Gũikara Tũrĩ Atheru Maitho-inĩ ma Ngai?

Ta wĩcirie ũhoro wa mũtumia akĩhaarĩria kahĩĩ gake endete nĩguo gathiĩ cukuru. Agatigĩrĩra atĩ nĩ gethambĩte, na atĩ nĩ kehumbĩte wega, na nguo ciako nĩ theru. Ũndũ ũcio nĩ ũtũmaga gakorũo na ũgima mwega wa mwĩrĩ na ũkonia andũ angĩ atĩ aciari ako nĩ makarũmbũyagia. Ũguo noguo Jehova, Ithe witũ ũtwendete, endaga tũkorũo tũrĩ atheru kĩĩmwĩrĩ na kĩĩmĩtugo. Rĩrĩa twaikara tũrĩ atheru nĩ tũgunĩkaga ithuĩ ene na tũkamũgoocithia.

1. Tũngĩka atĩa nĩguo tũkorũo tũrĩ atheru kĩĩmwĩrĩ?

Jehova atwĩraga ũũ: “No mũhaka mũkorũo mũrĩ atheru.” (1 Petero 1:16) Gũkorũo tũrĩ atheru kũhutĩtie ũtheru wa kĩĩmwĩrĩ na wa kĩĩmĩtugo. No tũkorũo tũrĩ atheru kĩĩmwĩrĩ tũngĩĩthambaga o mũthenya na tũkaigaga nguo citũ irĩ theru na irĩ na mũbango mwega, o hamwe na mĩciĩ itũ, na indo ingĩ ta ngaari. Ningĩ no tũteithagĩrĩrie gũtheria Nyũmba itũ ya Ũthamaki. Rĩrĩa twaikara tũrĩ atheru kĩĩmwĩrĩ nĩ tũgoocithagia Jehova.—2 Akorintho 6:3, 4.

2. Twagĩrĩirũo gwĩthema mĩtugo ĩrĩkũ nĩguo tũikare tũrĩ atheru?

Bibilia ĩtwĩraga “[twĩtherie] ũndũ o wothe ũrĩa ũngĩthahia mwĩrĩ na roho.” (2 Akorintho 7:1) Kwoguo nĩ twĩrutanagĩria gwĩthema ũndũ o wothe ũngĩthũkia mĩĩrĩ itũ kana meciria maitũ. Meciria maitũ nĩ magĩrĩirũo gũkenagia Jehova, na nĩkĩo twĩkaga ũrĩa wothe tũngĩhota kũregana na meciria moru. (Thaburi 104:34) Ningĩ nĩ twĩrutanagĩria kũhũthĩra mĩario mĩtheru.—Thoma Akolosai 3:8.

Nĩ maũndũ marĩkũ mangĩ mangĩtũma twage gũkorũo tũrĩ atheru kĩĩmwĩrĩ kana kĩĩmĩtugo? Indo imwe no ithũkie mĩĩrĩ itũ. Kwoguo nĩ twĩthemaga indo ta thigara, mĩraa, ndawa cia kũrebia, kana kũhũthĩra ndawa ingĩ ũũru. Nĩ ũndũ wa gwĩthema indo ta icio, tũkoragwo na ũgima mwega wa mwĩrĩ na nĩ tuonanagia atĩ nĩ tũtĩĩte kĩheo kĩa muoyo. Ningĩ nĩ twĩrutanagĩria gũikara tũrĩ atheru kĩĩmĩtugo na njĩra ya kũrũa na mĩtugo ĩtarĩ mĩtheru ya gwĩkinaa na kwĩrorera ponografĩ. (Thaburi 119:37; Aefeso 5:5) No ũkorũo ũtarĩ ũndũ mũhũthũ gũtooria mĩtugo ĩyo, ĩndĩ Jehova no atũteithie gũtooria.—Thoma Isaia 41:13.

THUTHURIA MAKĨRIA

3. Ũtheru wa kĩĩmwĩrĩ nĩ ũgoocithagia Jehova

No tũmenye mawoni ma Jehova megiĩ ũtheru tũngĩthuthuria mawatho marĩa aaheete Aisiraeli. Thomai Thama 19:10 na 30:17-19, mũcoke mwarĩrĩrie ciũria ici:

• Kũringana na mĩhari ĩyo-rĩ, Jehova akoragwo na mawoni marĩkũ megiĩ ũtheru wa kĩĩmwĩrĩ?

• Nĩ maũndũ marĩkũ mega ũngĩĩmenyeria gwĩkaga mangĩgũteithia gũikaraga ũrĩ mũtheru kĩĩmwĩrĩ?

Mũndũ nĩ abataraga kũhũthĩra mahinda na gũkorũo na kĩyo nĩguo aikare arĩ mũtheru kĩĩmwĩrĩ. Ĩndĩ no tũhote gwĩka ũguo gũtekũmakania kũrĩa tũikaraga kana ũhoti witũ wa kĩĩmbeca. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Ngai Endete Andũ Atheru (4:10)

• Kũiga indo citũ irĩ theru na irĩ na mũbango mwega gũtĩithagia atĩa wĩra witũ wa kũhunjia?

4. No ũtoorie mĩtugo mĩũru

Angĩkorũo nĩ ũnyuaga thigara kana ũkahũthĩra ndawa cia kũrebia, no kũhoteke nĩ ũĩ ũrĩa ũrĩ ũndũ mũritũ gũtiga mũtugo ũcio. Nĩ kĩĩ kĩngĩgũteithia? Wĩcũranie ũrĩa mũtugo ũcio ũkũhutagia. Thomai Mathayo 22:37-39, mũcoke mwarĩrĩrie ũrĩa kũnyua thigara kana kũhũthĩra ndawa ũũru kũhutagia . . .

• ũrata wa mũndũ na Jehova.

• famĩlĩ ya mũndũ na andũ arĩa marĩ hakuhĩ nake.

Banga ũrĩa ũgwĩka nĩguo ũhote gũtooria mũtugo mũũru.b Mwĩrorerei VIDEO ĩno.

VIDEO: Wĩrutanagĩrie Kwĩgirĩrĩria (2:47)

Thomai Afilipi 4:13, mũcoke mwarĩrĩrie kĩũria gĩkĩ:

• Gũkorũo na mũtaratara mwega wa kũhoya, kwĩruta Bibilia, na gũthiĩ mĩcemanio kũngĩhe mũndũ hinya atĩa wa gũtooria mũtugo mũũru?

5. Ũrĩa ũngĩrũa na meciria moru na mĩtugo ĩtarĩ mĩtheru

Thomai Akolosai 3:5, mũcoke mwarĩrĩrie ciũria ici:

• Tũmenyaga atĩa atĩ kwĩrorera ponografĩ, gũtũmanĩra mbica cia ũũra-thoni, na gwĩkina nĩ mĩtugo ĩtarĩ mĩtheru maitho-inĩ ma Jehova?

• Nĩ ũkuona ta tũngĩhota gũkorũo tũrĩ atheru kĩĩmĩtugo ta ũrĩa Jehova erĩgagĩrĩra tũkorũo? Ũngiuga ũguo nĩkĩ?

Rora wone ũrĩa ũngĩrũa na meciria moru. Mwĩrorerei VIDEO ĩno.

VIDEO: Wĩrutanĩrie Gũikaraga Ũrĩ Mũtheru (1:51)

Jesu nĩ aahũthĩrire ngerekano kuonania atĩ no mũhaka tuoe makinya marũmu nĩguo tũikare tũrĩ atheru kĩĩmĩtugo. Thomai Mathayo 5:29, 30, mũcoke mwarĩrĩrie kĩũria gĩkĩ:

• O na gũtuĩka Jesu ndooigaga atĩ twĩgere ngero, nĩ oonanirie atĩ nĩ tũrabatara kuoya ikinya. Mũndũ angĩoya ikinya ta rĩrĩkũ nĩguo etheme meciria matarĩ matheru?c

Angĩkorũo nĩ ũrerutanĩria gũtooria meciria matarĩ matheru, Jehova nĩ arakenio nĩ kĩyo gĩaku. Thomai Thaburi 103:13, 14, mũcoke mwarĩrĩrie kĩũria gĩkĩ:

• Angĩkorũo nĩ ũrarũa na mũtugo mũna ũtarĩ mũtheru-rĩ, rĩandĩko rĩu rĩragwĩkĩra ngoro atĩa ũthiĩ na mbere kwĩrutanĩria?

Ndũgakue ngoro!

Nĩ ũndũ mũhũthũ mũndũ kũigua akuĩte ngoro angĩcokerera mũtugo arerutanĩria gũtiga. No ta wĩcirie ũndũ ũyũ: Mũtengʼeri angĩhĩngwo na agwe, ũguo ti kuuga atĩ nĩ ahootwo kana atĩ ekũbatara gũtengʼera ihenya rĩu rĩngĩ kuuma kĩambĩrĩria. Na njĩra o ta ĩyo, gũcokerera mũtugo mũũru ti kuuga atĩ nĩ waremwo kũũtooria. Na ningĩ ti kuuga atĩ kĩyo gĩaku kĩrarĩ gĩa tũhũ. Ũcio nĩ ũndũ wĩkĩkaga harĩ andũ aingĩ rĩrĩa marerutanĩria gũtiga mũtugo mũna mũũru. Kwoguo, ndũgakue ngoro! Jehova nĩ egũgũteithia ũhote gũtooria mũtugo ũcio mũũru.

ŨRĨA TWERUTA

Nĩ tũkenagia Jehova rĩrĩa twaikara tũrĩ atheru kĩĩmwĩrĩ, kĩĩmeciria, na kĩĩmĩtugo.

Ciũria cia gũcokera

• Nĩkĩ nĩ ũndũ wa bata mũno gũkorũo tũrĩ atheru?

• Ũngĩka atĩa nĩguo ũikare ũrĩ mũtheru kĩĩmwĩrĩ?

• Ũngĩka atĩa nĩguo ũikare ũrĩ mũtheru kĩĩmeciria na kĩĩmĩtugo?

RIKĨRA

Nĩ maũndũ marĩkũ mahũthũ ũngĩkaga nĩguo ũikare ũrĩ mũtheru kĩĩmwĩrĩ o na angĩkorũo ndũrĩ na ũhoti mũnene wa kĩĩmbeca?

Ũtheru na Ũgima Mwega wa Mwĩrĩ—Gwĩthamba Moko (3:01)

Thoma wone makinya mũndũ angĩoya nĩguo ahote gũtiga kũnyuaga thigara.

“Ũrĩa Ũngĩtiga Kũnyua Thigara” (g10 05)

Thoma wone moimĩrĩro marĩa mangiumana na ponografĩ.

“Ponografĩ​—Nĩ Njega Kana nĩ Thumu?” (Mũrangĩri, Agosti 1, 2013)

Thoma wone ũrĩa mũndũ ũmwe aatooririe mũtugo wa kwĩrorera ponografĩ.

“O na Gũtuĩka nĩ Ndaagũire Maita Maingĩ, nĩ Ndehandire” (Mũrangĩri Na. 4 2016)

3. Nĩkĩ ndwagĩrĩirũo gwĩtĩkĩria guoya ũkũgirĩrĩrie kũbatithio?

Andũ amwe metigagĩra atĩ matikũhota kũhingia maũndũ marĩa merĩra Jehova. Rĩmwe na rĩmwe nĩ ũrĩhĩtagia, o ta arũme na atumia ehokeku arĩa magwetetwo Bibilia-inĩ. No Jehova nderĩgagĩrĩra athathaiya ake makorũo marĩ akinyanĩru. (Thoma Thaburi 103:13, 14.) Nĩ akenaga rĩrĩa weka ũrĩa wothe ũngĩhota. Nĩ arĩgũteithagia. O na atwĩrĩire atĩ gũtirĩ kĩndũ “kĩngĩhota gũtũtigithũkania na wendo [wake].”—Thoma Aroma 8:38, 39.