Kairĩtu Kanini Gũcoka Muoyo!

Jairo akona atĩ mũtumia ũrĩa uma na mũrimũ wa kuura thakame nĩ ahonio nĩ Jesu. Hatarĩ nganja Jesu no ahote gũteithia kairĩtu gake o nako, o na gũtuĩka nĩ arona ta ‘mwarĩ angĩkorũo rĩu nĩ mũkuũ.’ (Mathayo 9:18) Hihi no kũhoteke ateithio o na kũhaana ũguo?

O Jesu agĩthiaga na mbere kwaria na mũtumia ũrĩa ahonia, arũme amwe kuuma kwa Jairo mũciĩ magoka makamwĩra ũũ: “Kairĩtu gaku nĩ gakuire!” Makongerera makamwĩra: “Tiga gũthĩnia Mũrutani rĩngĩ.”​—Mariko 5:35.

Icio nĩ ndeto cia kĩeha mũno! Mũndũ ũcio, ũrĩa ũtĩĩtwo mũno itũũra-inĩ rĩao, ndarĩ na ũndũ ũngĩ wa gwĩka. Kairĩtu gake nĩ gakua na ndarĩ kangĩ. No Jesu akaigua riboti ĩyo, akahũgũkĩra Jairo akamwĩra na njĩra ya kũmwĩkĩra ngoro ũũ: “Ndũgetigĩre, no gĩa na wĩtĩkio.”​—Mariko 5:36.

Jesu agacoka agathiĩ hamwe na Jairo nginya gwake mũciĩ. Makinya magakora kũrĩ na inegene rĩingĩ. Andũ arĩa me kuo nĩ kũrĩra mararĩra, magĩkayaga, makĩĩringaringaga nĩ ũndũ wa kĩeha. Jesu akaingĩra na akoiga ciugo ici cia gũtua nda: “Kairĩtu kau gatikuĩte ĩndĩ nĩ gũkoma gakomete.” (Mariko 5:39) Andũ maigua ũguo, makambĩrĩria kũmũthekerera. Nĩ moĩ kũna atĩ kairĩtu kau nĩ gakuũ. O na kũrĩ ũguo, Jesu nĩ ekũhũthĩra hinya ũrĩa aheetwo nĩ Ngai, kuonania atĩ no kũhoteke andũ macokio muoyo, o ta ũrĩa mangĩũkĩrio kuuma toro.

Jesu akeera andũ acio angĩ othe moime nja tiga Petero, Jakubu, Johana na aciari a kairĩtu kau gakuũ. Agathiĩ hamwe na acio atano nginya harĩa kairĩtu kau gakometio. Agakanyita guoko agakeera ũũ: “Talitha kumi,” ũguo nĩ kuuga: “Kairĩtu, ndakwĩra atĩrĩ, ‘Ũkĩra!’” (Mariko 5:41) O rĩo gagokĩra na gakambĩrĩria gũthiĩ. Ta hũũra mbica gĩkeno kĩrĩa Jairo na mũtumia wake marĩ nakĩo mona ũguo! Nĩguo onanie makĩria atĩ kairĩtu kau nĩ ma karĩ muoyo, Jesu akoiga kaheo kĩndũ kangĩrĩa.

Mbere ĩyo, Jesu eeraga arĩa ahonia matikeere andũ angĩ ũrĩa amekĩire, na akeera aciari a kairĩtu kau o ũguo. O na kũrĩ ũguo, aciari acio na andũ angĩ nĩ ũndũ wa gũkena magatheremia ũhoro ũcio “kũndũ kũu guothe.” (Mathayo 9:26) O nawe githĩ to wĩre andũ arĩa angĩ ũkenete ũngĩona mũndũ wanyu wendete ariũkĩtio kuuma kũrĩ akuũ? Kĩama kĩu nĩkĩo gĩa kerĩ harĩ ciama cia kũriũkania iria Jesu aaringire.