Mũrũ Wa Mũndũ Nũ?

Jesu na arutwo ake magakinya itũũra rĩa Bethisaida. Andũ makarehe mũndũ mũtumumu na magathaitha Jesu amũhutie nĩguo ahone.

Jesu akamũnyita guoko, na akamumia nja ya itũũra. Thutha wa gũtuĩra mũndũ ũcio mata maitho, akamũũria: “Nĩ ũrona kĩndũ?” Mũndũ ũcio akoiga: “Ngwĩciria nĩ andũ ndĩrona, no mahaana ta mĩtĩ ĩrathiĩ.” (Mariko 8:​23, 24) Jesu akaigĩrĩra moko make maitho-inĩ ma mũndũ ũcio, na akamũcokeria ũhoti wa kuona. Agacoka akeera mũndũ ũcio rĩu ũrahota kuona wega ainũke, na akamũtaara ndagatonye itũũra.

Thutha ũcio, Jesu na arutwo ake magathiĩ mwena wa rũgongo gĩcigo-inĩ gĩa Kaisarea Filipi. Itũũra rĩu rĩrĩ kĩrĩma-inĩ, na gũthiĩ kuo nĩ mwambato mũraihu wa kilomita ta 40. Thutha wa rĩo nĩ marahota kuona kĩrĩma kĩngĩ kĩraiharaihu kĩrĩ na mbarabu gacũmbĩrĩ-inĩ gĩtagwo Herimoni. Rũgendo rũu hihi rũkoya thikũ igĩrĩ kana makĩria.

Ihinda rĩna marĩ o rũgendo-inĩ, Jesu agathiĩ kũhoya arĩ wiki. Atigĩtie mĩeri kenda kana ikũmi oragwo, na nĩ aratangĩkĩra mũno arutwo ake. Aingĩ nĩ merĩgĩte gũthiĩ magĩtiga kũmũrũmĩrĩra, na angĩ magakua ngoro kana makarigwo nĩ ũrĩa megwĩka. No kũhoteke nĩ mararigwo kĩrĩa gĩatũmire arege andũ mamũtue mũthamaki kana kĩrĩa gĩtũmaga aage kũringa kĩama onanie wega we nĩwe ũ.

Arutwo moka harĩa arahoera, Jesu akamoria: “Andũ moigaga Mũrũ wa mũndũ nũ?” Nao makamũcokeria atĩrĩ: “Amwe moigaga nĩ Johana Mũbatithania, angĩ Elija, na angĩ Jeremia kana ũmwe wa anabii.” Andũ marona Jesu ta arĩ ũmwe wa anabii acio ũriũkĩte. Nĩgetha amenye ũrĩa arutwo ake o mareciria, Jesu akamoria: “Ĩ inyuĩ na inyuĩ mugaga ndĩ ũ?” Petero o narua akamũcokeria akoiga: “Wee nĩwe Kristo, Mũrũ wa Ngai ũrĩa ũrĩ muoyo.”​—Mathayo 16:​13-16.

Jesu akoiga atĩ Petero nĩ agĩrĩirũo nĩ gũkena kuona Ngai nĩ amũguũrĩirie ũndũ ũcio, na agathiĩ na mbere akoiga: “Wee nĩwe Petero, na igũrũ rĩa rwaro rũrũ rwa ihiga, nĩ ngaaka kĩũngano gĩakwa, na Mbĩrĩra ndĩgagĩtooria.” Jesu arenda kuuga atĩ we mwene nĩ agaaka kĩũngano na atĩ o na Mbĩrĩra ndĩkahota kũgirĩrĩria andũ a kĩũngano kĩu mangĩtũũria wĩhokeku wao marĩ gũkũ thĩ. Akeera Petero ũũ: “Nĩ ngaakũhee cabi cia Ũthamaki wa igũrũ.”​—Mathayo 16:​18, 19.

Jesu ti kuonania aronania atĩ Petero nĩ wa bata gũkĩra atũmwo acio angĩ, ningĩ ti kũmũtua aramũtua mũthingi wa kĩũngano. Jesu we mwene nĩwe Ihiga rĩrĩa kĩũngano gĩake gĩgakwo igũrũ wa rĩo. (1 Akorintho 3:11; Aefeso 2:20) O na kũrĩ ũguo, Petero nĩ akaaheo cabi ithatũ. Nĩ agaakorũo na gĩtĩo gĩa kũhingũrĩra ikundi cia andũ mweke wa kũingĩra Ũthamaki-inĩ wa igũrũ.

Petero angĩkahũthĩra cabi ya mbere hĩndĩ ya Pentekoste ya mwaka wa 33, akĩonia Ayahudi arĩa merirĩte o hamwe na arĩa magarũrĩte wĩtĩkio ũrĩa mabatiĩ gwĩka nĩguo mahonokio. Angĩkahũthĩra ya kerĩ kũhingũrĩra Asamaria arĩa maronania wĩtĩkio mweke wa kũingĩra Ũthamaki-inĩ wa Ngai. Thutha ũcio mwaka wa 36, Petero nĩ angĩkahũthĩra cabi ya gatatũ kũhe nginya andũ a Ndũrĩrĩ mweke ũcio, wa mbere arĩ Korinelio, andũ a famĩlĩ yake, na arata.​—Atũmwo 2:​37, 38; 8:​14-17; 10:​44-48.

Ndeereti-inĩ yao, atũmwo a Jesu makanyitwo nĩ kĩeha ameera ũrĩa akiriĩ kũnyarirũo na kũũragwo itũũra-inĩ rĩa Jerusalemu. Tondũ wa kwaga gũtaũkĩrũo atĩ Jesu nĩ akaariũka na ambate igũrũ, Petero akamũtwara keheri-inĩ na akamũkania akamwĩra: “Mwathani, wĩiguĩre tha; maũndũ macio gũtirĩ hĩndĩ magaagũkora.” No Jesu akarora na kũngĩ akeera Petero: “Coka thutha wakwa, Shaitani! Wee ũrĩ mũhĩnga harĩ niĩ, nĩ ũndũ ndũreciria meciria ma Ngai, ĩndĩ ũreciria meciria ma andũ.”​—Mathayo 16:​22, 23.

Jesu agacoka ageta andũ angĩ makĩria ma atũmwo ake na agataarĩria atĩ ndũgũkorũo ũrĩ ũndũ mũhũthũ mũndũ gũtuĩka mũrũmĩrĩri wake. Akoiga ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo na anũmagĩrĩre. Nĩ gũkorũo mũndũ o wothe wendaga kũhonokia muoyo wake nĩ akoorũo nĩguo, no mũndũ o wothe ũkũrũo nĩ muoyo wake nĩ ũndũ wakwa na nĩ ũndũ wa ũhoro ũrĩa mwega nĩ akaũhonokia.”​—Mariko 8:​34, 35.

Nĩguo metĩkĩrĩke harĩ Jesu, arũmĩrĩri ake no mũhaka makorũo na ũmĩrĩru na meime. Jesu akoiga: “Mũndũ o wothe ũconokaga nĩ ũndũ wakwa, na nĩ ũndũ wa ciugo ciakwa thĩinĩ wa rũciaro rũrũ rwa andũ ehia na matarĩ ehokeku, o nake Mũrũ wa mũndũ nĩ akaamũconokera rĩrĩa agooka arĩ na riri wa Ithe arĩ hamwe na araika.” (Mariko 8:38) Hatarĩ nganja, rĩrĩa Jesu agoka, “akaarĩha o mũndũ kũringana na ciĩko ciake.”​—Mathayo 16:27.