Kuhĩrĩria Ngai
Nĩ Omagĩrĩria Arĩa Mathuthĩkĩte Ngoro
‘JEHOVA ndarĩ hĩndĩ angĩnyenda.’ Ũguo nĩguo mũtumia ũmwe Mũkristiano ũrĩa wakoretwo athuthĩkĩte ngoro hakuhĩ ũtũũro-inĩ wake wothe oigire. Eeĩraga atĩ gũtirĩ hingo Jehova angĩmũkuhĩrĩria. Hihi Jehova aikaraga haraya na athathaiya ake arĩa mangĩkorũo mathuthĩkĩte ngoro? Macokio ma gũtũũmĩrĩria marĩ thĩinĩ wa ciugo itongoretio na roho cia Daudi mwandĩki wa Thaburi, thĩinĩ wa Thaburi 34:18.
Daudi nĩ aamenyete ũrĩa gũtangĩka ngoro mũno kũngĩkorũo na moimĩrĩro moru harĩ ndungata njĩhokeku ya Jehova. Rĩrĩa aarĩ mwanake, Daudi aatũire oragĩra mũthamaki Saulu, ũrĩa wehotorete kũmũũraga nĩ ũndũ wa ũiru. Daudi aathire kwĩgitia itũũra-inĩ rĩa Gathu, bũrũri-inĩ wa Afilisti kũrĩa eeciragia atĩ Saulu ndangĩathire kũmũcaria tondũ Afilisti maarĩ thũ ciao. No thutha wa kũmenyeka, Daudi aatigirie hanini kũragwo tiga nĩ ũndũ etuire mũgũrũki. Daudi aagocithirie Ngai nĩ ũndũ wa kũmũhonokia, na maũndũ macio nĩmo maatũmire andĩke Thaburi ya 34.
Hihi Daudi nĩ eetĩkĩtie atĩ Ngai aikaraga haraya na arĩa meiguaga matiganĩirio kana ta matagĩrĩire maitho-inĩ Make rĩrĩa marĩ mĩtangĩko-inĩ? Daudi aandĩkire ũũ: “Jehova nĩ akoragwo hakuhĩ na arĩa athuthĩku ngoro; acio maherete roho-rĩ, agakĩmahonokia.” (Mũhari wa 18) Rekei tuone ũrĩa ciugo icio cingĩtũũmĩrĩria na citũhe mwĩhoko.
‘Jehova akoragwo hakuhĩ.’ Ibuku rĩmwe riugaga atĩ ciugo icio “nĩ njĩra ĩmwe ya kuonania atĩ Mwathani nĩ athikagĩrĩria na agaikara eiguĩte, hĩndĩ ciothe eharĩirie gũteithia na kũhonokia andũ ake.” Nĩ ũndũ ũtwĩkĩraga ngoro kũmenya atĩ Jehova nĩ aroraga andũ ake. Nĩ onaga mathĩna marĩa macemanagia namo ‘mahinda-inĩ maya ma ũgwati,’ na nĩ oĩ biũ ũrĩa maiguaga.—2 Timotheo 3:1; Atũmwo 17:27.
“Arĩa athuthĩku ngoro.” Kũringana na andũ amwe, ‘gũthuthĩka ngoro’ nĩ wendo gũthira. No mũthomi ũmwe oigire atĩ ciugo cia Daudi cionanagia “kĩeha na ihooru o rĩothe.” Ma nĩ atĩ, o na athathaiya ehokeku a Ngai rĩmwe na rĩmwe nĩ macemanagia na maũndũ maritũ mũno marĩa matũmaga makue ngoro.
‘Arĩa roho wao ũhinyĩrĩrĩkĩte.’ Arĩa makuĩte ngoro no methũũre mũno nginya rĩmwe mate mwĩhoko biũ. Ibuku rĩmwe rĩa ataũri a Bibilia riugaga atĩ ciugo icio no itaũrũo ũũ, “arĩa matarĩ ũndũ o na ũmwe mwega merĩgĩrĩire.”
Hihi Jehova ekaga atĩa nĩ ũndũ wa arĩa ‘athuthĩku ngoro’ na ‘makahinyĩrĩrĩka roho’? Hihi amaikaraga haraya, akamona ta matagĩrĩire kwendwo na kũrũmbũiyo nĩwe? Ũguo tiguo kũrĩ! Jehova aikaraga hakuhĩ na athathaiya ake arĩa mamũkayagĩra amateithie, o ta ũrĩa mũciari atindĩkagwo nĩ wendo kũnyita na kũũmĩrĩria kaana gake hĩndĩ ĩrĩa karĩ na mĩtangĩko. Nĩ akoragwo na wendo wa kũũmĩrĩria na kũhooreria ngoro ciao rĩrĩa ithuthĩkĩte na roho wao rĩrĩa ũhinyĩrĩrĩkĩte. Nĩ amaheaga hinya na ũũgĩ wa kũhiũrania na magerio o mothe marĩa mangĩcemania namo.—2 Akorintho 4:7; Jakubu 1:5.
Na githĩ ndũkĩagĩrĩirũo nĩ gũcaria ũrĩa ũngĩkuhĩrĩria Jehova makĩria? Ngai ũcio mũigua tha atwĩraga ũũ: ‘Njikaraga ndĩ hamwe na mũndũ ũrĩa wĩ na ngoro ĩherete na ĩrĩa ĩĩnyihĩtie, nĩguo ngaarahũre roho wa mũndũ ũcio wĩnyihĩtie, o na ngaramũkie andũ acio maikaraga maherete na ngoro ciao.’—Isaia 57:15.
Ũthomi wa Bibilia wa Juni