Ũrutani Wĩgiĩ Kũnyitana Ũgeni Na Kũhoya

Mwena wa irathĩro wa Kĩrĩma kĩa Mĩtamaiyũ, kilomita ta ithatũ kuuma Jerusalemu, nĩho taũni ya Bethania ĩrĩ. (Johana 11:18) Jesu agathiĩ taũni-inĩ ĩyo na agaceera kwa airĩtu erĩ a nyina ũmwe, Maritha na Mariamu. Airĩtu acio na Lazaro mũrũ wa nyina nao nĩ arata a Jesu, na akinya makamũnyita ũgeni.

Nĩ gĩtĩo kĩnene mũno harĩ o gũceererũo nĩ Mesia. Maritha arĩ na wendi mũnene wa kũrugĩra Jesu, kwoguo akambĩrĩria wĩra wa kũhaarĩria irio mĩthemba mĩingĩ. O Maritha agĩthiaga na mbere na wĩra, mwarĩ wa nyina Mariamu agaikara magũrũ-inĩ ma Jesu akĩmũthikĩrĩria. Thutha wa ihinda Maritha akoria Jesu atĩrĩ: “Mwathani, kaĩ ũtarona atĩ mwarĩ wa maitũ nĩ andigire ngĩhangʼĩra maũndũ ndĩ nyiki? Mwĩre oke andeithie.”​—Luka 10:40.

Handũ ha kũruta Mariamu mahĩtia, Jesu akarũnga Maritha tondũ wa kwĩhangʼia na irio akamwĩra: “Maritha, Maritha, ũratangĩka na ũgethĩnia nĩ ũndũ wa maũndũ maingĩ. Ĩndĩ no maũndũ manini marabatarania, kana o ũmwe tu. Ha ũhoro wake-rĩ, Mariamu athuurĩte ũndũ ũrĩa mwega, na ndangĩtunywo.” (Luka 10:​41, 42) Jesu akamuonia atĩ ti wega kũhũthĩra ihinda inene akĩruga irio nyingĩ. Tũirio o tũnini nĩ tũiganu.

Maritha arĩ na muoroto mwega. Arenda kuonia Jesu ũtaana. No kũhangʼĩra mũno irio nĩ kũratũma orũo nĩ motaaro ma bata kuuma kũrĩ Mũrũ wa Ngai! Jesu agatĩtĩrithia atĩ Mariamu atuire itua rĩa ũũgĩ, rĩrĩa rĩgũtũma agĩe na irathimo cia gũtũũra na rĩkorũo rĩrĩ kĩonereria harĩ andũ othe.

Arĩ gĩikaro-inĩ kĩngĩ, Jesu akaheana ũrutani ũngĩ wa bata ĩndĩ ngũrani na ũcio. Mũrutwo wake ũmwe akamũũria: “Mwathani, tũrute kũhoya, ta ũrĩa Johana o nake aarutire arutwo ake.” (Luka 11:1) Kĩndũ ta mwaka ũmwe na nuthu mũhĩtũku Jesu nĩ aarutanĩte kũhoya Mahunjio-inĩ make ma Kĩrĩma-inĩ. (Mathayo 6:​9-13) O na kũrĩ ũguo, no kũhoteke mũrutwo ũcio ndaarĩ ho hĩndĩ ĩyo, kwoguo Jesu agacokera maũndũ ma bata marĩa aarutanĩte. Agacoka akaheana ngerekano ĩno ĩratĩtĩrithia bata wa mũndũ kũhoya ategũtigithĩria.

“Ta tuai atĩ ũmwe wanyu arĩ na mũrata agacoka agathiĩ kũrĩ we ũtukũ gatagatĩ akamwĩra, ‘Mũrata, ngombera mĩgate ĩtatũ-ĩ, tondũ harĩ mũrata wakwa woka o rĩu oimĩte rũgendo na ndirĩ na kĩndũ gĩa kũmũhe.’ No ũcio akamũcokeria arĩ thĩinĩ akamwĩra: ‘Tiga kũngia. Mũrango nĩ ũrĩkĩtie kũhingwo, na twana twakwa tũrĩ toro hamwe na niĩ. Kwoguo ndingĩũkĩra ngũhe kĩndũ.’ Ngũmwĩra atĩrĩ, o na gũtuĩka ndangĩũkĩra na amũhe kĩndũ nĩ ũndũ tu nĩ mũratawe, hatarĩ nganja nĩ ũndũ wa kũmũtindĩrĩra nĩ egũũkĩra na amũhe kĩrĩa gĩothe arabatara.”​—Luka 11:​5-8.

Jesu ndarenda kuuga atĩ Jehova ndakoragwo ehaarĩirie gũthikĩrĩria andũ makĩmũhoya, ta ũrĩa mũrata ũcio eekire. No arenda kuonania atĩ angĩkorũo mũrata ta ũcio no athikĩrĩrie mũndũ ũramũtindĩrĩra-rĩ, hatarĩ nganja Ithe witũ wa igũrũ ũrĩ wendo no athikĩrĩrie mahoya ma kuuma ngoro ma ndungata ciake njĩhokeku. Jesu agathiĩ na mbere akoiga: “Ngũmwĩra atĩrĩ, thiĩi na mbere kũhoya, na nĩ mũkũheo; thiĩi na mbere gũcaria, na nĩ mũkuona; thiĩi na mbere kũringaringa, na nĩ mũkũhingũrĩrũo. Tondũ mũndũ o wothe ũhoyaga nĩ aheagwo, na mũndũ o wothe ũcaragia nĩ onaga, na mũndũ o wothe ũringaringaga, nĩ ahingũragĩrũo.”​—Luka 11:​9, 10.

Jesu agacoka agatĩtĩrithia ũndũ ũcio na njĩra ya kũringithania Jehova na ithe wa mũndũ akoiga: “Nĩ mũciari ũrĩkũ gatagatĩ-inĩ kanyu ũngĩhoywo nĩ mũrũwe thamaki, amũhe nyoka handũ ha thamaki? Kana ningĩ angĩmũhoya itumbĩ, amũhe kangʼaurũ? Nĩ ũndũ ũcio-rĩ, angĩkorũo inyuĩ o na gũtuĩka mũrĩ ehia nĩ mũĩ kũhe ciana cianyu iheo njega-rĩ, githĩ Ithe wanyu wa igũrũ ndarĩkĩheaga o na makĩria roho mũtheru arĩa mamũhoyaga!” (Luka 11:​11-13) Na githĩ ũndũ ũcio ndũratũma tũkorũo na ma atĩ Ithe witũ wa igũrũ nĩ ehaarĩirie gũtũthikĩrĩria na gũtũhe mabataro maitũ!