ITHOMO RĨA 17

Jesu Atariĩ Atĩa?

Rĩrĩa Icabe

Rĩrĩa tweruta ũhoro wĩgiĩ maũndũ marĩa Jesu ooigire na marĩa eekire arĩ gũkũ thĩ, nĩ tũmenyaga ngumo ciake iria itũgucagĩrĩria kũrĩ we na kũrĩ Ithe, Jehova. Hihi ngumo imwe ciake nĩ ta irĩkũ? Na tũngĩĩgerekania na Jesu atĩa ũtũũro-inĩ witũ?

1. Jesu atariĩ ta Ithe na njĩra irĩkũ?

Jesu akoretwo igũrũ mĩaka bilioni nyingĩ, na nĩ eyoneire Ithe agĩka maũndũ na akeruta kuuma kũrĩ we. Nĩ ũndũ ũcio, nĩ ahaanaine na Ithe harĩ ũrĩa eciragia, ũrĩa onaga maũndũ, na ũrĩa ekaga maũndũ. (Thoma Johana 5:19.) Jesu egerekanagia na Ithe biũ. Nĩkĩo ooigire: “Mũndũ o wothe ũnyonete nĩ onete Awa o nake.” (Johana 14:9) Weruta ũhoro wĩgiĩ ũrĩa Jesu atariĩ, nĩ ũkũmenya Jehova wega makĩria. Kwa ngerekano, ũcayanĩri ũrĩa Jesu aarĩ naguo kwerekera andũ nĩ wonanagia ũrĩa Jehova akũrũmbũyagia.

2. Jesu onanĩtie atĩa atĩ nĩ endete Jehova?

Jesu ooigire ũũ: “Nĩguo thĩ ĩmenye atĩ nĩ nyendete Awa, ndĩreka o ũrĩa Awa anjathĩte njĩke.” (Johana 14:31) Rĩrĩa Jesu aarĩ gũkũ thĩ, nĩ oonanirie wendo wake mũnene harĩ Ithe na njĩra ya kũmwathĩkĩra nginya rĩrĩa warĩ ũndũ mũritũ gwĩka ũguo. Ningĩ Jesu nĩ eendete kũheana ũhoro wĩgiĩ Ithe, na gũteithia andũ arĩa angĩ gũkũria ũrata hamwe na Ithe.—Johana 14:23.

3. Jesu onanĩtie atĩa atĩ nĩ endete andũ?

Bibilia yugaga atĩ Jesu nĩ “[akenagio] mũno nĩ andũ.” (Thimo 8:31, kohoro ka magũrũ-inĩ) Oonanirie wendo ũcio na njĩra ya gwĩkĩra andũ ngoro na kũmateithia atarĩ na mwĩyendo. Ciama iria aaringaga itioonanagia o hinya wake no nĩ nginya ũcayanĩri wake. (Mariko 1:40-42) Aarũmbũyagia andũ na tha atarĩ na mũthutũkanio. Ciugo ciake nĩ cioomagĩrĩria andũ othe a ngoro njega arĩa maamũthikagĩrĩria na ikamahe kĩĩrĩgĩrĩro. Jesu nĩ eehaarĩirie kũnyamarĩka na gũkua nĩ ũndũ wa wendo wake harĩ andũ othe. No makĩria nĩ endete andũ arĩa marũmagĩrĩra morutani make.—Thoma Johana 15:13, 14.

THUTHURIA MAKĨRIA

Reke twĩrute makĩria ũhoro wĩgiĩ ũrĩa Jesu atariĩ. Na tuone ũrĩa tũngĩĩgerekania nake harĩ kuonania wendo na ũtaana.

4. Jesu nĩ endete Ithe

Kĩonereria kĩa Jesu nĩ gĩtũrutaga ũrĩa tũngĩonania atĩ nĩ twendete Ngai. Thomai Luka 6:12 na Johana 15:10; 17:26. Arĩrĩriai kĩũria gĩkĩ thutha wa gũthoma o rĩandĩko:

Tũngĩĩgerekania atĩa na ũrĩa Jesu endete Jehova?

Jesu akĩhoya. — Jesu nĩ eendete Ithe Jehova, na nĩ aaragia nake kaingĩ kũgerera mahoya

5. Jesu nĩ arũmbũyagia andũ arĩa marabatara ũteithio

Jesu aaigaga mabataro ma andũ arĩa angĩ mbere ya make. Aahũthagĩra mahinda make na hinya wake gũteithia andũ, o na angĩakorirũo arĩ mũnogu. Thomai Mariko 6:30-44, mũcoke mwarĩrĩrie ciũria ici:

Kũringana na rũgano rũu-rĩ, Jesu oonanirie atĩ nĩ aarũmbũyagia andũ na njĩra ta irĩkũ?—Rora mũhari wa 31, 34, 41, na 42.
Nĩ kĩĩ gĩatindĩkaga Jesu gũteithia andũ?—Rora mũhari wa 34.
Tondũ Jesu eegerekanagia na Jehova-rĩ, maũndũ macio mothe marakũruta atĩa igũrũ rĩgiĩ Jehova?
Tũngĩĩgerekania na Jesu na njĩra ta irĩkũ harĩ kũrũmbũiya andũ?

Jesu akĩhũthĩra mĩgate ĩtano na tũthamaki twĩrĩ tũnini kũhũnia andũ ngiri nyingĩ na njĩra ya kĩama. Nao arutwo ake makagaĩra arũme, atumia, na ciana irio icio.

6. Jesu nĩ mũtaana

Jesu aarĩ mũtaana o na gũtuĩka ndaarĩ na indo nyingĩ, na nĩ aatwĩkĩrire ngoro tũkoragwo tũrĩ ataana. Thomai Atũmwo 20:35, mũcoke mwarĩrĩrie kĩũria gĩkĩ:

Kũringana na Jesu-rĩ, nĩ kĩĩ kĩngĩtũteithia kũgĩa na gĩkeno?

Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: “Kũheana nĩ Kũrĩ Gĩkeno Kĩnene”—Gacunjĩ ka Video (4:00)

Tũngĩonania ũtaana na njĩra ta irĩkũ o na angĩkorũo tũtirĩ na indo nyingĩ?

Hihi nĩ ũĩ?

Bibilia ĩtũrutaga atĩ twagĩrĩirũo kũhoya Jehova kũgerera harĩ rĩĩtwa rĩa Jesu. (Thoma Johana 16:23, 24.) Rĩrĩa twahoya na njĩra ĩyo, tuonanagia ngatho nĩ ũndũ wa maũndũ marĩa Jesu ekĩte nĩguo atũteithie gũtuĩka arata a Jehova.

ANDŨ AMWE MOIGAGA: “Mathĩna makoragwo marĩ magerio kuuma kũrĩ Ngai.”