ITHOMO RĨA 05
Bibilia nĩ Ndũmĩrĩri Kuuma Kũrĩ Ngai
Jehova nĩ atũheete kĩheo kĩa mwanya kĩa Bibilia, ĩrĩa ĩkoragwo na mabuku 66 manyitithanĩtio. Ĩndĩ no wĩyũrie: ‘Bibilia yoimire kũ? Mũtungi wayo nũũ?’ Nĩguo tuone macokio ma ciũria icio, reke twarĩrĩrie ũrĩa ndũmĩrĩri ya Ngai ĩrĩa ĩrĩ thĩinĩ wa Bibilia yatũkinyĩire.
1. Angĩkorũo andũ nĩo maandĩkire Bibilia-rĩ, nĩ kĩĩ kĩngĩtũma tuuge atĩ yumĩte kũrĩ Ngai?
Bibilia yaandĩkirũo nĩ andũ ta 40 kwa ihinda rĩa kĩndũ mĩaka 1,600, kuuma mwaka wa 1513 M.M.M. nginya kĩndũ mwaka wa 98 M.M. O na gũtuĩka andũ arĩa maamĩandĩkire mooimĩte mĩrerere-inĩ ĩtiganĩte, Bibilia ndĩĩhĩngĩcaga. Ũndũ ũcio ũngĩhoteka atĩa? Tondũ Ngai nĩwe Mũtungi wa Bibilia. (Thoma 1 Athesalonike 2:13.) Andũ arĩa maandĩkire Bibilia matiandĩkire mawoni mao ene. Handũ ha ũguo, “maaririe maũndũ moimĩte kũrĩ Ngai o ta ũrĩa maatongoririo nĩ roho mũtheru.”a (2 Petero 1:21) Ngai aahũthĩrire roho wake mũtheru gũtongoria andũ acio nĩguo mandĩke meciria make.—2 Timotheo 3:16.
2. Nĩa mangĩgunĩka kuumana na Bibilia?
Andũ a “ndũrĩrĩ ciothe na mĩhĩrĩga na thiomi na ikundi cia andũ” no magunĩke kuumana na ũhoro mwega ũrĩa ũrĩ thĩinĩ wa Bibilia. (Thoma Kũguũrĩrio 14:6.) Ngai aatigĩrĩire atĩ Bibilia no yoneke na thiomi nyingĩ gũkĩra ibuku rĩngĩ o rĩothe. Hakuhĩ mũndũ o wothe no ahote kuona Bibilia, gũtekũmakania kũrĩa aikaraga kana rũthiomi rũrĩa aragia.
3. Jehova agitĩrĩte Bibilia na njĩra ĩrĩkũ?
Bibilia yaandĩkĩtwo indo-inĩ itangĩtũũra ihinda iraihu, ta rũũa na marura. No andũ meendete Bibilia nĩ maamĩkobirie na kinyi nĩguo ĩkorũo ĩtarĩ na mahĩtia. Anene amwe na atongoria a ndini nĩ maageragia kũniina Bibilia, no andũ angĩ nĩ meerutĩire kũingĩria mĩoyo yao ũgwati-inĩ nĩguo mamĩgitĩre. Jehova ndarĩ etĩkĩria mũndũ o wothe kana kĩndũ o gĩothe kĩmũgirĩrĩrie kwaranĩria na ithuĩ. Bibilia yugaga ũũ: “Kiugo kĩa Ngai witũ gĩtũũraga tene na tene.”—Isaia 40:8.
THUTHURIA MAKĨRIA
Reke twĩrute makĩria ũrĩa Ngai aatongoririe andũ kwandĩka Bibilia, ũrĩa aamĩgitĩrire, na ũrĩa eekire nĩguo ĩkinyĩre andũ.
4. Bibilia nĩ ĩguũragia Mũtungi wayo nũũ
Mwĩrorerei VIDEO ĩno, mũcoke mũthome 2 Timotheo 3:16, na mwarĩrĩrie ciũria iria irũmĩrĩire.
Angĩkorũo Bibilia yandĩkirũo nĩ andũ-rĩ, ĩtagwo Kiugo kĩa Ngai nĩkĩ?
Nĩ kĩĩ kĩngĩtũma wĩtĩkie atĩ Ngai nĩ eekĩrire meciria make thĩinĩ wa andũ arĩa maandĩkire Bibilia?
Mũndũ no ere karani maũndũ marĩa ekwandĩka marũa-inĩ. Na njĩra o ta ĩyo, andũ nĩo maandĩkire Bibilia, no ndũmĩrĩri yayo yoimĩte kũrĩ Ngai
5. Bibilia nĩ ĩĩtirĩtie tharĩkĩro nyingĩ
Angĩkorũo Bibilia yumĩte kũrĩ Ngai, tũngĩĩrĩgĩrĩra amĩgitĩre. Kwa ihinda iraya, anene amwe nĩ mageretie kũniina Bibilia. Atongoria a ndini nao manageria kũmĩhitha. No andũ aingĩ nĩ meingĩrĩtie ũgwati-inĩ nĩguo magitĩre Bibilia, o na kũrĩ na ũkararia na mĩkaana ya kũũragwo. Nĩguo mwĩrute ũhoro wĩgiĩ mũndũ ũmwe wekire ũguo, mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
Hihi kũmenya maũndũ marĩa mothe mekĩtwo nĩguo Bibilia ĩgitĩrũo nĩ gwatũma wĩrirĩrie kũmĩthoma? Ũngiuga ũguo nĩkĩ?
Thomai Thaburi 119:97, mũcoke mwarĩrĩrie kĩũria gĩkĩ:
Nĩ kĩĩ gĩtindĩkĩte andũ aingĩ gũtaũra na gũtheremia Bibilia o na angĩkorũo gwĩka ũguo no kũingĩrie mĩoyo yao ũgwati-inĩ?
6. Ibuku andũ othe mangĩgĩa narĩo
Bibilia nĩrĩo ibuku rĩrĩa rĩtaũrĩtwo na rĩgatheremio mũno thĩinĩ wa thĩ. Thomai Atũmwo 10:34, 35, mũcoke mwarĩrĩrie ciũria ici:
Ngai endaga kiugo gĩake gĩtaũrũo na gĩtheremio na gĩkĩro kĩnene nĩkĩ?
Nĩ ũndũ ũrĩkũ wendete wĩgiĩ Bibilia?
Hakuhĩ
ANDŨ OTHE
thĩinĩ wa thĩ
no mahote kuona Bibilia na rũthiomi mangĩtaũkĩrũo nĩruo
Yonekaga na makĩria ma
thiomi
3,000
ĩrĩ yothe kana icunjĩ ciayo
Kwĩgeragĩrio atĩ kũrutĩtwo Bibilia
5,000,000,000
Gũtirĩ ibuku rĩngĩ rĩrutĩtwo na gĩkĩro kĩnene ũguo
ANDŨ AMWE MOIGAGA: “Bibilia nĩ ibuku rĩa tene rĩandĩkĩtwo nĩ andũ.”
Wee ũngiuga atĩa?
Nĩ ũira ũrĩkũ wonanagia atĩ Bibilia nĩ Kiugo kĩa Ngai?
ŨRĨA TWERUTA
Bibilia nĩ Kiugo kĩa Ngai, na nĩ atigĩrĩire atĩ mũndũ o wothe no ahote kũmĩona.
Ciũria cia gũcokera
Ngai aatongoririe andũ na njĩra ĩrĩkũ makĩandĩka Bibilia?
Nĩ ũndũ ũrĩkũ wagũkenia wĩgiĩ ũrĩa Bibilia ĩgitĩirũo, ĩgataũrũo, na ĩgatheremio?
Kũmenya ũrĩa wothe Ngai ekĩte nĩguo ahote kwaranĩria nawe kũratũma ũigue atĩa?
RIKĨRA
Thoma wone ũrĩa Bibilia yatũkinyĩire, kuuma maandĩko marĩa ma tene nginya ũrĩa ĩtaũrĩtwo mahinda-inĩ maya.
Thoma wone ũrĩa Bibilia ĩĩtirĩtie mogwati matatũ manene marĩa mangĩatũmire ĩniinwo.
Wĩrorere wone mogwati marĩa andũ maahiũranirie namo magĩtaũra Bibilia.
Bibilia nĩ ĩkobetio na ĩgataũrũo maita maingĩ. Nĩ kĩĩ kĩngĩtũma ũkorũo na ma atĩ ndũmĩrĩri yayo ndĩcenjetio?
a O ta ũrĩa ithomo rĩa 07 rĩonanĩtie, roho mũtheru nĩ hinya wa Ngai wa gwĩka maũndũ.