Rũciaro Rũmĩtie Ngoro

Jesu nĩ aheete Johana Mũbatithania gĩtĩo mũno, no hihi andũ aingĩ monaga Johana atĩa? Jesu akoiga ũũ: “Ngũgerekania rũciaro rũrũ na kĩĩ? Nĩ ta twana tũikarĩte thĩ thoko-inĩ tũranĩrĩra tũgĩtaga tũrĩa tũngĩ, tũkoiga ũũ: ‘Tũmũhuhĩire mũtũrirũ no mũtinathũngũtha, twacakaya no mũtinonania kĩeha.’”​—Mathayo 11:​16, 17.

Jesu arenda kuuga atĩa? Agataarĩria atĩ, “Johana okire akĩĩhingaga kũrĩa na atekũnyua ndibei, no andũ moigaga, ‘Arĩ na ndaimono.’ Mũrũ wa mũndũ nake okire atekwĩhinga kũrĩa na akĩnyuaga ndibei, na andũ no moigaga, ‘Ũyũ nĩ mũndũ mũkoroku na ũnyuaga ndibei, mũrata wa etia mbeca cia igooti na ehia.’” (Mathayo 11:​18, 19) Ngũrani na Jesu, Johana akoretwo agĩikara mũtũũrĩre mũhũthũ wa Mũnaziri, o na agethema kũnyua ndibei, ĩndĩ rũciaro rũu rũkoiga arĩ na ndaimono. (Ndari 6:​2, 3; Luka 1:15) No Jesu we aikaraga mũtũũrĩre o ta wa andũ arĩa angĩ. Arĩaga na akanyua ategũkĩria njano, no andũ makoiga atĩ nĩ mũkoroku. Kũroneka ti ũndũ mũhũthũ gũkenia andũ.

Jesu akaringithania rũciaro rũu na twana tũrĩ thoko tũrarega gũthũngũtha twahuhĩrũo mũtũrirũ nĩ twana tũngĩ na tũkaaga kuonania kĩeha rĩrĩa tũrĩa tũngĩ tũracakaya. Akoiga: “No rĩrĩ, ũũgĩ ũmenyekaga ũrĩa ũtariĩ kũgerera ciĩko ciaguo.” (Mathayo 11:​16, 19) “Ciĩko” icio, na nĩcio ũira ũrĩa ũheanĩtwo nĩ Johana na Jesu, nĩ cionanagia atĩ maũndũ marĩa andũ maramacukĩra nĩ ma maheeni.

Thutha wa Jesu kuonania atĩ rũciaro rũu nĩ rũmĩtie ngoro, akamenereria makĩria matũũra ma Korazini, Bethisaida, na Kaperinaumu, kũrĩa akoretwo agĩka maũndũ manene. Akoiga atĩ korũo maũndũ macio aamekire matũũra ma Turo na Sidoni gĩcigo-inĩ kĩa Foinike, nĩ mangĩĩrirĩte. Ningĩ akagweta Kaperinaumu kũrĩa akoretwo agĩikara ihinda rĩna. O na kuo, andũ aingĩ matiamũthikĩrĩirie. Jesu akoiga ũũ igũrũ rĩgiĩ itũũra rĩu: “Andũ a Sodomu nĩ makaiguĩrũo tha kũmũkĩra Mũthenya wa Cira.”​—Mathayo 11:24.

Jesu agacoka akagooca Ithe, o we ũhithaga “andũ arĩa ogĩ na marĩ ũmenyo” ma cia bata cia kĩĩroho, no agaciguũrĩria andũ a kĩrathi gĩa thĩ arĩa mahaananĩtio na twana. (Mathayo 11:25) Akeera andũ ta acio ũũ: “Ũkai harĩ niĩ, inyuothe arĩa mũnogete na mũtitikithĩtio mĩrigo, na nĩ ngũmũhurũkia. Oyai icoki rĩakwa mwĩigĩrĩre na mwĩrute kuuma kũrĩ niĩ, nĩ ũndũ niĩ ndĩ mũhooreri na mwĩnyihia ngoro-inĩ, na nĩ mũkũhurũkio. Tondũ icoki rĩakwa nĩ inyoroku, na mũrigo wakwa nĩ mũhũthũ.”​—Mathayo 11:​28-30.

Jesu ahurũkagia andũ na njĩra ĩrĩkũ? Atongoria a ndini nĩ makuithagia andũ mĩrigo nĩ ũndũ wa morutani mao ma ũkombo, ta mawatho makĩrĩtie njano megiĩ Thabatũ. No Jesu akamahurũkia na njĩra ya kũmaruta ma ĩgiĩ Ngai, ĩtatukanĩtio na morutani macio ma andũ. Ningĩ akonia arĩa maraigua mahinyĩrĩirio nĩ andũ arĩa marĩ wathani-inĩ ũrĩa mangĩona ũhurũko, o hamwe na andũ arĩa makuĩte ngoro nĩ ũndũ wa mehia. Jesu akamaguũrĩria ũrĩa mangĩka nĩguo moherũo mehia mao na ũrĩa mangĩiguithanio na Ngai.

Arĩa othe maretĩkĩra icoki inyoroku rĩa Jesu no meyamũrĩre Ngai, matungatĩre Ithe witũ wa igũrũ ũrĩ tha na ũcayanĩri. Gwĩka ũguo ti ũndũ mũritũ, amu mawatho ma Ngai ti mũrigo o na hanini.​—1 Johana 5:3.