2. Twagĩrĩirũo gũthathaiya Jehova atĩa?

Tondũ Jehova nĩwe Mũũmbi witũ, twagĩrĩirũo kũmũthathaiya o we wiki. (Kũguũrĩrio 4:11) Ũguo nĩ kuuga atĩ, twagĩrĩirũo kũmwenda na kũmũthathaiya o we wiki, tũtekũhũthĩra mĩhianano kana kĩndũ kĩngĩ o gĩothe.​—Thoma Isaia 42:8.

No mũhaka ũthathaiya witũ ũkorũo ũrĩ ‘mũtheru na wa gwĩtĩkĩrĩka’ harĩ Jehova. (Aroma 12:1) Ũguo nĩ kuuga atĩ no mũhaka twathĩkagĩre mawatho make. Kwa ngerekano, andũ arĩa mendete Jehova no mũhaka mende na mathĩkagĩre mawatho make megiĩ kĩhiko. Na nĩ methemaga mĩtugo mĩũru ta kũnyua thigara, mbakĩ, bangi, ndawa cia kũrebia, kana kũhũthĩra ũũru ndawa ingĩ kana njohi.a

3. Rũmbũyagia ũgima waku wa mwĩrĩ

Akristiano arĩa meyamũrĩire Jehova mahũthagĩra ũtũũro wao wothe kũmũtungatĩra. Nĩ ta makoragwo marutĩte mĩĩrĩ yao ĩrĩ igongona harĩ Ngai. Thomai Aroma 12:1, 2, mũcoke mwarĩrĩrie ciũria ici:

• Nĩ kĩĩ kĩagĩrĩirũo gũgũtindĩka kũrũmbũiya ũgima waku wa mwĩrĩ?

• Ũngĩka ũguo na njĩra ta irĩkũ?