⁸ O nake akĩĩrira rĩrĩa aaiguire ndũmĩrĩri ya Jona. Nĩ ũndũ wa gwĩtigĩra Ngai, akiuma gĩtĩ-inĩ gĩake kĩa ũnene, akĩaũra nguo yake ya ũthamaki, akĩĩhumba ya ikũnia ta andũ arĩa angĩ, na “agĩgĩikara thĩ mũhu-inĩ.” Arĩ hamwe na “andũ a gwake arĩa anene,” magĩĩkĩra watho atĩ ũndũ ũcio wathĩkĩrũo nĩ andũ a bũrũri wothe. Agĩathana andũ othe mehumbe nguo cia makũnia, nginya nyamũ ciao.b Agĩĩtĩkĩra enyihĩtie atĩ andũ acio nĩ meekĩte ũũru na ciĩko cia ũhinya. Arĩ na kĩĩrĩgĩrĩro atĩ Ngai nĩ angĩamonirie tha thutha wa kuona atĩ nĩ meerirĩte, mũthamaki oigire ũũ: “Nũ ũũĩ kana Ngai nĩangĩgarũrũka ericũkwo, atigane na marakara macio make mahiũ ũguo, tutige kũninwo?”—Jona 3:6-9.