Arutwo A Jesu Maagaga Kwĩhinga Nĩkĩ?

Johana Mũbatithania akoretwo njera. Ohirũo ihinda inini thutha wa Jesu gũkũngũĩra Pasaka ya mwaka wa 30. Johana eendaga arutwo ake matuĩke arũmĩrĩri a Jesu, no ti othe marĩkĩtie gwĩka ũguo mĩeri ĩrĩa ĩhĩtũkĩte kuuma Johana ohwo.

Pasaka ya mwaka wa 31 yakuhĩrĩria, arutwo amwe a Johana magoka kũrĩ Jesu makamũũria: “Nĩ kĩĩ gĩtũmaga ithuĩ na Afarisai twĩhinge no arutwo aku matiĩhingaga?” (Mathayo 9:14) Afarisai mehingaga ũrĩ ta mũtugo wa kĩndini. Thutha-inĩ Jesu o na akahũthĩra ngerekano ya Mũfarisai ũmwe wahoire ũũ tondũ wa kwĩyona arĩ mũthingu: “Nĩ ndagũcokeria ngatho Ngai, nĩ gũkorũo niĩ nditariĩ ta andũ arĩa angĩ othe . . . ndĩĩhingaga kũrĩa maita merĩ o kiumia.” (Luka 18:11, 12) O na arutwo a Johana no kũhoteke makoretwo makĩĩhinga ũrĩ ta mũtugo. Kana makorũo mehingaga nĩ ũndũ wa kĩeha kĩa Johana gũkorũo arĩ njera. Arutwo a Johana ningĩ nĩ mararigwo kĩrĩa gĩtũmaga arutwo a Jesu maage kwĩhinga, hihi manyitanĩre nao kuonania kĩeha nĩ ũndũ wa ũrĩa Johana ekĩtwo.

Jesu akamacokeria na ngerekano akameera: “Arata a mũhikania matikoragwo na gĩtũmi gĩa gũcakaya hĩndĩ ĩrĩa yothe mũhikania arĩ hamwe nao. No matukũ nĩ marĩũka rĩrĩa mũhikania akeeherio kũrĩ o, na hĩndĩ ĩyo nĩ makeehinga.”​—Mathayo 9:15.

Johana we mwene oigire Jesu nĩ mũhikania. (Johana 3:​28, 29) Nĩ ũndũ ũcio, tondũ Jesu arĩ muoyo, arutwo ake matirabatara kwĩhinga. Thutha-inĩ rĩrĩa Jesu agaakua, arutwo ake nĩ magaacakaya nginya maremwo nĩ kũrĩa. No ũguo tiguo gũkahaana ariũkio! Hĩndĩ ĩyo matigaakorũo na ũndũ wa gũtũma mehinge nĩ ũndũ wa kĩeha.

Jesu agacoka akaheana ngerekano ici igĩrĩ: “Gũtirĩ mũndũ ũtumagĩrĩra kĩraka kĩa nguo njerũ igũrũ rĩa nguo ngũrũ, tondũ angĩka ũguo, kĩraka kĩu kĩerũ kĩngĩgucia nguo ĩyo, nayo ĩtarũke makĩria. O na andũ mationoragĩria ndibei ĩragagata thĩinĩ wa mondo ngũrũ cia ndibei. Mangĩka ũguo, mondo icio nĩ itumũkaga na ndibei ĩgaitĩka nacio mondo igathũka. Ĩndĩ andũ monoragĩria ndibei ĩragagata thĩinĩ wa mondo njerũ cia ndibei.” (Mathayo 9:16, 17) Jesu arenda kũrutana ũndũ ũrĩkũ?

Arenda gũteithia arutwo a Johana Mũbatithania mone atĩ gũtirĩ mũndũ wagĩrĩirũo kwĩrĩgĩrĩra arũmĩrĩri a Jesu marũmĩrĩre mĩtugo ya tene ya ndini ya Kĩyahudi ta kwĩhinga. We ndokire gwĩkĩra iraka na kwagagĩria ũthathaiya ũcio mũkũrũ na mũtarũkangu ũkiriĩ gũteanĩrio. Ũthathaiya ũrĩa Jesu arekĩrĩra ti ũrĩa wa kũrũmĩrĩra maũndũ ma ndini ya Kĩyahudi ĩrĩa ĩrutanaga nginya irĩra cia andũ. Ndarageria gũtumĩrĩra kĩraka kĩerũ igũrũ rĩa nguo ngũrũ kana gwĩkĩra ndibei njerũ thĩinĩ wa mondo ngũrũ.