Ndũmĩrĩri ĩrĩa ya bata makĩria thĩinĩ wa Bibilia ĩkoragwo ĩhutanĩtie na Ũthamaki wa Ngai. Jehova akaahũthĩra Ũthamaki ũcio kũhingia muoroto ũrĩa aarĩ naguo kĩambĩrĩria-inĩ wa gũtua thĩ ĩno Paradiso. Ũthamaki ũcio nĩ kĩĩ? Tũmenyaga atĩa atĩ nĩ ũrathana ihinda-inĩ rĩrĩ? Nĩ maũndũ marĩkũ ũhingĩtie? Na nĩ maũndũ marĩkũ ũkaahingia ihinda-inĩ rĩũkĩte? Ciũria icio nĩ igũcokio ithomo-inĩ rĩrĩ na mathomo-inĩ merĩ marĩa marũmĩrĩire.

1. Ũthamaki wa Ngai nĩ kĩĩ, na Mũthamaki waguo nũũ?

Ũthamaki ũcio nĩ thirikari ĩhandĩtwo nĩ Jehova Ngai. Mũthamaki waguo nĩ Jesu Kristo, na athanaga arĩ igũrũ. (Mathayo 4:17; Johana 18:36) Bibilia yugaga ũũ ũhoro-inĩ wĩgiĩ Jesu: ‘Agaathana arĩ Mũthamaki tene na tene.’ (Luka 1:32, 33) Jesu arĩ Mũthamaki wa Ũthamaki wa Ngai, agaathaga andũ othe gũkũ thĩ.

2. Nĩa magaathana hamwe na Jesu?

Jesu ndagaathana arĩ wiki. “Andũ kuuma mĩhĩrĩga-inĩ yothe na thiomi na ikundi cia andũ na ndũrĩrĩ” nĩ magaathana “marĩ athamaki igũrũ rĩa thĩ.” (Kũguũrĩrio 5:9, 10) Nĩ andũ aigana magaathana hamwe na Kristo? Kuuma hĩndĩ ĩrĩa Jesu aarĩ gũkũ thĩ, Akristiano milioni nyingĩ nĩ matuĩkĩte arũmĩrĩri ake. O na kũrĩ ũguo, no andũ 144,000 magaathiĩ igũrũ nĩguo magaathane hamwe na Jesu. (Thoma Kũguũrĩrio 14:1-4.) Akristiano acio angĩ othe magaatuĩka raia a Ũthamaki ũcio gũkũ thĩ.—Thaburi 37:29.

3. Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari cia andũ?

O na rĩrĩa atongoria a gũkũ thĩ marerutanĩria gwĩka maũndũ mega, matikoragwo na hinya wa gwĩka maũndũ marĩa mothe mangĩenda. Na atongoria arĩa macokaga ithenya rĩao no makorũo marĩ na mwĩyendo na matekwenda gũteithia andũ. No gũtirĩ mũndũ ũngĩ ũgaacoka ithenya rĩa Jesu, Mũtongoria wa Ũthamaki wa Ngai. Ngai nĩ “[ahandĩte] ũthamaki ũrĩa gũtarĩ hĩndĩ ũkaanangwo.” (Danieli 2:44) Jesu agaathana igũrũ rĩa thĩ yothe, na ndagaakoragwo na mũthutũkanio. We nĩ arĩ wendo, nĩ mũtugi, nĩ arũmagĩrĩra kĩhooto, na nĩ akaaruta andũ kũrũmbũyania na njĩra o ta ĩyo ya wendo, ũtugi, na kĩhooto.—Thoma Isaia 11:9.

4. Thirikari ĩrĩ hinya nĩ ĩgaathana thĩinĩ wa thĩ yothe

Jesu Kristo arĩ na hinya mũnene wa gwathana gũkĩra mũtongoria ũngĩ o wothe ũrĩ wathana. Thomai Mathayo 28:18, mũcoke mwarĩrĩrie kĩũria gĩkĩ:

• Nĩ na njĩra ĩrĩkũ wathani wa Jesu ũrĩ mũnene gũkĩra wa mũtongoria ũngĩ o wothe wa gũkũ thĩ?

Thirikari cia andũ ti cia gũtũũra, na o ĩmwe yacio yathanaga thĩinĩ wa gacunjĩ kanini ga thĩ. Ĩ naguo Ũthamaki wa Ngai? Thomai Danieli 7:14, mũcoke mwarĩrĩrie ciũria ici:

• Nĩkĩ nĩ ũndũ mwega atĩ Ũthamaki wa Ngai “ndũkaaniinwo”?

• Nĩkĩ nĩ ũndũ mwega atĩ ũgaathana thĩinĩ wa thĩ yothe?

5. Thirikari cia andũ ciagĩrĩire kweherio

Ũthamaki wa Ngai ũkeeheria thirikari cia andũ na wathane ithenya rĩacio nĩkĩ? Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Ũthamaki wa Ngai nĩ Kĩĩ?—Gacunjĩ ka Video (1:41)

• Nĩ mathĩna marĩkũ marehetwo nĩ wathani wa andũ?

Thomai Kohelethu 8:9, mũcoke mwarĩrĩrie ciũria ici:

• Hihi nĩ ũkuona ta Ũthamaki wa Ngai wagĩrĩire kweheria thirikari cia andũ na wathane ithenya rĩacio? Ũngiuga ũguo nĩkĩ?

6. Ũthamaki wa Ngai ũrĩ na aathani mataũkagĩrũo nĩ ithuĩ

Tondũ Mũthamaki witũ, Jesu, anatũũra gũkũ thĩ arĩ mũndũ, no ahote “gũtũiguĩra tha maũndũ-inĩ marĩa twagĩte hinya.” (Ahibirania 4:15) Arũme na atumia ehokeku 144,000 arĩa magaathana hamwe na Jesu mathuurĩtwo nĩ Jehova “kuuma mĩhĩrĩga-inĩ yothe na thiomi na ikundi cia andũ na ndũrĩrĩ.”—Kũguũrĩrio 5:9.

• Hihi nĩ ũrona arĩ ũndũ mwega gũkorũo atĩ Jesu na arĩa othe magaathana nake nĩ moĩ ũrĩa ũtũũro wa andũ gũkũ thĩ ũkoragwo ũhaana? Ũngiuga ũguo nĩkĩ?

7. Ũthamaki wa Ngai ũkoragwo na mawatho mega makĩria

Thirikari ithondekaga mawatho irĩ na muoroto wa gũteithia na kũgitĩra raia a cio. O na Ũthamaki wa Ngai nĩ ũkoragwo na mawatho marĩa raia aguo magĩrĩirũo kũrũmĩrĩra. Thomai 1 Akorintho 6:9-11, mũcoke mwarĩrĩrie ciũria ici:

• Ũgwĩciria thĩ ĩgaakorũo ĩhaana atĩa rĩrĩa andũ othe magaakorũo magĩathĩkĩra mawatho ma Ngai megiĩ mĩtugo?a

• Nĩ ũkuona ta Jehova arĩ na kĩhooto gĩa kwĩrĩgĩrĩra raia a Ũthamaki ũcio marũmĩrĩre mawatho macio? Ũngiuga ũguo nĩkĩ?

• Nĩ kĩĩ kĩronania atĩ andũ arĩa matathĩkagĩra mawatho macio no magarũrũke?—Rora mũhari wa 11.

ŨRĨA TWERUTA

Ũthamaki wa Ngai nĩ thirikari ya biũ ĩkoragwo igũrũ na ĩgaathana thĩinĩ wa thĩ yothe.

Ciũria cia gũcokera

• Nĩa magaathana thĩinĩ wa Ũthamaki wa Ngai?

• Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari o yothe ya andũ?

• Jehova erĩgagĩrĩra raia a Ũthamaki wake meke atĩa?

RIKĨRA

Thoma wone ũrĩa Jesu aarutanire igũrũ rĩgiĩ kũrĩa Ũthamaki ũcio ũkoragwo.

“Hihi Ũthamaki wa Ngai Ũrĩ Ngoro-inĩ ya Mũndũ?” (Gĩcunjĩ thĩinĩ wa jw.org/ki)

Nĩ kĩĩ gĩtũmaga Aira a Jehova mone atĩ gũkorũo marĩ ehokeku harĩ Ũthamaki wa Ngai nĩ kwa bata makĩria gũkĩra gũkorũo marĩ ehokeku harĩ thirikari cia andũ?

Kũnyita Mbaru Ũthamaki wa Ngai (1:43)

Thuthuria wone ũrĩa Bibilia ĩrutanaga igũrũ rĩgiĩ arĩa 144,000 Jehova athuurĩte nĩguo magaathana hamwe na Jesu.

“Nĩ a Mathiaga Igũrũ?” (Gĩcunjĩ thĩinĩ wa jw.org/ki)

Nĩ kĩĩ gĩateithirie mũtumia ũmwe warĩ njera gũkorũo na ma atĩ no Ngai tu ũngĩrehe kĩhooto thĩinĩ wa thĩ?

“Ũrĩa Ndamenyire Kĩhonia kĩa Wagi wa Kĩhooto” (g 11/11)

Jesu ooigire atĩ arũmĩrĩri ake “[ti] a thĩ ĩno.” (Johana 15:19) Gũkorũo tũtarĩ a thĩ ĩno nĩ hamwe na kwaga kũnyita mbaru mwena o wothe wa gĩũteti na mbaara. Kwaria ma, ti ũndũ mũhũthũ hingo ciothe kwaga kũnyita mbaru mwena o wothe. Rĩmwe andũ no matũnyũrũrie. Nĩ kĩĩ kĩngĩtũteithia gũikara tũtekũnyita mbaru mwena o wothe nĩguo tũtũũrie wĩhokeku witũ harĩ Jehova Ngai?

1. Akristiano a ma monaga thirikari cia andũ atĩa?

Akristiano nĩ matĩĩte thirikari. Twĩkaga ũrĩa Jesu ooigire, “[tũkarĩha] Kaisari indo cia Kaisari,” na njĩra ya gwathĩkĩra mawatho ma bũrũri, ta mawatho megiĩ kũrĩha magooti. (Mariko 12:17) Bibilia ĩrutanaga atĩ thirikari cia andũ ciathanaga o tondũ tu Jehova nĩ aciĩtĩkĩrĩtie gwathana. (Aroma 13:1) Kwoguo nĩ tũtaũkagĩrũo atĩ thirikari cia andũ ikoragwo na wathani mũnini ũringithanĩtio na wa Ngai. Tũkoragwo twĩhokete atĩ Ngai witũ nĩwe ũrĩniinĩra andũ mathĩna kũgerera Ũthamaki wake wa igũrũ.

2. Tũngĩonania atĩa atĩ tũtinyitaga mbaru mwena o wothe?

O ta Jesu, ithuĩ tũtiĩingĩragia maũndũ-inĩ ma ũteti. Rĩrĩa andũ maageririe gũtua Jesu mũthamaki gũkũ thĩ thutha wake kũringa kĩama, ndetĩkĩrire. (Johana 6:15) Aaregire nĩkĩ? Tondũ thutha-inĩ ooigire ũũ: “Ũthamaki wakwa ti wa thĩ ĩno.” (Johana 18:36) Tondũ tũrĩ arũmĩrĩri a Jesu, tuonanagia na njĩra itiganĩte atĩ tũtinyitaga mbaru mwena o wothe. Kwa ngerekano, tũtiĩingĩragia mbaara-inĩ. (Thoma Mika 4:3.) Nĩ tũtĩĩte marũũri ma bũrũri, ta bendera, no tũtimathathayagia. (1 Johana 5:21) Ningĩ tũtinyitaga mbaru kana tũkaregana na kĩama o gĩothe kĩa ũteti kana mũteti. Kũgerera njĩra icio na ingĩ, nĩ tuonanagia atĩ tũkoragwo tũrĩ ehokeku biũ harĩ thirikari ya Ngai—Ũthamaki wake.

THUTHURIA MAKĨRIA

3. Akristiano a ma matinyitaga mbaru mwena o wothe

Jesu na arũmĩrĩri ake nĩ maatũigĩire kĩonereria gĩa kũrũmĩrĩra. Thomai Aroma 13:1, 5-7 na 1 Petero 2:13, 14, mũcoke mwĩrorere VIDEO ĩno na mwarĩrĩrie ciũria iria irũmĩrĩire.

VIDEO: Akristiano Matinyitaga Mbaru Mwena o na Ũmwe—Gĩcunjĩ kĩa 1 (4:28)

• Twagĩrĩirũo gũtĩa thirikari cia andũ nĩkĩ?

• Nĩ njĩra ta irĩkũ tũngĩonania nacio atĩ nĩ tũciathĩkagĩra?

Hĩndĩ ĩrĩa kũrĩ na mbaara, mabũrũri mamwe no moige atĩ matiranyita mbaru mwena o wothe, no magateithĩrĩria mĩena yerĩ ĩrĩa ĩrarũa. No hihi kwaga kũnyita mbaru mwena o wothe nĩ kuuga atĩa? Thomai Johana 17:16, mũcoke mwĩrorere VIDEO ĩno, na mwarĩrĩrie kĩũria kĩrĩa kĩrũmĩrĩire.

VIDEO: Akristiano Matinyitaga Mbaru Mwena o na Ũmwe—Gĩcunjĩ gĩa 2 (3:11)

• Kwaga kũnyita mbaru mwena o wothe nĩ kuuga atĩa?

Ĩ angĩkorũo thirikari iratwĩra twĩke ũndũ ũraregana na watho wa Ngai? Thomai Atũmwo 5:28, 29, mũcoke mwĩrorere VIDEO ĩno, na mwarĩrĩrie ciũria iria irũmĩrĩire.

VIDEO: Akristiano Matinyitaga Mbaru Mwena o na Ũmwe—Gĩcunjĩ gĩa 3 (1:18)

• Watho wa andũ ũngĩregana na watho wa Ngai-rĩ, twagĩrĩirũo gwathĩkĩra watho wa ũ?

• Nĩ maũndũ-inĩ ta marĩkũ Akristiano mangĩaga gwathĩkĩra thirikari?

4. Wĩtheme kũnyita mbaru mwena o wothe meciria-inĩ maku kana kũgerera ciĩko

Thomai 1 Johana 5:21, mũcoke mwĩrorere VIDEO ĩno, na mwarĩrĩrie ciũria iria irũmĩrĩire.

VIDEO: Akristiano a ma nĩ Mabataraga Ũmĩrĩru—Nĩguo Maikare Matekũnyita Mbaru Maũndũ ma Thĩ Ĩno (2:49)

• Kũringana na video ĩyo-rĩ, nĩ kĩĩ gĩatũmire Ayenge atue itua rĩa kwaga kũingĩra kĩama-inĩ kĩa ũteti kana kũnyitanĩra maũndũ-inĩ ma kĩĩbũrũri, ta kũhũũrĩra bendera tharuti?

• Nĩ ũkuona ta aatuire itua rĩa ũũgĩ?

Nĩ maũndũ ta marĩkũ mangĩ mangĩgeria itua ritũ rĩa kwaga kũnyita mbaru mwena o wothe? Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

VIDEO: Maũndũ ma Kwĩruta Kuuma Mũrangĩri-inĩ—Ndũkananyite Mbaru Maũndũ ma Ũteti Thĩinĩ wa Thĩ Ĩno Ĩgayũkanĩte (5:16)

• Tũngĩka atĩa nĩguo tũikare tũtekũnyita mbaru mwena o wothe maũndũ-inĩ ma mathaako ma kĩĩmabũrũri?

• Tũngĩka atĩa nĩguo tũikare tũtekũnyita mbaru mwena o wothe nginya rĩrĩa ithuĩ ene tũrahutio nĩ matua ma ateti?

• Nyũmba cia mohoro na andũ arĩa tũnyitanagĩra nao mangĩhutia atĩa itua ritũ rĩa kwaga kũnyita mbaru mwena o wothe?

ŨRĨA TWERUTA

Akristiano merutanagĩria kwaga kũnyita mbaru mwena o wothe wa ũteti meciria-inĩ mao na kũgerera ciugo na ciĩko ciao.

Ciũria cia gũcokera

• Twagĩrĩirũo gũkorũo na mawoni marĩkũ kwerekera thirikari cia andũ?

• Twagaga kũnyita mbaru mwena o wothe wa ũteti nĩkĩ?

• Nĩ maũndũ ta marĩkũ mangĩgeria itua ritũ rĩa kwaga kũnyita mbaru mwena o wothe?

RIKĨRA

Nĩ maũndũ ta marĩkũ tũngĩbatara kwĩima nĩguo tũikare tũtekũnyita mbaru mwena o wothe?

Jehova Ndarĩ Atũtiganĩria (3:14)

Famĩlĩ ingĩĩhaarĩria atĩa kabere nĩ ũndũ wa maũndũ marĩa mangĩgeria itua rĩao rĩa kwaga kũnyita mbaru mwena o wothe?

Kwaga Kũnyita Mbaru Mwena o Wothe Mambura-inĩ (4:25)

Nĩ kĩĩ kĩngĩtũma tuuge atĩ kũrũĩrĩra bũrũri tikĩo gĩtĩo kĩrĩa kĩnene mũndũ angĩgĩa nakĩo?

“Maũndũ Mothe No Mahoteke Harĩ Ngai” (5:19)

Thoma wone ũrĩa ũngĩtua matua megiĩ wĩra na njĩra ĩngĩgũteithia gũikara ũtarĩ wa thĩ ĩno.

“O Mũndũ Arĩkuuaga Mũrigo Wake Mwene” (w06 03/15)