Ũrutani Wĩgiĩ Gũtigana Na Wendo Harĩ Twana

Jesu na arutwo ake makoima Galili, makaringa Rũĩ rwa Jorodani, magathiĩ merekeire mwena wa mũhuro matuĩkanĩirie Perea. Riita rĩa mũico rĩrĩa Jesu aarĩ Perea, nĩ aatarĩirie Afarisai mawoni ma Ngai megiĩ gũtigana. (Luka 16:18) Rĩu makoimĩria ũndũ ũcio nĩguo magerie Jesu.

Musa aandĩkire atĩ mũthuri nĩ angĩatigire mũtumia wake, angĩonire arĩ na “ũndũ wa gũconorithania ũtaagĩrĩire.” (Gũcokerithia Maathani 24:1) Andũ marĩ na mawoni matiganĩte megiĩ kĩrĩa kĩngĩtũma arĩa mahikanĩtie matigane. Amwe metĩkĩtie atĩ nginya tũũndũ tũnini no tũtũme matigane. Nĩ ũndũ ũcio Afarisai makoria: “Watho nĩ wĩtĩkĩrĩtie mũndũ atigane na mũtumia wake nĩ ũndũ wa gĩtũmi o gĩothe?”​—Mathayo 19:3.

Handũ ha kũrũmĩrĩra mawoni ma andũ, Jesu akahũthĩra ũũgĩ gũtaarĩria ũrĩa Ngai aabangĩte kĩhiko gĩkorũo kĩhaana. Akoiga: “Kaĩ mũtathomete atĩ ũrĩa wombire andũ kuuma o kĩambĩrĩria aamombire marĩ mũthuri na mũtumia? Ningĩ kaĩ mũtathomete atĩ oigire, ‘Nĩ ũndũ ũcio mũndũrũme nĩ agaatiga ithe na nyina manyitane na mũtumia wake, na acio erĩ matuĩke mwĩrĩ ũmwe’? Nĩ ũndũ ũcio ti erĩ rĩngĩ, no nĩ mwĩrĩ ũmwe. Kwoguo-rĩ, arĩa Ngai anyitithanĩtie, mũndũ ndakanamatigithanie.” (Mathayo 19:​4-6) Rĩrĩa Ngai aanyitithanirie Adamu na Hawa kĩhiko-inĩ, ndaatanyĩte matigane.

Afarisai makaregana na Jesu makoiga: “Na nĩ kĩĩ gĩagĩtũmire Musa aathane atĩ mũndũ ahe mũtumia wake marũa ma ndigano?” (Mathayo 19:7) Jesu akameera: “Musa aamwĩtĩkĩririe mũtiganage na atumia anyu nĩ ũndũ wanyu kũũmia ngoro, no ũguo tiguo kwarĩ kuuma o kĩambĩrĩria.” (Mathayo 19:8) “Kĩambĩrĩria” kĩu ti matukũ-inĩ ma Musa, no nĩ rĩrĩa Ngai aambĩrĩirie kĩhiko mũgũnda-inĩ wa Edeni.

Jesu agacoka akarutana ũndũ wa bata akoiga: “Ngũmwĩra atĩ, mũndũ o wothe angĩtigana na mũtumia wake nĩ ũndũ wa gĩtũmi kĩngĩ tiga nĩ ũndũ wa ngomanio itagĩrĩire [Kĩngiriki, por·neiʹa] na ahikie ũngĩ nĩ atharĩtie.” (Mathayo 19:9) Kwoguo kũringana na Maandĩko, ngomanio itagĩrĩire nocio tu ingĩtũma andũ matigane.

Ũndũ ũcio ũgatũma arutwo moige: “Angĩkorũo ũguo nĩguo kwagĩrĩire harĩ mũthuri na mũtumia wake-rĩ, nĩ kaba kwaga kũhikania.” (Mathayo 19:10) Hatarĩ nganja, mũndũ wothe ũreciria kũingĩra kĩhiko-inĩ agĩrĩirũo kuona kĩrĩ ũndũ wa gũtũũra!

Ũhoro-inĩ wĩgiĩ mũndũ gũkorũo atarĩ kĩhiko-inĩ, Jesu agataarĩria atĩ amwe maciaragwo matariĩ ta andũ ahakũre, matarĩ na ũhoti wa kũhingia bata wa ngomanio. Angĩ mahakũrĩtwo nĩ andũ, makaagithio ũhoti wa kũhingia bata wa ngomanio. Nao angĩ magiragĩrĩria merirĩria mao ma ngomanio. Mekaga ũguo nĩgetha mahote kwĩrutĩra biũ maũndũ-inĩ ma Ũthamaki. Jesu akeera arĩa maramũthikĩrĩria atĩrĩ: “Ũrĩa ũngĩhota gũikara atarĩ kĩhiko-inĩ, nĩ aikare ũguo.”​—Mathayo 19:12.

Andũ makambĩrĩria kũrehe twana twao kũrĩ Jesu. No arutwo ake makamakaania hihi nĩguo Jesu ndagathumbũrũo. Jesu ona ũguo akarakara akameera: “Rekei twana tũũke harĩ niĩ; mũtigatũgirie, nĩ gũkorũo Ũthamaki wa Ngai nĩ wa arĩa matariĩ ta tuo. Ngũmwĩra atĩrĩ o ma, mũndũ wothe ũtaamũkagĩra Ũthamaki wa Ngai ta kaana kanini ndakaingĩra thĩinĩ waguo.”​—Mariko 10:14, 15; Luka 18:15.

Ũcio nĩ ũndũ wa bata mũno tũreruta! Nĩguo tũkaagaya Ũthamaki wa Ngai, no mũhaka tũkorũo tũrĩ enyihia na twĩhaarĩirie kũrutwo o ta twana. Jesu rĩu akonania ũrĩa endete twana, agatuoya na agatũrathima. Na ũguo noguo endete arĩa othe ‘mamũkagĩra Ũthamaki wa Ngai ta kaana kanini.’​—Luka 18:17.