Bata Wa Kuohanĩra

Petero akorũo aigua ũtaaro wa Jesu wĩgiĩ ũrĩa ariũ a Ithe witũ erĩ magĩrĩirũo kũgeria kũiguana rĩrĩa mathĩna moimĩra gatagatĩ-inĩ kao. O na kũrĩ ũguo, Petero arenda kũmenya maita marĩa mũndũ agĩrĩirũo gwĩka ũguo.

Akoria: “Mwathani, mũrũ wa Ithe witũ agĩrĩirũo nĩ kũnjĩhĩria maita maigana o ngĩmuohagĩra? Hihi nĩ nginya maita mũgwanja?” Atongoria amwe a ndini marutanaga atĩ mũndũ agĩrĩirũo kuohanĩra nginya maita matatũ. Kwoguo no kũhoteke Petero arona ta angĩkorũo ekĩte wega mũno angĩohera mũrũ wa Ithe “nginya maita mũgwanja.”​—Mathayo 18:21.

No mũndũ gũtara maita marĩa ahĩtĩirio gũtiratwarana na ũrutani wa Jesu. Nĩ ũndũ ũcio akarũnga Petero akamwĩra ũũ: “Ngũkwĩra atĩrĩ, ti nginya maita mũgwanja, ĩndĩ nĩ nginya maita mĩrongo mũgwanja na mũgwanja.” (Mathayo 18:22) Ũguo nĩ kuuga maita matangĩtarĩka. Kwoguo Petero ndabatiĩ kũiga mũigana wa maita marĩa angĩohera mũrũ wa Ithe.

Jesu agacoka akahe Petero na arĩa angĩ ngerekano ya kũmonia bata wa kuohanĩra. Ĩgiĩ ngombo yagire kwĩgerekania na mwathi wayo harĩ kuonania tha. Nĩ harĩ mũthamaki weendaga kũrĩhwo thiirĩ nĩ ngombo ciake. Ngombo ĩmwe ĩrĩa yarĩ na thiirĩ mũnene wa taranda 10,000 [dinari 60,000,000] ĩkĩrehwo harĩ we. Ndĩngĩahotire kũrĩha thiirĩ ũcio. Kwoguo mũthamaki agĩathana atĩ ngombo ĩyo, mũtumia wayo, na ciana ciayo mendio nĩguo thiirĩ ũcio ũrĩhwo. Yaigua ũguo, ngombo ĩyo ĩkĩgwa magũrũ-inĩ ma mwathi wayo ĩkĩmũthaitha ĩkĩmwĩra: “Ndagũthaitha ũhe ihinda, na nĩ ngũkũrĩha thiirĩ waku ũrĩa wothe ndĩ naguo.”​—Mathayo 18:26.

Mũthamaki akĩringwo nĩ tha na akĩohera ngombo ĩyo thiirĩ wayo mũnene. Thutha wa kuoherũo nĩ mũthamaki, ngombo ĩyo ĩgĩthiĩ ĩgĩkora ngombo ĩngĩ yarĩ na thiirĩ wayo wa dinari 100. Ĩkĩmĩnyita na ĩkĩambĩrĩria kũmĩita ĩkiugaga: “Ndĩha thiirĩ wakwa wothe ũrĩa ũrĩ naguo.” Nayo ngombo ĩyo ĩgĩturia maru ĩkĩmĩthaitha, ĩkĩmĩĩra, “Ndagũthaitha ũhe ihinda, na nĩ ngũkũrĩha thiirĩ waku.” (Mathayo 18:​28, 29) No ngombo ĩrĩa yoheirũo thiirĩ wayo nĩ mũthamaki ĩkĩaga kwĩgerekania na mwathi wayo. Ĩgĩikithia ngombo ĩyo yarĩ na thiirĩ mũnini njera, nginya rĩrĩa ĩkaarĩha thiirĩ ũcio.

Jesu agacoka akoiga atĩ rĩrĩa ngombo icio ingĩ cionire gĩĩko kĩu gĩtarĩ gĩa tha, igĩthiĩ ikĩra mwathi wacio, nake akĩrakara agĩta ngombo ĩyo akĩmĩra: “Wee ngombo ĩno njũru, rĩrĩa ũthaithire nĩ ngũrekeire thiirĩ waku wothe. Githĩ o nawe ndũkwagĩrĩirũo nĩ kũiguĩra ngombo ĩrĩa ĩngĩ tha o ta ũrĩa ngũiguĩrĩire tha?” Nĩ ũndũ wa kũrakara, mũthamaki akĩmĩneana ĩikio njera nginya rĩrĩa ĩkaarĩha thiirĩ ũrĩa wothe yarĩ naguo. Jesu akarĩkĩrĩria na kuuga: “Ũguo noguo o na inyuĩ, mũngĩaga kuohagĩra ariũ a Ithe wanyu kuuma ngoro, o nake Awa ũrĩa ũrĩ igũrũ ndarĩmuohagĩra.”​—Mathayo 18:​32-35.

Ũcio nĩ ũrutani wa bata mũno wĩgiĩ kuohanĩra! Ngai nĩ atuoheire thiirĩ mũnene wa mehia. Ũndũ o wothe Mũkristiano ũngĩ angĩtũhĩtĩria naguo nĩ mũnini ũringithanĩtio na thiirĩ ũcio. Ningĩ maita marĩa Jehova atuohagĩra matingĩtarĩka. Githĩ o na ithuĩ to tuohere mũrũ wa Ithe witũ maita maingĩ o na angĩkorũo tũrĩ na gĩtũmi gĩa kũrakara? O ta ũrĩa Jesu aarutanire Mahunjio-inĩ ma Kĩrĩma-inĩ, Ngai ‘arĩtuohagĩra mehia maitũ, o ta ũrĩa tuohagĩra arĩa matwĩhagĩria.’​—Mathayo 6:12.