĩire wĩgiĩ kĩhiko. Matiathagĩrĩra ciana ciao cingĩre kĩhiko-inĩ nĩ ũndũ wa mbeca kana magacihatĩka itume ndũgũ itagimarĩte ũndũ ingĩhota kũramata mũciĩ. (1 Kor. 7:36) O na kũrĩ ũguo, Abigaili ndangĩahotire gũcenjia ũndũ wĩgiĩ kĩhiko gĩake. Aahikĩire Nabali, na nĩ eerutanagĩria o ũrĩa angĩahotire gũtũũria kĩhiko gĩake.

“Nake Akĩmaruma”

8. Nabali aarumĩte ũ, na gĩĩko kĩu kĩarĩ kĩa ũrimũ nĩkĩ?

⁸ Nabali aatũmĩte Abigaili aritũhĩrũo nĩ maũndũ o na makĩria nĩ gũkorũo nĩ aarumĩte Daudi. Daudi aarĩ ndungata njĩhokeku ya Jehova ĩrĩa yaitĩrĩirio maguta nĩ mũnabii Samueli, kuonania atĩ nĩwe wathuurĩtwo nĩ Ngai athamake thutha wa Saulu. (1 Sam. 16:1, 2, 11-13) Rĩrĩa aahĩtagwo nĩ Mũthamaki Saulu ũrĩa wamũiguagĩra ũiru na wendaga kũmũũraga, Daudi ehithire werũ-inĩ hamwe na mbũtũ yake ya arũme ehokeku 600.

9, 10. (a) Daudi na arũme ake maacemanagia na moritũ marĩkũ? (b) Nĩkĩ Nabali nĩ aagĩrĩirũo gũcokia ngatho nĩ ũndũ wa ũrĩa Daudi na arũme ake meekaga? (Rora nginya kohoro ka magũrũ-inĩ ga kĩbungo gĩa 10.)

⁹ Nabali aaikaraga Maoni no aarutaga wĩra Karimelia na no kũhoteke aarĩ na mũgũnda kuo. Matũũra macio maarĩ gatagatĩ ka ngʼongo irĩ nyeki nduru, kũndũ kwarĩ kwega gwa kũrĩithĩria ngʼondu, kũrĩa Nabali aarĩithagĩria ngʼondu ciake 3,000. No icigo iria ciathiũrũrũkĩirie ciarĩ werũ. Mwena wa mũhuro kwarĩ werũ wa Parani. Naguo mwena wa irathĩro ũtanaringa Iria rĩa Cumbĩ kwarĩ kũndũ gũtaarĩmagwo kũiyũire mĩkuru na ngurunga. Marĩ matũũra-inĩ macio, Daudi na arũme ake meethaga irio na thĩna na makomĩrĩria moritũ maingĩ. Kaingĩ nĩ maacemanagia na imwana iria ciarĩithagia mahiũ ma gĩtonga kĩu gĩetagwo Nabali.

¹⁰ Thigari icio ciarĩ na kĩyo ciaikaranagia atĩa na arĩithi acio? Ũngĩarĩ ũndũ mũhũthũ kũiyaga ngʼondu cia arĩithi acio, no matiekaga ũguo. Ithenya rĩa ũguo, o na nĩ kũgitĩra maagitagĩra mahiũ na ndungata cia Nabali. (Thoma 1 Samueli 25:15, 16.) Ngʼondu na arĩithi nĩ maacemanagia na mogwati maingĩ. Kwarĩ na nyamũ nyingĩ ndĩani na mũhaka wa mũhuro wa Isiraeli warĩ hakuhĩ mũno, kwoguo thũ na aici kuuma mabũrũri mangĩ nĩ maamatharĩkagĩra.b

11, 12. (a) Daudi onanirie atĩa ũũgĩ na gĩtĩo kũgerera ndũmĩrĩri yake kũrĩ Nabali? (b) Nĩ kĩĩ kĩarĩ kĩũru na ũrĩa Nabali aamũkĩrire ndũmĩrĩri ya Daudi?

¹¹ No mũhaka ũkorũo warĩ ũndũ mũritũ mũno kũhe arũme acio irio werũ-inĩ. Nĩ ũndũ ũcio, Daudi agĩtũma andũ ikũmi kũrĩ Nabali makahoe ũteithio. Aacagũrire ihinda rĩrĩa rĩagĩrĩire. Rĩarĩ ihinda rĩa kwenja mbũri, rĩrĩa andũ monanagia ũtana mũno na gwakoragwo na ndĩa. O na ningĩ nĩ aahũthĩrire ciugo cia ũũgĩ na cia gĩtĩo. Eeĩtire “mũrũguo Daudi,” hihi kuonania atĩ nĩ aamũtĩĩte nĩ gũkorũo Nabali aarĩ mũkũrũ kũmũkĩra. Nabali aacokirie atĩa?—1 Sam. 25:5-8.

¹² Aarakarire mũno! Mwanake ũrĩa ũkũgwetetwo kĩambĩrĩria-inĩ eerire Abigaili atĩ Nabali nĩ ‘aamarumire.’ Nabali ũcio mũkarĩ agĩteta mũno nĩ ũndũ wa mũgate wake wa goro, maĩ, na nyama. Akĩnyũrũria Daudi atĩ aarĩ mũndũ wa tũhũ na akĩmũringithania na ndungata ya kũũra. No kũhoteke mawoni ma Nabali maarĩ ta ma Saulu ũrĩa wamenete Daudi. Erĩ gũtirĩ warĩ na mawoni ta ma Jehova. Ngai nĩ eendete Daudi, na ndaamuonaga arĩ ndungata ĩtarĩ njĩhokeku, no aamuonaga arĩ mũndũ ũrĩa ũgatuĩka mũthamaki wa Isiraeli.—1 Sam. 25:10, 11, 14.

13. (a) Nĩ ikinya rĩrĩkũ Daudi aambire kuoya erũo ũrĩa Nabali oigĩte? (b) Ũrutani ũrĩa ũrĩ thĩinĩ wa Jakubu 1:20 ũratũruta ũndũ ũrĩkũ wĩgiĩ ikinya rĩrĩa Daudi oire?

¹³ Rĩrĩa andũ arĩa Daudi aatũmĩte maamwĩrire ũrĩa gwekĩkĩte, nĩ aarakarire mũno. Agĩathana ũũ: “Wĩyohei mũndũ o mũndũ rũhiũ rũake rwa njora.” Akĩĩhotora matharaita, na agĩtongoria mbũtũ ya arũme ake 400 makamũtharĩkĩre. Akĩĩhĩta kũniina arũme othe a nyũmba ya Nabali. (1 Sam. 25:12, 13, 21, 22) Daudi nĩ aarĩ na kĩhooto gĩa kũrakara, no njĩra ĩrĩa aahũthĩrire kuonania marakara macio ndĩarĩ njega. Bibilia yugaga ũũ: “Kũrakara kwa mũndũ gũtiĩkithagia maũndũ ma ũthingu wa Ngai.” (Jak. 1:20) No hihi Abigaili angĩahonokirie atĩa nyũmba yake?

“Ũũgĩ Waku Ũrorathimwo”

14. (a) Nĩ na njĩra ĩrĩkũ Abigaili oire ikinya rĩa mbere nĩguo arũnge ihĩtia rĩrĩa Nabali eekĩte? (b) Nĩ ũndũ ũrĩkũ tũngĩĩruta kuumana na ngũrani ĩrĩa yarĩ ho gatagatĩ ka Nabali na Abigaili? (Rora nginya kohoro ka magũrũ-inĩ.)

¹⁴ No tuuge atĩ Abigaili nĩ oire ikinya rĩa mbere nĩguo arũnge mahĩtia ma mũthuriwe. Mũgarũ na mũthuriwe, Abigaili nĩ onanirie atĩ nĩ eehaarĩirie gũthikĩrĩria. Mwanake ũrĩa waatũmĩtwo oigire ũũ igũrũ rĩgiĩ Nabali: “Nĩ mwaganu mũno, na gũtirĩ mũndũ ũngĩmwarĩria aigue.”c (1 Sam. 25:17) Ũndũ wa kĩeha nĩ atĩ, Nabali aagire gũthikĩrĩria nĩ ũndũ wa kwĩona arĩ wa bata. Mwĩtĩo ta ũcio nĩ wonekaga mũno o na ũmũthĩ. Mwanake ũrĩa waatũmĩtwo nĩ oĩ atĩ Abigaili aarĩ ngũrani, nĩkĩo aathire kũrĩ we kũmwĩra thĩna ũcio.

15, 16. (a) Abigaili onanirie atĩa atĩ aarĩ ta mũtumia ngatha ũrĩa warĩrĩirio ibuku-inĩ rĩa Thimo? (b)Nĩkĩ gĩĩko kĩrĩa Abigaili eekire gĩtiarĩ gĩa kũregana na ũnene wa mũthuriwe arĩ kĩongo kĩa famĩlĩ?

¹⁵ Abigaili eeciririe na akĩoya ikinya narua. Tũthomaga ũũ: “Abigaili agĩkĩhĩkĩrĩria.” Rũgano rũrũ rũhũthĩrĩte ciugo ironania mĩtũkĩ maita mana gũtaarĩria mũtumia ũcio. Aaharĩirie kĩheo na njĩra ya ũtana nĩguo atwarĩre Daudi na arũme ake. Aaharĩirie mũgate, ndibei, ngʼondu, ngano hĩhie, keki cia thabibũ nyũmũ, na cia ngũyũ. Hatarĩ nganja, Abigaili nĩ oĩ wega atĩ nĩwe warĩ na itemi rĩa kũramata maũndũ thĩinĩ wa nyũmba yake, o ta mũtumia ngatha ũrĩa warĩrĩirio ibuku-inĩ rĩa Thimo. (Thim. 31:10-31) Agĩtũmana indo icio itwaragwo nĩ ndungata imwe ciake, agĩcoka akĩmarũmĩrĩra arĩ wiki. Bibilia yugaga atĩ “ndaigana kwĩra Nabali, mũthuriwe, ũhoro ũcio.”—1 Sam. 25:18, 19.

¹⁶ Hihi ũguo nĩ kuonania atĩ Abigaili nĩ kũregana aareganaga na ũnene wa mũthuriwe arĩ kĩongo kĩa famĩlĩ? Aca. Ririkana atĩ nĩ ndungata ya Jehova njitĩrĩrie maguta Nabali eekĩte ũũru, gĩĩko kĩrĩa kĩngĩatũmire andũ aingĩ mataarĩ na mahĩtia a nyũmba ya Nabali moragwo. Korũo Abigaili ndoire ikinya-rĩ, hihi nĩ angĩarĩ na itemi mehia-inĩ macio ma mũthuriwe? Ũndũ-inĩ ũcio, aagĩrĩirũo gwathĩkĩra Ngai mbere ya gwathĩkĩra mũthuriwe.

17, 18. Abigaili eekire atĩa nĩguo atũngane na Daudi, aamwĩrire atĩa, na nĩkĩ gĩatũmire ciugo ciake ihutie ngoro ya Daudi?

¹⁷ Thutha wa kahinda gatarĩ coho, Abigaili agĩtũngana na Daudi na arũme ake. O rĩngĩ akĩhiũha, akiuma igũrũ rĩa ndigiri yake agĩturumithia ũthiũ wake thĩ mbere ya Daudi. (1 Sam. 25:20, 23) Agĩcoka akĩmũitũrũrĩra ngoro yake, akĩmũthaitha aiguĩre mũthuriwe tha o hamwe na nyũmba yake. Nĩ kĩĩ gĩatũmire ciugo ciake ikorũo na moimĩrĩro mega?

¹⁸ Abigaili aakuuire mahĩtia macio ta maarĩ make na akĩhoya Daudi amũrekere. Akĩmwĩra atĩ mũthuriwe aarĩ mũndũ ũtarĩ wĩcirio o ta ũrĩa rĩĩtwa rĩake rĩoigĩte, hihi akĩonania atĩ Daudi ndaagĩrĩirũo kwĩnyihĩria mũndũ ta ũcio. Akĩonania atĩ nĩ eehokete Daudi arĩ we wathuurĩtwo nĩ Jehova, nĩ kũmenya atĩ Daudi aarũaga “mbaara ya Jehova.” Ningĩ akĩonania atĩ nĩ aamenyaga ũrĩa Jehova erĩire Daudi ũthamaki, tondũ oigire ũũ: ‘Jehova nĩ agaagũtua mũnene wa gwatha Isiraeli.’ Agĩcoka agĩthaitha Daudi ndageke ũndũ ũgũtũma akorũo na ihĩtia rĩa gũita thakame kana ũndũ ũgacoka ‘kũmũiguithia ũũru’—akĩarĩrĩria ũhoro wa thamiri ĩrĩ na ũcuke. (Thoma 1 Samueli 25:24-31.) Ciugo ciake ciarĩ cia ũtugi na nĩ ciahutirie ngoro ya Daudi.

19. Daudi eekire atĩa aigua ciugo cia Abigaili, na aamũgathĩrĩirie nĩkĩ?

¹⁹ Daudi eekire atĩa? Nĩ aamũkĩrire iheo cia Abigaili na akiuga ũũ: “Jehova Ngai wa Isiraeli arogoocwo, o we ũcio ũkũrekirie nĩguo ũũke ũcemanie na niĩ ũmũthĩ; o naguo ũũgĩ waku ũrorathimwo, ningĩ o nawe, wee mwene, ũrorathimwo, o wee wagiria njite thakame ũmũthĩ.” Daudi nĩ aamũgathĩrĩirie nĩ ũndũ wa kũhiũha kũmũtũnga atarĩ na guoya, o na akĩmwĩra atĩ nĩ aamũgirĩrĩirie gũita thakame. Daudi akĩmwĩra, “Ambata wĩinũkĩre gwaku mũciĩ na thayũ; atĩrĩrĩ, uuge waku nĩndaũigua, nawe wee mwene nĩndagwĩtĩkĩra.”—1 Sam. 25:32-35.

“Niĩ Ndungata Yaku ya Mũndũ-wa-nja”

20, 21. (a) Nĩ ũndũ ũrĩkũ ũragũkenia wĩgiĩ wendi wa Abigaili wa gũcoka kũrĩ mũthuriwe? (b) Abigaili onanirie ũmĩrĩru na ũũgĩ atĩa harĩ gũthuura mahinda ma kwaria na Nabali?

²⁰ Thutha wa gũtigana, no mũhaka Abigaili akorũo nĩ eeciririe ũhoro wa ihinda rĩu na akĩona ngũrani gatagatĩ ka Daudi na Nabali. Daudi aarĩ mwĩhokeku na mũtugi, nake Nabali aarĩ mũndũ mũru mũno. No ndaathire na mbere gwĩciria ũhoro ũcio. Bibilia yugaga ũũ: “Abigaili agĩgĩkinya kwĩ Nabali.” Abigaili nĩ aacokire kũrĩ mũthuriwe atuĩte itua rĩa gwĩka ũrĩa wothe angĩhota arĩ mũtumia wake. No nginya angĩamwĩrire ũhoro wa kĩheo kĩrĩa aaheete Daudi na arũme ake. Nĩ aarĩ na kĩhooto gĩa kũmenya. Ningĩ no nginya Abigaili angĩamwĩrire ũhoro wa ũgwati ũrĩa ũngĩamũkora handũ ha kũmenyithio nĩ andũ angĩ, ũndũ ũrĩa hihi ũngĩamũconorithirie makĩria. No ihinda rĩu rĩtiarĩ rĩagĩrĩru. Nĩ gũkorũo Nabali aarĩ na ndĩa ta ya mũthamaki na aarĩ mũrĩĩu mũno.—1 Sam. 25:36.

²¹ O rĩngĩ akĩonania ũũmĩrĩru na ũũgĩ na njĩra ya gweterera nginya rũcinĩ rũrũ rũngĩ njohi yarikĩra. Hĩndĩ ĩyo nĩ angĩataũkĩirũo nĩ ũhoro ũcio, o na gũtuĩka no angĩarĩ na marakara. O na kũrĩ ũguo, nĩ aamũheire ũhoro wothe. Hatarĩ nganja nĩ erĩgagĩrĩra amũrakarĩre mũno, na hihi arute ngũĩ. Ithenya rĩa ũguo, Nabali aaikarire thĩ ategwĩka ũndũ.—1 Sam. 25:37.

22. Gwathire atĩa harĩ Nabali, na tũngĩĩruta ũndũ ũrĩkũ wĩgiĩ ũhinyanĩrĩria kana ũnyarirani thĩinĩ wa famĩlĩ?

²² Nĩ kĩĩ kĩarĩ kĩũru na Nabali? ‘Ngoro yake yaikarĩte ta ĩkuĩrĩire thĩinĩ wake, agĩgĩkira o ta ihiga.’ No gũkorũo nĩ kũnyitwo aanyitirũo nĩ mũrimũ wa mũthemba mũna. O na kũrĩ ũguo, aakuire thutha wa kĩndũ thikũ ikũmi, na to ũndũ wa mũrimũ. Bibilia yugaga ũũ: “Jehova akĩhũra Nabali, agĩkua.” (1 Sam. 25:38) Thutha wake kũũragwo nĩ Jehova, kĩhiko gĩa thĩna kĩa Abigaili gĩgĩkinya mũthia. O na gũtuĩka ũmũthĩ Jehova ndoragaga andũ na njĩra ya kĩama, ũndũ ũyũ no ũtũririkanie atĩ nĩ onaga arĩa mahinyagĩrĩria kana makanyarira arĩa angĩ thĩinĩ wa famĩlĩ. Nĩ arehaga kĩhooto ihinda rĩrĩa rĩagĩrĩire.—Thoma Luka 8:17.

23. Nĩ kĩrathimo kĩrĩkũ kĩngĩ Abigaili aagĩire nakĩo, na onanirie atĩa atĩ ũndũ ũcio ndwamũcenjirie?

²³ Makĩria ma kwehererio kĩhiko kĩũru, Abigaili nĩ angĩagĩire na kĩrathimo kĩngĩ. Rĩrĩa Daudi aamenyire atĩ Nabali nĩ akuĩte, agĩtũma ndungata kũrĩ Abigaili imũrie kana no atuĩke mũtumia wake. Abigaili aaciĩrire ũũ: “Niĩ ndungata yaku ya mũndũ wa nja-rĩ, ndĩ ndungata ya gũthambagia magũrũ ma ndungata cia mwathi wakwa.” Ũndũ ũcio ndwatũmire eyone arĩ wa bata, o na nĩ eerutĩire gũtuĩka ndungata ya ndungata cia Daudi! Tũthomaga o rĩngĩ atĩ nĩ aahiũhire, riita rĩrĩ akehaarĩrie nĩguo athiĩ kwa Daudi.—1 Sam. 25:39-42.

24. Nĩ mathĩna marĩkũ Abigaili aacemanirie namo mũtũũrĩre-inĩ wake mwerũ, no mũthuriwe aamuonaga atĩa? Ĩ nake Ngai wake aamuonaga atĩa?

²⁴ Ũguo ti kuga atĩ mũtũũrĩre wa Abigaili ndũngĩagĩire na mathĩna; kĩhiko kĩao na Daudi gĩtiagire mathĩna. Daudi nĩ aahikĩtie Ahinoamu, na o na gũtuĩka Ngai nĩ eetĩkĩrĩtie mũthuri kũhikia atumia aingĩ, ũndũ ũcio ndwarĩ mũhũthũ harĩ atumia ehokeku a mahinda macio. Ningĩ Daudi ndaatuĩkĩte mũthamaki; ũguo nĩ kwarĩ na mĩhĩnga na mathĩna maingĩ ma kũhiũrania namo kamũira atungatĩre Jehova arĩ mũthamaki. O ũrĩa Abigaili aathire na mbere gũteithia Daudi na kũmũnyita mbaru, o na akĩmũciarĩra kahĩĩ, noguo aamenyaga atĩ aarĩ na mũthuri wamwendete mũno na wamũgitagĩra. O na kũrĩ hĩndĩ Daudi aamũhonokirie rĩrĩa aatahĩtwo. (1 Sam. 30:1-19) Kwoguo Daudi nĩ eegerekanirie na Jehova Ngai, ũrĩa wendete na agatĩa atumia ogĩ, marĩ na ũmĩrĩru, na wĩhokeku.