Ciũria Kuuma Kũrĩ Athomi

Hihi rĩandĩko rĩa Kohelethu 5:8 rĩaragia ũhoro wa anene a gũkũ thĩ, kana ũhoro wa Jehova?

Mũhari ũcio uugaga ũũ: “Ũngĩkona thĩinĩ wa gĩcigo kĩanyu athĩni makĩhinyĩrĩrio na gũtarĩ na kĩhooto na ũthingu, ndũkanamakio nĩ ũndũ ũcio. Tondũ mũnene ũcio nĩ aroragwo nĩ ũrĩa ũrĩ na ũnene kũmũkĩra, na kũrĩ o na angĩ makoragwo marĩ anene gũkĩra acio.”​—⁠Koh. 5:8.

Mũndũ angĩthoma mũhari ũcio, no ecirie atĩ ũrarĩrĩria andũ arĩa makoragwo na ũnene thirikari-inĩ. No tũngĩĩciria ũhoro wĩgiĩ mũhari ũcio makĩria, no tuone atĩ nĩ ũrarĩrĩria igũrũ rĩgiĩ Jehova, na ũndũ ũcio no ũtũũmĩrĩrie.

Kohelethu 5:8 yaragia ũhoro wa mũnene ũhinyagĩrĩria andũ arĩa athĩni na akamekĩra maũndũ matarĩ ma kĩhooto. Mũndũ ũcio nĩ abatiĩ kũririkana atĩ nĩ ararorũo nĩ mũndũ ũrĩ na gaturũa kanenanene kana hinya kũmũkĩra thirikari-inĩ. Ningĩ no gũkorũo na angĩ marĩ na ũnene o na makĩria gũkĩra acio. Ũndũ wa kĩeha nĩ atĩ, thĩinĩ wa thirikari cia andũ, hakuhĩ athani othe makoragwo marĩ na ungumania, na kwoguo andũ arĩa makoragwo rungu rwao makanyamarĩka nĩ ũndũ ũcio.

Ĩndĩ o na kũhaana ũguo, no tũmĩrĩrio kũmenya atĩ Jehova nĩ ‘aroraga nginya anene arĩa marĩ na tũturũa’ thirikari-inĩ. Nĩ twagĩrĩirũo gũthaitha Ngai na kũmũikĩria mĩtangĩko itũ. (Thab. 55:22; Afil. 4:6, 7) Nĩ tũĩ atĩ “maitho ma Jehova morũraga kũndũ guothe thĩinĩ wa thĩ nĩguo onanie hinya wake nĩ ũndũ wa arĩa meheanĩte na ngoro yao yothe harĩ we.”​—⁠2 Maũ. 16:9.

Gũkĩrĩ ũguo, Kohelethu 5:8 nĩ ĩtuonagia ũrĩa maũndũ mahaana thĩinĩ wa thĩ, atĩ hĩndĩ ciothe gũtiagaga mũndũ ũrĩ na ũnene gũkĩra ũrĩa ũngĩ. Na ũndũ wa bata makĩria nĩ atĩ mũhari ũcio nĩ ũratũririkania atĩ Jehova nĩwe ũkoragwo igũrũ makĩria, na nĩwe ũkoragwo na Ũnene Wothe. Rĩu nĩwe ũrathana akĩhũthĩra Mũrũ wake, Jesu Kristo, arĩ Mũthamaki wa Ũthamaki wake. Mwene-Hinya-Wothe, o we ũroraga andũ othe, hamwe na Mũrũ wake, monanagia kĩhooto na njĩra nginyanĩru.