Ica ikuhĩ, Jehova nĩ ekũhũthĩra Ũthamaki wake gũtwehereria mathĩna mothe. Ũcio nĩ ũhoro mwega mũno na andũ othe nĩ marabatara kũũmenya. Jesu eerire arũmĩrĩri ake makinyĩrie andũ othe ndũmĩrĩri ĩyo! (Mathayo 28:19, 20) Aira a Jehova mahingagia atĩa rĩathani rĩu rĩa Jesu?

1. Rĩandĩko rĩa Mathayo 24:14 rĩrahingio atĩa ũmũthĩ?

Jesu aarathire ũũ: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo.” (Mathayo 24:14) Aira a Jehova nĩ makenagĩra kũruta wĩra ũcio wa bata. Tũhunjagia ũhoro ũcio mwega thĩinĩ wa thĩ yothe na makĩria ma thiomi 1,000! Wĩra ũcio mũnene ũguo nĩ ũbataraga kĩyo kĩnene na mĩbango mĩega. Tũtingĩhota kũruta wĩra ũcio tũtarĩ na ũteithio wa Jehova.

2. Twĩrutanagĩria atĩa gũkinyĩra andũ?

Tũhunjagia kũrĩa guothe andũ mangĩoneka. O ta Akristiano a karine ya mbere, tũhunjagia “nyũmba kwa nyũmba.” (Atũmwo 5:42) Njĩra ĩyo nĩ ĩtũteithagia gũkinyĩra andũ milioni nyingĩ o mwaka. Ningĩ tondũ ti hĩndĩ ciothe andũ makoragwo mĩciĩ, nĩ tũhunjagia kũndũ kũingĩ kwa mũingĩ. Hingo ciothe nĩ tũcaragia mĩeke ya kwĩra andũ arĩa angĩ ũhoro wĩgiĩ Jehova na mĩoroto yake.

3. Nĩa magĩrĩirũo kũhunjia ũhoro ũrĩa mwega?

Akristiano othe a ma nĩ magĩrĩirũo kũhunjĩria andũ arĩa angĩ ũhoro ũrĩa mwega. Nĩ tuoyaga wĩra ũcio na ũritũ. Tũhunjagia ũrĩa wothe tũngĩhota tondũ nĩ tũmenyaga atĩ ũndũ ũcio no ũhonokie mĩoyo ya andũ. (Thoma 1 Timotheo 4:16.) Tũtirĩhagwo twaruta wĩra ũcio tondũ Bibilia yugaga ũũ: “Mũheetwo tũhũ, heanagai tũhũ.” (Mathayo 10:7, 8) Ti andũ othe mathikagĩrĩria ndũmĩrĩri itũ. O na kũrĩ ũguo, no tũthiaga na mbere kũhunjia tondũ rĩrĩa tũreka ũguo tũkoragwo tũgĩathĩkĩra Jehova na tũgatũma akene.

THUTHURIA MAKĨRIA

4. Nĩ twĩrutanagĩria kũhunjĩria andũ othe

VIDEO: Kũhunjia “Nginya Ituri Ciothe cia Thĩ” (7:33)

• Nĩ ũndũ ũrĩkũ wagũkenia wĩgiĩ ũrĩa Aira a Jehova merutanagĩria kũhunjia?

Thomai Mathayo 22:39 na Aroma 10:13-15, mũcoke mwarĩrĩrie ciũria ici:

• Wĩra witũ wa kũhunjia wonanagia atĩa atĩ nĩ twendete andũ arĩa angĩ?

• Jehova onaga atĩa andũ arĩa mahunjagia ũhoro ũrĩa mwega?​—Rora mũhari wa 15.

5. Tũrĩ arutithania wĩra hamwe na Ngai

Maũndũ maingĩ marĩa monetwo monanagia atĩ Jehova nĩ atongoragia wĩra witũ wa kũhunjia. Kwa ngerekano, thĩinĩ wa bũrũri wa New Zealand, mũrũ wa Ithe witũ ũmwe wĩtagwo Paul akĩhunjia nyũmba kwa nyũmba mathaa-inĩ ma mĩaraho, nĩ aakorire mũtumia ũmwe. Mũthenya ũcio rũcinĩ, mũtumia ũcio nĩ aahoete Ngai akĩhũthĩra rĩĩtwa rĩake, Jehova, akamũũria atũme mũndũ amũceerere. Paul ooigire ũũ: “Ndathiire gwake mathaa matatũ thutha wake kũhoya.”

Thomai 1 Akorintho 3:9, mũcoke mwarĩrĩrie kĩũria gĩkĩ:

• Maũndũ monetwo, ta ũhoro ũcio wa kuuma New Zealand, monanagia atĩa atĩ Jehova nĩ atongoragia wĩra wa kũhunjia?

Thomai Atũmwo 1:8, mũcoke mwarĩrĩrie kĩũria gĩkĩ:

• Tũrabatara ũteithio wa Jehova nĩkĩ nĩguo tũhote kũhunjia?

Hihi nĩ ũĩ?

O kiumia mũcemanio-inĩ wa gatagatĩ-inĩ ga kiumia, nĩ tũkoragwo na icunjĩ cia gũtũmenyeria kũhunjia. Angĩkorũo nĩ ũrĩ wathiĩ mũcemanio ũcio-rĩ, woonire atĩa icunjĩ icio cia gũtũmenyeria kũhunjia?

6. Nĩ twathĩkagĩra rĩathani rĩa Ngai rĩa kũhunjia

Hĩndĩ ya karine ya mbere, akararia nĩ maageragia kũgiria arũmĩrĩri a Jesu kũhunjia. Akristiano a hĩndĩ ĩyo nĩ maarũĩrĩire kĩhooto kĩao gĩa kũhunjia na njĩra ya “kũrũmia ũhoro ũrĩa mwega kĩĩwatho.” (Afilipi 1:7) O na Aira a Jehova noguo mekaga ũmũthĩ.a

VIDEO: Kũrũĩrĩra Ũhoro Ũrĩa Mwega Kĩĩwatho (2:28)

Thomai Atũmwo 5:27-42, mũcoke mwarĩrĩrie kĩũria gĩkĩ:

• Nĩkĩ tũtingĩtiga kũhunjia?—Rora mũhari wa 29, 38, na 39.

ŨRĨA TWERUTA

Jesu eerire arũmĩrĩri ake mahunjie ũhoro ũrĩa mwega kũrĩ ndũrĩrĩ ciothe. Jehova nĩ ateithagia andũ ake kũruta wĩra ũcio.

Ciũria cia gũcokera

• Wĩra wa kũhunjia ũhoro ũrĩa mwega ũrutagwo atĩa thĩinĩ wa thĩ yothe?

• Wĩra wa kũhunjia wonanagia atĩa atĩ nĩ twendete andũ arĩa angĩ?

• Hihi nĩ ũkuona ta wĩra wa kũhunjia ũngĩtũma tũgĩe na gĩkeno? Ũngiuga ũguo nĩkĩ?

RIKĨRA

Rora wone ũrĩa Aira a Jehova mahunjagĩria andũ mataũni-inĩ marĩa menene.

Mahunjio ma Kũndũ kwa Mũingĩ Taũni-inĩ ya Paris (5:11)

Aira a Jehova mekĩte atĩa nĩguo mateithie ethari ngũĩ?

Kũhũnia Ethari Ngũĩ na Irio cia Kĩĩroho (5:59)

Thikĩrĩria mũtumia ũmwe agĩtaarĩria gĩkeno kĩrĩa akoragwo nakĩo nĩ ũndũ wa kũhũthĩra ũtũũro wake wĩra-inĩ wa kũhunjia.

Nĩ Ngenaga nĩ Gũthuura Ũtungata Ũyũ (6:29)

Thoma wone maciira mamwe mahotanĩtwo marĩa mateithĩrĩirie wĩra-inĩ wa kũhunjia ũhoro ũrĩa mwega.

“Ahunjia a Ũthamaki Gũtwara Cira wao Igooti-inĩ” (Ũthamaki wa Ngai nĩ Ũrathana!, gĩcunjĩ gĩa 13)

Jesu aarutanire atĩ no mũhaka Akristiano mabatithio. (Thoma Mathayo 28:19, 20.) No hihi mũndũ agĩrĩirũo kũbatithio atĩa? Na mũndũ agĩrĩirũo gwĩka atĩa nĩguo agĩrĩre kũbatithio?

1. Mũndũ agĩrĩirũo kũbatithio atĩa?

Kiugo “batithia” gĩtaũrĩtwo kuuma kiugo-inĩ gĩa Kĩngiriki kĩrĩa kiugĩte “gũtobokia” maĩ-inĩ. Rĩrĩa Jesu aabatithirio, aarikirio Rũũĩ-inĩ rwa Jorodani agĩcoka ‘akiumĩra maĩ-inĩ.’ (Mariko 1:9, 10) Ũndũ ũmwe na ũcio, Akristiano a ma mabatithagio na njĩra ya gũtobokio, kana kũrikio biũ maĩ-inĩ.

2. Kũbatithio kuonanagia ũndũ ũrĩkũ?

Rĩrĩa mũndũ abatithio, onanagia atĩ nĩ eyamũrĩire Jehova Ngai. Mũndũ eyamũragĩra Jehova atĩa? Mũndũ eyamũragĩra Jehova atanabatithio, na njĩra ya kwaria na Jehova kũgerera mahoya arĩ wiki akamwĩra atĩ nĩ arenda kũmũtungatagĩra tene na tene. Eraga Jehova atĩ arĩmũthathayagia o we wiki na atĩ ũndũ ũrĩa wa bata makĩria ũtũũro-inĩ wake ũrĩkoragwo ũrĩ gwĩka wendi wa Ngai. Athuuraga ‘kwĩrega na kũrũmĩrĩra’ morutani ma Jesu na kĩonereria gĩake. (Mathayo 16:24) Nĩ ũndũ wa kwĩyamũrĩra Jehova na kũbatithio, nĩ ahotaga kũgĩa na ũrata wa hakuhĩ hamwe na Jehova na Akristiano arĩa angĩ.

3. Mũndũ arabatara gwĩka atĩa nĩguo akinyĩrĩre kũbatithio?

Nĩguo wagĩrĩre kũbatithio, wagĩrĩirũo kwĩruta ũhoro wĩgiĩ Jehova na gũkũria wĩtĩkio mũrũmu harĩ we. (Thoma Ahibirania 11:6.) O ũrĩa ũgũthiĩ ũkĩmenyaga Jehova na ũkagĩa na wĩtĩkio harĩ we, noguo ũkũmwenda makĩria. Ningĩ nĩ ũrĩĩriragĩria kũhunjĩria andũ ũhoro wake, na gũtũũra kũringana na ithimi ciake. (2 Timotheo 4:2; 1 Johana 5:3) Rĩrĩa mũndũ ambĩrĩria gũtũũra mũtũũrĩre ũrĩa ‘waganĩrĩire na Jehova nĩguo amũkenagie biũ,’ no atue itua rĩa kũmwĩyamũrĩra na kũbatithio.—Akolosai 1:9, 10.a

THUTHURIA MAKĨRIA

4. No twĩrute kuumana na ũrĩa Jesu aabatithirio

Thomai Mathayo 3:13-17 muone ũhoro makĩria wĩgiĩ ũrĩa Jesu aabatithirio, mũcoke mwarĩrĩrie ciũria ici:

• Hihi Jesu aabatithirio arĩ gakenge?

• Hihi aabatithirio na njĩra ya gũitĩrĩrio maĩ mũtwe?

Jesu aambĩrĩirie kũruta wĩra wa mwanya ũrĩa aahetwo nĩ Ngai gũkũ thĩ rĩrĩa aabatithirio. Thomai Luka 3:21-23 na Johana 6:38, mũcoke mwarĩrĩrie kĩũria gĩkĩ:

• Thutha wa Jesu kũbatithio-rĩ, nĩ wĩra ũrĩkũ aaigaga mbere ũtũũro-inĩ wake?

5. No ũhote gũkinyĩra muoroto wa kũbatithio

Kĩambĩrĩria-inĩ, mũndũ no one ũrĩ ũndũ mũritũ kwĩyamũrĩra Ngai na kũbatithio. O na kũrĩ ũguo, no ũkũre kĩĩroho nginya ũkinyĩrĩre kũigua ũrĩ na ũmĩrĩru wa gũtua itua rĩu rĩa bata. Nĩguo muone andũ amwe maahotire gwĩka ũguo, mwĩrorerei VIDEO ĩno.

VIDEO:Gũkũria Ũrata Hamwe na Jehova (1:11)

Thomai Johana 17:3 na Jakubu 1:5, mũcoke mwarĩrĩrie kĩũria gĩkĩ:

• Nĩ kĩĩ kĩngĩteithia mũndũ ehaarĩrie kũbatithio?

1. Twĩyamũragĩra Jehova na njĩra ya kũmwĩra atĩ nĩ tũrenda kũmũtungatagĩra tene na tene

2. Rĩrĩa twabatithio, tuonagia andũ arĩa angĩ atĩ nĩ twĩyamũrĩire Ngai

6. Rĩrĩa twabatithio tũtuĩkaga a famĩlĩ ya Jehova

Rĩrĩa twabatithio tũtuĩkaga a famĩlĩ ĩmwe ya thĩ yothe ĩrĩ na ũrũmwe. O na gũtuĩka tuumĩte kũndũ gũtiganĩte na mĩrerere-inĩ ĩtiganĩte, ithuothe twĩtĩkĩtie maũndũ mahaanaine na tũtũũraga kũringana na ithimi ihaanaine cia mĩtugo. Thomai Thaburi 25:14 na 1 Petero 2:17, mũcoke mwarĩrĩrie kĩũria gĩkĩ:

• Kũbatithio kũhutagia atĩa ũrata wa mũndũ na Jehova o hamwe na arĩa angĩ mamũthathayagia?

ŨRĨA TWERUTA

Jesu aarutanire atĩ no mũhaka Akristiano mabatithio. Nĩguo mũndũ akinyĩre muoroto ũcio, agĩrĩirũo gũkũria wĩtĩkio mũrũmu harĩ Jehova, gũtũũra kũringana na ithimi ciake, na kũmwĩyamũrĩra.

Ciũria cia gũcokera

• Mũndũ agĩrĩirũo kũbatithio atĩa, na kũbatithio nĩ kwa bata nĩkĩ?

• Kwĩyamũrĩra Ngai kũhutanĩtie atĩa na kũbatithio?

• Mũndũ agĩrĩirũo gwĩka atĩa ataneyamũrĩra Ngai na abatithio?

RIKĨRA

Thoma wone ũhoro wa ma wĩgiĩ kũbatithio.

“Kũbatithio nĩ Kĩĩ?” (Gĩcunjĩ thĩinĩ wa jw.org/ki)

Thuthuria maũndũ marĩa mangĩteithia mũndũ gũkinyĩra kũbatithio.

“Ngatho na Wendo Harĩ Jehova no Igũtindĩke Kũbatithio” (Mũrangĩri, Machi 2020)

Thoma wone ũrĩa mũndũ ũmwe eekire ũthuthuria atanatua itua rĩa kũbatithio.

“Wendi Wao Warĩ Ndĩmenyere Niĩ Mwene atĩ Ũyũ nĩ Ũhoro wa Ma” (Mũrangĩri, Februarĩ 1, 2013)

Thoma wone nĩkĩ nĩ ũndũ wa bata kwĩrutanĩria gũkinyĩra muoroto wa kũbatithio na ũrĩa ũngĩĩhaarĩria nĩguo ũũkinyĩre.

“Hihi nĩ Njagĩrĩirũo Kũbatithio?” (yp2 gĩc. 37)