CIŨRIA KUUMA KŨRĨ ATHOMI
Hihi ciugo cia Daudi thĩinĩ wa Thaburi 37:25 na ciugo cia Jesu thĩinĩ wa Mathayo 6:33 cionanagia atĩ gũtirĩ hĩndĩ Jehova angĩrekereria Mũkristiano age irio?
Daudi oigire atĩ ‘ndarĩ ona mũndũ mũthingu atiganĩirio, kana mbeũ yake ĩkĩhoyanga irio.’ Oigire ciugo icio kũringana na ũrĩa we eeyoneire. Nĩ aamenyete wega atĩ gũtirĩ hĩndĩ Jehova atiganagĩria andũ ake. (Thab. 37:25) O na kũrĩ ũguo, ciugo icio cia Daudi itionanagia atĩ gũtirĩ ndungata o na ĩmwe ya Jehova ĩrĩ yaaga kana ĩngĩaga irio.
Kũrĩ mahinda Daudi we mwene aacemanirie na mathĩna maritũ mũno. Hĩndĩ ĩmwe nĩ rĩrĩa oragĩra Saulu. Daudi nĩ aanyihĩirũo nĩ irio, na nĩ ũndũ ũcio agĩthiĩ gũcaria mũgate nĩ ũndũ wake na arĩa marĩ nao. (1 Sam. 21:1-6) O na gũtuĩka hĩndĩ ĩyo Daudi nĩ aagire kĩndũ gĩa kũrĩa, ndaabatarire gũthiĩ akĩhoyahoyaga irio. Nĩ aamenyaga atĩ Jehova nĩ angĩarũmbũyirie mabataro make.
Thĩinĩ wa Mathayo 6:33, Jesu atwĩraga atĩ hatarĩ nganja Ngai nĩ arĩhingagia mabataro ma ndungata ciake njĩhokeku iria cigaga maũndũ ma Ũthamaki mbere. Oigire ũũ: “No ambai mũcarie ũthamaki wa Ngai o na ũthingu wake, nacio indo icio ciothe [gĩa kũrĩa, kũnyua, na gĩa kwĩhumba] nĩmũrĩkĩragĩrĩrio.” O na kũrĩ ũguo, Jesu ningĩ nĩ oigire atĩ nĩ kũngĩahotekire ‘ariũ a Ithe’ mage irio nĩ ũndũ wa kũnyarirũo. (Mat. 25:35, 37, 40) Ũndũ ũcio nĩ wakorire mũtũmwo Paulo. Kũrĩ hĩndĩ aagaga gĩa kũrĩa na gĩa kũnyua.—2 Kor. 11:27.
Jehova nĩ atwĩrĩte atĩ nĩ tũrĩnyariragwo na njĩra itiganĩte. Ahota gwĩtĩkĩria twage mabataro maitũ nĩguo tũcokie thitango ĩrĩa yoimĩririo nĩ Mũcukani. (Ayub. 2:3-5) Kwa ngerekano, aarĩ na ariũ a Ithe witũ amwe, ta arĩa maarĩ kambĩ-inĩ cia kũherithanĩrio cia Nazi, maarĩ na mathĩna maingĩ mũno nĩ ũndũ wa kũnyarirũo. Njĩra ĩmwe njũru ĩrĩa yahũthagĩrũo nĩguo Aira a Jehova makaane wĩtĩkio wao nĩ kwaga kũheo irio cia kũigana. Aira a Jehova maathire na mbere gũkorũo marĩ ehokeku harĩ Jehova, nake ndaigana kũmatiganĩria. Nĩ eetĩkĩririe magerio ota ũrĩa etĩkagĩria Akristiano othe magerio na njĩra itiganĩte. O na kũrĩ ũguo, hatirĩ nganja atĩ Jehova nĩ omagĩrĩria arĩa othe manyamarĩkaga nĩ ũndũ wa rĩĩtwa rĩake. (1 Kor. 10:13) Nĩ wega kũririkana ciugo ici cia Afilipi 1:29: “Ha ũhoro wa Kristo, inyuĩ nĩ mwĩtĩkĩrĩtio kũmwĩhoka, na to kũmwĩhoka gwiki, no ningĩ kũnyamarĩka nĩ ũndũ wake.”
Jehova eranĩire atĩ nĩ arĩkoragwo hamwe na ndungata ciake. Kwa ngerekano, Isaia 54:17 yugaga ũũ: “Gũtirĩ mũtĩ wa mbaara o na ũrĩkũ, ũrĩa ũthondeketwo wa gũgũũkĩrĩra, ũkaagĩrĩra wĩra-inĩ waguo.” Kĩĩranĩro kĩu na ingĩ itariĩ takĩo nĩ ũira wa atĩ Jehova nĩ agitagĩra andũ ake marĩ gĩkundi. O na kũrĩ ũguo, Mũkristiano ũmwe ũmwe no acemanie na magerio nginya akinyĩrĩre gũkua.