Hihi Wee nĩ Ũingĩrĩte Kĩhurũko-inĩ kĩa Ngai?
“Nĩ ũndũ Ũhoro wa Ngai wĩ muoyo, na wĩ na ũhoti.”—AHIB. 4:12.
1. Nĩ na njĩra ĩrĩkũ tũngĩingĩra kĩhurũko-inĩ kĩa Ngai ũmũthĩ, no nĩkĩ ũcio ti ũndũ mũhũthũ?
THĨINĨ wa gĩcunjĩ kĩrĩa kĩhĩtũku-rĩ, tuoonire atĩ no tũingĩre kĩhurũko-inĩ kĩa Ngai tũngĩathĩkĩra maũndũ marĩa maringaine na mĩoroto yake. No rĩngĩ na rĩngĩ ti ũndũ mũhũthũ gwathĩka. Kwa ngerekano rĩrĩa tweruta atĩ Jehova nĩ athũire ũndũ mũna twendete-rĩ, kĩambĩrĩria-inĩ twahota gũkararia. Ũndũ ũcio ũronania atĩ nĩ tũrabatara gũkũra-kũra ũhoro-inĩ wĩgiĩ gwathĩka ‘tũtarĩ na ngarari.’ (Jak. 3:17) Thĩinĩ wa gĩcunjĩ gĩkĩ, nĩ tũkwarĩrĩria maũndũ mamwe marĩa mangĩtũhe mweke wa kuonania kana nĩ tũkoragwo twĩhaarĩirie biũ gwathĩka hingo ciothe.
2, 3. Nĩ kĩyo kĩrĩkũ arĩ o mũhaka tũthiĩ na mbere kuonania nĩguo tũtũũre tũrĩ a kwĩrirĩrio maitho-inĩ ma Jehova?
2 Hihi wee nĩ ũkoragwo wĩhaarĩirie gwathĩkĩra ũtaaro ũrĩa uumĩte Bibilia-inĩ? Maandĩko matwĩraga atĩ nĩ wendi wa Ngai gũcokanĩrĩria harĩ we ‘indo iria ciĩriragĩrio mũno cia ndũrĩrĩ.’ (Hag. 2:7) Ma nĩ atĩ, aingĩ aitũ tũtiarĩ a kwĩrirĩrio hĩndĩ ĩrĩa twambagĩrĩria kwĩruta ũhoro wa ma. Ĩndĩ, wendo witũ harĩ Ngai na harĩ Mũrũwe nĩ watũtindĩkire gwĩka ũgarũrũku mũnene harĩ mwerekera na mĩtugo iitũ nĩguo tũkenagie Ngai biũ. Macũngĩrĩro-inĩ, thutha wa kũhoya na kwĩrutanĩria mũno, mũthenya ũrĩa wa bata nĩ wakinyire rĩrĩa twabatithirio tũgĩtuĩka Akristiano.—Thoma Akolosai 1:9, 10.
3 O na kũrĩ ũguo-rĩ, no tũrũaga na kwaga gũkinyanĩra o na thutha wa kũbatithio. Mbaara ĩyo nĩ ĩrathiĩ na mbere na no ĩgũthiĩ na mbere hingo ĩrĩa yothe tũgũkorũo tũtarĩ akinyanĩru. Tũngĩthiĩ na mbere kũrũa mbaara ĩyo na tũkorũo tũtuĩte itua rĩa gũikaraga tũrĩ a kwĩrirĩrio maitho-inĩ ma Ngai, Jehova atwĩrĩte na ma atĩ nĩ arĩrathimaga kĩyo giitũ.
Hĩndĩ Ĩrĩa Tũrabatara Kũrũngwo
4. Nĩ njĩra irĩkũ ithatũ ingĩhũthĩrũo gũtũhe ũtaaro uumĩte Maandĩko-inĩ?
4 Mbere ya kũrũnga mawathe maitũ ma kwaga gũkinyanĩra-rĩ, no mũhaka twambe tũmenye mawathe macio nĩ marĩkũ. Mĩario no ĩrutwo thĩinĩ wa Nyũmba ya Ũthamaki, kana tũthome gĩcunjĩ mabuku-inĩ maitũ gĩtũteithie kuona mawathe maitũ. Makĩria ma ũguo, tũngĩaga kuona bata wa ũtaaro hĩndĩ ĩrĩa mĩario ĩrarutwo, kana twage kũrũmĩrĩra ũtaaro ũrĩa ũrĩ mabuku-inĩ, Jehova no ahũthĩre Mũkristiano ũngĩ gũtũteithia tuone mahĩtia maitũ.—Thoma Agalatia 6:1.
5. Gweta maũndũ mamwe matarĩ mega marĩa tũngĩka rĩrĩa twaheo ũtaaro, na ũtaarĩrie nĩkĩ arĩithi Akristiano no mũhaka mathiĩ na mbere kwĩrutanĩria gũtũteithia.
5 Ti ũndũ mũhũthũ gwĩtĩkĩra ũtaaro kuuma kũrĩ mũndũ ũtarĩ mũkinyanĩru, o na angĩhũthĩra ũũgĩ na wendo ũigana atĩa agĩtũhe ũtaaro. Ĩndĩ, o ta ũrĩa Agalatia 6:1 yonanagia, Jehova nĩ athĩte arĩa magĩrĩire kĩĩroho mageragie gũtũrũnga, marĩ na ‘ũhoreri.’ Tũngĩtĩkĩra ũtaaro ũcio, nĩ tũrĩtuĩkaga a kwĩrirĩrio makĩria maitho-inĩ ma Ngai. Kaingĩ tũkĩhoya, nĩ twĩtĩkagĩra atĩ tũtirĩ akinyanĩru. O na kũrĩ ũguo, mũndũ angĩtuonia ihĩtia rĩna twĩkĩte, kaingĩ tũkoragwo na mwerekera wa gwĩtetera, kũhũthia ihĩtia rĩu, gwĩkĩrĩra nganja muoroto wa mũndũ ũrĩa ũraruta ũtaaro ũcio, kana kũrakario nĩ njĩra ĩrĩa ahũthĩra kũũruta. (2 Ath. 5:11) Tũngĩheo ũtaaro, hihi ũhutie ũndũ mũna tũtendaga kũigua ũkĩario— ta mĩthiĩre ya mũndũ wa famĩlĩ iitũ, mwĩhumbĩre witũ, ũtheru witũ, kana ũndũ wa gwĩkenia ũrĩa Jehova athũire no nĩ tũkenagio nĩguo-rĩ, twahota kũrakara mũno ũndũ tũngĩtigwo tũgĩthumbũka, na tũtũme ũrĩa ũgũtũheaga ũtaaro aigue ũũru! No thutha wa kũhoorera, kaingĩ nĩ tũcokaga gwĩtĩkĩra atĩ ũtaaro ũcio nĩ ũgũtwagĩrĩire.
6. Kiugo kĩa Ngai kĩguũragia atĩa “meciria ma ngoro o na ũrĩa ĩcirĩire gwĩka”?
6 Rĩandĩko rĩa mũthingi rĩa gĩcunjĩ gĩkĩ rĩtũririkanagia atĩ kiugo kĩa Ngai nĩ ‘kĩrĩ ũhoti.’ Ĩĩni, kiugo kĩa Ngai nĩ kĩrĩ ũhoti wa kũgarũra mĩtũũrĩre ya andũ. Gĩkoragwo na hinya wa gũtũteithia gwĩka ũgarũrũku ũrĩa ũngĩbatarania thutha wa kũbatithio, o ta ũrĩa gĩatũteithirie mbere ya kũbatithio. Thĩinĩ wa marũa make kũrĩ Ahibirania Paulo ningĩ nĩ aandĩkire atĩ, kiugo kĩa Ngai ‘gĩthecaga gĩkagayũkania muoyo na roho, o na gĩgaatia mĩthimo na gĩkagayũkania mahĩndĩ na maguta, ningĩ nĩ kĩhiũhaga gũkũũrana meciria ma ngoro o na ũrĩa ĩcirĩire gwĩka.’ (Ahib. 4:12) Na njĩra ĩngĩ nĩ kuuga atĩ rĩrĩa twamenya ũrĩa Ngai arenda twĩke, ũrĩa twamũkagĩra ũtaaro ũcio nĩ wonanagia ũrĩa tũtariĩ biũ. Hihi nĩ harĩ ngũrani ya ũrĩa andũ matuonaga na ũrĩa tũtariĩ thĩinĩ witũ? (Thoma Mathayo 23:27, 28.) Ta wĩcirie ũrĩa wee ũngĩka ũngĩkorũo maũndũ-inĩ ta maya marĩ haha mũhuro.
Thiĩ na Mbere Gũtwarana na Ithondeka rĩa Jehova
7, 8. (a) Hihi nĩ kĩĩ gĩatũmaga Akristiano amwe Ayahudi manyitĩrĩre mĩtugo ĩmwe ya Watho wa Musa? (b) Nĩkĩ kĩngĩtũma tuuge atĩ kĩyo kĩao kĩarĩ mũgarũ na muoroto wa Jehova ũrĩa wathiaga na mbere kũhinga?
7 Aingĩ aitũ nĩ tũĩ wega ciugo iria irĩ thĩinĩ wa Thimo 4:18: “No rĩrĩ, mũthiĩre wa andũ arĩa athingu ũhaana ta ũtheri gũgĩkĩa, ũrĩa ũũkaga ũkĩnenehaga kinya mũthenya barigici.” Ũguo nĩ kuuga atĩ o ũrĩa mahinda marathiĩ noguo mĩthiĩre iitũ na ũtaũku witũ harĩ mĩoroto ya Ngai ĩrĩthiaga yagĩrĩte.
8 O ta ũrĩa twaarĩrĩirie gĩcunjĩ-inĩ kĩrĩa kĩhĩtũku-rĩ, thutha wa gĩkuũ kĩa Jesu, warĩ ũndũ mũritũ harĩ Akristiano aingĩ Ayahudi gũtiga kũrũmĩrĩra Watho wa Musa. (Atũm. 21:20) O na gũtuĩka Paulo nĩ aatarĩirie na njĩra njega atĩ Akristiano matiarĩ rungu rwa Watho, amwe nĩ maaregire ihooto iria aarutire atongoretio nĩ roho. (Kol. 2:13-15) Kwahoteka meeĩraga atĩ hihi mangĩathiire na mbere gwathĩkĩra icunjĩ imwe cia Watho, nĩ mangĩethemire kũnyarirũo. O ũrĩa kũngĩkorũo kwarĩ, Paulo atekũhithĩrĩra eerire Akristiano Ahibirania atĩ matingĩaingĩrire kĩhurũko-inĩ kĩa Ngai mangĩagire gũtũũra kũringana na muoroto Wake ũrĩa wathiaga ũkĩguũragio.a (Ahib. 4:1, 2, 6; thoma Ahibirania 4:11.) Nĩguo metĩkĩrũo nĩ Jehova, no nginya mangĩetĩkĩrire atĩ rĩu aahũthagĩra njĩra ngũrani.
9. Twagĩrĩirũo nĩ gũkorũo na mawoni marĩkũ hĩndĩ ĩrĩa gwekwo ũgarũrũku thĩinĩ wa ũtaũku witũ wa Maandĩko?
9 Mahinda-inĩ maya, nĩ gũkoretwo na ũgarũrũku harĩ ũtaũku witũ wa morutani mamwe ma Bibilia. Ũndũ ũcio ndwagĩrĩirũo nĩ gũtũthumbũra; wagĩrĩirũo nĩ kuongerera mwĩhoko witũ harĩ ngombo ĩrĩa ĩĩhokekete na njũgĩ. Hĩndĩ ĩrĩa Kĩama kĩrĩa kĩrũgamĩrĩire “ngombo” ĩyo kĩona ũndũ mũna ũrabatara gũtaarĩrio wega kana kũrũngwo, gĩtiagaga gwĩka ũgarũrũku ũcio. Ngombo ĩrĩa ĩĩhokekete yonaga gwĩka kũringana na muoroto wa Ngai ũrĩa ũrathiĩ ũkĩguũragio kũrĩ kwa bata, gũkĩra kwĩgitĩra ndĩkarutwo mahĩtia igũrũ rĩgiĩ ũtaũku mwerũ wa ũrutani mũna. Hĩndĩ ĩrĩa kwagĩa na ũgarũrũku wĩgiĩ ũtaũku witũ wa Maandĩko-rĩ, hihi wee ũiyũkagia ũndũ ũcio atĩa?—Thoma Luka 5:39.
10, 11. Tũngĩĩruta atĩa kuumana na ũrĩa amwe meekire rĩrĩa kwagĩire na ũgarũrũku wa njĩra cia kũhunjia ũhoro mwega?
10 Rekei twarĩrĩrie ũndũ ũngĩ. Mũthia-inĩ wa karine ya 19 na kĩambĩrĩria-inĩ gĩa karine ya 20, Arutwo amwe a Bibilia arĩa maarĩ na ũhoti mwega wa kũruta mĩario, moonaga atĩ njĩra ĩrĩa njega ya kũruta wĩra ũrĩa twathĩtwo wa kũhunjia nĩ kũheana mĩario mĩhaarĩrie wega mbere ya andũ aingĩ. Nĩ maakenaga makĩhunjia mbere ya andũ, na amwe makaigua wega makĩgaathĩrĩrio nĩ athikĩrĩria. Ĩndĩ, thutha-inĩ nĩ kwagĩire na ũtaũku atĩ Jehova endaga andũ ake marute wĩra wa kũhunjia na njĩra itiganĩte, njĩra ĩmwe ĩrĩ kũhunjia nyũmba kwa nyũmba. Amwe arĩa maarĩ na ũhoti mwega wa kũheana mĩario mbere ya andũ aingĩ matiigana gwĩtĩkĩra ũgarũrũku ũcio. Makĩoneka, maarĩ andũ a kĩĩroho, meeyamũrĩire Mwathani biũ. O na kũrĩ ũguo, rĩrĩa Ngai aaguũririe biũ muoroto wake wĩgiĩ wĩra wa kũhunjia, meciria mao, matanya mao o hamwe na mĩoroto yao ĩkĩoneka ũrĩa yaatariĩ. Hihi Jehova aaiguire atĩa nĩ ũndũ wao? Ndaigana kũmarathima. Andũ acio magĩtiga ithondeka rĩa Jehova.—Mat. 10:1-6; Atũm. 5:42; 20:20.
11 Ũguo ti kuuga atĩ wĩra wa kũhunjia waarĩ mũhũthũ harĩ arĩa othe maathire na mbere gũkorũo marĩ ehokeku harĩ ithondeka. Kĩambĩrĩria-inĩ, aingĩ ao nĩ moonaga wĩra ũcio ũrĩ mũritũ. Ĩndĩ nĩ moonanirie wathĩki. Thutha wa ihinda, magĩthirũo nĩ guoya ũrĩa maarĩ naguo, nake Jehova akĩmarathima mũno. Hihi wee ũiguaga atĩa hĩndĩ ĩrĩa twerũo tũhũthĩre njĩra njerũ ya kũhunjia tũtarĩ twahũthĩra? Hihi nĩ ũkoragwo wĩhaarĩirie gwĩtĩkĩra ũgarũrũku?
Hĩndĩ Ĩrĩa Mũndũ Twendete Atiga Jehova
12, 13. (a) Nĩ kĩĩ gĩtũmaga Jehova oige ehia arĩa maregete kwĩrira meherio? (b) Aciari amwe Akristiano makoragwo na igerio rĩrĩkũ, na nĩkĩ kĩritũhagia igerio rĩu mũno?
12 Hatarĩ nganja ithuothe no twĩtĩkĩre ũũma wa atĩ no mũhaka tũkorũo tũrĩ atheru kĩĩmwĩrĩ, kĩĩmĩtugo, na kĩĩroho nĩguo tũkenie Ngai. (Thoma Tito 2:14.) No rĩrĩ, nĩ kũrĩ hĩndĩ wĩhokeku witũ harĩ muoroto wa Ngai wĩgiĩ kũrũmĩrĩra ma ĩyo ũngĩgerio na njĩra nene. Kwa ngerekano-rĩ, ta hũũra mbica, mũriũ wa mũmwe wa aciari Akristiano eehokeku atigĩte ma. Nĩ ũndũ wake gũthuura “gwĩkenia ihinda na mĩago ya wĩhia” handũ ha gũkorũo na ũkuruhanu wa hakuhĩ hamwe na Jehova, na aciari ake etigĩri Ngai, mwanake ũcio akeherio thiritũ-inĩ ya Gĩkristiano.—Ahib. 11:25.
13 Aciari ake makaigua ũũru mũno! Nĩ moĩ wega ũrĩa Bibilia yugaga ũhoro-inĩ wĩgiĩ arĩa meheretio thiritũ-inĩ ya Gĩkristiano atĩ “mũndũ o na ũrĩkũ wĩtagwo mũrũ wa Ithe witũ-rĩ, angĩkorũo nĩ mũhũri-maraya, kana arĩ wa riitho iraya, kana e mũhoi-mĩhianano, kana e mũrumani, kana mũndũ ũrĩagwo nĩ njohi, kana mũhahanyi-rĩ, mũtigage gũthiĩ thiritũ na ũcio; ĩĩ-ni, o na mũtigage kũrĩanĩra na mũndũ ta ũcio.” (1 Kor. 5:11, 13, nĩ ithuĩ tũinamĩtie ndemwa icio.) Ningĩ nĩ moĩ atĩ ciugo “mũndũ o na ũrĩkũ,” mũhari-inĩ ũcio, nĩ kuuga nginya andũ a famĩlĩ ciitũ arĩa tũtaikaraga nao. No aciari acio nĩ mendete mũriũ wao mũno! Ngoro ciao ciahota gũtũma mecirie ũũ: ‘Tũngĩhota atĩa gũteithia mwana witũ acokerere Jehova angĩkorũo tũtirĩnyitanagĩra nake o na hanini? Na githĩ to tũmũteithie mũno angĩkorũo nĩ tũrĩkoragwo nake kaingĩ?’b
14, 15. Nĩ itua rĩrĩkũ iritũ aciari arĩa ciana ciao cieheretio thiritũ-inĩ ya Gĩkristiano arĩ o mũhaka matue?
14 No tũiguĩre aciari acio tha. Ona kũrĩ ũguo-rĩ, mũriũ wao, aarĩ na mweke wa gwĩthuurĩra, no agĩthuura gũthingata mũthiĩre ũtarĩ wa gĩkristiano handũ ha gũthiĩ na mbere gũkorũo na ũkuruhanu wa hakuhĩ hamwe na aciari ake na Akristiano arĩa angĩ. Hatirĩ ũndũ aciari ake mangĩekire ũndũ-inĩ ũcio. Nĩkĩo no maigue ũũru mũno!
15 No aciari acio mangĩka atĩa? Hihi nĩ megwathĩkĩra watho wa Jehova? Kana hihi marĩkoragwo hamwe na mũriũ ũcio wao weheretio thiritũ-inĩ megwatagie atĩ nĩ “maũndũ ma bata ma famĩlĩ maratũma”? Magĩtua itua rĩao, no mũhaka maririkane ũrĩa Jehova aiguaga igũrũ rĩgiĩ ũndũ ũcio. Muoroto wake nĩ kũiga ithondeka rĩake rĩrĩ itheru na, kũngĩhoteka, gũteithia ehia merire. Aciari Akristiano mangĩnyita mbaru muoroto ũcio atĩa?
16, 17. Tũngĩĩruta atĩa tũngĩcũrania ũhoro wa kĩonereria kĩa Haruni?
16 Haruni, mũrũ wa nyina na Musa, nĩ eekorire ũndũ-inĩ mũritũ nĩ ũndũ wa ciĩko cia ariũ ake erĩ. Ta hũũra mbica ũrĩa aaiguire rĩrĩa ariũ ake Nadabu na Abihu maarutire mwaki ũtaarĩ mwĩtĩkĩrĩku nĩ Jehova Nake akĩmooraga. Hatarĩ nganja, gĩĩko kĩu nĩ kĩaninire ũkuruhanu o wothe ũrĩa aanake acio maarĩ naguo na aciari ao. No nĩ haarĩ na ũndũ makĩria. Jehova eerire Haruni na ariũ acio angĩ ake eehokeku ũũ: “Mũtikanareke njũĩrĩ cianyu cia mũtwe ciikare irĩ nguũrie, kana mũtembũrange nguo cianyu [mũkĩmarĩrĩra], nĩ getha mũtigakue, na ningĩ nĩ getha Jehova ndakarakarĩre kĩrĩndĩ gĩkĩ gĩothe.” (Alaw. 10:1-6) Ũndũ ũrĩa tũreruta nĩ ũyũ; wendo witũ harĩ Jehova no mũhaka ũkorũo ũrĩ mũnene gũkĩra wendo witũ harĩ andũ a famĩlĩ ciitũ arĩa matarĩ ehokeku.
17 Mahinda maya, Jehova ndoragaga o hĩndĩ ĩyo andũ arĩa maregaga gwathĩkĩra watho wake. Nĩ ũndũ wa wendo nĩ amaheaga mweke merire matigane na ciĩko ciao itarĩ cia ũthingu. O na kũrĩ ũguo-rĩ, Jehova angĩigua atĩa, aciari a mũndũ ũregete kwĩrira mangĩikara Makĩmũgeragia na njĩra ya kũnyitanagĩra na mũriũ kana mwarĩ ũcio wao ũrĩa weheretio thiritũ-inĩ ya Gĩkristiano?
18, 19. Andũ a famĩlĩ mangĩona irathimo irĩkũ nĩ ũndũ wa gũthiĩ na mbere kũrũmĩrĩra motaaro ma Jehova makoniĩ arĩa meheretio thiritũ-inĩ ya Gĩkristiano?
18 Aingĩ arĩa hĩndĩ ĩmwe maneeherio thiritũ-inĩ ya Gĩkristiano thutha-inĩ nĩ moigaga atĩ mũrũgamo mũrũmu ũrĩa wooirwo nĩ arata ao na andũ a famĩlĩ ciao nĩ wamateithirie gwĩcokera. Athuri a kĩũngano makĩnyita mbaru gũcokio kwa mwarĩ wa Ithe witũ kĩũngano-inĩ, maandĩkire atĩ ũndũ ũmwe ũrĩa waateithirie mwarĩ wa Ithe witũ ũcio nĩ “tondũ mũrũ wa nyina nĩ onanirie gĩtĩo harĩ mũbango wa kweheria ehia thiritũ-inĩ.” Mwarĩ wa Ithe witũ ũcio oigire atĩ “wĩhokeku wa mũrũ wa nyina harĩ ithimi cia Maandĩko nĩ wamũteithirie kwenda gũcoka kĩũngano-inĩ.”
19 Rĩu tũngĩkiuga atĩa? Twagĩrĩirũo nĩ kũrũa na mwerekera witũ wa ngoro ciitũ itarĩ nginyanĩru wa kwaga gwathĩkĩra ũtaaro wa Maandĩko. Twagĩrĩirũo nĩ gũkorũo na ma biũ atĩ njĩra ya Ngai ya kũrora mathĩna maitũ ĩkoragwo ĩrĩ njega hĩndĩ ciothe.
“Ũhoro wa Ngai wĩ Muoyo”
20. Rĩandĩko rĩa Ahibirania 4:12 rĩronania maũndũ marĩkũ merĩ? (Rora kohoro ka magũrũ-inĩ.)
20 Paulo akĩandĩka atĩ “ũhoro wa Ngai wĩ muoyo,” to Ũhoro wa Ngai ũrĩa mwandĩke thĩinĩ wa Bibilia wiki aaragia igũrũ rĩaguo.c Mĩhari ĩyo ĩngĩ ya mũrango ũcio yonanagia atĩ aaragia ũhoro wĩgiĩ ciĩranĩro cia Ngai. Paulo onanirie atĩ Ngai nderanagĩra ũndũ agacoka akariganĩrũo nĩguo. Jehova nĩ onanirie ũndũ ũcio kũgerera mũnabii Isaia: ‘Ũhoro ũcio ndũkanjokerera o ro ũguo tũhũ, no nĩ ũkaruta wĩra ũrĩa ndaũrekeirie, wagĩre wega.’ (Isa. 55:11) Kwoguo, tũtiagĩrĩirũo nĩ gũthethũka hĩndĩ ĩrĩa maũndũ maaga kũhinga na ihenya ũrĩa tũngĩenda. Jehova “atũire o arutaga wĩra” nĩ getha ahingie muoroto wake.—Joh. 5:17.
21. Rĩandĩko rĩa Ahibirania 4:12 rĩngĩũmĩrĩria atĩa arĩa a ‘kĩrĩndĩ kĩrĩa kĩingĩ’ matungatĩire mĩaka mĩingĩ marĩ eehokeku?
21 Akristiano amwe ehokeku a ‘kĩrĩndĩ kĩrĩa kĩingĩ’ nĩ matungatĩire Jehova mĩaka mĩingĩ. (Kũg. 7:9) Aingĩ ao matierĩgĩrĩire gũkũra marĩ o mũtabarĩre-inĩ ũyũ wa maũndũ. O na kũrĩ ũguo, matikuĩte ngoro. (Thab. 92:14) Nĩ moĩ atĩ kiugo kĩa Ngai gĩa kĩĩranĩro nĩ kĩa ma—kĩrĩ muoyo, na Jehova nĩ arĩkĩhingia. Tondũ muoroto wa Ngai nĩ wa bata mũno harĩ we-rĩ, nĩ tũmũkenagia twathiĩ na mbere kũwona ũrĩ wa bata. Mahinda-inĩ maya ma mũthenya wa mũgwanja, Jehova akoretwo ahurũkĩte, arĩ na ma atĩ muoroto wake nĩ ũkahinga, na andũ ake marĩ othe nĩ maraũnyita mbaru. Ĩ wee nawe? Hihi wee nĩ ũingĩrĩte kĩhurũko-inĩ kĩa Ngai?
[Mohoro ma magũrũ-inĩ]
a Atongoria aingĩ thĩinĩ wa Ayahudi nĩ maarũmagĩrĩra mũno Watho wa Musa, no rĩrĩa Mesia okire, makĩmũrega. Matiigana gũtwarana na muoroto wa Ngai ũrĩa wathiaga na mbere kũhinga.
b Rora ibuku rĩa ‘Mwĩigei Wendo-Inĩ wa Ngai,’ karatathi ka 207-209.
c Ũmũthĩ Ngai aragia na ithuĩ kũgerera Kiugo gĩake, kĩrĩa kĩrĩ ũhoti wa kũgarũra ũtũũro witũ. Kwoguo, ciugo cia Paulo thĩinĩ wa Ahibirania 4:12 nĩ ikoniĩ Bibilia o nayo.
Hihi nĩ Ũraririkana?
• Ũmũthĩ nĩ ũndũ ũrĩkũ ũrabatarania nĩguo tũingĩre kĩhurũko-inĩ kĩa Ngai?
• Nĩ ũkuruhanu ũrĩkũ ũrĩ ho gatagatĩ ka muoroto wa Ngai na wendi witũ wa gwĩtĩkĩra ũtaaro wa Maandĩko?
• Nĩ maũndũ-inĩ marĩkũ tũngĩritũhĩrũo nĩ gwathĩkĩra ũtongoria wa Maandĩko, no nĩkĩ nĩ ũndũ wa bata gwathĩka?
• Rĩandĩko rĩa Ahibirania 4:12 rĩronania maũndũ marĩkũ merĩ?
[Mbica karatathi ka 31]
Aciari ake makaigua ũũru mũno!