Mũthenya wa Gũtuanĩra nĩ Kĩĩ?

WEE wĩciragia mũthenya wa gũtuanĩra ũkaahaana atĩa? Andũ aingĩ meciragia atĩ andũ bilioni nyingĩ makaarũgama ũmwe ũmwe mbere ya gĩtĩ kĩa ũthamaki kĩa Ngai. Na hau nĩho o mũndũ agaatuĩrũo cira wake we mwene. Amwe mathiĩ ikenero rĩa matu-inĩ, na arĩa angĩ matuĩrũo kũherithio tene na tene. No Bibilia yugaga ũndũ ngũrani na ũcio igũrũ rĩgiĩ ihinda rĩu. Kiugo kĩa Ngai gĩtaarĩirie mũthenya ũcio atĩ nĩ ihinda rĩa mwĩhoko na gũthondeka, no ti rĩa kũguoyohia.

Thĩinĩ wa Kũguũrĩrio 20:11, 12 nĩ tũthomaga ũrĩa mũtũmwo Johana ataarĩirie Mũthenya wa Gũtuanĩra: “Ngĩona gĩtĩ-gĩa-ũthamaki kĩnene, kĩerũ, o nake ũrĩa wagĩikarĩire, nayo thĩ o na igũrũ ikĩũrĩra ũthiũ wake, gũkĩaga kũrĩa ingĩikara. Ningĩ ngĩona arĩa maanakua, o arĩa anene na arĩa anyinyi, marũngiĩ mbere ya gĩtĩ kĩu gĩa ũthamaki; na gũkĩhingũrũo mabuku. O narĩo ibuku rĩngĩ rĩkĩhingũrũo, nĩrĩo ibuku rĩa muoyo; nao arĩa akuũ magĩtuĩrũo matuĩro mao na maũndũ marĩa maandĩkĩtwo mabuku-inĩ macio, o kũringana na maũndũ mao marĩa maaneka.” Mũtuanĩri ũcio ũgwetetwo hau nũũ?

Jehova Ngai nĩwe Mũtuanĩri cira ũrĩa mũnene biũ wa andũ. No we nĩaheanĩte wĩra ũcio wa gũtuĩra andũ cira. Kũringana na Atũmwo 17:31, mũtũmwo Paulo oigire atĩ Ngai “nĩ gũtua atuĩte mũthenya ũrĩa agatuĩra andũ cira na kĩhooto, arĩa matũire gũkũ thĩ guothe, na ũndũ wa Mũndũ ũrĩa athurĩte.” Mũtuanĩri ũcio ũthuurĩtwo nĩ Jesu Kristo ũrĩa wariũkirio. (Johana 5:22) No rĩrĩ, Mũthenya wa Gũtuanĩra ũkaambĩrĩria rĩ? Ũgaakorũo ũigana atĩa?

Ibuku rĩa Kũguũrĩrio rĩonanagia atĩ Mũthenya wa Gũtuanĩra ũkaambĩrĩria thutha wa mbara ya Hari-Magedoni, rĩrĩa mũtabarĩre wa Shaitani gũkũ thĩ ũkaanangwo.a (Kũguũrĩrio 16:14, 16; 19:19–20:3) Thutha wa Hari-Magedoni-rĩ, Shaitani na ndaimono ciake makaahingĩrũo thĩinĩ wa irima rĩtarĩ gĩturi kwa ihinda rĩa mĩaka ngiri ĩmwe. Hĩndĩ ĩo arĩa 144,000 a gũthiĩ matu-inĩ magatuĩka atuanĩri cira, na “magathamakaga hamwe na Kristo mĩaka ngiri.” (Kũguũrĩrio 14:1-3; 20:1-4; Aroma 8:17) Mũthenya wa Gũtuanĩra ti ũndũ ũgeekwo na ihenya thĩinĩ wa mathaa 24. Nĩ ihinda rĩa mĩaka ngiri ĩmwe.

Hĩndĩ ĩo ya mĩaka ngiri-rĩ, Jesu Kristo ‘agaacirithia andũ arĩa marĩ muoyo o na arĩa makuĩte.’ (2 Timotheo 4:1) “Andũ arĩa marĩ muoyo” nĩ “kĩrĩndĩ kĩingĩ mũno” kĩrĩa gĩkaahonoka Hari-Magedoni. (Kũguũrĩrio 7:9-17) Mũtũmwo Johana ningĩ nĩoonire “arĩa maanakua . . . marũgamĩte mbere-inĩ ya gĩtĩ kĩrĩa gĩa ũthamaki” gĩa gũtuanĩra. O ta ũrĩa Jesu eeranĩire-rĩ, “arĩa othe me thĩinĩ wa mbĩrĩra makaigua mũgambo [wa Kristo], na moime kuo” na njĩra ya kũriũkio. (Johana 5:28, 29; Atũmwo 24:15) No magaatuĩrũo kũringana na maũndũ marĩkũ?

Kũringana na kĩoneki kĩa mũtũmwo Johana-rĩ, ‘kwahingũrirũo mabuku’ na “akuũ magĩtuĩrũo matuĩro mao na maũndũ marĩa maandĩkĩtwo mabuku-inĩ macio, o kũringana na maũndũ mao marĩa maaneka.” Mabuku macio hihi maandĩkĩtwo ũhoro wa maũndũ marĩa andũ arĩa akuũ meekĩte tene? Aca, andũ matigatuĩrũo kũringana na maũndũ marĩa meekire matanakua. Tũmenyaga ũguo atĩa? Bibilia yugaga ũũ: “Mũndũ ũrĩkĩtie gũkua ũguo nĩatuĩtwo mũthingu agatigithanio na wĩhia.” (Aroma 6:7) Kwoguo arĩa makaariũkio magaacoka muoyo matarĩ na mehia. Nĩ ũndũ ũcio no mũhaka mabuku macio makorũo monanagia maathani mangĩ ma Ngai. Nĩgetha andũ arĩa makahonoka Hari-Magedoni na arĩa makariũkio matũũre tene na tene-rĩ, no nginya magaathĩkĩra mawatho ma Ngai, hamwe na maathani mangĩ merũ marĩa Jehova hihi akaaguũria hĩndĩ ĩo ya mĩaka ngiri. Kwoguo-rĩ, andũ magaatuĩrũo kũringana na maũndũ marĩa mageka hĩndĩ ya Mũthenya wa Gũtuanĩra.

Mũthenya wa Gũtuanĩra nĩ ũkaahe andũ bilioni nyingĩ mweke wao wa mbere wa kwĩruta igũrũ rĩgiĩ wendi wa Ngai na gũtũũra kũringana naguo. Ũguo nĩ kuuga atĩ ũrutani mũnene mũno nĩũgakorũo ũgĩthiĩ na mbere. ‘Andũ arĩa magatũũraga mabũrũri [ma thĩ] magaitĩka kwĩruta ũhoro wa ũthingu.’ (Isaia 26:9) No rĩrĩ, ti othe magakorũo makĩenda gũtũũra kũringana na wendi wa Ngai. Isaia 26:10 yugaga ũũ: “O na mũndũ mwaganu angĩiguĩrũo tha-rĩ, ndangĩĩruta ũhoro wa ũthingu; o na arĩ bũrũri ũrĩa wĩkagwo maũndũ ma ũthingu-rĩ, no gwĩka arĩĩkaga andũ maũndũ moru, na ndarĩ hingo akona ũkaru wa Jehova.” Andũ acio aganu makaninwo kaimana hĩndĩ ĩo ya Mũthenya wa Gũtuanĩra.​​—Isaia 65:20.

Mũthenya ũcio wa Gũtuanĩra ũgĩũka gũthira-rĩ, andũ arĩa magaakorũo matigarĩte ‘magaacoka muoyo’ kũna marĩ andũ akinyanĩru. (Kũguũrĩrio 20:5) Kwoguo hĩndĩ ya Mũthenya wa Gũtuanĩra andũ nĩ magaacokerio ũkinyanĩru ũrĩa maarĩ naguo mbere. (1 Akorintho 15:24-28) Gũgaacoka kũgĩe na igerio rĩa mũthia. Shaitani nĩ akaarekererio kuuma kĩoho-inĩ gĩake na etĩkĩrio agerie kũhĩtithia andũ rita rĩmwe rĩa mũthia. (Kũguũrĩrio 20:3, 7-10) Arĩa makaaregana nake nĩ magaakenera kũhingio gwa kĩĩranĩro gĩkĩ kĩa Bibilia: “Arĩa athingu nĩo makagaya thĩ, na gũtũũra mamĩtũũre o nginya tene.” (Thaburi 37:29) Ĩĩ, Mũthenya wa Gũtuanĩra ũgakorũo ũrĩ kĩrathimo kũrĩ andũ othe ehokeku!