Aahonirio Ahutia Nguo Ya Jesu

Ũhoro wĩgiĩ gũcoka kwa Jesu kuuma Dekapoli ũgatherema kũrĩ Ayahudi arĩa marĩ mwena wa ithũĩro wa rũteere rwa Iria rĩa Galili. No kũhoteke aingĩ nĩ maiguĩte atĩ rĩrĩa kwĩrĩga kũgĩa na kĩhuhũkanio iria-inĩ, Jesu nĩ aahoreririe rũhuho na maĩ, na amwe no gũkorũo nĩ maiguĩte atĩ nĩ aahonirie andũ arĩa maarĩ na ndaimono. Nĩ ũndũ ũcio, “kĩrĩndĩ kĩingĩ mũno” gĩgoka hau iria-inĩ, kwahoteka gĩcigo-inĩ gĩa Kaperinaumu nĩguo kĩnyite Jesu ũgeni. (Mariko 5:21) Andũ marĩ na wendi mũnene mũno wa kũmuona akinya rũteere-inĩ.

Ũmwe wa arĩa marenda mũno kuona Jesu nĩ Jairo, mũrũgamĩrĩri wa thunagogi, hihi ĩrĩa ya Kaperinaumu. Akagwa magũrũ-inĩ ma Jesu na akamũthaitha maita maingĩ, akamwĩra: “Kairĩtu gakwa nĩ karwaru mũno. Ndagũthaitha, ũka ũgakaigĩrĩre moko nĩguo kahone gatũũre muoyo.” (Mariko 5:23) Hihi Jesu ekuoya ithaithana rĩa Jairo atĩa rĩa gũteithia kairĩtu gake? Jairo akoragwo na kairĩtu kau tu ka mĩaka 12, na nĩ akendete mũno.​—Luka 8:42.

Jesu arĩ njĩra-inĩ agĩthiĩ kwa Jairo, agacemania na ũndũ ũngĩ wa kũhutia ngoro mũno. Andũ aingĩ a arĩa maratwarana na Jesu nĩ marahĩahĩa, mararigwo kana hihi nĩ mekuona akĩringa kĩama kĩngĩ. O na kũrĩ ũguo, mũtumia ũmwe ũrĩ gĩkundi-inĩ kĩu we areciria ũhoro wĩgiĩ thĩna wake wa mwĩrĩ.

Kwa ihinda rĩa mĩaka 12, mũtumia ũcio Mũyahudi akoretwo agĩthĩnio nĩ mũrimũ wa kuura thakame. Ethete ũteithio kuuma kũrĩ mandagĩtarĩ maingĩ, akahũthĩra mbeca ciake ciothe na ũrigitani ũrĩa araheo. No ndateithĩkĩte. Ĩndĩ no ‘kwĩhĩrũo ehagĩrũo.’​—Mariko 5:26.

No wone atĩ mũrimũ wake makĩria ma kũmũhinyĩrĩria, nĩ ũramũconorithia na ũkamwagithĩria gĩtĩo. Mũndũ ũrĩ na mũrimũ ta ũcio kaingĩ akiraga naguo. Makĩria ma ũguo, rungu rwa Watho wa Musa, mũtumia ũroira thakame akoragwo atarĩ mũtheru. Mũndũ o wothe wamũhutia kana ahutie nguo ciake icio irĩ na thakame, abataraga gwĩthamba na onwo atarĩ mũtheru nginya hwaĩ-inĩ.​—Maũndũ ma Alawii 15:​25-27.

Mũtumia ũcio nĩ ‘aiguite ũhoro wĩgiĩ Jesu,’ na rĩu nĩwe aretha. Tondũ ti mũtheru, agathiĩra kĩrĩndĩ-inĩ emenyereire mũno ndakamenyeke, akĩĩraga ũũ: “Ingĩhutia o nguo yake ya igũrũ tu, nĩ ngũhona.” Ahutia nguo ya Jesu, o rĩo akaigua nĩ atiga kuura thakame! ‘Akahona mũrimũ ũcio mũru.’​—Mariko 5:​27-29.

Jesu agacoka akoria ũũ: “Nũ wahutia?” Ũgwĩciria mũtumia ũcio aigua atĩa Jesu oria ũguo? Petero akamũcokeria ta arenda kũmũrũnga akamwĩra ũũ: “Mũrutani, kĩrĩndĩ nĩ gĩgũthiũrũrũkĩirie na nĩ kĩrakũhatĩka.” Nĩ kĩĩ gĩagĩtũma Jesu orie, “Nũ wahutia?” Jesu agataarĩria ũũ: “Nĩ harĩ mũndũ wahutia, tondũ nĩ ndaamenya atĩ hinya nĩ woima thĩinĩ wakwa.” (Luka 8:​45, 46) Gĩĩko kĩu gĩa kũhonania nĩ gĩatũma hinya uume thĩinĩ wa Jesu.

Mũtumia ũcio amenya atĩ nĩ amenyeka, akagwa magũrũ-inĩ ma Jesu amakĩte na akĩinainaga. Akaria ũhoro wa ma wĩgiĩ mũrimũ wake mbere ya andũ acio othe na akoiga atĩ rĩu nĩ ahonio. Jesu arĩ na tha akamũmĩrĩria ũũ: “Mwarĩ wakwa, wĩtĩkio waku nĩ watũma ũhone. Thiĩ na thayũ, na ndũkanathĩnio nĩ mũrimũ ũcio mũru rĩngĩ.”​—Mariko 5:34.

Hatarĩ nganja, mũndũ Ũrĩa Ngai athuurĩte wa gũgaathana gũkũ thĩ akoragwo na wendo na tha, na thengia ya kũrũmbũiya andũ, arĩ na hinya wa kũmateithia!