Hihi nĩ Wĩtĩkagĩra Gũtongorio nĩ Roho wa Ngai?
“Reke roho waku mwega ũndongoragie, ngagera bũrũri mwaraganu.”—THAB. 143:10.
1, 2. (a) Gweta mahinda mamwe marĩa Jehova aahũthĩrire roho wake mũtheru gũteithia ndungata ciake. (b) Hihi roho mũtheru ũrutaga wĩra o mahinda ma mwanya tu? Taarĩria.
HIHI nĩ ũndũ ũrĩkũ ũkaga meciria-inĩ maku rĩrĩa weciria ũrĩa roho mũtheru ũrutaga wĩra? Hihi wĩciragia ũhoro wa ciĩko cia hinya iria ciekirũo nĩ Gideoni na Samsoni? (Atiir. 6:33, 34; 15:14, 15) Kwahoteka nĩ wĩciragia ũhoro wa ũcamba wa Akristiano a tene, kana thayũ ũrĩa Stefano aarĩ naguo arũgamĩte mbere ya kĩama gĩa Sanhedrini. (Atũm. 4:31; 6:15) Ĩ nakĩo gĩkeno kĩrĩa tũkoragwo nakĩo mahinda-inĩ maya, hĩndĩ ya irũrũngano cia kĩmabũrũri, wĩkindĩru wa aarĩ na ariũ a Ithe witũ arĩa marĩ njera nĩ ũndũ wa kwaga kwĩingĩria maũndũ-inĩ ma gĩũteti, na wongerereku mũnene ũrĩa uumanĩte na wĩra wa kũhunjia? Maũndũ macio mothe monanagia ũrĩa roho mũtheru ũrutaga wĩra.
2 Hihi roho mũtheru ũrutaga wĩra o mahinda kana maũndũ-inĩ ma mwanya? Aca. Kiugo kĩa Ngai kĩaragia ũhoro wa Akristiano ‘magĩthiĩ kũringana na roho,’ ‘magĩtongorio nĩ roho,’ na ‘magĩtũũra kũringana na roho.’ (Gal. 5:16, 18, 25, NW) Ciugo icio ironania roho mũtheru no ũtũtongorie mũtũũrĩre-inĩ witũ hĩndĩ ciothe. Twagĩrĩirũo gũthaitha Jehova o mũthenya, atongoragie mwĩcirĩrie witũ, mĩario na ciĩko ciitũ kũgerera roho wake. (Thoma Thaburi 143:10.) Twetĩkĩra roho ũcio ũrute wĩra ũtũũro-inĩ witũ, nĩ ũrĩkũragia thĩinĩ witũ maciaro marĩcanjamũraga andũ na makagoocithia Ngai.
3. (a) Tũrabatara gũtongorio nĩ roho mũtheru nĩkĩ? (b) Nĩ ciũria irĩkũ tũkwarĩrĩria?
3 Harĩ bata nĩkĩ wa gũtongoragio nĩ roho mũtheru? Nĩ tondũ nĩ harĩ hinya ũngĩ wendaga gũtũatha, hinya ũrĩa ũreganaga na ũtongoria wa roho mũtheru. Hinya ũcio ũngĩ nĩguo Maandĩko moigaga nĩ wa “mwĩrĩ,” ũrĩa arĩ guo mwerekera wa mwĩrĩ witũ wa mehia ũrĩa uumanĩte na kwaga gũkinyanĩra kũrĩa tũgaĩte kuuma kũrĩ Adamu. (Thoma Agalatia 5:17.) Kwoguo-rĩ, nĩguo twĩtĩkĩrie roho wa Ngai ũtũtongorie tũrabatara gwĩka atĩa? Hihi nĩ kũrĩ makinya mega tũngĩoya tũhũrane na ũgucania wa mwĩrĩ witũ wa mehia? Rekei twĩcirie ũhoro wa ciũria icio tũkĩarĩrĩria ‘maciaro mangĩ ma roho’ ta, ‘gũkirĩrĩria, gũtugana, gwĩkana wega, kwĩhokeka, kũhoorera, na kwĩgirĩrĩria.’—Gal. 5:22, 23.
Kũhoorera na Gũkirĩrĩria Kũrehaga Thayũ Kĩũngano-inĩ
4. Kũhoorera na gũkirĩrĩria gũtũmaga kĩũngano kĩgĩe na thayũ na njĩra ĩrĩkũ?
4 Thoma Akolosai 3:12, 13. Kũhoorera na gũkirĩrĩria itwaranaga hamwe nĩguo kũgĩe na thayũ thĩinĩ wa kĩũngano. Maciaro macio merĩ ma roho matũteithagia gwĩka andũ wega, kwaga kũrakara rĩrĩa twatuurio, na gwĩthema kwĩrĩhĩria rĩrĩa andũ maaria kana matwĩka maũndũ matarĩ mega. Rĩrĩa twahĩtania na mũrũ kana mwarĩ wa Ithe witũ, gũkirĩrĩria, nĩ gũtũteithagia tũtigakue ngoro, na handũ-inĩ ha ũguo tũgeka o ũrĩa wothe tũngĩhota gũcokia thayũ. Hihi kũhoorera na gũkirĩrĩria nĩ kũrabatarania kĩũngano-inĩ? Ĩĩ, nĩ kũrabatarania tondũ ithuothe tũtirĩ akinyanĩru.
5. Nĩ ũndũ ũrĩkũ wekĩkire gatagatĩ ka Paulo na Baranaba, na ũndũ ũcio ũronania atĩa?
5 Ta wĩcirie ũndũ ũrĩa wekĩkire gatagatĩ ka Paulo na Baranaba. Maakoretwo makĩrutithania wĩra wa kũhunjia ũhoro mwega mĩaka mĩingĩ. O erĩ gũtirĩ ũtaarĩ na ngumo njega. O na kũrĩ ũguo, hĩndĩ ĩmwe, ‘nĩ maakararanirie mũno o nginya makĩamũkana.’ (Atũm. 15:36-39) Ũndũ ũcio ũronania atĩ o na ndungata cia Ngai iria imwĩyamũrĩire, rĩmwe na rĩmwe nĩ ihĩtanagia. Hangĩgĩa ũndũ ũngĩtũma Mũkristiano age kũiguithania na ũrĩa ũngĩ-rĩ, angĩka atĩa nĩguo matigacokanĩrie na njĩra ĩngĩrehe nyamũkano gatagatĩ kao?
6, 7. (a) Nĩ ũtaaro ũrĩkũ wa Kĩĩmandĩko tũngĩrũmĩrĩra gũtanagĩa mburugano gatagatĩ-inĩ gaitũ na Mũkristiano ũngĩ? (b) Mũndũ angĩgunĩka atĩa ‘angĩhiũhaga gũthikĩrĩria, no akaga kũhĩka kwaria kana kũrakara?’
6 Ciugo ‘gũkararania mũno,’ ironania atĩ ngarari gatagatĩ ka Paulo na Baranaba ciarĩ nene na ciambĩrĩirie oro rĩmwe. Mũkristiano angĩigua nĩ arambĩrĩria kũrakara makĩarĩrĩria ũndũ mũna na Mũkristiano ũngĩ-rĩ, no ũkorũo ũrĩ ũndũ wa ũũgĩ kũrũmĩrĩra ũtaaro ũyũ ũrĩ thĩinĩ wa Jakubu 1:19, 20: “Ĩndĩ mũndũ o wothe nĩahiũhage gũthikĩrĩria, no ndakahĩke kwaria kana kũrakara; nĩ gũkorũo kũrakara kwa mũndũ gũtiĩkithagia maũndũ ma ũthingu wa Ngai.” Kũringana na ũrĩa angĩona gũtariĩ-rĩ, Mũkristiano ũcio no agerie gũcenjia ũhoro ũcio mararĩrĩria, kũũiga mũhohio, kana kwehera gũtanagĩa mburugano.—Thim. 12:16; 17:14; 29:11.
7 Tũngĩgunĩka atĩa nĩ kũrũmĩrĩra ũtaaro ũcio? Rĩrĩa Mũkristiano eterera ahorere, ahoya igũrũ rĩa ũndũ ũcio na acoka eciria ũrĩa angĩcokia ũrĩa kwagĩrĩire-rĩ, na njĩra ĩyo akoragwo agĩtĩkĩria roho wa Ngai ũmũtongorie. (Thim. 15:1, 28) Nĩ ũndũ wa gũtongorio nĩ roho mũtheru, Mũkristiano ũcio no ahote kũhoorera na gũkirĩrĩria. Na kwoguo, ahote kũrũmĩrĩra ũtaaro ũyũ ũrĩ thĩinĩ wa Aefeso 4:26, 29: “Mwarakara-rĩ, wĩmenyagĩrĩrei mũtikanehie; . . . Tigagai kwaria ciugo njũru na tũnua twanyu; kaba mwaragie ciugo iria ciagĩrĩire cia kũguna andũ hĩndĩ ĩrĩa mabataire, nĩguo itũme arĩa maciiguaga magĩage na Wega wa Ngai.” Hatirĩ nganja, tũngĩĩhumba ũhoreri na ũkirĩrĩria nĩ tũrĩtũmaga kũgĩe thayũ na ũrũmwe thĩinĩ wa kĩũngano.
Canjamũra Famĩlĩ Yaku na Njĩra ya Gũkorũo wĩ Mũtugi na Kũmeka Wega
8, 9. Gũtugana na gwĩkana wega nĩ kĩĩ, na ikoragwo na moimĩrĩro marĩkũ harĩ mũikaranĩrie wa famĩlĩ?
8 Thoma Aefeso 4:31, 32; 5:8, 9. Gũtugana na gwĩkana wega gũcanjamũraga ta karũhuho kahehu kana tũĩ tũhehu hĩndĩ ya riũa ihiũ. Ngumo icio itũmaga mũikaranĩrie thĩinĩ wa famĩlĩ ũkorũo wĩ mwega. Ũtugi nĩ ngumo njega yumanaga na kwenda andũ hatarĩ na ũhinga, kũrĩa kuonanagio kũgerera ciĩko cia gũteithia na ciugo njega. O ta ũtugi, gwĩka andũ wega nĩ ngumo njega yonanagio na ciĩko cia kũguna andũ na nĩ ĩkoragwo na roho wa ũtana. (Atũm. 9:36, 39; 16:14, 15) No gwĩkana wega nĩ makĩria ma ũguo.
9 Gwĩkana wega nĩ gwĩka wega biũ. Gũtionanagio tu na maũndũ marĩa twĩkaga, no makĩria nĩ ũrĩa tũtariĩ. Ta hũra mbica, mũtumia akĩharĩrĩria famĩlĩ yake itunda, akarĩtinangia akĩroraga o gacunjĩ agatigĩrĩra atĩ itunda rĩu rĩothe nĩ rĩru biũ na rĩtirĩ na wathe o na hanini. Wega ũrĩa uumanaga na roho mũtheru o naguo ũkoragwo ũhutĩtie mũtũũrĩre wothe wa Mũkristiano.
10. Nĩ ũndũ ũrĩkũ ũngĩkwo nĩguo andũ thĩinĩ wa famĩlĩ makũrie maciaro ma roho?
10 Nĩ ũndũ ũrĩkũ ũngĩteithia andũ thĩinĩ wa famĩlĩ ya Gĩkristiano gũtuganaga na gwĩkanaga wega? Kũgĩa na ũmenyo wa Kiugo kĩa Ngai no kũmateithie mũno. (Kol. 3:9, 10) Famĩlĩ imwe nĩ ibangagĩra kwĩruta ũhoro wa maciaro ma roho hĩndĩ ya hwaĩ-inĩ wa Ũthathaiya wa Famĩlĩ. Ti ũndũ mũritũ kũbanga gwĩka ũguo. Mũkĩhũthĩra indo cia ũthuthuria iria cingĩoneka na rũthiomi rwanyu, cariai ũhoro wĩgiĩ gĩcunjĩ kĩmwe kĩa maciaro ma roho. No mũhũthĩre ciumia cigana ũna kwarĩrĩria gĩcunjĩ kĩmwe kĩa maciaro ma roho mũkaragĩrĩria ibungo cigana ũna o kiumia ciĩgiĩ gĩcunjĩ kĩu. Rĩrĩa mũreruta ũhoro ũcio, thomai na mwarĩrĩrie maandĩko marĩa monanĩtio. Cariai ũrĩa mũngĩhũthĩra maũndũ macio mũreruta, na mũhoe Jehova arathime kĩyo kĩanyu. (1 Tim. 4:15; 1 Joh. 5:14, 15) Hihi wĩruti ũcio no wagĩrie mũikaranĩrie wa andũ thĩinĩ wa famĩlĩ?
11, 12. Athuri erĩ na atumia ao Akristiano maagunĩkire atĩa nĩ kwĩruta igũrũ rĩa ngumo ya ũtugi?
11 Makĩenda kũgaacĩrithia kĩhiko kĩao-rĩ, mwanake ũmwe na mũirĩtu rĩrĩa maahikanirie nĩ moonire arĩ wega kwĩruta na njĩra ndikĩru igũrũ rĩa maciaro ma roho. Hihi magunĩkĩte atĩa? Mũtumia ũcio oigaga ũũ: “Kwĩruta atĩ ũtugi nĩ ũkonainie na wĩhokeku nĩ kwagĩrĩtie mũno mĩikaranĩrie iitũ o nginya ũmũthĩ. Ũndũ ũcio ũtũrutĩte gũthikanĩrĩria na kuohanĩra. Ningĩ o na nĩ twĩrutĩte o mũndũ gũcokagĩria ũrĩa ũngĩ ngatho na kũhoyana mũhera hĩndĩ ĩrĩa yagĩrĩire.”
12 Mũthuri ũngĩ na mũtumia wake Akristiano, arĩa maakoragwo na mathĩna kĩhiko-inĩ kĩao, maacokire kũmenya atĩ kĩrĩa maagĩte mĩikaranĩrie-inĩ yao nĩ ũtugi. Magĩtua itua rĩa kwĩruta igũrũ rĩa ngumo ĩyo marĩ hamwe. Moimĩrĩro maarĩ marĩkũ? Mũthuri ũcio oigaga ũũ: “Kwĩruta igũrũ rĩgiĩ ũtugi gwatũteithirie kuona bata wa mũndũ kwĩhoka ũrĩa ũngĩ na kuonaga wega wake handũ ha gwĩciranagĩria ũũru. Tũkĩambĩrĩria o mũndũ kũrũmbũiya mabataro ma ũrĩa ũngĩ makĩria. Nĩguo nyonanie ũtugi ndabataraga kũhe mũtumia wakwa wĩyathi wa kwĩyaria kĩrĩa kĩrĩ ngoro itekũmũrakarĩra. No mũhaka ingĩaninire rũngʼathio. Rĩrĩa twaambĩrĩirie kuonania ũtugi kĩhiko-inĩ giitũ, twathiire tũgĩtigaga gũcokanĩria mahĩtia. Ũndũ ũcio nĩ watũteithirie mũno.” Hihi famĩlĩ yaku no ĩgunĩke ĩngĩĩruta igũrũ rĩa maciaro ma roho?
Onania Wĩtĩkio O na Rĩrĩa Ũrĩ Wiki
13. Nĩ ũgwati ũrĩkũ ũngĩtũthũkia kĩĩroho twagĩrĩirũo nĩ gwĩthema?
13 Akristiano mabataraga kũreka roho wa Ngai ũmatongorie rĩrĩa marĩ gatagatĩ-inĩ ka andũ o na rĩrĩa marĩ oiki. Ũmũthĩ thĩinĩ wa thĩ ĩno ya Shaitani, mbica na maũndũ ma gwĩkenia ma ũũra-thoni nĩ ciongererekete. Maũndũ macio no mathũkie ũkuruhanu witũ na Jehova. Mũkristiano aagĩrĩirũo nĩ gwĩka atĩa? Kiugo kĩa Ngai gĩtwĩraga ũũ: “Teaniai maũndũ mothe marĩa mathũku, na waganu ũrĩa ũtheaga, na mwĩtĩkĩre, mwĩ na ũhoreri, ũhoro ũrĩa ũhandĩtwo thĩinĩ wanyu, o ũrĩa ũngĩhota kũhonokia mĩoyo yanyu.” (Jak. 1:21) Rekei twarĩrĩrie ũrĩa wĩtĩkio, ngumo ĩngĩ ya roho, ũngĩtũteithia gũtũũra tũrĩ atheru maitho-inĩ ma Jehova.
14. Kwaga wĩtĩkio kũngĩtũma mũndũ agũe magerio-inĩ atĩa?
14 Tũngĩkorũo na wĩtĩkio wa ma tũtirĩkoragwo na nganja atĩ Jehova Ngai arĩkuo. Tũngĩkorũo tũtarĩ na ma biũ atĩ Ngai arĩkuo, no tũgũe magerio-inĩ na njĩra hũthũ. Ta wĩcirie ũrĩa gwekĩkire thĩinĩ wa andũ a Ngai hĩndĩ ya tene. Jehova nĩ aaguũrĩirie mũnabii Ezekieli maũndũ maarĩ magigi marĩa meekagĩrũo hitho-inĩ, rĩrĩa aamwĩrire ũũ: “Hĩndĩ ĩo agĩkĩnjĩra atĩrĩ, Mũrũ wa mũndũ, nĩwona maũndũ marĩa athuri a nyũmba ya Isiraeli mekaga na hitho me nduma-inĩ, mũndũ o mũndũ wao arũgamĩte nyũmba yake thĩinĩ ya mĩhianano? Amu moigaga atĩrĩ, Jehova ndegũtuona; Jehova nĩatigĩte kũrũmbũiya ũhoro wa bũrũri ũyũ.” (Ezek. 8:12) Hihi nĩ wona harĩa thĩna ũcio woimaga? Matietĩkĩtie atĩ Jehova nĩ onaga maũndũ marĩa meekaga. Mationaga ta Jehova arĩkuo.
15. Wĩtĩkio mũrũmu harĩ Jehova ũtũgitagĩra atĩa?
15 Ngũrani na ũguo-rĩ, ta wĩcirie ũrĩa Jusufu eekire. O na gũtuĩka aarĩ kũraya na famĩlĩ yao na andũ ao-rĩ, Jusufu nĩ aaregire gũtharia na mũtumia wa Potifaru. Nĩkĩ? Oigire ũũ: “Kaĩ ingĩkĩhota atĩa gwĩka ũndũ ta ũcio mũnene ũguo wa waganu, o na njĩhie Ngai?” (Kĩam. 39:7-9) Ĩĩni, Jusufu nĩ etĩkĩtie atĩ kũna Jehova arĩkuo. Angĩkorũo nĩ twĩtĩkĩtie atĩ Ngai arĩkuo-rĩ, tũtingĩĩrorera maũndũ mooru ma gwĩkenia kana twĩke ũndũ ũngĩ o na ũrĩkũ ũtarĩ wa gũkenia Ngai tũrĩ hitho-inĩ. Tũkũgĩa na itua o ta rĩa mũtungi wa Thaburi ũrĩa wainire ũũ: “Gwakwa mũciĩ ndĩrĩikaraga na mĩthiĩre o ĩrĩa ya ngoro nginyanĩru. Ũndũ wa ũgenyũ gũtirĩ ngaiga maitho-inĩ makwa ona ũrĩkũ.”—Thab. 101:2, 3.
Gitĩra Ngoro Yaku na Njĩra ya Kwĩgirĩrĩria
16, 17. (a) Kũringana na ũrĩa ibuku rĩa Thimo rĩtarĩirie-rĩ, “kĩmwana gĩtarĩ na wĩcirio” kĩaingĩrire mehia-inĩ atĩa? (b) O ta ũrĩa honanĩtio karatathi-inĩ ka 30, ũndũ ta ũcio ũngĩkĩka atĩa ũmũthĩ, harĩ mũndũ mũkũrũ o na kana mwĩthĩ?
16 Kwĩgirĩrĩria nĩyo ngumo ya kũrigĩrĩria ya roho mũtheru. Ĩtũhotithagia kũrega maũndũ marĩa Ngai athũire. No ĩtũteithie kũgitĩra ngoro ciitũ. (Thim. 4:23) Ta wĩcirie ũhoro wĩ thĩinĩ wa Thimo 7:6-23, ũtaarĩirie ũrĩa “kĩmwana gĩtarĩ na wĩcirio” kĩahenekire nĩ wara wa mũtumia mũmaraya. Kĩahenekire nĩ ũndũ wa ‘gũthiĩra barabara hakuhĩ na thome wa kwa mũndũ mũka ũcio.’ No kũhoteke kĩmwana kĩu kĩagereire kũndũ kũu nĩ ũndũ wa kwenda kũmenya maũndũ marĩa meekĩkaga kuo. Kĩmwana kĩu gĩtigana gũkũũrana na ihenya atĩ kĩeerekeirio ũndũ-inĩ mũũru wa ‘gũtega muoyo wakĩo.’
17 Kĩmwana kĩu kĩngĩethemire atĩa mahĩtia macio? Korũo nĩ gĩaathĩkĩire mũkaana ũyũ: “Ndũkanetĩkĩre ngoro yaku yehũke na njĩra cia mũndũ mũka ũcio.” (Thim. 7:25) Nĩ harĩ ũndũ tũreruta: Angĩkorũo nĩ tũrenda gũtongorio nĩ roho wa Ngai, no mũhaka twĩtheme gwĩtwarĩrĩria magerio-inĩ. Mũndũ angĩikara agĩcenjacenjagia ceceni cia T.V kana Intaneti atarĩ na muoroto mwega angĩkorũo agĩka o ta ‘kĩmwana kĩu gĩtaarĩ na wĩcirio.’ Akĩendaga kana atekwenda ahota gũkorerera maũndũ mangĩarahũra merirĩria mooru. No aambĩrĩrie mĩtugo ĩtarĩ mĩega ya kwĩrorera mbica cia ũũra-thoni, athũkie thamiri yake o hamwe na ũkuruhanu wake hamwe na Ngai. Ũndũ ũrĩa ũngĩingĩria muoyo wake ũgwati-inĩ.—Thoma Aroma 8:5-8.
18. Nĩ maũndũ marĩkũ Mũkristiano angĩka nĩguo agitĩre ngoro yake, na maũndũ macio makonainie atĩa na kwĩgirĩrĩria?
18 Hatarĩ nganja nĩ twagĩrĩirũo na no tũhote kwĩgirĩrĩria na njĩra ya kuoya ikinya rĩa narua rĩrĩa twakorerera mbica cingĩarahũra merirĩria moru. No githĩ ndũkĩrĩ ũndũ wa bata tũngĩĩthema maũndũ mooru o mbere! (Thim. 22:3) Nĩguo tũhote kwĩĩkĩrĩra mĩhaka ĩrĩa yagĩrĩire na kũmĩrũmĩrĩra tũkũbatara kwĩgirĩrĩria. Kwa ngerekano-rĩ, nĩ ũgitĩri kũiga kompiuta handũ ĩngĩonwo nĩ mũndũ o wothe. Andũ amwe monaga arĩ wega kũhũthĩra kompiuta kana kwĩrorera T.V hĩndĩ ĩrĩa kũrĩ na andũ angĩ. Kũrĩ angĩ nao matuĩte itua rĩa kwaga kũhũthĩra intaneti. (Thoma Mathayo 5:27-30.) Rekei twĩke o ũrĩa wothe tũngĩhota kwĩgitĩra ithuĩ ene hamwe na famĩlĩ ciitũ nĩguo tũhote gũthathaiya Jehova “na ngoro theru, na thamiri njega, o na wĩtĩkio ũtarĩ na ũhinga.”—1 Tim. 1:5.
19. Tũgunĩkaga atĩa twetĩkĩra gũtongorio nĩ roho mũtheru?
19 Maciaro marĩa moimanaga na wĩra wa roho mũtheru nĩ marĩ umithio mũnene. Kũhoorera na gũkirĩrĩria nĩ kũrehaga thayũ thĩinĩ wa kĩũngano. Ũtugi na gwĩka andũ wega kũrehaga gĩkeno thĩinĩ wa famĩlĩ. Wĩtĩkio na gũkirĩrĩria itũteithagia gũikaraga hakuhĩ na Jehova na gũkoragwo tũrĩ atheru maitho-inĩ make. Makĩria ma ũguo-rĩ, Agalatia 6:8 ĩtwĩraga ũũ: “Ũrĩa ũkũhanda maũndũ ma gũkenia Roho-rĩ, ũcio nĩakagetha muoyo ũtagathira, uumĩte kwĩ Roho ũcio.” Ĩĩni, kũgerera kũrĩ igongona rĩa ũkũũri rĩa Kristo, Jehova nĩ arĩhũthĩra roho wake mũtheru kũhe muoyo ũtagathira arĩa othe metĩkagĩra gũtongorio nĩ roho wake.
Ũngĩcokia Atĩa?
• Kũhoorera na gũkirĩrĩria kũrehaga thayũ thĩinĩ wa kĩũngano atĩa?
• Nĩ kĩĩ kĩngĩteithia Akristiano matuĩke atugi na mekanage wega mĩciĩ-inĩ?
• Wĩtĩkio na kwĩgirĩrĩria cingĩteithia Mũkristiano kũgitĩra ngoro yake atĩa?
[Mbica karatathi ka 28]
Ũngĩka atĩa nĩguo mũtigacokanĩrie na njĩra ĩngĩrehe nyamũkano?
[Mbica karatathi ka 29]
Kwĩruta ũhoro wa maciaro ma roho no kũgune famĩlĩ yaku
[Mbica karatathi ka 30]
Nĩ mogwati marĩkũ twĩthemaga nĩ ũndũ wa gũkorũo na wĩtĩkio na kwĩgirĩrĩria?