Jesu Kũheana Ũtaaro Wĩgiĩ Ũtonga

Jesu arĩ thĩinĩ wa nyũmba ya Mũfarisai, kwĩna andũ aingĩ mamwetereire nja. Ũndũ ta ũcio wanekĩka rĩngĩ arĩ Galili. (Mariko 1:33; 2:2; 3:9) Gũkũ Judea, andũ aingĩ nĩ marenda kũmuona na kũmũigua, na njĩra ĩyo makonania mwerekera ngũrani na wa Afarisai arĩa ekũrĩanagĩra nao.

Ũndũ ũrĩa Jesu aramba kũgweta nĩ wa bata harĩ arutwo ake. Akameera: “Mwĩmenyererei ndawa ya kũimbia ya Afarisai, nĩyo ũhinga.” Jesu anaheana mũkaana ũcio rĩngĩ, no ũndũ ũrĩa onire rĩrĩa oima kwa Mũfarisai ũronania atĩ ũtaaro ũcio ũbatiĩ kũhũthĩrũo na ihenya. (Luka 12:1; Mariko 8:15) Afarisai marageria kũhithĩrĩra waganu wao na njĩra ya kuonania ũrĩa meamũrĩire Ngai, ĩndĩ ũhinga ũcio wao nĩ wagĩrĩire kumbũrũo. Jesu akoiga: “Gũtirĩ ũndũ mũhithe biũ ũtakaaguũrio, na gũtirĩ hitho ĩtakaamenyeka.”​—Luka 12:2.

No kũhoteke andũ aingĩ arĩa marathikĩrĩria Jesu moimĩte kũu Judea, na matiarĩ Galili rĩrĩa aarutanaga kuo. Nĩ ũndũ ũcio agacokera maũndũ ma bata marĩa aarutanĩte. Akeera arĩa othe maramũthikĩrĩria ũũ: “Mũtigetigĩre arĩa moragaga mwĩrĩ na thutha ũcio matirĩ ũndũ ũngĩ mangĩhota gwĩka.” (Luka 12:4) O ta ũrĩa amenyerete gwĩka, agatĩtĩrithia bata wa arũmĩrĩri ake kwĩhoka atĩ Ngai nĩ ekũmarũmbũiya. Ningĩ nĩ mabatiĩ gwĩtĩkia Mũrũ wa mũndũ na mamenye atĩ Ngai no amateithie.​—Mathayo 10:​19, 20, 26-33; 12:​31, 32.

Mũndũ ũmwe ũrĩ thĩinĩ wa kĩrĩndĩ akera Jesu ũndũ ũrĩa ũramũthumbũra, akoiga: “Mũrutani, ĩra mũrũ wa maitũ tũgayane indo iria ciatigirũo nĩ baba.” (Luka 12:13) Watho uugĩte atĩ mwana ũrĩa mũkũrũ abatiĩ kũheo icunjĩ igĩrĩ cia igai, kwoguo gũtiagĩrĩirũo gũkorũo na ũndũ wa gũkararanĩria. (Gũcokerithia Maathani 21:17) No kũroneka ta mũndũ ũcio arenda makĩria ma igai rĩrĩa rĩmwagĩrĩire. Jesu akahũthĩra ũũgĩ, akaga kũnyita mwena o wothe mbaru. Akoria: “Mũndũ ũyũ, nũ ũnduĩte mũcirithania kana mũtuithania wanyu inyuerĩ?”​—Luka 12:14.

Jesu agacoka akahe arĩa othe maramũthikĩrĩria ũtaaro ũyũ: “Ikaragai mũhingũrĩte maitho manyu na mwĩmenyerere ũkoroku wa mĩthemba yothe, tondũ o na rĩrĩa mũndũ arĩ na ũingĩ, muoyo wake ndumanaga na indo iria arĩ nacio.” (Luka 12:15) O na mũndũ angĩkorũo na indo nyingĩ atĩa-rĩ, githĩ to agakua mũthenya ũmwe acitige? Jesu akaheana ngerekano ya gũtĩtĩrithia ũndũ ũcio, na akonania bata wa mũndũ kũgĩa rĩĩtwa rĩega na Ngai akoiga:

“Mũgũnda wa mũndũ ũmwe warĩ mũtongu nĩ waciarire wega. Kwoguo akĩambĩrĩria kwĩĩra na ngoro atĩrĩ, ‘Rĩu ngwĩka atĩa na ndirĩ na kũndũ gwa gũcokanĩrĩria magetha makwa?’ Agĩcoka akiuga: ‘Ngwĩka atĩrĩ, ngũtharia makũmbĩ makwa njake mangĩ manene makĩria, na kũu nĩkuo ngũcokanĩrĩria irio ciakwa na indo ciakwa ciothe, njoke ndĩĩre atĩrĩ: “Ũrĩ na indo nyingĩ njega icokanĩrĩirio cia kũhũthĩra mĩaka mĩingĩ; hurũka, ũrĩe na ũnyue na wĩgangare.”’ No Ngai akĩmwĩra, ‘Kĩrimũ gĩkĩ, ũtukũ ũyũ nĩ marenda gũkũruta muoyo. Indo iria ũcokanĩrĩirie-rĩ, igũgĩtuĩka cia ũ?’ Ũguo noguo gũthiaga harĩ mũndũ ũrĩa ũcokanagĩrĩria mũthithũ nĩ ũndũ wake mwene no ti mũtongu maitho-inĩ ma Ngai.”​—Luka 12:​16-21.

Arutwo a Jesu o hamwe na arĩa maramũthikĩrĩria no magwe mũtego-inĩ wa kwenda kũgĩa indo nyingĩ. Kana mĩtangĩko ya ũtũũro ĩtũme maremwo gũtungatĩra Jehova na ngoro yothe. Kwoguo Jesu agacokera ũtaaro aaheanĩte ta mwaka ũmwe na nuthu mũhĩtũku Mahunjio-inĩ ma Kĩrĩma-inĩ, akoiga:

“Tigai gũtangĩkĩra mĩoyo yanyu ũhoro-inĩ wĩgiĩ kĩrĩa mũkũrĩa kana kĩrĩa mũkwĩhumba. . . . Mwĩciriei ũhoro wa mahuru: Matihandaga mbegũ kana makagetha; matirĩ nyũmba cia kũiga irio kana makũmbĩ; ĩndĩ Ngai nĩ amaheaga gĩa kũrĩa. Githĩ mũtikĩrĩ a bata gũkĩra nyoni? . . . Wĩciriei ũrĩa mahũa makũraga: Matiĩnogagia kana makogotha ndigi; no ngũmwĩra atĩrĩ, o na Suleimani na riri wake wothe ndaagemete ta rĩmwe rĩamo. . . . Nĩ ũndũ ũcio tigai gwĩtanga nĩ kĩrĩa mũkũrĩa na kĩrĩa mũkũnyua, na mũtige gwĩthĩnia mũno . . . Ithe wanyu nĩ oĩ nĩ mũbataraga maũndũ macio. . . . Caragiai Ũthamaki wake, namo maũndũ macio mangĩ mothe nĩ mũrĩongagĩrĩrũo.”​—Luka 12:​22-31; Mathayo 6:​25-33.

Hihi nĩa mangĩgacaria Ũthamaki wa Ngai? Jesu akonania atĩ nĩ gakundi kanini ka andũ ehokeku, akameta “karũũru kanini.” Thutha-inĩ nĩ kũngĩkamenyeka atĩ mũigana wao nĩ andũ 144,000. Hihi nĩ kĩĩ makaaheo? Jesu akameera na ma atĩ: “Ithe wanyu nĩ onete arĩ wega kũmũhe Ũthamaki.” Kwoguo andũ acio matingĩkerutanĩria kwĩigĩra mĩthithũ gũkũ thĩ kũrĩa aici mangĩiya. Handũ ha ũguo, mangĩkaiga ngoro ciao harĩ “mũthithũ ũrĩa ũtabuthaga kũrĩa igũrũ,” kũrĩa magaathana na Kristo.​—Luka 12:​32-34.