Atũmwo Gũkararanĩria Ũnene O Rĩngĩ

Jesu na arutwo ake makarĩkĩrĩria rũgendo rwao gĩcigo-inĩ kĩa Perea merekeire Jerusalemu, magacoka makaringa Rũĩ rwa Jorodani hakuhĩ na Jeriko. Nĩ harĩ andũ angĩ maratwarana nao marathiĩ gũkũngũĩra Pasaka ya mwaka wa 33.

Jesu arathiĩ arĩ mbere ya arutwo, ehotorete gũkinya Jerusalemu ihinda rĩrĩa rĩagĩrĩire nĩ ũndũ wa Pasaka. No arutwo marĩ na guoya. Hau kabere rĩrĩa Lazaro aakuire Jesu arĩ hakuhĩ kuuma Perea athiĩ Judea, Toma eerire arutwo acio angĩ: “Nĩ tũthiĩi o na ithuĩ, tũgakue hamwe nake.” (Johana 11:​16, 47-53) Kwoguo nĩ ũgwati gũthiĩ Jerusalemu na nĩkĩo arutwo marĩ na guoya.

Nĩguo Jesu ahaarĩrie arutwo ake nĩ ũndũ wa maũndũ marĩa marĩ mbere, akameta keheri-inĩ akameera: “Atĩrĩrĩ, tũrorete Jerusalemu, na Mũrũ wa mũndũ nĩ ekũneanwo kũrĩ athĩnjĩri-Ngai arĩa anene na andĩki-Watho. Nao nĩ mekũmũtuĩra oragwo na mamũneane kũrĩ andũ a ndũrĩrĩ mamũnyũrũrie na mamũhũũre na mamũcuurie mũtĩ-inĩ; na mũthenya wa gatatũ nĩ akaariũkio.”​—Mathayo 20:​18, 19.

Rĩrĩ nĩrĩo riita rĩa gatatũ Jesu kwĩra arutwo ake ũhoro wa gũkua na kũriũka gwake. (Mathayo 16:21; 17:​22, 23) No riita rĩrĩ akameera atĩ ekũragwo na njĩra ya gũcuurio mũtĩ-inĩ. O na gũtuĩka nĩ maramũthikĩrĩria, matirataũkĩrũo nĩ ũrĩa arenda kuuga. No kũhoteke marerĩgĩrĩra ũthamaki wa Isiraeli ũcokio thĩinĩ wa thĩ, nĩguo magĩe na riri na ũnene ũthamaki-inĩ ũcio hamwe na Kristo.

Ũmwe wa arĩa maratwarana nao nĩ Salome, ũrĩa wonekaga ta arĩ we nyina wa Jakubu na Johana. Jesu aheete arutwo acio erĩ rĩĩtwa riugĩte “Ariũ a Marurumĩ” nĩ ũndũ wa ũrĩa marakaraga na ihenya. (Mariko 3:17; Luka 9:54) Arutwo acio erĩ nĩ makoretwo makĩĩrirĩria gũkorũo na ũnene Ũthamaki-inĩ wa Kristo. Nyina wao nĩ oĩ ũguo, nĩ ũndũ ũcio agathiĩ harĩ Jesu ithenya rĩao akamũinamĩrĩra, akamwĩra harĩ ũndũ angĩenda kũmũhoya. Jesu akamũũria: “Ũkwenda atĩa?” Nake akamwĩra: “Ingĩenda ariũ aya akwa erĩ magaaikara ũmwe mwena waku wa ũrĩo na ũcio ũngĩ mwena wa ũmotho thĩinĩ wa Ũthamaki waku.”​—Mathayo 20:​20, 21.

Ihoya rĩu rĩake riumanĩte na Jakubu na Johana. Tondũ Jesu nĩ akorũo ataarĩria maũndũ moru marĩa egwĩkwo, akameera: “Inyuĩ mũtiũĩ kĩrĩa mũrahoya. Hihi no mũhote kũnyuĩra gĩkombe kĩrĩa ngũnyuĩra?” Nao makamũcokeria atĩrĩ: “Ĩĩ no tũhote.” (Mathayo 20:22) Ĩndĩ no kũhoteke matirĩ marataũkĩrũo nĩ ũrĩa ũndũ ũcio ũkũmahutia.

O na kũrĩ ũguo, Jesu akameera: “Kũnyuĩra nĩ mũkũnyuĩra gĩkombe gĩakwa, no ha ũhoro wa gũikara mwena wakwa wa ũrĩo na wa ũmotho ti niĩ heanaga, ĩndĩ nĩ wa arĩa mahaarĩrĩirio nĩ Awa.”​—Mathayo 20:23.

Atũmwo acio angĩ ikũmi mamenya ũndũ ũrĩa Jakubu na Johana mekũhoyaga, makarakara. Hihi no kũhoteke atĩ Jakubu na Johana nĩ maageretie kũiguithia atũmwo acio angĩ rĩrĩa othe maakararanagĩria igũrũ rĩgiĩ nũ mũnene? (Luka 9:​46-48) O na angĩkorũo nĩguo kwarĩ, ũndũ ũrĩa warĩkia gwĩkĩka nĩ ũronania atĩ acio Ikũmi na Erĩ matiarũmĩrĩire ũtaaro wa Jesu wa mũndũ kwĩyona arĩ we mũnyinyi. Mwerekera wao wa kwenda ũnene ũrĩ o ho.

Jesu akona arĩ wega kũrũnga ũndũ ũcio na rũmena rũrĩa rũroimana naguo. Ageta acio othe Ikũmi na Erĩ akamahe ũtaaro ũyũ na njĩra ya wendo: “Inyuĩ nĩ mũĩ atĩ arĩa monagwo marĩ atongoria a ndũrĩrĩ nĩ metũũgagĩria igũrũ rĩa andũ na arĩa marĩ na ũnene nĩ mahũthagĩra hinya gwathana. Ũguo tiguo inyuĩ mwagĩrĩirũo gũkorũo, no ũrĩa ũkwenda gũtuĩka mũnene gatagatĩ-inĩ kanyu no mũhaka atuĩke ndungata yanyu, nake ũrĩa ũkwenda gũtuĩka wa mbere gatagatĩ-inĩ kanyu no mũhaka atuĩke ngombo ya arĩa angĩ othe.”​—Mariko 10:​42-44.

Jesu akameera ũhoro wĩgiĩ kĩonereria gĩake mwene, kĩrĩa magĩrĩirũo kũrũmĩrĩra. Akoiga: “O ta ũrĩa Mũrũ wa mũndũ atookire gũtungatagĩrũo, ĩndĩ okire nĩguo atungate, na arute muoyo wake ũtuĩke wa gũkũũra andũ aingĩ.” (Mathayo 20:28) Jesu akoretwo agĩtungatĩra arĩa angĩ kwa ihinda rĩa mĩaka ta ĩtatũ. Na nĩ egũthiĩ na mbere gwĩka ũguo nginya arute muoyo wake nĩ ũndũ wa andũ! Arutwo mabatiĩ gũkorũo na mwerekera ta ũcio wa Kristo wa kwenda gũtungatanĩra handũ ha gũtungatwo, na gũkorũo marĩ ũrĩa mũnyinyi handũ ha kũgĩa na ũnene.