Ithomo Rĩa 18
Tuĩka Mũrata wa Ngai Tene Na Tene!
Kĩyo nĩkĩbataranagia nĩguo ũgĩe na mũrata; kĩyo nĩkĩbataranagia nĩguo ũige mũrata. Kĩyo gĩaku gĩa gũtuĩka na gũtũũra wĩ mũrata wa Ngai nĩgĩkũrathimwo mũno. Jesu eerire arĩa mamwĩtĩkĩtie ũũ: “Ũhoro wa ma nĩũkũmũkũũra ũkombo-inĩ.” (Johana 8:32) Ũguo nĩ ta kuuga atĩa?
No ũkenere gũkũũrũo ũkombo-inĩ rĩu. No ũkũũrũo ũkombo-inĩ kuuma morutani matarĩ ma ma na maheeni marĩa mahunjĩtio nĩ Shaitani. No ũkũũrũo ũkombo-inĩ wa kwaga kĩĩrĩgĩrĩro ta ũrĩa ũiyũrĩte mũtũũrĩre-inĩ wa andũ milioni nyingĩ arĩa matoĩ Jehova. (Aroma 8:22) Arata a Ngai o na nĩmakũũrĩtwo ũkombo-inĩ wa “gwĩtigĩra gĩkuũ.”—Ahibirania 2:14, 15.
No ũkenere gũkũũrũo ũkombo-inĩ thĩinĩ wa thĩ njerũ ya Ngai. Nĩ gũkũũrũo ũkombo-inĩ kwa magegania atĩa ũngĩhota gũkenera ihinda-inĩ rĩrĩa rĩũkĩte! Thĩinĩ wa thĩ ĩtuĩkĩte Paradaisi, nĩgũgakorũo na gũkũũrũo ũkombo-inĩ wa mbaara, mĩrimũ, na uuni wa watho. Gũkũũrũo ũkombo-inĩ wa ũthĩni na ngʼaragu. Gũkũũrũo ũkombo-inĩ wa ũkũrũ na gĩkuũ. Gũkũũrũo ũkombo-inĩ wa guoya, ũhinyĩrĩria, na kwaga kĩhooto. Bibilia yugaga ũũ ũhoro-inĩ ũkoniĩ Ngai: “Ũkumbatũragia guoko gwaku, kĩrĩa gĩothe kĩĩ muoyo ũgakĩhũnia kĩrĩa gĩkwenda.”—Thaburi 145:16.
Arata a Ngai magaatũũraga tene na tene. Muoyo wa tene na tene nĩ kĩheo kĩa goro mũno kĩrĩa Ngai akahee arĩa othe macaragia ũrata wake. (Aroma 6:23) Ta wĩcirie tu muoyo ũtegũthira ũngĩkorũo na gĩtũmi kĩrĩkũ harĩ we!
Nĩ ũgaakorũo na mahinda ma gwĩka maũndũ maingĩ. Hihi no gũkorũo no wende kwĩruta kũhũthĩra kĩndũ gĩa kũina nyĩmbo. Kana hihi ũngĩenda kwĩruta gũcora mbica kana kwĩruta ũtheremara. Kana hihi ũngĩenda kwĩruta ũhoro wa nyamũ kana mĩmera. Rĩngĩ hihi ũngĩenda gũthiĩ thabarĩ ũkone mabũrũri na andũ mwanya mwanya. Wĩ na muoyo wa tene na tene, maũndũ macio mothe nĩmakahoteka!
Nĩ ũgakorũo na mahinda ma gũthondeka ũrata na andũ aingĩ. Gũtũũra muoyo tene na tene nĩgũgaakũhotithia kũmenya andũ angĩ aingĩ arĩa matuĩkĩte arata a Ngai. Nĩũkamenya ũhoti wao mwanya mwanya na ngumo ciao njega, na o nao nĩmagaatuĩka arata aku. Nĩũkaamenda, nao nĩmagaakwenda. (1 Akorintho 13:8) Wĩ na muoyo ũtegũthira nĩũgaakorũo na mahinda ma gũtuĩka mũrata wa mũndũ o wothe wĩ thĩinĩ wa thĩ! Na wega makĩria-rĩ, ũrata waku na Jehova ũgathiĩ na mbere na kũgĩa na hinya o ta ũrĩa magana ma mĩaka marahĩtũka. Ũrogĩtuĩka mũrata wa Ngai tene na tene!