Gũciarũo Kwa Ũrĩa Ũngĩkahaarĩria Njĩra

Elizabethi atigĩtie hanini kũheo mwana. Makoretwo magĩikara na Mariamu kwa ihinda rĩa mĩeri ĩtatũ. Rĩu nĩ ihinda rĩa Mariamu kũmuugĩra ũhoro na kwambĩrĩria rũgendo rwa gũcoka kwao mũciĩ taũni-inĩ ya Nazarethi. O nake nĩ arerĩgĩrĩra kũheo kahĩĩ thutha wa mĩeri ta ĩtandatũ.

Kahinda kanini thutha wa Mariamu kũinũka, Elizabethi akaheo mwana, na we hamwe na mwana ũcio magakorũo na ũgima mwega wa mwĩrĩ. Elizabethi na Zekaria magakena mũno! Elizabethi onia andũ a itũũra na a mbarĩ ciao kahĩĩ kau, o nao magakena mũno.

Watho ũrĩa Ngai aaheete Aisiraeli woigĩte atĩ thikũ inyanya thutha wa kahĩĩ gũciarũo, kaagĩrĩirũo kũruithio na kaheo rĩĩtwa. (Maũndũ ma Alawii 12:​2, 3) Andũ amwe marona atĩ kahĩĩ kau ga Zekaria kagĩrĩire gwĩtwo take. No Elizabethi akaria akoiga: “Aca! gegwĩtwo Johana.” (Luka 1:60) Ririkana atĩ mũraika Gaburieli oigĩte kaana kau kagĩrĩire gwĩtwo Johana.

Nao andũ a itũũra na a mbarĩ ciao makarehe thĩna makoiga: “Gũtakĩrĩ mũndũ wa mbarĩ cianyu wĩtagwo ũguo.” (Luka 1:61) Makarĩria Zekaria na ciĩko, makamũũria ũrĩa ekwenda gwĩta kahĩĩ kau gake. Nake Zekaria akoiga areherũo gĩcunjĩ kĩa rũbaũ na akaandĩka atĩrĩ: “Johana nĩrĩo rĩĩtwa rĩako.”​—Luka 1:63.

O hĩndĩ ĩyo, Zekaria akaringĩrũo kĩama akahota kwaria rĩngĩ. No gũkorũo nĩ ũraririkana atĩ aatuĩkire bubu rĩrĩa aagire gwĩtĩkia ũrĩa mũraika aamwĩrire atĩ Elizabethi nĩ akaagĩa mwana. Kwoguo andũ a itũũra mona Zekaria akĩaria makagega makeyũria atĩrĩ: “Kaĩ kaana gaka gagatuĩka ũ?” (Luka 1:66) Magakũũrana atĩ Ngai arĩ na itemi harĩ Johana kũheo rĩĩtwa.

Zekaria agacoka akoiga ũũ aiyũirũo nĩ roho mũtheru: “Jehova, Ngai wa Isiraeli arogoocwo, tondũ nĩ aririkanĩte andũ ake na akamarehera ũhonokio. Na nĩ atũmĩte kũgĩe na rũhĩa rwa ũhonokio thĩinĩ wa nyũmba ya Daudi ndungata yake.” (Luka 1:​68, 69) Akĩhũthĩra ciugo “rũhĩa rwa ũhonokio,” araria ũhoro wa Mwathani Jesu, ũrĩa ũtarĩ ũraciarũo. Zekaria akoiga atĩ kũgerera harĩ Ũcio, “thutha wa gũtũhonokia kuuma moko-inĩ ma thũ, [Ngai] nĩ agaatũhe gĩtĩo gĩa kũmũrutĩra ũtungata mũtheru tũtarĩ na guoya tũrĩ na wĩhokeku na ũthingu harĩ we matukũ maitũ mothe.”​—Luka 1:​74, 75.

Ũhoro-inĩ wĩgiĩ mũrũwe, Zekaria akaratha ũũ: “No wee kaana gaka, nĩ ũgetagwo mũnabii wa Ũrĩa ũrĩ Igũrũ Mũno, tondũ nĩ ũgaathiĩ mbere ya Jehova nĩguo ũhaarĩrie njĩra ciake, ũmenyithie andũ ake ũhoro wĩgiĩ kũhonokio na njĩra ya kuoherũo mehia mao, nĩ ũndũ wa tha nyingĩ cia Ngai witũ. Tondũ wa tha icio, ũtheri nĩ ũgoka kũrĩ ithuĩ uumĩte igũrũ, warĩre arĩa maikaraga nduma-inĩ na kĩĩruru-inĩ gĩa gĩkuũ na ũtũtongorie wega njĩra-inĩ ya thayũ.” (Luka 1:​76-79) Na githĩ ũrathi ũcio ti wa kũhutia ngoro mũno!

Gũkinyĩria rĩu, Mariamu ũrĩa ũtarĩ araingĩra thĩinĩ wa kĩhiko nĩ mũkinyu kwao mũciĩ Nazarethi. Hihi gũgũthiĩ atĩa kwamenyeka atĩ arĩ na nda?