Jesu akahe atũmwo ake motaaro mega mũno megiĩ ũrĩa mekũhunjia marĩ erĩ erĩ. No ndaratigĩra hau. Na njĩra ya wendo, akamamenyithia ũhoro wĩgiĩ ũkararia, akameera: “Atĩrĩrĩ, ndĩramũtũma mũtariĩ ta ngʼondu gatagatĩ-inĩ ka njũi . . . Mwĩmenyagĩrĩrei, tondũ andũ nĩ makamũtwara magooti-inĩ na mamũhũũrĩre thunagogi-inĩ ciao. Ningĩ nĩ mũgaatwarũo kũrĩ mangavana na athamaki nĩ ũndũ wa rĩĩtwa rĩakwa.”​—Mathayo 10:​16-18.

Na githĩ macio ti motaaro, mĩkaana, na ciugo njega Jesu arahũthĩra kũũmĩrĩria atũmwo ake 12? O na kũrĩ ũguo, no wone atĩ ciugo icio irahũthĩka nginya harĩ arĩa makaaruta wĩra wa kũhunjia thutha wa Jesu gũkua na kũriũka. Ũndũ ũcio ũronanio nĩ ciugo icio arera arutwo ake atĩ nĩ ‘magaathũũrũo nĩ andũ othe,’ to arĩa tu atũmwo marathiĩ kũhunjĩria. Makĩria ma ũguo, gũtirĩ handũ tũthomaga atũmwo magĩtwarũo mbere ya mangavana na athamaki kana kũũragithio nĩ andũ a famĩlĩ ciao kahinda-inĩ kau kanini ga kambĩini ya kũhunjia Galili.

Hatarĩ nganja, Jesu areciria ũhoro wa mahinda mokĩte akĩĩra atũmwo ake maũndũ macio. Ta wĩcirie ũhoro wa ciugo ciake atĩ arutwo ake matikaarĩkia kũhunjia matũũra mothe ‘Mũrũ wa mũndũ atakinyĩte.’ Jesu aronania atĩ arutwo ake matigakorũo marĩkĩtie kũhunjia ũhoro wa Ũthamaki wa Ngai mbere ya Mũthamaki Jesu Kristo ũrĩa ũrĩ na riri okĩte arĩ mũtuanĩri cira wamũrĩtwo nĩ Ngai.