ITHOMO RĨA 49
Nĩ Kĩĩ Kĩngĩteithia Famĩlĩ Yaku Gũkorũo na Gĩkeno?—Gĩcunjĩ kĩa 1
Andũ mahikania o ũguo merĩgagĩrĩra atĩ gĩkeno kĩrĩa makoragwo nakĩo mũthenya wao wa ũhiki nĩ gĩgũtũũra tene na tene. Na no gĩtũũre. Akristiano arĩa makoretwo kĩhiko-inĩ ihinda iraihu na merutanagĩria kũhũthĩra ũtaaro wa Bibilia nĩ monete atĩ ũndũ ũcio no ũhoteke.
1. Nĩ ũtaaro ũrĩkũ Bibilia ĩheete athuri?
Jehova nĩ amũrĩte mũthuri atongoragie famĩlĩ-inĩ. (Thoma Aefeso 5:23.) Jehova erĩgagĩrĩra mũthuri atuage matua marĩgunaga famĩlĩ yake. Bibilia ĩtaaraga athuri ũũ: “Thiĩi na mbere kwendaga atumia anyu.” (Aefeso 5:25) Hihi ũguo nĩ kuuga atĩa? Mũthuri wendete mũtumia wake amũrũmbũyagia na njĩra ya ũtugi marĩ mũciĩ na marĩ mbere ya andũ. Nĩ agitagĩra mũtumia wake na akerutanĩria biũ kũmũhingĩria mabataro make ma kĩĩmwĩrĩ na ma ngoro. (1 Timotheo 5:8) Ũndũ wa bata o na makĩria, nĩ amũteithagĩrĩria gũkorũo na ũrata wa hakuhĩ hamwe na Jehova. (Mathayo 4:4) Kwa ngerekano, nĩ agĩrĩirũo kũhoyaga hamwe na mũtumia wake na gũthoma Bibilia hamwe nake. Rĩrĩa mũthuri arũmbũiya mũtumia wake na njĩra ya wendo, nĩ atũũragia ũrata mwega hamwe na Jehova.—Thoma 1 Petero 3:7.
2. Nĩ ũtaaro ũrĩkũ Bibilia ĩheete atumia?
Kiugo kĩa Ngai kiugaga atĩ mũtumia “agĩrĩirũo kũheaga mũthuri wake gĩtĩo kĩnene.” (Aefeso 5:33) Hihi angĩka ũguo atĩa? No eciragie ũhoro wa ngumo njega cia mũthuri wake na kĩyo kĩrĩa ekagĩra kũmũrũmbũiya o hamwe na ciana ciao. Ningĩ no onanie atĩ nĩ atĩĩte mũthuri wake na njĩra ya kũnyitaga mbaru matua make, kũmwaragĩria na njĩra ya gĩtĩo, na kwaragia maũndũ mega mamwĩgiĩ, o na angĩkorũo ndathathayagia Jehova.
3. Mũthuri na mũtumia mangĩkĩra kĩhiko kĩao hinya atĩa?
Bibilia yugaga ũũ igũrũ rĩgiĩ arĩa mahikanĩtie: “Eerĩ matuĩke mwĩrĩ ũmwe.” (Mathayo 19:5) Ũguo nĩ kuuga atĩ no mũhaka metheme ũndũ o wothe ũngĩtũma wendo wao ũnyihe. Mekaga ũguo na njĩra ya kũhũthagĩra mahinda hamwe kaingĩ na kwaranĩria moimĩranĩtie ngoro na njĩra ya wendo. Matibatiĩ kũreka kĩndũ kana mũndũ ũngĩ—tiga o Jehova tu—akorũo arĩ wa bata gũkĩra ũrĩa mahikanĩtie nake. Nĩ magĩrĩirũo gwĩthema biũ gũkũria ũrata ũtagĩrĩire na mũndũ ũngĩ o wothe.
THUTHURIA MAKĨRIA
Reke tũthuthurie tuone motaaro ma Bibilia marĩa mangĩĩkĩra kĩhiko gĩaku hinya.
4. Athuri, endagai atumia anyu na mũkamarũmbũyagia
Bibilia yugaga atĩ “athuri magĩrĩirũo kwendaga atumia ao o ta mĩĩrĩ yao ene.” (Aefeso 5:28, 29) Ũguo nĩ kuuga atĩa? Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
Nĩ na njĩra ta irĩkũ mũthuri angĩonania atĩ nĩ endete mũtumia wake na nĩ amũrũmbũyagia?
Thomai Akolosai 3:12, mũcoke mwarĩrĩrie kĩũria gĩkĩ:
Nĩ na njĩra ta irĩkũ mũthuri angĩonania ngumo icio kĩhiko-inĩ gĩake?
5. Atumia, endagai athuri anyu na mũkamahe gĩtĩo
Bibilia ĩtaaraga mũtumia aheage mũthuri wake gĩtĩo, akorũo nĩ atungatagĩra Jehova kana ndamũtungatagĩra. Thomai 1 Petero 3:1, 2, mũcoke mwarĩrĩrie ciũria ici:
Angĩkorũo mũthuri waku ndatungatagĩra Jehova hamwe nawe, no mũhaka akorũo nĩ wendaga mũno ambĩrĩrie gwĩka ũguo. Ũgwĩciria nĩ njĩra ĩrĩkũ njega makĩria ya kũmũteithia—hihi nĩ kũmũhunjagĩria hingo ciothe-ĩ kana nĩ kuonania ngumo njega na kũmũheaga gĩtĩo? Ũngiuga ũguo nĩkĩ?
Nĩ ũndũ wa bata mũthuri na mũtumia gũtuaga matua marĩ hamwe. No rĩmwe mũtumia no age gwĩtĩkania na itua rĩa mũthuri wake. Hĩndĩ ta ĩyo, mũtumia no ere mũthuri wake ũrĩa areciria ahoreire na arĩ na gĩtĩo, no nĩ arabatara kũririkana atĩ Jehova aheete mũthuri ũigĩrĩrĩki wa gũtua nĩ itua rĩrĩkũ rĩgũteithia famĩlĩ. Mũtumia nĩ agĩrĩirũo kwĩrutanĩria biũ kũnyita mbaru itua rĩa mũthuri wake. Rĩrĩa eka ũguo, nĩ ateithagĩrĩria famĩlĩ yothe gũkorũo na gĩkeno. Thomai 1 Petero 3:3-5, mũcoke mwarĩrĩrie kĩũria gĩkĩ:
Jehova aiguaga atĩa rĩrĩa mũtumia onia mũthuri wake gĩtĩo?
6. No mũtoorie mathĩna thĩinĩ wa kĩhiko kĩanyu
Gũtirĩ kĩhiko gĩkinyanĩru. Kwoguo, mũthuri na mũtumia magĩrĩirũo kwĩrutanĩria marĩ hamwe gũtooria moritũ marĩa mangiumĩra. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
Kũringana na video ĩyo-rĩ, nĩ maũndũ ta marĩkũ maronania atĩ mũthuri ũcio na mũtumia wake maathiaga o makĩraihanagĩrĩria?
Mooire makinya marĩkũ nĩguo mekĩre kĩhiko kĩao hinya?
Thomai 1 Akorintho 10:24 na Akolosai 3:13. Arĩrĩriai kĩũria gĩkĩ thutha wa gũthoma o rĩandĩko:
Kũhũthĩra ũtaaro ũcio kũngĩkĩra kĩhiko hinya atĩa?
Bibilia yugĩte atĩ nĩ twagĩrĩirũo kũheanaga gĩtĩo. Kũheana gĩtĩo nĩ kũhutĩtie kũrũmbũiya mũndũ na njĩra ya ũtugi na ya wendo. Thomai Aroma 12:10, mũcoke mwarĩrĩrie ciũria ici:
Hihi mũthuri kana mũtumia nĩ agĩrĩirũo gweterera ũrĩa mahikanĩtie nake amuonie gĩtĩo mbere? Ũngiuga ũguo nĩkĩ?
ANDŨ AMWE MOIGAGA: “Tũtikoragwo tũkuhanĩrĩirie na ũrĩa tũhikanĩtie nake ta ũrĩa twarĩ mbere.”
Ũngĩtaarĩria atĩa ũrĩa Bibilia ĩngĩmateithia?
ŨRĨA TWERUTA
Mũthuri na mũtumia no makorũo na gĩkeno angĩkorũo nĩ mendaine, nĩ maheanaga gĩtĩo, na nĩ mahũthagĩra motaaro ma Bibilia.
Ciũria cia gũcokera
Mũthuri angĩka atĩa nĩguo ateithĩrĩrie kĩhiko kĩao gĩkorũo na gĩkeno?
Mũtumia angĩka atĩa nĩguo ateithĩrĩrie kĩhiko kĩao gĩkorũo na gĩkeno?
Angĩkorũo ũrĩ thĩinĩ wa kĩhiko-rĩ, ũkuona ta arĩ ũtaaro ũrĩkũ wa Bibilia ũngĩteithia gwĩkĩra kĩhiko kĩanyu hinya?
RIKĨRA
Wĩrute wone motaaro mangĩmũteithia kũgĩa na gĩkeno famĩlĩ-inĩ yanyu.
Wĩrorere video ya rwĩmbo ĩrĩa ĩronania irathimo cia kũhũthĩra ũtaaro wa Ngai kĩhiko-inĩ kĩanyu.
Thoma wone ũrĩa kwĩnyihĩria ũtongoria wa mũthuri kuugĩte.
“Mũtumia Agĩrĩirũo Kwĩnyihĩria Ũtongoria wa Mũthuri Wake Nĩkĩ?” (w10 05/15)
Mũthuri ũmwe na mũtumia wake maahotire atĩa gũtooria mathĩna manene, o na nginya ndigano, kĩhiko-inĩ kĩao?
Nĩ Twathondekire Kĩhiko Gitũ Kũgerera Ũteithio wa Ngai (5:14)