Ũũma Kuuma Harĩ Ndemwa Ĩrĩa Nini Mũno ya Kĩhibirania

Hihi no tũkorũo na ma atĩ ciĩranĩro ciothe cia Ngai nĩ ikahinga? Jesu ndaarĩ na nganja o na hanini ũndũ-inĩ ũcio na ũrutani wake nĩ wekĩraga wĩtĩkio wa athikĩrĩria ake hinya. Ta wĩcirie ngerekano aaheanire hĩndĩ ya Mahunjio make ma Kĩrĩma-inĩ ĩrĩa yandĩkĩtwo thĩinĩ wa Mathayo 5:18: “Ngũmwĩra atĩrĩ na ma, nginya hĩndĩ ĩrĩa thĩ na igũrũ ikeehera, gũtirĩ kairia [ndemwa ĩrĩa nini mũno] ka maandĩko, o na gũtirĩ gakururo kanini ga karamu gakeehera o na atĩa kuuma Watho-inĩ, nginya maũndũ mothe makaahingio.” (Holy Bible in Gĩkũyũ)

Ndemwa ĩrĩa nini mũno ya rũthiomi rwa Kĩhibirania nĩ י (yod), na nĩyo ndemwa ya mbere ya Tetragrammaton, rĩĩtwa itheru rĩa Ngai, Jehova.a Makĩria ma kuona ciugo na ndemwa iria ciarĩ Watho-inĩ wa Ngai irĩ cia bata, andĩki-Watho na Afarisai monaga o na “gakururo kanini” ka ndemwa karĩ ka bata mũno.

Jesu oigaga atĩ warĩ ũndũ mũhũthũ harĩ igũrũ na thĩ gũthira gũkĩra o na kaũndũ karĩa kanini mũno thĩinĩ wa Watho kwaga kũhinga. No Maandĩko matũheaga ũũma atĩ gũtirĩ hingo igũrũ na thĩ igathira. (Thaburi 78:69) Kwoguo, ũndũ ũcio Jesu oigire wonanagia atĩ gũtirĩ o na kaũndũ kanini atĩa ka Watho gatangĩkahinga.

Hihi Jehova Ngai nĩ atindanagĩra nginya na tũũndũ tũrĩa tũnini? Ĩĩ, hatarĩ nganja. Ta wĩcirie ũndũ ũyũ: Aisiraeli meerĩtwo atĩ matiagĩrĩirũo nĩ kuuna ihĩndĩ o na rĩmwe rĩa ngʼondu ya Pasaka. (Thama 12:46) Kwahoteka kau karĩ kaũndũ kanini. Hihi nĩ maataũkagĩrũo nĩkĩ mataagĩrĩirũo nĩ kuuna ihĩndĩ o na rĩmwe? No gũkorũo matiataũkagĩrũo. No Jehova Ngai nĩ aamenyaga atĩ ũndũ ũcio warĩ ũrathi wa atĩ Mesia ndangĩoinirũo ihĩndĩ o na rĩmwe rĩrĩa oragagĩrũo mũtĩ-inĩ wa kũnyarirĩrũo.—Thaburi 34:20; Johana 19:31-33, 36.

Nĩ ũndũ ũrĩkũ ciugo icio cia Jesu itũrutaga? O na ithuĩ no tũkorũo na ma biũ atĩ ciĩranĩro ciothe cia Jehova nĩ ikahinga, nginya kaũndũ karĩa kanini biũ. Ũcio nĩ ũũma mũnene mũno kuuma harĩ ndemwa ĩrĩa nini mũno ya Kĩhibirania.