ITHOMO RĨA 02

Bibilia nĩ Ĩtũheaga Kĩĩrĩgĩrĩro

Rĩrĩa Icabe

Andũ thĩinĩ wa thĩ nĩ mahiũranagia na mathĩna matũmaga maigue marĩ na kĩeha, mĩtangĩko, o na ruo. Hihi nĩ ũrĩ wacemania na ũndũ watũmire ũigue ũguo? No gũkorũo nĩ ũrathĩnĩka nĩ ũndũ wa mũrimũ kana gũkuĩrũo nĩ mũndũ wendete. Wahota kwĩyũria ũũ, ‘Hihi nĩ kũrĩ hĩndĩ ũtũũro ũkaagĩra?’ Bibilia nĩ ĩtũheaga macokio ma kĩũria kĩu.

1. Bibilia ĩtũheete kĩĩrĩgĩrĩro kĩrĩkũ kĩa ihinda rĩũkĩte?

Bibilia nĩ ĩtaaragĩria kĩrĩa gĩtũmĩte thĩ ĩiyũre mathĩna, na makĩria ma ũguo ĩgatũhe ũhoro mwega wa atĩ ica ikuhĩ Ngai nĩ egũka kũmeheria. Ciĩranĩro cia Bibilia ciĩgiĩ “ihinda rĩega rĩũkĩte” no ikũhe “kĩĩrĩgĩrĩro.” (Thoma Jeremia 29:11, 12.) Kĩĩrĩgĩrĩro kĩu no gĩtũteithie gũkirĩrĩria mathĩna marĩa tũrĩ namo, na tũkorũo na gĩkeno ihinda-inĩ rĩrĩ. Ningĩ ciĩranĩro icio nĩ itũheaga ũũma atĩ nĩ tũgaakorũo na gĩkeno tene na tene.

2. Bibilia yugaga ihinda rĩũkĩte rĩgaakorũo rĩhaana atĩa?

Bibilia yugaga atĩ ihinda rĩũkĩte “gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.” (Thoma Kũguũrĩrio 21:4.) Mathĩna marĩa matũmaga andũ mage mwĩhoko ũmũthĩ, ta ũthĩni, wagi wa kĩhooto, mĩrimũ, na gĩkuũ, matigaacoka gũkorũo kuo rĩngĩ. Bibilia ĩranĩire atĩ andũ nĩ magaakenera muoyo wa tene na tene thĩinĩ wa thĩ ĩrĩ Paradiso.

3. Nĩ kĩĩ kĩngĩgũteithia gũkorũo na ma atĩ ciĩranĩro cia Bibilia nĩ ikaahinga?

Andũ aingĩ nĩ merĩgagĩrĩra atĩ maũndũ mega nĩ mageekĩka, ĩndĩ matikoragwo na ma kana ciĩrĩgĩrĩro icio makoragwo nacio nĩ ikaahinga. No hatarĩ nganja ciĩranĩro cia Bibilia nĩ ikaahinga. “[Gũthuthuria] Maandĩko . . . na njĩra ndikĩru” no gũtũteithie gũkorũo na ma atĩ maũndũ marĩa Bibilia yugĩte nĩ makaahinga. (Atũmwo 17:11) Ũkĩĩruta Bibilia, nĩ ũkũhota gwĩtuĩra kana nĩ ũgwĩtĩkia ũrĩa yugĩte igũrũ rĩgiĩ ihinda rĩũkĩte.

THUTHURIA MAKĨRIA

Reke tũthuthurie maũndũ mamwe marĩa Bibilia ĩranĩire atĩ nĩ mageekĩka ihinda rĩũkĩte. Nĩ tũkuona ũrĩa kĩĩrĩgĩrĩro kĩrĩa Bibilia ĩheanaga kĩrateithia andũ ũmũthĩ.

Mbica irĩ hamwe: Mbica ironania ngũrani ya mathĩna marĩa andũ mageragĩra ũmũthĩ na ciĩranĩro iria Bibilia ĩranĩire cia ihinda rĩũkĩte. Mbica icio nĩ icokeretwo haha mũhuro.

4. Bibilia ĩtwĩrĩire atĩ no tũtũũre tene na tene tũtarĩ na mathĩna

Rora ciĩranĩro ici irĩ haha mũhuro igwetetwo Bibilia-inĩ. Nĩ ciĩranĩro irĩkũ iragũkenia makĩria? Nĩkĩ?

Thomai maandĩko marĩa monanĩtio harĩ ciĩranĩro icio, mũcoke mwarĩrĩrie ciũria ici:

Nĩ ũkuona ta maandĩko macio marakũhe kĩĩrĩgĩrĩro? Hihi no mahe andũ anyu a famĩlĩ na arata aku kĩĩrĩgĩrĩro?

Ta hũũra mbica ũgĩtũũra thĩinĩ wa thĩ rĩrĩa

GŨTARĨ MŨNDŨ . . .	ANDŨ OTHE . . .
ũkaaiguaga ruo, agakũra, kana agakua.—Isaia 25:8.	makoona endwa ao arĩa makuĩte makĩriũkio matũũre rĩngĩ thĩinĩ wa thĩ.—Johana 5:28, 29.
ũkaarwara kana akorũo na wonje.—Isaia 33:24; 35:5, 6.	magaakorũo na ũgima mwega wa mwĩrĩ na hinya wa wĩthĩ.—Ayubu 33:25.
ũgeekwo ũndũ ũtarĩ wa kĩhooto.—Isaia 32:16, 17.	magaakorũo na irio cia kũigana, mũciĩ mwega, na wĩra marakenera.—Thaburi 72:16; Isaia 65:21, 22.
ũgaathĩnĩka nĩ ũndũ wa mbaara.—Thaburi 46:9.	magaakenera thayũ mũingĩ.—Thaburi 37:11.
ũgaatangĩka meciria nĩ ũndũ wa kũririkana maũndũ matarĩ mega.—Isaia 65:17.	magaatũũra tene na tene gũtarĩ mathĩna.—Thaburi 37:29.

Kamwana kaarĩ karwaru kahonete gakĩhĩmbĩria nyina.

Mũthuri warĩ mũkũrũ acokete wĩthĩ agĩtindĩka hurumbarũ.

5. Ciĩranĩro cia Bibilia no itũteithie ũtũũro-inĩ

Andũ aingĩ nĩ makuaga ngoro kana o na makarakara nĩ ũndũ wa mathĩna marĩa marĩ kuo. Andũ amwe merutanagĩria biũ kũrehe mogarũrũku nĩguo maũndũ maagĩre. Rora wone ũrĩa kĩĩranĩro kĩa Bibilia kĩa atĩ maũndũ nĩ marĩagĩra gĩteithagia andũ ũmũthĩ. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

VIDEO: Nĩ Ndendaga Kũrũa na Wagi wa Kĩhooto (4:07)

Mbica irĩ hamwe: Mbica irutĩtwo video-inĩ ya ‘Nĩ Ndendaga Kũrũa na Wagi wa Kĩhooto.’ 1. Rafika arĩ kairĩtu kanini aagethaga mbamba na andũ a rũrĩrĩ rwao. 2. Rafika akenete nĩ ũndũ wa kuona andũ a ndũrĩrĩ itiganĩte marĩ na ũrũmwe riita rĩa mbere athiĩ kĩgomano-inĩ kĩa Aira a Jehova.

Kũringana na video ĩyo-rĩ, nĩ wagi ũrĩkũ wa kĩhooto wathĩnagia Rafika?
O na gũtuĩka wagi wa kĩhooto ũrĩa oonaga ndwathirire-rĩ, Bibilia yamũteithirie atĩa?

Kĩĩrĩgĩrĩro kĩrĩa Bibilia ĩheanaga kĩa ihinda rĩũkĩte no gĩtũteithie gũtooria maũndũ ma kũũraga ngoro na gĩtũme tũkorũo na gĩkeno o na tũkĩhiũranagia na mathĩna. Thomai Thimo 17:22 na Aroma 12:12, mũcoke mwarĩrĩrie ciũria ici:

Nĩ ũkuona ta ndũmĩrĩri ĩrĩa ĩrĩ thĩinĩ wa Bibilia ĩgiĩ ihinda rĩũkĩte ĩngĩgũteithia ũtũũro-inĩ ihinda-inĩ rĩrĩ? Ũngiuga ũguo nĩkĩ?

MŨNDŨ NO ORIE: “Hihi nĩ ma ciĩranĩro cia Bibilia nĩ ikaahinga?”

Nĩkĩ nĩ ũndũ wa bata gwĩthuthurĩria wee mwene ũira wa atĩ ciĩranĩro icio nĩ ikaahinga?

ŨRĨA TWERUTA

Bibilia nĩ ĩkoragwo na ciĩranĩro nyingĩ njega cia ihinda rĩũkĩte. Ũndũ ũcio nĩ ũtũmaga tũkorũo na kĩĩrĩgĩrĩro na ũkagagĩria ũtũũro witũ ihinda-inĩ rĩrĩ.

Ciũria cia gũcokera

Andũ marabatara kũmenya ũhoro wĩgiĩ ciĩranĩro cia Ngai nĩkĩ?
Bibilia yugaga atĩa igũrũ rĩgiĩ ihinda rĩũkĩte?
Kũgĩa na kĩĩrĩgĩrĩro kĩa ihinda rĩũkĩte kũngĩgũteithia atĩa ihinda-inĩ rĩrĩ?

Ndarĩkia ithomo rĩrĩ tarĩki

Geria gwĩka ũũ

Thoma rĩngĩ maandĩko marĩa monanĩtio ithomo-inĩ rĩrĩ nĩguo ũtaũkĩrũo wega nĩ ciĩranĩro icio cia Bibilia.

Ũndũ ũngĩ ũngĩka:

Ũndũ ũngĩ ũngĩgeria gwĩka

RIKĨRA

Wĩrute ũrĩa gũkorũo na kĩĩrĩgĩrĩro kũngĩgũteithia rĩrĩa ũrahiũrania na moritũ.

“Ũngĩruta Kĩĩrĩgĩrĩro Kũ?” (g04 04/22)

Wĩrute ũrĩa kĩĩrĩgĩrĩro kĩa ihinda rĩũkĩte kĩngĩteithia arĩa makoragwo na mũrimũ wa gũtũũra.

“Bibilia Ĩngĩndeithia Atĩa Ingĩkorũo Ndĩ na Mũrimũ wa Gũtũũra?” (Gĩcunjĩ thĩinĩ wa jw.org/ki)

Ũkĩĩrorera video ĩno ya rwĩmbo, hũũra mbica mwĩ hamwe na andũ a famĩlĩ yanyu mũgĩkenera ũtũũro thĩinĩ wa Paradiso ĩrĩa Bibilia ĩranĩire.

Hũũra Mbica ya Thĩ Njerũ (3:37)

Thoma wone ũrĩa ũtũũro wa mũndũ warũagĩrĩra ihooto cia andũ wacenjirie eruta ũhoro wĩgiĩ kĩĩrĩgĩrĩro kĩrĩa Bibilia ĩheanaga kĩgiĩ ihinda rĩũkĩte.

“Rĩu nĩ Nyonete Atĩ Ndingĩhota Gũcenjia Thĩ Ĩno” (Mũrangĩri, Julaĩ 1, 2013)