Watho Wĩtĩkĩrĩtie Ũndũ Ũrĩkũ Mũthenya Wa Thabatũ?

Mũthenya ũngĩ wa Thabatũ, Jesu agaceera thunagogi-inĩ hihi thĩinĩ wa Galili. Arĩ kũu akona mũndũ muonju guoko kwa ũrĩo. (Luka 6:6) Andĩki-Watho na Afarisai maraikia Jesu riitho mũno. Nĩkĩ? Muoroto wao kũna ũkamenyeka moria kĩũria gĩkĩ: “Watho nĩ wĩtĩkĩrĩtie kũhonania mũthenya wa Thabatũ?”​—Mathayo 12:10.

Atongoria acio a ndini ya Kĩyahudi metĩkĩtie atĩ kũhonania mũthenya wa Thabatũ gwĩtĩkĩrĩkaga tu muoyo ũngĩkorũo ũgwati-inĩ. Kwa ngerekano, mũndũ ndagĩrĩire kũrũnga kana kuoha ihĩndĩ rĩthenyũkĩte mũthenya wa Thabatũ, tondũ ũcio ti ũndũ ũngĩũraga mũndũ. Hatarĩ nganja, andĩki-Watho na Afarisai matiroria Jesu ciũria tondũ wa kũiguĩra tha mũndũ ũcio ũranyamarĩka. Marageria gũcaria mũthingi wa gũthitanga Jesu.

No Jesu nĩ aramenya mwĩcirĩrie ũcio wao mũhĩngĩcanu. Nĩ oĩ atĩ, nĩ makũrĩtie muonere ũkĩrĩtie njano na ũtarĩ wa Kĩĩmandĩko wĩgiĩ kũruta wĩra mũthenya wa Thabatũ. (Thama 20:​8-10) Nĩ acemanĩtie na ũkararia ta ũcio ũtarĩ na mũthingi wĩra-inĩ wake mwega. Jesu rĩu ageka ũndũ ũgũtũma mone mweke wa kũmũkararia wega, akeera mũndũ ũcio wĩna guoko kuonju: “Rũgama na ũũke haha gatagatĩ.”​—Mariko 3:3.

Jesu agacoka akahũgũkĩra andĩki-Watho na Afarisai, akameera: “Nĩ mũndũ ũrĩkũ gatagatĩ-inĩ kanyu ũrĩ na ngʼondu ĩmwe na ĩngĩgwa irima mũthenya wa Thabatũ ũtangĩmĩnyita amĩrute thĩinĩ wa irima rĩu?” (Mathayo 12:11) Ngʼondu nĩ kĩndũ kĩngiuma mbia kwoguo matingĩmĩtiga irima nginya mũthenya ũyũ ũngĩ, tondũ no ĩkue na mathiĩ hathara. O na makĩria, Maandĩko moigaga: “Mũndũ mũthingu nĩamenyagĩrĩra muoyo wa nyamũ yake.”​—Thimo 12:10.

Akĩringithania ũndũ ũcio, Jesu ningĩ akameera: “Githĩ mũndũ ndakĩrĩ wa bata gũkĩra ngʼondu! Nĩ ũndũ ũcio-rĩ, Watho nĩ wĩtĩkĩrĩtie gwĩka ũndũ mwega mũthenya wa Thabatũ.” (Mathayo 12:12) Kwoguo, Jesu ndegũkorũo oinĩte watho wa Thabatũ ahonia mũndũ ũcio. Atongoria acio a ndini makaremwo gũcokia maigua ciugo icio cia kĩhooto na cia ũcayanĩri. Magakira ki.

E na marakara na kĩeha kĩingĩ nĩ ũndũ wa mwĩcirĩrie wao mũhĩtanu, Jesu akarora mĩena yothe. Agacoka akeera mũndũ ũcio: “Tambũrũkia guoko gwaku.” (Mathayo 12:13) Nake agatambũrũkia guoko kũu kuonju, na gũkahona. Mũndũ ũcio agakena mũno, no hihi arĩa marageria gũtega Jesu mekũigua atĩa?

Handũ ha gũkena atĩ mũndũ ũcio nĩ ahonio guoko, Afarisai makoima nja makambĩrĩria gũcirĩra Jesu “marĩ na arũmĩrĩri a Herode, nĩguo mamũũrage.” (Mariko 3:6) Arũmĩrĩri acio a Herode no kũhoteke nĩ hamwe na andũ amwe a gĩkundi kĩa ndini gĩtagwo Asadukai. Asadukai na Afarisai matiiguithanagia, no rĩu marĩ hamwe ta gĩkwa na mũkũngũgũ nĩguo mokĩrĩre Jesu.